Skip to content

Skip to table of contents

 ESPERIÉNSIA

Ami hetan “pérola ida neʼebé folin-boot”

Ami hetan “pérola ida neʼebé folin-boot”

WINSTON no Pamela (Pam) Payne serbí iha sukursál Australásia. Sira moris kontente, maibé sira mós hasoru susar oioin. Susar balu mak sira presiza sai toman ho kultura neʼebé la hanesan no mós tenke tahan sentimentu triste tanba sira-nia bebé abortu. Maski hasoru susar sira-neʼe hotu, sira mantein sira-nia domin ba Jeová no ninia povu no mós sira nafatin haksolok hodi halo serbisu ba Maromak. Ami entrevista sira no husu sira atu fahe sira-nia esperiénsia.

Winston, konta mai ami kona-ba oinsá Ita buka Maromak.

Haʼu boot iha kintál ida iha Queensland, Austrália. Haʼu-nia família la relijiozu. Haʼu ladún hasoru ema seluk tanba ami hela dook husi ema. Maizumenus kuandu haʼu tinan 12, haʼu komesa buka Maromak. Haʼu halo orasaun ba nia hodi husu ajuda atu hatene lia-loos kona-ba nia. Ikusmai haʼu husik kintál neʼe no hetan serbisu iha Adelaide iha Austrália parte súl. Bainhira haʼu tinan 21, haʼu bá feriadu iha Sydney no hasoru Pam, no nia konta ba haʼu kona-ba grupu relijiaun ida naran Bretaña-Izraél neʼebé fiar katak ema Bretaña mak jerasaun husi suku Izraél neʼebé lakon. Grupu neʼe dehan katak neʼe mak suku sanulu husi nasaun Izraél parte norte neʼebé sai dadur iha tinan 740 AEC. Entaun bainhira haʼu fila fali ba Adelaide, haʼu koʼalia kona-ba neʼe ho haʼu-nia kolega serbisu neʼebé komesa ona estuda Bíblia ho Testemuña ba Jeová. Koʼalia tiha ba oras balu, liuliu kona-ba Testemuña nia fiar, haʼu rekoñese katak Maromak hatán ona haʼu-nia orasaun neʼebé haʼu halo kuandu sei kiʼik. Haʼu aprende lia-loos kona-ba haʼu-nia Kriadór no ninia Ukun! Haʼu hetan ona “pérola ida neʼebé folin-boot”.​—Mt 13:45, 46.

Pam, Ita mós komesa buka pérola neʼe kuandu Ita sei kiʼik. Oinsá mak ita hetan?

Haʼu boot iha família neʼebé relijiozu iha sidade kiʼik naran Coffs Harbour, New South Wales. Haʼu-nia inan-aman no avó sira fiar hanorin husi grupu relijiaun Bretaña-Izraél. Haʼu, haʼu-nia alin, biin, no prima ho primu  barak, fiar katak Maromak hafolin liu ema husi jerasaun husi Bretaña. Maibé, haʼu nafatin dúvida, no haʼu la sente besik Maromak. Bainhira haʼu tinan 14, haʼu bá igreja oioin hanesan Anglikanu, Batista, no Adventista. Maibé sira la ajuda haʼu atu hakbesik Maromak.

Ikusmai haʼu-nia família muda ba Sydney, no iha neʼebá mak haʼu hasoru Winston neʼebé feriadu hela. Hanesan nia dehan ona, tanba ami-nia diskusaun kona-ba relijiaun, ikusmai nia komesa estuda ho Testemuña. Depois neʼe, ninia karta ba haʼu nakonu ho eskritura sira! Foufoun haʼu hanoin barak no mós hirus uitoan. Maibé, neineik-neineik haʼu rekoñese katak buat neʼebé nia hakerek mak lia-loos.

Iha tinan 1962, haʼu muda ba Adelaide atu besik Winston. Nia arranja ona atu haʼu hela ho kaben-naʼin Testemuña ida, Thomas no Janice Sloman, neʼebé uluk serbí nuʼudar misionáriu iha Papua Giné Foun. Sira hatudu laran-diʼak neʼebé boot ba haʼu. Iha momentu neʼe haʼu tinan 18 deʼit, no sira ajuda haʼu hatene didiʼak kona-ba Jeová. Entaun haʼu mós komesa estuda Maromak nia Liafuan, no lakleur deʼit haʼu fiar katak haʼu hetan ona lia-loos. Bainhira haʼu no Winston kaben, ami komesa kedas moris neʼebé kontente hodi halo serbisu ba Jeová, no neʼe halo ami hafolin liután pérola diʼak neʼebé ami hetan ona maski ami hasoru susar oioin.

Winston, konta toʼok oinsá Ita hahú Ita-nia serbisu ba Jeová.

A. Mapa kona-ba ami-nia viajen nuʼudar katuas área

B. Karimbu korreiu nian husi illa balu. Kiribás no Tuvalu nia naran uluk mak Illa Gilbert no Ellice.

C. Illa furak Funafuti iha nasaun Tuvalu. Neʼe mak illa ida husi illa barak neʼebé ami vizita antes misionáriu sira mai

Lakleur depois Pam no haʼu kaben, Jeová komesa loke “odamatan boot” ba ami atu aumenta ami-nia serbisu ba nia. (1 Kor 16:9) Oportunidade primeiru atu serbí liután Jeová mak hodi sai pioneiru regulár. Irmaun Jack Porter no ninia feen Roslyn anima ami atu serbí nuʼudar pioneiru. Iha tempu neʼebá irmaun Jack mak ami-nia katuas área no agora ami serbí hamutuk nuʼudar membru husi Komisaun ba Sukursál Australásia nian. Pam no haʼu serbí nuʼudar pioneiru durante tinan lima. Bainhira haʼu tinan 29, ami simu knaar atu sai katuas área iha illa sira iha tasi Pasífiku Súl, iha momentu neʼebá sukursál Fijí mak tau matan. Illa sira-neʼe mak Samoa Amerikana, Samoa, Kiribás, Naurú, Niue, Tokelau, Tonga, Tuvalu, no Vanuatu.

Ita tempu neʼebá, ema iha illa balu neʼebé izoladu deskonfia Testemuña ba Jeová, entaun ami tenke matan-moris no hatudu matenek. (Mt 10:16) Kongregasaun sira mak kiʼik no balu la iha fatin ba ami atu hela. Entaun ami husu atu hela ho ema iha suku laran, no sira sempre hatudu laran-diʼak ba ami.

Winston, Ita hafolin tebes no interese kona-ba tradusaun. Tanbasá?

Iha Samoa, dirije eskola ba katuas kongregasaun sira

Bainhira ami komesa serbí iha rai-Tonga, irmaun-irmán sira iha neʼebá iha deʼit panfletu no livru kiʼik balu iha lian Tonganés. Iha serbisu haklaken, sira uza livru iha lian Inglés ho títulu The Truth That Leads to Eternal Life (Lia-loos neʼebé lori moris rohan-laek) hodi estuda ho ema. Durante eskola katuas kongregasaun nian ba semana haat, katuas lokál naʼin-tolu neʼebé ladún hatene Inglés deside atu tradús livru neʼe ba lian Tonganés. Pam ketik buat neʼebé sira tradús, no ami haruka neʼe ba sukursál Estadus Unidus atu print. Projetu tomak uza maizumenus semana ualu. Maski tradusaun neʼe ladún diʼak, maibé livru neʼe ajuda ona ema barak neʼebé koʼalia lian Tonganés atu hatene lia-loos. Pam no haʼu laʼós tradutór, maibé esperiénsia neʼe halo haʼu hafolin no interese ba serbisu neʼe.

Pam, oinsá mak moris iha illa sira la hanesan ho moris iha Austrália?

Ami-nia hela-fatin ida bainhira serbí nuʼudar katuas área

Neʼe la hanesan duni! Iha fatin balu iha susuk barak, laho, dala ruma ai-han uitoan deʼit, iha moras oioin, no manas loos.  Maibé, bainhira ami deskansa iha lokraik ami kontente atu bele hateke ba tasi husi ami-nia fale, naran ba ema Polinézia nia uma-tali iha lian Samoa. Iha kalan neʼebé fulan naroman loos, ami bele haree nuu-hun, no tasi haleno fulan nia naroman. Tempu furak sira-neʼe book ami atu medita no halo orasaun, no neʼe ajuda ami atu hanoin buat neʼebé pozitivu.

Ami hadomi labarik sira tanba sira sempre kontente no interese bainhira haree ema estranjeiru kulit mutin. Bainhira ami vizita Niue, labarik-mane ida kaer Winston nia liman fulun no dehan: “Haʼu gosta ó-nia fulun.” Tuir loloos, nia seidauk haree ema nia liman neʼebé iha fulun barak!

Ami sente triste bainhira haree ema kiak sira no sira-nia situasaun moris. Sira-nia área mak furak tebes maibé la iha fasilidade saúde neʼebé diʼak no bee moos uitoan deʼit. Maibé, ita-nia irmaun-irmán sira la hanoin barak. Ba sira, neʼe mak baibain deʼit. Sira kontente tanba sira-nia família besik sira, no iha fatin atu hasoru malu hodi halo adorasaun, no iha priviléjiu atu fó hahiʼi ba Jeová. Sira-nia ezemplu ajuda ami atu tau fokus ba buat neʼebé importante no halaʼo moris simples.

Pam, oinsá mak Ita bele kuru bee rasik no prepara ai-han iha situasaun neʼebé Ita la toman?

Iha Tonga, Pam fase hela ami-nia roupa

Haʼu agradese tebes tanba treinu husi haʼu-nia aman. Nia hanorin haʼu buat barak neʼebé diʼak, hanesan oinsá sunu ahi atu teʼin no oinsá bele moris ho sasán uitoan deʼit. Bainhira ami vizita Kiribás, ami hela iha uma kiʼik ida neʼebé ninia kakuluk halo husi tali, rai nahe ho korál neʼebé harahun ona, no didin husi au. Atu teʼin ai-han simples ida, haʼu keʼe kuak ida halo ahi-matan no hatama nuu kulit hodi sunu. Atu kuru bee, haʼu tenke forma iha bee-matan hamutuk ho feto lokál sira. Sira uza ai neʼebé naruk metru rua no ninia tutun iha tali neʼebé kesi metin balde atu kuru bee. Feto ida-idak troka malu atu hatún balde neʼe no tuirmai book ai iha tempu neʼebé loos hodi bee tama iha balde laran. Haʼu hanoin neʼe fasil, maibé bainhira haʼu koko, neʼe susar. Haʼu hatún balde dala balu, maibé balde neʼe namlele deʼit! Bainhira ema hotu para hamnasa, feto ida oferese atu ajuda haʼu. Ema lokál sempre ajuda no hatudu laran-diʼak.

Imi gosta tebes imi-nia knaar iha illa sira. Imi bele fahe imi-nia esperiénsia espesiál ba ami ka lae?

Winston: Presiza tempu atu komprende kostume ruma. Porezemplu, bainhira irmaun-irmán sira fó ai-han, baibain sira fó ai-han hotu neʼebé sira iha. Foufoun, ami la hatene katak ami presiza husik hela ai-han balu ba sira. Entaun ami han buat hotu neʼebé tau iha ami-nia oin! Klaru katak, bainhira ami komprende situasaun loloos, ami husik hela ai-han balu ba sira. Maski ami halo sala, maibé irmaun-irmán sira komprende. Sira kontente atu hasoru ami kada fulan neen bainhira ami vizita sira nuʼudar katuas área. Irmaun-irmán sira-neʼe la iha oportunidade atu ransu ho Testemuña seluk, só ho ami deʼit.

Iha illa Niue, lori grupu ida bá haklaken

Ami-nia vizita mós fó sasin diʼak ba komunidade. Ema barak hanoin katak irmaun-irmán lokál mak inventa deʼit relijiaun neʼe. Entaun bainhira ami ema estranjeiru vizita irmaun-irmán sira, ema lokál rekoñese relijiaun neʼe iha duni.

Pam: Esperiénsia neʼebé haʼu hafolin tebes akontese iha Kiribás. Iha momentu neʼebá iha kongregasaun ida deʼit no irmaun-irmán uitoan. Iha katuas kongregasaun ida deʼit, ninia naran Itinikai Matera. Nia hakaʼas an atu tau matan ba ami. Loron ida nia mai vizita ami no lori bote neʼebé iha manu-tolun ida deʼit. Nia dehan: “Neʼe ba imi.” Prezente neʼe mak espesiál tanba ami han manu-tolun dala ruma deʼit. Prezente  kiʼik neʼebé fó ho laran-luak neʼe book tebes ami-nia laran.

Pam, tinan balu liutiha, Ita lakon Ita-nia oan tanba abortu. Saida mak ajuda Ita atu tahan?

Haʼu sai isin-rua iha tinan 1973 bainhira Winston no haʼu iha Pasífiku Súl. Ami deside atu fila fali ba Austrália, no fulan haat tuirmai ami lakon ami-nia bebé. Haʼu no Winston laran-triste loos. Neineik-neineik haʼu-nia laran-triste sai menus, maibé la lakon hotu toʼo ami simu Menara Pengawal, 15 Abríl 2009. Informasaun iha Pertanyaan Pembaca neʼebé husu: “Apakah ada harapan kebangkitan bagi bayi yang meninggal dalam kandungan ibunya?” Informasaun neʼe halo ami fiar katak situasaun neʼe iha Jeová nia liman no nia sempre halo buat neʼebé loos. Nia sei halakon susar hotu neʼebé ita hasoru iha mundu aat neʼe, tanba nia fó ona mandamentu ba ninia Oan-Mane atu “harahun Diabu nia serbisu hotu”. (1 João 3:8) Informasaun neʼe mós ajuda ami atu hafolin liután “pérola” folin-boot neʼebé ami iha nuʼudar Jeová nia povu! Ami hetan kmaan tebes tanba hatene esperansa kona-ba futuru!

Depois ami-nia bebé mate, ami komesa serbí fali Maromak tempu-tomak. Ami serbí fulan balu iha Betel Austrália no ikusmai serbí fali nuʼudar katuas área. Ami serbí durante tinan haat iha área izoladu iha New South Wales no Sydney, depois neʼe iha tinan 1981, ami simu konvite atu serbí iha sukursál Austrália, no serbí iha neʼe toʼo agora.

Winston, Ita-nia esperiénsia iha illa sira ajuda Ita halaʼo serbisu nuʼudar membru husi Komisaun ba Sukursál Australásia nian ka lae?

Sin, ajuda duni iha dalan oioin. Primeiru, Austrália simu knaar atu tau matan ba Samoa Amerikana no Samoa. Tuirmai, sukursál Novazelándia sai ida deʼit ho Austrália. Agora, sukursál Australásia tau matan ba Austrália, Cook Islands, Niue, Novazelándia, Samoa Amerikana no Samoa, Timor-Leste, Tokelau, no Tonga. Haʼu vizita ona illa sira-neʼe barak nuʼudar reprezentante husi sukursál. Haʼu-nia esperiénsia hodi serbisu hamutuk ho irmaun-irmán sira neʼebé laran-metin iha illa sira ajuda duni haʼu tanba agora haʼu serbí sira husi sukursál.

Winston no Pam iha sukursál Australásia

Atu remata, haʼu hakarak dehan katak ba tinan barak ona Pam no haʼu rekoñese katak laʼós ema boot deʼit mak buka Maromak. Ami aprende ona husi ami-nia esperiénsia rasik katak joven sira mós buka “pérola ida neʼebé folin-boot” maski sira-nia família ladún hatudu interese. (2 Reis 5:2, 3; 2 Krón 34:1-3) Klaru katak, Jeová, Maromak domin nian, hakarak ema hotu, joven no idade, atu hetan moris!

Bainhira Pam no haʼu komesa buka Maromak maizumenus tinan 50 liubá, ami ladún hatene ami sei hetan rezultadu saida. Lia-loos kona-ba Maromak nia Ukun mak pérola neʼebé folin-boot duni! Ami hakarak kaer metin ida-neʼe ho ami-nia kbiit tomak!