Skip to content

Skip to table of contents

 LISAUN ESTUDU 32

Halo ita-nia domin sai boot liután

Halo ita-nia domin sai boot liután

“Haʼu husu nafatin iha haʼu-nia orasaun katak imi-nia domin bele sai boot liután.”​—FLP 1:9.

KNANANUK 106 Haburas hahalok domin

IHA LISAUN NEʼE *

1. Sé-sé deʼit mak ajuda atu harii kongregasaun iha Filipe?

BAINHIRA apóstolu Paulo, Silas, Lucas, no Timóteo toʼo iha sidade Filipe neʼebé Roma mak ukun, sira hetan ema barak neʼebé hatudu interese ba liafuan diʼak kona-ba Maromak nia Ukun. Irmaun naʼin-haat neʼe ajuda harii kongregasaun, no dixípulu hotu komesa halibur hamutuk karik iha Lídia nia uma. Nia mak fiar-naʼin ida neʼebé laran-luak tebes.​—Após 16:40.

2. Lakleur deʼit kongregasaun neʼe hasoru susar saida?

2 Lakleur deʼit kongregasaun foun neʼe hasoru susar. Satanás book ema atu odi lia-loos no kontra makaʼas serbisu haklaken neʼebé ema Kristaun laran-metin sira-neʼe halo. Ema kaer Paulo no Silas, baku sira ho ai, no hatama sira ba komarka. Bainhira sira sai husi komarka, sira vizita dixípulu foun sira no fó aten-brani ba sira. Tuirmai Paulo, Silas, no Timóteo husik sidade neʼe maibé karik Lucas hela nafatin. Saida mak irmaun-irmán foun sira halo? Jeová ajuda sira liuhusi ninia espíritu, tan neʼe fiar-naʼin foun sira-neʼe kontinua serbí Jeová ho laran-manas. (Flp 2:12) Paulo iha razaun diʼak atu sente orgullu kona-ba fiar-naʼin sira-neʼe!

3. Hanesan hakerek iha Filipe 1:9-11, Paulo halo orasaun kona-ba saida deʼit?

3 Maizumenus tinan sanulu liutiha, Paulo hakerek karta ida ba kongregasaun iha Filipe. Bainhira ita lee karta neʼe, ita bele haree oinsá Paulo hadomi tebes ninia irmaun-irmán sira. Nia hakerek: “Haʼu hanoin tebes imi hotu,  haʼu hadomi imi hanesan domin neʼebé Kristu Jesus hatudu.” (Flp 1:8) Nia hakerek ba sira katak nia halo orasaun kona-ba sira. Nia husu Jeová ajuda sira atu halo sira-nia domin sai boot liután, atu buka-hatene loloos buat sira neʼebé importante liu, atu bele laran-moos, atu la halo ema seluk sidi, no atu kontinua sai nakonu ho hahalok loos. Ohin loron ita mós bele hetan benefísiu husi Paulo nia liafuan sira-neʼe. (Lee Filipe 1:9-11.) Iha lisaun neʼe, ita sei koʼalia kona-ba pontu sira neʼebé Paulo temi no aprende oinsá ita bele aplika pontu sira-neʼe.

HALO DOMIN SAI BOOT LIUTÁN

4. (a) Tuir 1 João 4:9, 10, oinsá mak Jeová hatudu ona ninia domin ba ita? (b) Ita-nia domin ba Maromak tenke boot oinsá?

4 Jeová hatudu ninia domin boot ba ita hodi haruka ninia Oan-Mane mai rai atu mate ba ita-nia sala. (Lee 1 João 4:9, 10.) Maromak nia domin neʼebé la hanoin an deʼit book ita atu hadomi nia. (Rom 5:8) Ita-nia domin ba Maromak tenke boot oinsá? Jesus hatán ba pergunta neʼe bainhira nia hatete ba ema Farizeu ida: “Imi tenke hadomi Jeová, imi-nia Maromak, ho imi-nia laran tomak, ho imi-nia moris tomak no ho imi-nia neon tomak.” (Mt 22:36, 37) Ita hakarak hadomi Jeová ho ita-nia laran tomak no hakarak ita-nia domin aumenta liután loron ba loron. Paulo hatete ba ema Kristaun iha Filipe katak sira-nia domin tenke “sai boot liután”. Saida mak ita bele halo atu hametin ita-nia domin ba Maromak?

5. Oinsá mak ita-nia domin bele sai boot liután?

5 Ita presiza hatene kona-ba Maromak atu bele hadomi nia. Bíblia hatete: “Ema neʼebé la hatudu domin la hatene Maromak, tanba Maromak mak domin.” (1 João 4:8) Apóstolu Paulo fó sai katak ita-nia domin ba Maromak sei sai boot liután bainhira ita hatene lia-loos kona-ba Maromak no komprende ninia hanoin. (Flp 1:9) Bainhira ita foin estuda Bíblia, ita haburas domin ba Maromak maski ita seidauk hatene buat hotu kona-ba ninia hahalok furak sira. Tuirmai bainhira ita aprende liután kona-ba Jeová, ita-nia domin sai boot liután. Tan neʼe importante tebes atu estuda beibeik Bíblia no medita kona-ba Maromak nia Liafuan.​—Flp 2:16.

6. Tuir 1 João 4:11, 20, 21, atu hatudu domin boot liután, ita presiza hatudu domin ba sé?

6 Maromak nia domin ba ita sei book ita atu hadomi ita-nia irmaun-irmán sira. (Lee 1 João 4:11, 20, 21.) Karik ita hanoin katak fasil deʼit atu hadomi ita-nia irmaun-irmán sira tanba ita adora Jeová no koko atu banati-tuir ninia hahalok sira. Ita halo tuir ezemplu husi Jesus neʼebé hatudu domin boot hodi entrega ninia moris ba ita-nia diʼak. Maski nuneʼe, dala ruma ita sente susar atu halo tuir mandamentu atu hadomi malu. Hanoin kona-ba ezemplu ida iha kongregasaun Filipe.

7. Ita aprende saida husi Paulo nia konsellu ba Evódia no Síntike?

7 Evódia no Síntike mak irmán sira neʼebé laran-manas no serbisu hamutuk ho apóstolu Paulo. Maibé, karik mosu problema entre sira no halo sira la liga malu. Iha Paulo nia karta ba sira-nia kongregasaun, Paulo temi sira-nia naran no fó konsellu neʼebé klaru ba sira “atu iha hanoin neʼebé hanesan”. (Flp 4:2, 3) Paulo sente katak nia presiza haruka  kongregasaun tomak atu “kontinua halo buat hotu hodi la muramura no la haksesuk malu”. (Flp 2:14) Ita la duvida katak Paulo nia konsellu klaru neʼe ajuda irmán laran-metin sira-neʼe no mós kongregasaun tomak atu hametin sira-nia domin ba malu.

Tanbasá ita presiza tau fokus ba ita-nia maluk nia hahalok diʼak? (Haree parágrafu 8) *

8. Saida mak halo susar ba ita atu hadomi ita-nia irmaun-irmán sira? Saida mak bele ajuda ita?

8 Hanesan Evódia no Síntike, dala ruma susar atu hadomi ita-nia irmaun-irmán sira tanba ita tau fokus ba sira-nia sala. Ita hotu halo sala loroloron. Se ita tau fokus ba sala neʼebé ema seluk halo, neʼe sei hanetik ita atu hatudu domin ba sira. Porezemplu, se irmaun ida haluha atu ajuda ita hamoos Reuniaun-Fatin, karik ita bele sai hirus. Se ita komesa hanoin kona-ba sala hotu neʼebé nia halo ona, ita-nia hirus sei sai boot liután no ita-nia domin ba nia sei menus. Se Ita iha problema hanesan neʼe, diʼak atu medita kona-ba lia-loos tuirmai neʼe: Jeová haree ita-nia sala no ita-nia maluk sira-nia sala. Maski nuneʼe, Jeová nafatin hadomi ita no ita-nia maluk. Tan razaun neʼe, ita tenke banati-tuir Jeová nia domin no kontinua tau fokus ba ita-nia maluk nia hahalok diʼak. Bainhira ita hakaʼas an atu hadomi ita-nia irmaun-irmán, ita sei hametin ita-nia unidade.​—Flp 2:1, 2.

“BUAT SIRA NEʼEBÉ IMPORTANTE LIU”

9. Saida deʼit mak “buat sira neʼebé importante liu” neʼebé Paulo temi iha ninia karta?

9 Espíritu santu book Paulo atu haruka ema Kristaun iha Filipe no mós ema Kristaun hotu atu “buka-hatene loloos buat sira neʼebé importante liu”. (Flp 1:10) Buat importante sira-neʼe inklui Jeová nia naran sai santu, ninia hakarak sira sai loos, no dame ho unidade iha kongregasaun. (Mt 6:9, 10; João 13:35) Bainhira ita tau uluk buat sira-neʼe iha ita-nia moris, ita hatudu katak ita hadomi Jeová.

10. Oinsá ita hatudu katak ita laran-moos ka la iha sala?

10 Paulo mós hatete katak ita tenke “laran-moos”. Dala ruma liafuan Gregu neʼe mós bele tradús nuʼudar “la iha sala”. Neʼe la signifika ita tenke sai perfeitu. Ita labele sai perfeitu hanesan Maromak Jeová. Maibé Jeová sei haree ita nuʼudar ema perfeitu se ita hakaʼas an atu hametin ita-nia domin no tau uluk buat sira neʼebé importante liu. Dalan ida atu hatudu ita-nia domin mak hakaʼas an atu la halo ema seluk sidi.

11. Tanbasá ita presiza kuidadu atu la halo ema seluk sidi?

11 Mandamentu kona-ba la halo ema seluk sidi mak sériu tebes. Oinsá mak ita bele halo ema seluk sidi? Karik liuhusi atividade halimar nian, roupa, ka serbisu neʼebé ita hili. Buat neʼebé ita halo karik la sala. Maibé se ema seluk nia konxiénsia sente la diʼak no sira sidi, neʼe mak buat neʼebé sériu. Jesus hatete katak diʼak liu tara fatuk todan ba ita-nia kakorok no soe tun ita ba tasi laran duké halo ninia bibi-malae ida sidi.​—Mt 18:6.

12. Saida mak ita aprende husi feen-laʼen pioneiru ida nia ezemplu?

12 Feen-laʼen pioneiru ida halo tuir Jesus nia avizu neʼe. Sira serbí iha kongregasaun ida hamutuk ho feen-laʼen neʼebé foin batizmu. Uluk irmaun no irmán foun neʼe sai boot iha família neʼebé bandu buat barak. Sira sente katak ema Kristaun labele bá sinema maski atu haree filme neʼebé la kontra Bíblia.  Sira sai laran-kanek bainhira hatene katak feen-laʼen pioneiru neʼe haree ona filme ida. Husi tempu neʼebá, feen-laʼen pioneiru neʼe la bá tan sinema toʼo irmaun no irmán foun neʼe treinu ona sira-nia konxiénsia no komprende diʼak liután saida mak sala no loos. (Ebr 5:14) Hodi hatudu hahalok neʼebé la hanoin an deʼit, feen-laʼen pioneiru neʼe hatudu katak sira hadomi sira-nia irmaun no irmán foun neʼe laʼós ho liafuan deʼit maibé mós ho hahalok.​—Rom 14:19-21; 1 João 3:18.

13. Oinsá mak ita bele book ema seluk atu halo sala?

13 Ita mós bele halo ema seluk sidi liuhusi book sira atu halo sala. Oinsá ida-neʼe bele akontese? Hanoin toʼok situasaun neʼe. Estudante Bíblia ida hakaʼas an ba tempu kleur, ikusmai nia konsege kontrola ninia toman atu hemu tua. Nia komprende katak nia labele tan hemu tua. Nia laʼo ba oin lalais no hetan batizmu. Loron ida, irmaun ida konvida nia bá festa no oferese tua ba nia, hodi dehan: “Agora ó sai ona ema Kristaun; Jeová nia espíritu hamutuk ho ó. Hahalok ida neʼebé mai husi espíritu santu mak kontrola an. Se ó kontrola an, ó bele hemu tua uitoan.” Ida-neʼe bele lori konsekuénsia aat tebes se irmaun foun neʼe rona ba konsellu neʼebé la loos.

14. Oinsá reuniaun Kristaun sira ajuda ita atu aplika konsellu iha Filipe 1:10?

14 Ita-nia reuniaun Kristaun sira ajuda ita atu aplika konsellu iha Filipe 1:10 iha dalan oioin. Primeiru, buat neʼebé ita  aprende iha reuniaun sira ajuda ita hatene saida mak importante liu tuir Jeová nia hanoin. Segundu, ita aprende oinsá atu aplika buat neʼebé ita rona atu nuneʼe ita bele sai laran-moos ka sai perfeitu tuir Maromak nia haree. Terseiru, ita hetan anima “atu hatudu domin no hahalok diʼak”. (Ebr 10:24, 25) Bainhira ita-nia irmaun-irmán sira anima ita, ita-nia domin ba Maromak no ba ita-nia irmaun-irmán sira sei sai boot liután. Bainhira ita hadomi Maromak no irmaun-irmán sira ho laran tomak, ita sei hakaʼas an atu la halo sira sidi.

KONTINUA “SAI NAKONU HO HAHALOK LOOS”

15. “Sai nakonu ho hahalok loos” katak sá?

15 Paulo halo orasaun ho laran atu ema Kristaun iha Filipe “sai nakonu ho hahalok loos”. (Flp 1:11) Klaru katak “hahalok loos” neʼe inklui sira-nia domin ba Jeová no ninia povu. Neʼe mós inklui koʼalia ba ema seluk kona-ba sira-nia fiar ba Jesus no sira-nia esperansa furak. Paulo mós uza ai-knanoik iha Filipe 2:15, hodi dehan: “Sai hanesan ahi-oan hodi fó naroman iha mundu.” Ai-knanoik neʼe fó-hanoin ita kona-ba Jesus nia liafuan ba ninia dixípulu katak sira mak “naroman ba mundu”. (Mt 5:14-16) Nia mós fó mandamentu ba ninia dixípulu sira atu ‘hanorin ema sai dixípulu’, no nia hatete katak sira ‘sei sai ninia testemuña toʼo rai sira neʼebé dook liu iha mundu’. (Mt 28:18-20; Após 1:8) Ita hatudu “hahalok loos” bainhira ita hakaʼas an hola parte iha serbisu importante neʼe.

Bainhira Paulo hela iha uma ida iha Roma nuʼudar dadur, nia hakerek karta ba ema Kristaun iha Filipe. Durante tempu neʼe, Paulo mós aproveita oportunidade hotu atu haklaken ba guarda sira no ema neʼebé vizita nia. (Haree parágrafu 16)

16. Tuir Filipe 1:12-14, oinsá ita bele sai hanesan ahi-oan neʼebé fó naroman maski hasoru susar? (Haree dezeñu iha livru oin.)

16 Ita bele sai hanesan ahi-oan neʼebé fó  naroman iha situasaun oioin. Dala ruma, buat neʼebé hanetik ita atu haklaken liafuan diʼak bele sai fali oportunidade ba ita atu haklaken. Porezemplu, Paulo hakerek karta ba ema Kristaun iha Filipe bainhira nia hela iha uma ida iha Roma nuʼudar dadur. Maibé, ninia situasaun la hanetik nia atu haklaken ba guarda sira no mós ema neʼebé vizita nia. Paulo haklaken ho laran-manas iha situasaun neʼe, no neʼe halo irmaun-irmán sira sai aten-brani “atu koʼalia Maromak nia liafuan la ho taʼuk”.​—Lee Filipe 1:12-14; 4:22.

Sempre buka dalan oioin atu haklaken (Haree parágrafu 17) *

17. Oinsá mak ita-nia irmaun-irmán sira kontinua haklaken maski hasoru susar?

17 Ita-nia irmaun-irmán barak mós hatudu aten-brani hanesan Paulo. Sira hela iha nasaun neʼebé bandu sira atu labele haklaken iha fatin públiku ka husi uma ba uma, tan neʼe sira buka dalan seluk atu haklaken liafuan diʼak. (Mt 10:16-20) Iha nasaun sira-neʼe ida, katuas área fó sujestaun atu haklaken-naʼin ida-idak haklaken ba sira-nia família, viziñu, kolega eskola, kolega serbisu, no ema neʼebé sira koñese. Iha tinan rua nia laran, kongregasaun iha área neʼe aumenta barak tan. Karik ita hela iha nasaun neʼebé ita bele haklaken ho livre. Maski nuneʼe, ita bele aprende lisaun importante husi irmaun-irmán sira-neʼe, neʼe mak sempre buka dalan oioin atu haklaken, no fiar metin katak Jeová sei fó ita kbiit atu haklaken maski hasoru susar.​—Flp 2:13.

18. Ita hakarak hakaʼas an atu halo saida?

18 Iha loron ikus sira-neʼe, ita tenke hakaʼas an atu aplika konsellu husi Paulo nia karta ba ema Kristaun iha Filipe. Ita tenke buka-hatene buat neʼebé importante liu, sai laran-moos, labele halo ema seluk sidi, no hatudu hahalok loos. Ho ida-neʼe, ita-nia domin sei sai boot liután no lori glória ba ita-nia Aman Jeová neʼebé hadomi ita.

KNANANUK 17 ‘Ha’u prontu’

^ par. 5 Importante tebes atu hakaʼas an agora hodi hametin ita-nia domin ba irmaun-irmán sira. Paulo nia karta ba ema Kristaun iha Filipe ajuda ita halo ita-nia domin sai boot liután maski hasoru susar.

^ par. 54 ESPLIKASAUN BA DEZEÑU: Bainhira hamoos Reuniaun-Fatin, irmaun Joel para hamoos atu koʼalia ho irmaun ida no ninia oan. Neʼe halo irmaun Miguel neʼebé hamoos daudaun sai hirus. Nia hanoin: ‘Joel tenke halo serbisu, laʼós koʼalia.’ Tuirmai, Miguel haree Joel ajuda irmán ferik ida. Situasaun neʼe book Miguel atu tau fokus ba ninia irmaun nia hahalok diʼak.

^ par. 58 ESPLIKASAUN BA DEZEÑU: Iha nasaun neʼebé governu bandu Testemuña atu haklaken, irmaun ida fahe liafuan diʼak kona-ba Maromak nia Ukun ba ema neʼebé nia koñese, iha dalan neʼebé la dada ema seluk nia atensaun. Depois neʼe, durante deskansa iha serbisu-fatin, irmaun neʼe haklaken ba ninia kolega serbisu.