Skip to content

Skip to table of contents

Joven sira​—Oinsá mak imi bele prepara an ba batizmu?

Joven sira​—Oinsá mak imi bele prepara an ba batizmu?

“Oh, haʼu-nia Maromak, atu halo Ita-nia hakarak mak buat neʼebé halo haʼu haksolok.”—SALMO (MAZMUR) 40:8.

KNANANUK: 51, 48

1, 2. (a) Esplika toʼok, tansá batizmu mak buat neʼebé sériu? (b) Antes atu hetan batizmu, buat importante saida deʼit mak ita tenke halo uluk?

ITA mak joven neʼebé hanoin hela atu hetan batizmu ka lae? Se nuneʼe, neʼe mak buat kmanek neʼebé Ita halo iha Ita-nia moris. Hanesan koʼalia ona iha lisaun uluk, batizmu mak desizaun neʼebé sériu tebes. Liuhusi batizmu mak ita hatudu ba ema seluk katak ita dedika an ona ba Jeová. Neʼe katak ita promete ba Jeová ita sei serbí nia ba nafatin, no buat neʼebé importante liu iha ita-nia moris mak hodi halo tuir ninia hakarak. Tan neʼe mak atu hetan batizmu, importante atu sai maduru iha lia-loos. Ita rasik mak tenke halo desizaun neʼe, no Ita mós tenke komprende uluk dedikasaun katak sá.

2 Oinsá se Ita sente katak ita seidauk prontu atu hetan batizmu? Ka karik Ita sente katak Ita prontu ona maibé Ita-nia inan-aman mak hanoin katak diʼak liu Ita hein toʼo Ita sai maduru uitoan mak bele hetan batizmu. Saida mak Ita tenke halo? Keta sente laran-tun. Diʼak atu uza tempu neʼe hodi hakaʼas an laʼo ba oin liután atu nuneʼe iha futuru Ita bele hetan batizmu. Atu laʼo  ba oin, Ita bele halo planu kona-ba buat tolu tuirmai neʼe, (1) Ita-nia fiar, (2) Ita-nia hahalok, no (3) Ita-nia agradese.

ITA-NIA FIAR

3, 4. Joven sira bele aprende saida husi Timóteo nia ezemplu?

3 Hanoin toʼok oinsá mak Ita sei hatán ba pergunta sira tuirmai neʼe: Tanbasá mak haʼu fiar katak Maromak iha duni? Tanbasá mak haʼu fiar katak Bíblia mai duni husi Maromak? Tanbasá mak haʼu fiar katak halo tuir Maromak nia mandamentu diʼak liu fali moris tuir mundu neʼe nia morál? Pergunta sira-neʼe bele ajuda Ita atu halo tuir apóstolu Paulo nia konsellu. Nia hakarak ema kristaun atu “hatene ho loloos kona-ba Maromak nia hakarak neʼebé diʼak no loos no neʼebé nia simu”. (Roma 12:2) Tanbasá mak Ita tenke halo tuir nuneʼe?

4 Haree toʼok kona-ba Timóteo nia ezemplu. Timóteo hatene didiʼak kona-ba eskritura sira, tanba nia inan no avó-feto hanorin nia kona-ba lia-loos “husi kiʼik kedas”. Maski nuneʼe, apóstolu Paulo fó-hatene ba Timóteo: “Kontinua halo tuir buat neʼebé ó aprende ona no buat neʼebé ema ajuda ó atu fiar.” (2 Timóteo 3:14, 15) Liafuan orijinál iha eskritura neʼe iha arti katak “fiar metin katak buat ruma mak loos duni”. Tan neʼe Timóteo rasik tenke fiar katak nia hetan ona lia-loos husi eskritura sira. Nia simu lia-loos laʼós tanba nia inan no avó-feto mak haruka nia, maibé tanba nia hanoin didiʼak kona-ba buat neʼebé nia aprende no tau fiar ba ida-neʼe.—Lee Roma 12:1.

5, 6. Tanbasá mak importante ba Ita atu aprende uza Ita-nia “kbiit atu hanoin” husi kiʼik kedas?

5 Oinsá ho Ita? Karik Ita hatene lia-loos ba tempu kleur ona. Se nuneʼe, diʼak uza tempu atu hanoin didiʼak kona-ba tanbasá Ita fiar hanesan neʼe. Tanba ida-neʼe bele ajuda hametin Ita-nia fiar no la foti desizaun neʼebé sala hodi tuir deʼit kolega sira, mundu neʼe nia hanoin no Ita-nia sentimentu.

6 Se Ita aprende atu uza Ita-nia “kbiit atu hanoin” husi kiʼik kedas, neʼe bele ajuda Ita hatán ba Ita-nia kolega bainhira sira husu pergunta hanesan: ‘Oinsá mak Ita bele hatene katak Maromak iha duni? Tanbasá mak Maromak neʼebé domin husik ita terus? Tanbasá mak Maromak laiha hun no rohan?’ Bainhira Ita prepara didiʼak, pergunta sira hanesan neʼe sei la halo Ita-nia fiar sai fraku maibé sei book Ita atu estuda liután.

7-9. Esplika toʼok oinsá mak atividade Panduan Belajar Alkitab bele ajuda hametin liután Ita-nia fiar.

7 Estuda Bíblia mesak bele ajuda Ita atu hatán pergunta oioin, halakon duvida, no hametin Ita-nia fiar. (Apóstolu 17:11) Jeová nia organizasaun halo ona livru barak hodi ajuda Ita atu halo buat sira-neʼe. Ema balu gosta lee ita-nia livru neʼebé esplika kona-ba ita-nia Kriadór no ninia kriasaun sira. Joven barak gosta halo Panduan Belajar Alkitab neʼebé foti husi ita-nia sítiu. Atividade ida-idak bazeia ba livru “Tuir Loloos, Saida mak Bíblia Hanorin?” no bele ajuda Ita atu hametin Ita-nia fiar kona-ba tópiku sira husi Bíblia. Atu hetan atividade sira-neʼe, buka iha AJARAN ALKITAB husi sítiu jw.org.

8 Tanba Ita mak estudante Bíblia ida, tan neʼe karik Ita hatene ona resposta ba pergunta balu husi atividade neʼe. Maibé tanbasá mak Ita fiar katak Ita-nia resposta mak loos duni? Atividade sira-neʼe sei ajuda Ita atu hanoin didiʼak kona-ba eskritura sira no tuirmai Ita bele hakerek sai razaun kona-ba Ita-nia fiar neʼe. Ida-neʼe bele ajuda Ita hatene oinsá atu esplika Ita-nia fiar ba ema seluk. Se Ita iha internét, Ita bele uza atividade Panduan Belajar Alkitab iha  Ita-nia estuda mesak hodi hametin liután Ita-nia fiar.

9 Ita rasik tenke fiar duni katak neʼe mak lia-loos. Neʼe sei ajuda prepara Ita ba batizmu. Irmán joven ida dehan: “Antes haʼu foti desizaun atu hetan batizmu, haʼu estuda didiʼak Bíblia no haʼu haree duni katak neʼe mak relijiaun neʼebé loos. No loron ba loron haʼu-nia fiar sai metin liután.”

ITA-NIA HAHALOK

10. Tanbasá mak atu hetan batizmu tenke iha fiar no hahalok?

10 Bíblia dehan: “Se fiar la hamutuk ho hahalok, fiar neʼe mate.” (Tiago 2:17) Se Ita iha fiar neʼebé metin, Ita sei hatudu ida-neʼe liuhusi Ita-nia hahalok. Hahalok hanesan saida? Bíblia dehan ita presiza “hahalok santu” no ‘hatudu katak ita serbí Maromak ho laran-metin’.—Lee 2 Pedro 3:11.

11. Esplika toʼok, saida mak “hahalok santu”.

11 “Hahalok santu” mak saida? Se Ita-nia hahalok mak santu, ita mós moris tuir morál neʼebé moos. Porezemplu, hanoin filafali toʼok kona-ba fulan neen liubá. Oinsá mak Ita hatudu katak Ita treinu didiʼak ona Ita-nia “kbiit atu hanoin” bainhira hasoru tentasaun ruma? (Ebreu 5:14) Ita bele hanoin fali ka lae ba tempu neʼebé Ita hakaʼas an atu la monu ba tentasaun ruma ka hakaʼas an atu tahan hasoru susar husi kolega sira? Iha eskola Ita hatudu hahalok diʼak ba ema seluk ka lae? Ita nafatin laran-metin ba Jeová ka Ita halo tuir deʼit kolega sira iha eskola atu sira la goza Ita? (1 Pedro 4:3, 4) Loos, ita hotu mak sala-naʼin. Tan neʼe dala ruma Ita sente moe ka susar atu haklaken ba ema seluk. Ema balu neʼebé serbí Jeová ba tempu kleur ona mós sente hanesan neʼe. Maibé ema neʼebé dedika an ba Jeová sente orgullu tebes tanba sai ona Jeová nia testemuña ida, no nia hatudu ida-neʼe liuhusi ninia hahalok santu.

12. Oinsá mak Ita ‘hatudu katak Ita serbí Maromak ho laran-metin’, no Ita tenke iha hanoin saida kona-ba atividade sira-neʼe?

12 Oinsá mak Ita ‘hatudu katak Ita serbí Maromak ho laran-metin’? Liuhusi atividade sira neʼebé Ita halo iha kongregasaun, hanesan tuir reuniaun sira no bá haklaken. No mós buat neʼebé Ita halo mesak-mesak, hanesan Ita rasik nia orasaun no estuda mesak. Ema neʼebé dedika ona ninia moris ba Jeová sei la hanoin katak atu halo buat sira-neʼe mak hanesan naha todan ida. Nia sei sente hanesan ho Liurai David neʼebé dehan: “Oh, haʼu-nia Maromak, atu halo Ita-nia hakarak mak buat neʼebé halo haʼu haksolok, no Ita-nia ukun-fuan iha haʼu-nia laran.”—Salmo (Mazmur) 40:8.

13, 14. Saida mak bele ajuda Ita atu ‘hatudu katak Ita serbí Maromak ho laran-metin’, no oinsá mak neʼe ajuda ona joven balu?

13 Saida mak bele ajuda Ita atu ‘hatudu katak Ita serbí Maromak ho laran-metin’? Karik bele hanoin kona-ba pergunta sira tuirmai neʼe: “Ita halo orasaun ba Maromak husi Ita-nia laran ka lae, no oinsá mak Ita-nia orasaun hatudu katak Ita iha domin ba Jeová? Ita estuda informasaun saida deʼit iha Ita-nia estuda mesak? Ita hola parte nafatin iha serbisu haklaken ka lae maski Ita-nia inan-aman la halo?” Ita bele hakerek hela resposta ba pergunta sira-neʼe, tanba neʼe bele ajuda Ita atu halo planu hodi hadiʼa Ita-nia orasaun, estuda mesak no haklaken. [1] (Haree nota husi lisaun.)

14 Joven balu sente katak hakerek hela resposta ba pergunta sira-neʼe ajuda duni sira atu halo planu ba batizmu. Irmán joven ida naran Tilda dehan katak halo hanesan neʼe ajuda nia kumpre ninia planu ida-idak, no tinan ida liutiha nia mós prontu ona atu hetan batizmu. Irmaun joven ida seluk naran Patrick mós halo nuneʼe. Nia dehan: “Haʼu hatene ona haʼu-nia planu mak saida,  maibé bainhira haʼu hakerek sai planu sira-neʼe, neʼe halo haʼu hakaʼas an liután atu kumpre.”

Se Ita-nia inan-aman mak para ona la serbí tan Jeová, Ita sei serbí nafatin Jeová ka lae? (Haree parágrafu 15)

15. Esplika toʼok tanbasá mak dedikasaun tenkesér Ita rasik nia desizaun?

15 Pergunta importante ida seluk mak: “Se Ita-nia inan-aman ka kolega balu mak para ona la serbí tan Jeová, Ita sei serbí nafatin Jeová ka lae?” Hanoin-hetan katak bainhira Ita dedika ona Ita-nia moris ba Jeová no hetan batizmu, Ita haburas ona Ita rasik nia relasaun ida ho Jeová. Tan neʼe mak Ita la bele depende ba inan-aman ka kolega sira mak atu determina Ita atu serbí Jeová. Liuhusi Ita-nia hahalok santu no hahalok laran-metin mak Ita hatudu katak Ita fiar duni lia-loos no hakarak halo tuir Jeová. Neʼe mak sinál neʼebé hatudu katak Ita laʼo ba oin daudauk atu hetan batizmu.

ITA-NIA AGRADESE

16, 17. (a) Saida mak book ema atu sai ema kristaun ida? (b) Ita bele kompara Ita-nia agradese ba Jesus nia sakrifísiu hanesan ezemplu saida?

16 Loron ida mane neʼebé hatene didiʼak kona-ba Moisés nia Ukun-Fuan husu Jesus: “Mandamentu ida-neʼebé mak boot liu?” Jesus hatán: “Ó tenke hadomi Jeová ó-nia Maromak ho ó-nia laran tomak, ho ó-nia moris tomak, no ho ó-nia neon tomak.” (Mateus 22:35-37) Iha Jesus nia liafuan neʼe, nia hatudu katak ita-nia domin ba Jeová ho laran tomak mak tenke book ita atu hakarak hetan batizmu no sai nuʼudar ema kristaun ida. Dalan ida atu hametin ita-nia domin ba Jeová mak hodi hanoin didiʼak kona-ba prezente furak neʼebé Maromak fó ba ita, neʼe mak ninia Oan-Mane nia sakrifísiu. (Lee 2 Korinto 5:14, 15; 1 João 4:9, 19.) Hodi hanoin didiʼak kona-ba Jesus nia sakrifísiu sei book Ita atu hatudu sai Ita-nia agradese.

17 Ita bele kompara Ita-nia agradese ba Jesus nia sakrifísiu hanesan ezemplu tuirmai neʼe: Hanoin toʼok se Ita mak mout daudauk iha bee no ema ida mai salva Ita. Bainhira ema neʼe salva tiha Ita, Ita hamaran Ita-nia an, fila liu ba uma no haluha kedas buat neʼebé ema neʼe foin halo ka lae? Lae! Ita sei agradese tebes ba ema neʼe, tanba nia salva ona Ita-nia moris. Hanesan neʼe mós, Ita sei agradese tebes ba Jeová no Jesus nia sakrifísiu. Iha Ita-nia moris tomak, Ita iha tusan ba sira. Sira salva ona Ita-nia moris husi sala no mate. Tanba sira-nia domin neʼebé boot tebes ba Ita mak Ita iha esperansa atu moris ba nafatin iha mundu foun iha rai.

18, 19. (a) Tanbasá mak Ita la presiza taʼuk atu dedika an ba Jeová? (b) Oinsá mak serbí Jeová halo Ita-nia moris kontente liután?

18 Tanba Ita hafolin buat sira neʼebé  Jeová halo ba Ita mak Ita hakarak dedika Ita-nia moris ba Jeová no hetan batizmu, loos ka lae? Dedikasaun mak Ita-nia promete ba Jeová katak Ita hakarak halo tuir nia iha Ita-nia moris tomak. Maibé Ita presiza taʼuk ka lae atu halo promete hanesan neʼe ba Jeová? Lae. Tanba buat neʼebé Jeová hakarak Ita atu halo sempre ba Ita rasik nia diʼak, no nia mós sei fó bensaun ba Ita tanba Ita hakarak halo tuir nia. (Ebreu 11:6) Dedika Ita-nia an ba Jeová no hetan batizmu sei nunka halo todan Ita-nia moris, maibé halo Ita moris kontente liután. Irmaun ida ho idade 24, neʼebé hetan batizmu antes nia sai joven hatete: “Se haʼu boot tan uitoan karik haʼu sei komprende buat barak liután, maibé tanba haʼu foti desizaun atu dedika an ba Jeová bainhira haʼu sei kiʼik, neʼe proteje duni haʼu husi buka mundu nia hakarak.”

19 Jeová hakarak fó buat neʼebé diʼak liu hotu ba Ita. Maibé Satanás la hanesan neʼe, nia buka diʼak ba ninia an deʼit. Se Ita mak tuir nia, nia la bele fó buat neʼebé diʼak ba Ita, tanba nia rasik laiha buat neʼebé diʼak. Nia laiha liafuan diʼak, laiha esperansa. Hanoin toʼok, Satanás nia futuru mak aat tebes, se nuneʼe, nia bele fó futuru neʼebé diʼak ba Ita ka lae?—Apokalipse 20:10.

20. Joven ida bele halo saida hodi laʼo ba oin toʼo dedika ninia an no hetan batizmu? (Haree mós  kaixa iha pájina neʼe.)

20 Dedika Ita-nia moris ba Jeová mak desizaun neʼebé diʼak liu hotu. Ita prontu ona atu foti desizaun neʼe ka lae? Se Ita prontu ona, keta demora. Se Ita sente katak Ita presiza tan tempu uitoan, bele uza sujestaun sira husi lisaun neʼe hodi kontinua laʼo ba oin. Apóstolu Paulo hakerek ba irmaun-irmán iha Filipe dehan katak: “Nuʼudar ita laʼo ba oin ona, mai ita kontinua laʼo ba oin ho didiʼak iha dalan neʼebé hanesan.” (Filipe 3:16) Se Ita mak halo tuir konsellu neʼe, lakleur tan Ita mós sei hakarak atu dedika Ita-nia moris ba Jeová no hetan batizmu.

^ [1] (parágrafu 13) Pergunta sira neʼebé bele hetan husi livru Pertanyaan Kaum Muda—Jawaban yang Praktis, Jilid 2, pájina 308 no 309 ajuda ona joven barak.