Skip to content

Skip to table of contents

Fiar​—Hahalok neʼebé hametin ita

Fiar​—Hahalok neʼebé hametin ita

FIAR iha kbiit boot tebes. Porezemplu, maski Satanás hakarak estraga ita-nia relasaun ho Jeová, maibé ho fiar ita bele “hamate rama-oan hotu neʼebé lakan ho ahi husi aat-naʼin”. (Éf 6:16) Ho fiar, ita bele hasoru problema neʼebé boot hanesan foho. Jesus dehan ba ninia dixípulu sira: “Se imi-nia fiar boot hanesan mostarda-musan, imi sei hatete ba foho neʼe: ‘Muda husi neʼe hodi bá fali neʼebá’, no foho neʼe sei muda, no la iha buat ida neʼebé imi labele halo.” (Mt 17:20) Tanba fiar bele hametin ita iha dalan espirituál, ita tenke hanoin kona-ba pergunta sira-neʼe: Saida mak fiar? Oinsá mak fiar liga ho ita-nia laran? Oinsá mak ita bele hametin ita-nia fiar? No ba sé mak ita tenke tau fiar?​—Rom 4:3.

SAIDA MAK FIAR?

Fiar laʼós deʼit hatene kona-ba lia-loos, tanba “anju aat sira mós fiar [katak Maromak iha] no nakdedar”. (Tgo 2:19) Se nuneʼe, saida mak fiar?

Ita fiar katak loron no kalan sei iha nafatin, nuneʼe mós, ita fiar katak Maromak nia liafuan sempre sai loos

Primeiru, tuir Bíblia, “fiar mak laran-metin katak ita-nia esperansa sei sai loos”. (Ebr 11:1a) Se Ita iha fiar neʼebé loos, ita laran-metin katak buat hotu neʼebé Jeová koʼalia mak loos, no nia sei kumpre ida-neʼe. Porezemplu, Jeová dehan ba ema Izraél sira: “Hanesan imi labele halakon haʼu-nia aliansa kona-ba loron no kalan hodi hanetik loron no kalan atu la mosu tuir sira-nia oras, nuneʼe mós la iha buat ida mak bele halakon haʼu-nia aliansa ho haʼu-nia atan David.” (Jer 33:20, 21) Ita nunka fiar katak loro-matan sei para atu hanetik loron no kalan, loos ka lae? Tan neʼe, se Ita fiar ba ukun-fuan natureza nian neʼebé halo mundu neʼe haleʼu beibeik loro-matan, Ita mós sei la duvida katak Ida neʼebé halo ukun-fuan sira-neʼe bele kumpre ninia promesa sira, loos ka lae?​—Isa 55:10, 11; Mt 5:18.

Segundu, “fiar mak evidénsia neʼebé hatudu ho klaru” katak buat ruma “iha duni maski matan labele haree”. Sin, fiar mak “evidénsia forte” katak buat neʼebé matan labele haree iha duni. (Ebr 11:1b; nota) Ezemplu kona-ba neʼe mak saida? Se labarik ida husu Ita: ‘Oinsá Ita hatene katak anin iha?’ Maski Ita nunka haree anin, maibé Ita sei ajuda labarik neʼe atu komprende liuhusi evidénsia katak anin iha duni, porezemplu bainhira ita dada iis ka haree ai-tahan sira book an. Kuandu labarik neʼe komprende evidénsia, nia mós bele simu katak anin iha maski nia seidauk haree ida-neʼe. Hanesan neʼe mós, fiar bazeia ba evidénsia neʼebé forte.​—Rom 1:20.

ATU IHA FIAR TENKE HAFOLIN LIA-LOOS

Tanba fiar bazeia ba evidénsia, atu haburas fiar, ema ida tenkesér hetan uluk “koñesimentu neʼebé loos kona-ba lia-loos”. (1 Tim 2:4) Maibé neʼe mós la toʼo. Apóstolu Paulo dehan: “Ho laran mak ema hatudu fiar.” (Rom 10:10) Tan neʼe ita mós tenke hafolin lia-loos husi laran. Se ita halo hanesan neʼe mak ita sei hatudu fiar hodi moris iha dalan neʼebé halo Maromak kontente. (Tgo 2:20) Ema neʼebé la hafolin lia-loos karik sei la simu  evidénsia tanba nia lakohi troka buat neʼebé nia fiar ka hakarak halo tuir deʼit buat neʼebé nia hakarak. (2 Ped 3:3, 4; Jud 18) Tan neʼe mak iha Bíblia nia tempu, laʼós ema hotu neʼebé haree Maromak nia milagre sira sai fiar-naʼin. (Núm 14:11; João 12:37) Maromak nia espíritu santu bele ajuda ema atu iha fiar, só deʼit se ema neʼe hafolin lia-loos duké rona lia-bosok sira.​—Gal 5:22; 2 Tes 2:10, 11.

OINSÁ MAK DAVID HABURAS FIAR NEʼEBÉ METIN

Liurai David mak ema ida neʼebé fiar metin. (Ebr 11:32, 33) Maibé laʼós ninia família hotu iha fiar hanesan nia. Porezemplu, hanoin kona-ba David nia maun Eliab. Bainhira Golias sadik Maromak neʼebé moris, David hirus. Tanba Eliab siʼak fali David, neʼe hatudu katak Eliab la iha fiar ba Jeová nia kbiit atu fó salvasaun. (1 Sam 17:26-28) La iha ema ida moris mai iha ona fiar, no labele mós hetan husi inan-aman. Tan neʼe, David bele iha fiar tanba nia rasik iha relasaun diʼak ho Maromak.

Iha Salmo 27, David fó-hatene tanbasá nia iha fiar neʼebé metin. (Ver. 1) David medita kona-ba oinsá Jeová proteje nia husi inimigu sira. (Ver. 2, 3) Nia hafolin Jeová nia arranju ba adorasaun. (Ver. 4) David adora Maromak hamutuk ho maluk fiar-naʼin sira iha tenda santu. (Ver. 6) Nia buka Jeová liuhusi orasaun. (Ver. 7, 8) David mós hakarak Maromak atu hanorin nia atu laʼo iha Maromak nia dalan. (Ver. 11) Fiar mak importante tebes ba David toʼo nia husu: “Se haʼu la fiar katak haʼu bele haree Jeová nia laran-diʼak . . . agora haʼu iha neʼebé?”—Ver. 13.

OINSÁ ATU HAMETIN ITA-NIA FIAR

Ita mós bele iha fiar hanesan David se Ita halo tuir ninia atitude no toman sira neʼebé hakerek iha Salmo 27. Tanba fiar mai husi koñesimentu neʼebé loos, neʼe katak se Ita estuda liután Maromak nia Liafuan no livru sira kona-ba Bíblia, sei sai fasil liu ba Ita atu hatudu hahalok neʼebé mai husi Maromak nia espíritu santu neʼe. (Sal 1:2, 3) Uza tempu atu medita bainhira Ita estuda. Hanesan rai-metan bele halo moris ai-horis sira, nuneʼe mós medita bele halo moris agradesimentu. Bainhira Ita-nia agradesimentu ba Jeová sai boot liután, ita mós sei hakarak liután atu hatudu fiar hodi adora nia iha reuniaun sira no fahe esperansa ba ema seluk. (Ebr 10:23-25) Ita mós hatudu fiar bainhira ita “halo orasaun nafatin no la rende an”. (Lc 18:1-8) Tan neʼe, “halo orasaun beibeik” ba Jeová no fiar katak ‘nia hanoin ita’. (1 Tes 5:17; 1 Ped 5:7) Fiar book ita atu halo buat neʼebé loos, no kuandu ita halo buat neʼebé loos, ita-nia fiar sai metin liután.​—Tgo 2:22.

HATUDU FIAR BA JESUS

Iha kalan antes Jesus mate, nia hatete ba ninia dixípulu sira: “Hatudu fiar ba Maromak,  no hatudu fiar mós ba haʼu.” (João 14:1) Entaun, ita presiza hatudu fiar, laʼós deʼit ba Jeová, maibé mós ba Jesus. Oinsá mak ita bele hatudu fiar ba Jesus? Mai ita haree dalan tolu.

Hatudu fiar ba Jesus katak sá?

Primeiru, haree Jesus nia sakrifísiu nuʼudar prezente ba Ita rasik. Apóstolu Paulo dehan: “Haʼu halaʼo haʼu-nia moris nuʼudar ema ida ho fiar ba Maromak nia Oan-Mane, neʼebé hadomi haʼu no fó nia moris ba haʼu-nia diʼak.” (Gal 2:20) Se Ita hatudu fiar ba Jesus, Ita sei fiar metin katak Jesus nia sakrifísiu mak ba Ita rasik, Ita bele hetan perdua ba Ita-nia sala sira, iha esperansa atu moris ba nafatin, no fiar katak sakrifísiu neʼe mak dalan importante liu neʼebé Maromak hatudu ninia domin ba Ita. (Rom 8:32, 38, 39; Éf 1:7) Neʼe sei hametin Ita tanba ita sei la hanoin negativu no la fó sala ba Ita-nia an.​—2 Tes 2:16, 17.

Segundu, tanba Jesus nia sakrifísiu mak ita bele halo orasaun ba Jeová. Tan neʼe, ita tenke aproveita arranju neʼe hodi hakbesik liután ba Jeová iha orasaun, no ita bele “halo orasaun hodi koʼalia nakloke, atu nuneʼe ita bele simu laran-sadiʼa no hetan ajuda iha tempu neʼebé loloos liuhusi Maromak nia laran-diʼak neʼebé boot”. (Ebr 4:15, 16; 10:19-22) Orasaun ajuda ita atu hamriik metin hodi la monu ba tentasaun atu halo sala.​—Lc 22:40.

Terseiru, halo tuir Jesus. Apóstolu João hakerek: “Ema neʼebé hatudu fiar ba Oan-Mane hetan moris rohan-laek, no ema neʼebé lakohi halo tuir Oan-Mane sei la haree moris, no Maromak nia hirus sei tun ba nia ba nafatin.” (João 3:36) Iha eskritura neʼe, João dehan katak hatudu fiar la hanesan ho lakohi halo tuir. Tan neʼe, ita hatudu fiar ba Jesus kuandu ita halo tuir nia. Ita halo tuir Jesus hodi tuir “Kristu nia ukun-fuan”, neʼe mak buat hotu neʼebé Jesus hanorin no haruka ita atu halo. (Gal 6:2) Ita mós halo tuir Jesus hodi halo tuir matadalan husi “atan laran-metin no matenek”. (Mt 24:45) Se ita halo tuir Jesus, ita sei hetan forsa atu tahan problema sira neʼebé boot tebes.​—Lc 6:47, 48.

“HAMETIN IMI-NIA FIAR NEʼEBÉ SANTU”

Loron ida, mane ida hatete ba Jesus: “Haʼu iha ona fiar! Maibé ajuda haʼu atu iha fiar liután!” (Mc 9:24) Mane neʼe iha ona fiar uitoan, maibé ho haraik an, nia rekoñese katak nia presiza fiar barak liután. Hanesan mane neʼe, iha situasaun balu, ita mós presiza fiar liután. No ita hotu bele hametin ita-nia fiar agora. Hanesan ita haree tiha ona, ita hametin ita-nia fiar bainhira ita estuda no medita Maromak nia Liafuan, no neʼe mós sei halo ita sente agradese liután ba Jeová. Ita-nia fiar mós sei sai boot liután bainhira ita fahe ita-nia esperansa ba ema seluk, halo orasaun beibeik, no adora Jeová hamutuk ho maluk Kristaun sira. Liután neʼe, ita sei simu bensaun neʼebé boot tebes. Maromak nia Liafuan hatete: “Maluk doben sira, hametin imi-nia fiar neʼebé santu . . . atu nuneʼe, imi bele hela nafatin iha Maromak nia domin”.​—Jud 20, 21.