Skip to content

Skip to table of contents

 LISAUN ESTUDU 34

Sai toman ho knaar foun

Sai toman ho knaar foun

“Maromak nunka hatudu hahalok aat hodi haluha imi-nia serbisu no imi-nia domin neʼebé imi hatudu ona ba ninia naran.”—EBR 6:10.

KNANANUK 38 Nia sei halo ó forsa

IHA LISAUN NEʼE *

1-3. Saida mak razaun balu tanbasá ema sira neʼebé serbí Maromak tempu-tomak hasoru mudansa?

FEEN-LAʼEN ida naran Robert no Mary Jo hatete: “Ami serbí ona nuʼudar misionáriu durante tinan 21 kuandu ami naʼin-rua nia inan-aman sai moras. Ami kontente atu tau matan ba sira naʼin-haat. Maibé, ami mós sente triste atu husik fatin neʼebé ami gosta tebes.”

2 Feen-laʼen ida seluk naran William no Terrie hatete: “Bainhira ami hatene katak ami-nia saúde la permite atu halaʼo fali ami-nia knaar, ami tanis. Ami gosta tebes atu serbí Jeová iha rai seluk, maibé agora ami labele tan halo ida-neʼe.”

3 Aleksey hatete: “Ami hatene katak ema neʼebé kontra ami hakarak atu taka sukursál neʼebé ami serbí bá. Maibé bainhira sira taka duni sukursál no ami tenke sai, ami sente triste.”

4. Ita sei hatán ba pergunta saida deʼit iha lisaun neʼe?

4 Ema barak tan neʼebé serbí tempu-tomak, inklui sira neʼebé uluk serbí iha Betel mós simu knaar foun. * Irmaun-irmán laran-metin sira-neʼe sente susar atu husik knaar neʼebé sira hafolin. Saida mak bele ajuda sira atu sai toman ho mudansa? Oinsá ita bele ajuda sira? Resposta ba pergunta sira-neʼe bele ajuda ita bainhira ita hasoru mudansa iha ita-nia moris.

 OINSÁ ATU SAI TOMAN HO MUDANSA?

Tanbasá susar ba ema neʼebé serbí Jeová tempu-tomak atu husik sira-nia knaar? (Haree parágrafu 5) *

5. Iha dalan saida deʼit mak mudansa bele afeta ita?

5 Maski ita serbí iha Betel ka haklaken tempu-tomak, baibain ita hadomi ema no mós gosta fatin neʼebé ita serbí bá. Tan neʼe, ita sente triste tebes atu husik ita-nia knaar neʼe. Ita hanoin tebes ita-nia irmaun-irmán sira neʼebé ita husik hela, no laran-taridu kona-ba sira, liuliu se ita husik hela sira tanba ema kontra ita. (Mt 10:23; 2 Kor 11:28, 29) No karik ita mós sente susar tebes atu muda ba fatin seluk tanba ita presiza sai toman ho kultura foun. Ita mós bele sente hanesan neʼe maski ita fila fali ba ita-nia rai rasik. Robert no Mary Jo hatete: “Ami la toman ona ho ami-nia kultura rasik no mós haklaken ho ami-nia língua rasik. Ami sente hanesan ami ema estranjeiru iha ami-nia rai rasik.” Ema balu neʼebé hasoru mudansa hanesan neʼe, karik hetan problema ekonomia. Karik sira sente laran-kraik no la hakmatek. Saida mak bele ajuda sira?

Importante atu hakbesik ba Maromak no tau fiar ba nia (Haree parágrafu 6-7) *

6. Oinsá ita bele hakbesik nafatin ba Jeová?

6 Hakbesik nafatin ba Jeová. (Tgo 4:8) Oinsá? Liuhusi tau fiar ba nia nuʼudar “Maromak neʼebé rona ba orasaun”. (Sal 65:2) Salmo 62:8 dehan: “Fakar sai [Ita-nia] laran iha ninia oin.” Jeová bele “halo barak liu fali buat hotu neʼebé ita husu ka hanoin”. (Éf 3:20) Jeová la fó deʼit buat neʼebé ita husu iha orasaun. Maibé nia mós bele rezolve ita-nia problema iha dalan neʼebé ita seidauk imajina.

7. (a) Saida mak bele ajuda ita atu hakbesik nafatin ba Jeová? (b) Tuir Ebreu 6:10-12, saida mak rezultadu bainhira ita kontinua serbí Jeová ho laran-metin?

7 Loroloron lee no medita kona-ba Eskritura sira atu bele hakbesik nafatin ba Jeová. Irmaun ida neʼebé uluk serbí nuʼudar misionáriu dehan: “Ita presiza halaʼo beibeik adorasaun família nian no prepara ba reuniaun sira, hanesan uluk ita halo iha Ita-nia knaar.” No mós, hakaʼas an atu hola parte beibeik iha serbisu haklaken hamutuk ho Ita-nia kongregasaun foun. Jeová nunka haluha ema neʼebé kontinua serbí nia ho laran-metin maski sira labele halo buat barak hanesan uluk.​—Lee Ebreu 6:10-12.

8. Oinsá liafuan iha 1 João 2:15-17 bele ajuda Ita atu halaʼo moris neʼebé simples?

 8 Halaʼo moris simples. Keta husik hanoin resin kona-ba moris iha Satanás nia mundu neʼe atu hanetik Ita serbí Maromak. (Mt 13:22) Keta rona ba belun, família, ka ema neʼebé la serbí Jeová se sira koko anima Ita atu buka osan barak. (Lee 1 João 2:15-17.) Tau fiar ba Jeová neʼebé promete atu tau matan ba Ita-nia presiza espirituál, emosaun, no isin nian “iha tempu neʼebé loloos”.​—Ebr 4:16; 13:5, 6.

9. Tuir Provérbios 22:3, 7, tanbasá ita presiza hasees an husi debe osan? Saida mak bele ajuda ita atu halo desizaun ho matenek?

9 Keta debe se la presiza. (Lee Provérbios 22:3, 7.) Dala ruma atu muda mak karun tebes no fasil deʼit ba ita atu debe osan. Tan neʼe keta empresta osan atu sosa sasán neʼebé Ita ladún presiza. Bainhira hasoru situasaun neʼebé halo ita neon-susar hanesan tau matan ba família neʼebé moras, neʼe bele halo susar ba ita atu deside osan hira mak ita presiza empresta. Iha situasaun hanesan neʼe, hanoin-hetan katak “orasaun no harohan” bele ajuda Ita atu halo desizaun ho matenek. Jeová bele hatán ba Ita-nia orasaun hodi fó Ita dame neʼebé sei ‘proteje Ita-nia laran no kbiit atu hanoin’, atu nuneʼe Ita bele hanoin ho kalma.​—Flp 4:6, 7; 1 Ped 5:7.

10. Oinsá mak ita bele buka belun foun?

10 Habelun ho ema neʼebé fó influénsia diʼak. Fahe Ita-nia sentimentu no esperiénsia ba belun diʼak sira, liuliu sira neʼebé karik hasoru situasaun hanesan ho Ita. Halo nuneʼe bele ajuda Ita atu sente kontente. (Ecle 4:9, 10) Karik Ita iha ona belun iha fatin neʼebé uluk Ita serbí, maibé Ita mós presiza buka belun foun iha fatin foun. Hanoin-hetan katak atu iha belun, Ita presiza hatudu laran-diʼak. Oinsá mak Ita bele buka belun foun? Konta ba ema seluk kona-ba Ita-nia esperiénsia atu nuneʼe ema seluk bele haree kontente neʼebé Ita hetan bainhira serbí Jeová. Maski ema balu iha kongregasaun karik la komprende tanbasá Ita gosta tebes atu serbí Jeová tempu-tomak, maibé karik ema seluk hakarak atu hatene liután no sai Ita-nia belun diʼak. Maibé kuidadu atu la koʼalia barak liu kona-ba Ita-nia an, buat neʼebé Ita halo ona iha Jeová nia serbisu, no buat negativu neʼebé Ita sente.

11. Ita bele halo saida atu Ita-nia moris kaben nian nafatin kontente?

11 Se Ita presiza husik Ita-nia knaar tanba Ita-nia kaben moras, keta fó sala ba nia. Ka se Ita rasik mak moras, keta fó sala ba Ita-nia an no sente katak Ita hakanek  Ita-nia kaben nia laran. Hanoin-hetan, imi naʼin-rua mak “isin ida deʼit”, no imi promete ba Jeová atu tau matan ba malu iha situasaun hotu. (Mt 19:5, 6) Se Ita husik Ita-nia knaar tanba Ita-nia feen isin-rua, ajuda Ita-nia oan atu hatene katak nia importante liu fali Ita-nia knaar. Fó-hatene beibeik ba Ita-nia oan katak Ita haree nia nuʼudar “prezente” husi Maromak. (Sal 127:3-5) No mós, konta ba nia kona-ba esperiénsia furak neʼebé Ita hetan iha Ita-nia knaar. Hodi halo nuneʼe, Ita bele motiva Ita-nia oan atu uza ninia moris hodi serbí Jeová hanesan Ita.

OINSÁ EMA SELUK BELE AJUDA?

12. (a) Oinsá ita bele ajuda sira neʼebé serbí tempu-tomak atu kontinua sira-nia knaar? (b) Oinsá ita bele ajuda sira neʼebé simu knaar foun atu sai toman ho mudansa neʼe?

12 Kongregasaun no mós irmaun ka irmán barak hakaʼas an atu ajuda ema neʼebé serbí tempu-tomak atu bele kontinua halaʼo sira-nia knaar. Irmaun-irmán sira ajuda iha dalan oioin hanesan anima sira atu kontinua sira-nia serbisu, fó osan ka sasán atu apoia, ka tau matan ba sira-nia família neʼebé hela dook. (Gal 6:2) Se sira neʼebé serbí tempu-tomak simu knaar foun hodi muda ba Ita-nia kongregasaun, keta hanoin katak mudansa neʼe tanba sira ladún halo didiʼak sira-nia knaar ka hetan dixiplina. * Maibé, ajuda sira atu sai toman ho mudansa neʼe. Simu sira ho laran no gaba sira kona-ba serbisu neʼebé sira halo ona, maski karik  sira labele halo buat barak tanba sira-nia saúde la diʼak. Buka atu koñese didiʼak sira. Aprende husi sira-nia koñesimentu, treinu neʼebé sira simu, no sira-nia esperiénsia.

13. Saida mak ita bele halo atu ajuda sira neʼebé simu knaar foun?

13 Dala ruma, sira neʼebé simu knaar foun karik presiza Ita-nia ajuda atu buka hela-fatin, transporte, serbisu, no buat seluk neʼebé sira presiza. Karik sira mós presiza informasaun oioin hanesan oinsá atu rejistu karreta ka sosa pulsa eletrisidade. Maibé sira presiza liu atu ita komprende sira-nia situasaun. Karik sira ka sira-nia família tenke tahan hasoru problema saúde. Karik sira triste tanba ema neʼebé sira hadomi mate. * Maski sira la fó sai, maibé karik sira mós triste tanba hanoin sira-nia belun iha fatin uluk neʼebé sira serbí. Presiza tempu atu sira la sente tan hanesan neʼe.

14. Oinsá mak irmaun-irmán sira ajuda irmán ida atu sai toman ho ninia knaar foun?

14 Ita-nia apoiu no ezemplu bele ajuda sira atu sai toman ho situasaun foun. Irmán ida neʼebé serbí iha rai seluk ba tinan barak hatete: “Iha haʼu-nia knaar uluk, haʼu estuda Bíblia ho ema loroloron. Iha haʼu-nia knaar foun, susar tebes atu hetan oportunidade atu loke Bíblia ka hatudu vídeo bainhira haklaken. Maibé haklaken-naʼin sira konvida haʼu atu tuir sira bá vizita fali no estuda Bíblia. Hodi haree irmaun-irmán sira-nia laran-manas no aten-brani atu estuda Bíblia ho ema, neʼe ajuda haʼu iha hanoin neʼebé loos kona-ba haklaken-fatin foun neʼe. Haʼu aprende oinsá atu komesa koʼalia ba ema iha haklaken-fatin foun neʼe. Buat hotu neʼe ajuda haʼu atu hetan fali ksolok.”

KONTINUA HAKAʼAS AN

Buka dalan atu aumenta Ita-nia serbisu haklaken iha Ita-nia rai (Haree parágrafu 15-16) *

15. Oinsá Ita bele hetan susesu iha Ita-nia knaar foun?

15 Ita bele hetan susesu iha Ita-nia knaar foun. Keta hanoin katak Ita ladún halo  didiʼak Ita-nia knaar uluk nian ka Ita la iha ona folin. Hanoin kona-ba dalan oioin neʼebé Jeová ajuda Ita agora no kontinua haklaken. Banati-tuir ema Kristaun sira neʼebé laran-metin iha apóstolu sira-nia tempu. “Sira neʼebé namkari, sira laʼo iha rai tomak hodi haklaken liafuan diʼak”. (Após 8:1, 4) Ita-nia hakaʼas an atu kontinua haklaken sei lori rezultadu diʼak. Porezemplu, governu duni sai pioneiru barak husi nasaun ida no sira muda ba nasaun viziñu neʼebé mós presiza haklaken-naʼin liután iha língua neʼebé sira hatene. Liutiha fulan balu deʼit, sira harii grupu foun balu iha língua neʼebé sira haklaken bá.

16. Oinsá Ita bele hetan ksolok iha Ita-nia knaar foun?

16 Bíblia hatete: “Jeová nia ksolok mak imi-nia kbiit.” (Neem 8:10, nota) Ita-nia ksolok tenke mai husi ita-nia relasaun diʼak ho Jeová, laʼós ita-nia knaar, maski ita hafolin tebes knaar neʼe. Tan neʼe, kontinua laʼo ho Jeová, buka matadalan, matenek, no apoia husi nia. Hanoin-hetan katak Ita gosta Ita-nia knaar uluk nian tanba Ita hakaʼas an atu ajuda ema iha neʼebá. Entaun, hakaʼas an atu ajuda ema iha Ita-nia knaar foun no haree oinsá Jeová ajuda Ita atu gosta knaar neʼe.​—Ecle 7:10.

17. Ita tenke hanoin-hetan saida kona-ba ita-nia knaar agora?

17 Ita tenke hanoin-hetan katak ita sei serbí Jeová ba nafatin, no ita-nia knaar agora mak temporáriu deʼit. Iha mundu foun, karik ita hotu sei simu knaar foun. Aleksey neʼebé temi uluk, fiar katak mudansa neʼebé akontese ba nia agora prepara nia ba mudansa iha futuru. Aleksey hatete: “Uluk haʼu hatene katak Jeová iha no mundu foun sei mai. Maibé agora haʼu sente besik loos ho Jeová no fiar katak lakleur tan mundu foun sei mai duni.” (Após 2:25) Tan neʼe, iha ita-nia knaar hotu, mai ita kontinua laʼo ho Jeová. Nia sei nunka husik ita, maibé sei ajuda ita atu hetan ksolok iha serbisu hotu neʼebé ita halo ba nia iha fatin naran deʼit.​—Isa 41:13.

KNANANUK 90 Fó laran-manas ba malu

^ par. 5 Dala ruma, irmaun-irmán sira neʼebé serbí tempu-tomak tenke husik sira-nia knaar, ka karik sira simu knaar foun. Iha lisaun neʼe ita sei koʼalia kona-ba susar neʼebé sira hasoru no saida mak ajuda sira atu sai toman ho sira-nia situasaun foun. Ita mós sei aprende saida mak ema seluk bele halo atu anima no apoia sira, no mós prinsípiu sira neʼebé bele ajuda ita bainhira ita hasoru mudansa iha ita-nia moris.

^ par. 4 Bainhira irmaun sira neʼebé iha responsabilidade sai idade ona, sira tenke entrega fali sira-nia knaar ba irmaun neʼebé idade kiʼik liu. Haree informasaun ho títulu “Irmaun idade sira—Jeová hafolin Ita-nia laran-metin”, husi Livru Haklaken fulan-Setembru 2018, no “Sai kalma nafatin maski hasoru mudansa”, husi Livru Haklaken fulan-Outubru 2018.

^ par. 12 Katuas sira husi kongregasaun neʼebé uluk irmaun-irmán sira-neʼe serbí, labele demora atu hakerek karta hodi fó koñese sira ba kongregasaun foun, atu nuneʼe sira bele kontinua kedas serbí nuʼudar pioneiru, katuas, ka atan ba kongregasaun ida.

^ par. 13 Haree série iha revista Matan-moris bá! No. 3, 2018 ho títulu “Tahan hasoru laran-triste bainhira ema mate”.

^ par. 57 ESPLIKASAUN BA DEZEÑU: Feen-laʼen ida tenke husik sira-nia knaar nuʼudar misionáriu iha rai seluk no sira fó adeus ba sira-nia kongregasaun ho matan-been.

^ par. 59 ESPLIKASAUN BA DEZEÑU: Iha sira-nia rai, feen-laʼen neʼe halo orasaun beibeik ba Jeová atu husu ajuda hodi tahan susar neʼebé sira hasoru.

^ par. 61 ESPLIKASAUN BA DEZEÑU: Jeová ajuda feen-laʼen neʼe atu serbí nuʼudar pioneiru. Sira uza língua neʼebé sira aprende bainhira serbí nuʼudar misionáriu atu fahe liafuan diʼak ba ema estranjeiru iha sira-nia rai.