Skip to content

Skip to table of contents

João Batista—Ezemplu neʼebé ajuda ita atu kontente nafatin

João Batista—Ezemplu neʼebé ajuda ita atu kontente nafatin

IHA ka lae knaar balu neʼebé Ita hakarak atu halo iha kongregasaun maibé labele halo agora? Karik neʼe mak knaar neʼebé ema ida halo daudaun, ka kona-ba priviléjiu balu neʼebé Ita halo uluk maibé agora lae. Karik tanba idade, saúde, ekonomia, ka responsabilidade atu tau matan ba família hanetik Ita atu halo knaar ruma. Ka karik tanba iha mudansa ruma iha organizasaun, Ita labele tan halaʼo knaar neʼebé baibain Ita halo. Neʼe bele halo Ita hanoin katak Ita labele halo buat neʼebé Ita gosta iha serbisu ba Maromak. Iha situasaun sira hanesan neʼe, karik bele halo Ita sai laran-kraik. Maski nuneʼe, oinsá mak Ita bele iha hanoin neʼebé loos, la laran-kraik, no la rai hirus? Oinsá mak Ita bele kontente nafatin?

Ita bele aprende buat importante balu husi João Batista kona-ba oinsá bele kontente nafatin. João kontente tebes ho priviléjiu neʼebé nia iha, maibé karik nia nunka imajina buat neʼebé sei akontese iha ninia moris. João nunka hanoin katak tempu neʼebé nia iha komarka naruk liu fali ho tempu neʼebé nia haklaken kona-ba Jesus. Maski nuneʼe, João nafatin kontente durante ninia moris. Saida mak ajuda nia? No oinsá mak ita bele kontente nafatin maski hasoru susar ruma?

KNAAR NEʼEBÉ LORI KONTENTE

Maizumenus iha fulan-Abríl tinan 29 EC, João hahú ninia knaar nuʼudar ida neʼebé loke dalan ba Mesias, nia dehan: “Arrepende imi-nia sala bá, tanba Ukun lalehan nian besik ona.” (Mt 3:2; Lc 1:12-17) Ema barak mai husi fatin dook atu rona ba nia, no balu arrepende an no hetan batizmu. João ho aten-brani fó sai avizu ba ulun-naʼin relijiaun sira kona-ba kastigu neʼebé sira sei simu se sira la arrepende an. (Mt 3:5-12) Buat neʼebé importante liu hotu husi João nia knaar mak bainhira nia fó batizmu ba Jesus maizumenus iha fulan-Outubru tinan 29. Hahú husi tempu neʼebá, João haklaken ba ema seluk atu laʼo tuir Jesus, Mesias neʼebé promete nanis ona.​—João 1:32-37.

Tanba knaar neʼebé João halo, Jesus hatete: “Toʼo agora, seidauk iha ema ida iha rai neʼebé boot liu fali João Batista.” (Mt 11:11)  Ita fiar katak João kontente ho bensaun neʼebé nia simu. Hanesan João, ema barak simu ona bensaun husi Maromak. Ezemplu kona-ba irmaun Terry. Nia no ninia feen, Sandra, serbí tempu-tomak ba tinan 50 liu. Terry hatete: “Haʼu simu ona priviléjiu barak neʼebé furak. Haʼu serbí ona nuʼudar pioneiru, tama Betel, pioneiru tempu-tomak, katuas área, katuas vizitante, no agora serbí fali nuʼudar pioneiru tempu-tomak.” Priviléjiu sira-neʼe lori duni kontente, maibé hanesan João Batista, presiza mós hakaʼas an atu bele kontente nafatin maski ita-nia situasaun troka.

NAFATIN HATUDU AGRADESE

Xave ida neʼebé ajuda João atu kontente nafatin mak nia sempre hafolin priviléjiu neʼebé nia simu. Porezemplu, depois Jesus hetan tiha batizmu, João nia serbisu haklaken sai menus liu maibé Jesus nian sai boot liu. João nia dixípulu sira hanoin barak no hatete: “Nia fó batizmu ba ema no ema hotu laʼo ba nia.” (João 3:26) João hatán: “Noiva mak noivu nian. Maibé, kuandu noivu nia belun hamriik besik noivu no rona noivu nia lian, nia haksolok tebes. Entaun, haʼu-nia ksolok sai kompletu ona.” (João 3:29) João la kompete ho Jesus, no nia mós la hanoin katak buat neʼebé nia halo la iha folin tanba Jesus nia knaar mak importante liu. João nafatin kontente tanba nia hafolin ninia knaar nuʼudar “noivu nia belun”.

João nia atitude ajuda nia atu sente kontente ho rezultadu husi buat neʼebé nia halo ona, maski ninia knaar neʼe la fasil. Porezemplu, João moris mai nuʼudar ema Nazireu ida, tan neʼe nia labele hemu tua. (Lc 1:15) Jesus koʼalia kona-ba João nia moris neʼebé simples hodi hatete: “João mai, nia la han no la hemu.” Maibé la hanesan ho João, Jesus no ninia dixípulu sira la moris tuir ema Nazireu nia toman, sira halaʼo moris neʼebé hanesan baibain. (Mt 11:18, 19) No mós, João la halo milagre ida, maibé nia hatene katak Jesus nia dixípulu sira, inklui sira balu neʼebé uluk laʼo tuir nia, simu kbiit atu halo milagre oioin. (Mt 10:1; João 10:41) Duké hanoin demais buat sira-neʼe, João kontinua hatudu laran-manas ba knaar neʼebé nia simu husi Jeová.

Se ita mós kontinua hafolin knaar neʼebé agora ita halaʼo daudaun atu serbí Jeová, ita bele kontente nafatin. Terry neʼebé temi ona, hatete: “Haʼu fokus nafatin ba knaar ida-idak neʼebé haʼu simu.” Nuʼudar nia hanoin fali kona-ba tempu neʼebé uluk nia sei serbí tempu-tomak, nia hatete: “Haʼu nunka arrepende haʼu-nia desizaun sira no agora haʼu iha memória neʼebé furak.”

Ita bele sai kontente liután se ita hanoin-hetan katak knaar ida-idak husi Jeová mak espesiál, tanba atu sai “Maromak nia maluk serbisu-naʼin” mak priviléjiu ida. (1 Kor 3:9) Sasán ruma neʼebé folin-boot sei haree furak nafatin se ita tau matan ho didiʼak. Hanesan neʼe mós, ita sei nafatin kontente se ita hanoin didiʼak kona-ba oinsá serbí Jeová mak priviléjiu neʼebé boot. Ita sei la hanoin katak knaar neʼebé Jeová fó mai ita mak la iha folin se kompara ho knaar neʼebé ema seluk iha.​—Gal 6:4.

FOKUS BA BUAT ESPIRITUÁL

Karik João hatene katak ninia knaar ba tempu uitoan deʼit, maibé karik nia la hatene katak ninia knaar neʼe sei remata derrepente. (João 3:30) Iha tinan 30 EC, fulan neen liutiha depois Jesus hetan batizmu, Liurai Herodes hatama João ba komarka. Maski nuneʼe, João nafatin kontinua fó sai buat neʼebé loos. (Mc 6:17-20) Oinsá mak João kontente nafatin maski hasoru mudansa sira-neʼe? Nia kontinua fokus ba buat espirituál.

Kuandu João iha komarka, nia rona kona-ba Jesus nia serbisu haklaken neʼebé aumenta ba beibeik. (Mt 11:2; Lc 7:18) João fiar duni katak Jesus mak Mesias maibé karik nia mós hanoin oinsá mak Jesus sei kumpre buat hotu neʼebé hakerek nanis iha eskritura sira kona-ba Mesias. Tanba Mesias mak sei simu knaar atu ukun, karik João hanoin, Jesus sei hahú ninia ukun iha tempu badak nia laran ka lae? Neʼe sei halo nia livre husi komarka  ka lae? Tanba João hakarak hatene buat barak liután kona-ba saida mak Jesus sei halo, nia haruka ninia dixípulu sira bá atu husu Jesus: “Ita mak Ida neʼebé atu mai, ka ami sei hein ema seluk?” (Lc 7:19) Bainhira sira filafali, ita fiar katak João rona ho didiʼak kuandu sira konta kona-ba oinsá Jesus halo milagre hodi kura ema moras no haruka sira filafali atu fó-hatene ba João: “Agora ema matan-delek sira haree fali, ema ain-kudeʼik sira laʼo, ema moras-lepra sira sai moos, ema tilun-diuk sira rona, ema mate moris fali, no ema kiak sira rona liafuan diʼak.”​—Lc 7:20-22.

Buat neʼebé João nia dixípulu sira hatete hametin duni nia. Neʼe katak Jesus mak sei kumpre profesia sira kona-ba Mesias. Maski Jesus la halo João livre, João bele hatene katak ninia knaar la saugati, no nia iha duni razaun atu kontente maski hasoru susar.

Hodi hanoin kona-ba atividade diʼak oioin husi ita-nia serbisu haklaken iha mundu tomak bele ajuda ita atu kontente nafatin

Hanesan João, se ita fokus ba buat espirituál, ita bele tahan susar ho kontente no pasiénsia. (Kol 1:9-11) Ita bele tahan hodi lee no medita kona-ba Bíblia. Neʼe fó-hanoin ita katak buat hotu neʼebé ita halo ba Maromak la saugati. (1 Kor 15:58) Sandra hatete: “Lee Bíblia loroloron ajuda haʼu hakbesik liután ba Jeová no atu fokus ba nia duké ba haʼu-nia an.” Ita mós bele hanoin kona-ba atividade neʼebé ita-nia maluk sira halo ba Jeová, tanba neʼe bele ajuda ita atu la hanoin an deʼit, no bele haree saida deʼit mak Jeová halo ona. Sandra hatete: “Programa JW Broadcasting® mós ajuda ami besik liután ba Jeová nia organizasaun, no kontente nafatin ho knaar neʼebé ami iha.”

Durante tempu badak João Batista halaʼo ninia knaar, nia haklaken ho “espíritu no kbiit hanesan Elias nian”, no hanesan Elias, nia “mak ema ida neʼebé iha sentimentu hanesan ita”. (Lc 1:17; Tgo 5:17) Kuandu ita banati-tuir ninia ezemplu atu nafatin fokus hodi serbí Jeová, ita mós bele kontente nafatin iha ita-nia knaar sira maski hasoru buat naran deʼit.