Skip to content

Skip to table of contents

Oinsá atu hametin ita-nia unidade?

Oinsá atu hametin ita-nia unidade?

“Husi nia mak isin-lolon tomak tutan hamutuk ho didiʼak no parte ida-idak apoia malu.”—ÉFESO 4:16.

KNANANUK: 53, 16

1. Husi tempu neʼebé Maromak komesa ninia kriasaun, ita bele haree hahalok saida?

HUSI uluk kedas Jeová no Jesus mak unidade tebes bainhira sira serbisu hamutuk atu kria buat hotu. Maibé antes neʼe Jeová kria uluk Jesus. Tuirmai Jesus serbisu iha ninia aman nia sorin “nuʼudar ninia badain neʼebé matenek”. (Provérbios [Amsal] 8:30) Maromak Jeová nia atan sira iha tempu uluk mós serbisu hamutuk no apoia malu iha buat hotu neʼebé sira halo. Hanesan Noé no ninia família serbisu hamutuk ho unidade bainhira sira halo ró boot. No ema Izraél sira mós serbisu hamutuk atu harii tabernákulu, sobu, no muda husi fatin ida ba fatin seluk. Iha templu mós sira hotu kanta no toka múzika furak hamutuk hodi fó glória ba Jeová. Loos, Jeová nia atan sira bele halo buat hotu neʼe tanba sira serbisu hamutuk no apoia malu.—Gênesis (Kejadian) 6:14-16, 22; Números (Bilangan) 4:4-32; 1 Crônicas (Tawarikh) 25:1-8.

2. (a) Hahalok diʼak saida mak ema kristaun iha tempu uluk hatudu? (b) Ita sei koʼalia kona-ba pergunta saida deʼit?

2 Ema kristaun iha apóstolu sira-nia tempu mós serbisu hamutuk ho unidade. Apóstolu Paulo esplika katak maski sira ida-idak nia kbiit no knaar la hanesan, maibé sira sempre apoia malu. Sira hotu banati-tuir sira-nia Ulun, Jesus Kristu. Paulo kompara sira hanesan ho isin-lolon neʼebé iha parte oioin maibé serbisu  hamutuk. (Lee 1 Korinto 12:4-6, 12.) Oinsá ho ita ohin loron? Oinsá mak ita bele iha unidade iha serbisu haklaken, iha kongregasaun laran, no iha moris família nian?

UNIDADE IHA SERBISU HAKLAKEN

3. Apóstolu João haree vizaun ida kona-ba saida?

3 Iha tempu uluk, apóstolu João haree vizaun ida kona-ba anju naʼin-hitu neʼebé huu trombeta. Bainhira anju ba dala lima huu ninia trombeta, João “haree fitun ida monu husi lalehan ba rai”. No “fitun” neʼe uza xave atu loke rai-kuak kleʼan neʼebé nakukun, no suar sai husi rai-kuak neʼe, tuirmai gafañotu barak sai husi suar neʼe. Sira la halo aat ba ai-horis, maibé halo aat deʼit ba ema sira neʼebé “la iha marka husi Maromak iha sira-nia reen-toos”. (Apokalipse 9:1-4) João hatene katak gafañotu lubun ida bele duni estraga buat barak hanesan sira estraga ona buat barak iha rai-Ejitu iha Moisés nia tempu. (Êxodo [Keluaran] 10:12-15) Gafañotu sira neʼebé João haree reprezenta ema kose-mina neʼebé fó sai Maromak nia tesi-lia hasoru relijiaun falsu. No ema barak neʼebé iha esperansa atu moris ba nafatin iha rai mós apoia ema kose-mina sira-neʼe. Sira hotu hamutuk halo serbisu haklaken ho unidade. Serbisu haklaken neʼe ajuda ona ema barak atu haketak an husi relijiaun falsu no livre husi Satanás nia ukun.

4. Maromak nia povu ohin loron tenke halo serbisu saida, no saida mak dalan ida deʼit neʼebé bele ajuda sira atu halo ida-neʼe?

4 Ita hotu iha knaar atu haklaken “liafuan diʼak” ba ema hotu iha mundu tomak antes mundu nia rohan toʼo mai. Neʼe mak serbisu neʼebé boot tebes! (Mateus 24:14; 28:19, 20) Ita tenke konvida ema neʼebé “hamrook” atu hemu “bee moris nian” liuhusi hanorin lia-loos ba sira neʼebé hakarak tebes atu aprende. (Apokalipse 22:17) Maibé dalan ida deʼit neʼebé bele ajuda ita atu halo ida-neʼe mak serbisu hamutuk no “apoia malu” iha kongregasaun laran.—Éfeso 4:16.

5, 6. Oinsá mak serbisu haklaken hatudu katak ita iha unidade?

5 Atubele haklaken ba ema hotu, ita presiza organiza didiʼak ita-nia serbisu haklaken. Matadalan neʼebé ita hetan husi kongregasaun, hanesan husi grupu haklaken, ajuda ita atu halo knaar neʼe ho diʼak liután. Ita haklaken ba ema liafuan diʼak kona-ba Maromak nia Ukun no mós fahe ona livru rihun ba rihun iha mundu tomak. Dala ruma ita mós hetan knaar atu hola parte iha kampaña espesiál hodi haklaken. Bainhira ita halo serbisu haklaken hanesan neʼe, ita iha unidade ho irmán-irmaun hotu iha mundu tomak neʼebé halo mós nuneʼe. Liután neʼe ita mós serbisu hamutuk ho anju sira neʼebé dirije Maromak nia povu ohin loron atu haklaken liafuan diʼak ba ema.—Apokalipse 14:6.

6 Ita hotu haksolok tebes atu lee Buku Tahunan kona-ba rezultadu husi ita-nia serbisu haklaken iha mundu tomak. Hanoin kona-ba oinsá ita iha unidade iha mundu tomak bainhira ita hotu hola parte iha serbisu haklaken hodi konvida ema barak atu asiste ita-nia reuniaun boot sira. Diskursu no drama sira iha reuniaun boot fó laran-manas tebes ba ita atu fó buat neʼebé diʼak liu ba Jeová. Ita mós iha unidade ho ita-nia irmaun-irmán sira iha mundu tomak bainhira ita tuir Memoriál tinan-tinan. (1 Korinto 11:23-26) Ita hotu halibur hamutuk iha data no tempu hanesan bainhira loron-matan tun iha loron 14 Nisan. Ita halo nuneʼe atu hatudu agradese ba Jeová ba buat neʼebé nia halo ona ba ita ema no mós hodi halo tuir Jesus nia mandamentu. Iha semana balu antes Memoriál, ita hotu serbisu hamutuk hodi fahe konvite ba ema barak atu sira mós bele mai asiste loron importante neʼe.

7. Bainhira ita hotu serbisu hamutuk ho unidade, ita bele halo saida?

7 Gafañotu ida deʼit laiha forsa. Nuneʼe mós ho ita, se mesak deʼit, ita labele haklaken  ba ema hotu. Maibé tanba ita hotu serbisu hamutuk ho unidade nuʼudar Maromak nia povu, ita bele fó-hatene ba ema rihun ba rihun iha mundu tomak kona-ba Jeová no ajuda sira atu fó hahiʼi no adora nia mesak deʼit.

UNIDADE IHA KONGREGASAUN LARAN

8, 9. (a) Paulo uza ai-knanoik saida hodi hanorin ema kristaun atu hametin unidade? (b) Oinsá mak ita bele serbisu hamutuk hodi apoia malu iha kongregasaun?

8 Iha apóstolu Paulo nia karta ba maluk kristaun sira iha Éfeso, nia esplika kona-ba oinsá kongregasaun ida bele organiza, no nia dehan katak ema hotu iha kongregasaun laran tenke “sai boot iha dalan hotu”. (Lee Éfeso 4:15, 16.) Paulo uza ilustrasaun kona-ba isin-lolon atu esplika katak ema kristaun ida-idak presiza serbisu hamutuk hodi hametin kongregasaun nia unidade hodi tuir Jesus, kongregasaun nia ulun. Nia dehan katak parte ida-idak husi ita-nia isin-lolon liga ba malu no “apoia malu”. Tan neʼe, mai ita hotu, joven, idade, forsa, ka fraku, mai ita hamutuk hametin kongregasaun nia unidade.

9 Jesus hili ona katuas sira atu tau matan ba kongregasaun, no nia hakarak ita hotu atu hatudu respeitu no halo tuir matadalan neʼebé katuas sira fó ba ita. (Ebreu 13:7, 17) Dala ruma neʼe la fasil atu halo tuir, maibé ita bele husu Maromak Jeová nia ajuda. Ninia espíritu santu bele ajuda ita atu halo tuir matadalan sira neʼebé katuas sira fó ba ita. Hanoin-hetan mós katak se ita hatudu haraik-an hodi apoia katuas sira, neʼe sei ajuda tebes kongregasaun nia unidade. No neʼe mós sei ajuda ita atu haburas domin ba malu.

10. Oinsá mak atan ba kongregasaun ajuda hodi kongregasaun iha unidade nafatin? (Haree foto iha pájina 13.)

10 Atan ba kongregasaun mós ajuda hodi kongregasaun bele iha unidade nafatin. Sira serbisu makaʼas hodi ajuda katuas sira, no ita agradese tebes ba buat hotu neʼebé sira halo. Porezemplu, sira konta didiʼak livru sira, nuneʼe bele toʼo ba kongregasaun atu uza ba haklaken, no sira iha knaar atu fó benvindu ba ema foun neʼebé tuir reuniaun. Sira mós serbisu makaʼas atu hadiʼa no hamoos ita-nia Reuniaun-Fatin. Bainhira ita serbisu hamutuk hodi apoia irmaun sira-neʼe, ita hatudu katak ita iha unidade no ajuda hodi buat hotu iha kongregasaun bele laʼo ho diʼak.—Kompara ho Apóstolu 6:3-6.

11. Saida mak irmaun joven sira bele halo atu ajuda kongregasaun nia unidade?

11 Katuas balu iha kongregasaun serbisu makaʼas ba tinan barak ona. Maibé dala ruma sira labele tan halo knaar barak iha kongregasaun hanesan uluk tanba sira-nia idade boot ona. Irmaun joven foin-saʼe sira mak bele ajuda. Se sira hetan treinu ho didiʼak, sira bele halo knaar barak iha kongregasaun. No bainhira atan ba kongregasaun sira serbisu makaʼas, aban-bainrua sira mós bele serbí nuʼudar katuas kongregasaun. (1 Timóteo 3:1, 10) Katuas kongregasaun sira neʼebé sei joven hela halo sira-nia knaar ho didiʼak toʼo sira balu serbí nuʼudar katuas área nian no ajuda irmaun-irmán sira iha kongregasaun barak. Ita hotu agradese tebes bainhira haree joven sira ho laran-haksolok halaʼo sira-nia knaar hodi apoia kongregasaun atubele iha unidade nafatin.—Lee Salmo (Mazmur) 110:3; [1] Eclesiastes (Pengkhotbah) 12:1. [2]

UNIDADE IHA FAMÍLIA LARAN

12, 13. Saida mak bele ajuda ema ida-idak iha família laran atu serbisu hamutuk no apoia malu?

12 Oinsá mak ita bele ajuda ema ida-idak iha ita-nia família laran atu iha unidade? Adorasaun Família nian semana-semana bele ajuda ita. Bainhira inan-aman uza tempu hamutuk ho oan sira atu aprende  kona-ba Maromak Jeová, sira-nia domin ba malu mós sei sai metin liután. Iha tempu Adorasaun Família nian sira bele pratika oinsá atu haklaken. Neʼe bele ajuda aumenta sira-nia matenek atu haklaken ba ema. No bainhira rona ema ida-idak iha família laran nia komentáriu kona-ba lia-loos iha tempu adorasaun, no haree oinsá sira hadomi tebes Jeová no hakarak halo nia kontente, ida-neʼe bele halo ema hotu iha família laran sai besik liu ba malu no iha unidade iha sira leet.

Adorasaun família nian bele ajuda ita hametin família nia relasaun (Haree parágrafu 12, 15)

13 Oinsá mak feen no laʼen bele serbisu hamutuk no apoia malu? Bainhira sira naʼin-rua hadomi Jeová no serbí nia hamutuk, sira sei haksolok no iha unidade iha sira-nia moris nuʼudar kaben-naʼin. Eskritura sira mós fó sai kona-ba feen-laʼen iha tempu uluk neʼebé hatudu domin ba malu hanesan Abraão no Sara, Isaac no Rebeka, no Elcana no Ana. Tan neʼe diʼak mós feen-laʼen sira ohin loron atu hatudu domin ba malu. (Gênesis [Kejadian] 26:8; 1 Samuel 1:5, 8; 1 Pedro 3:5, 6) Bainhira feen no laʼen halo nuneʼe, sira sei iha unidade no hakbesik liután ba Aman Jeová.—Lee Eclesiastes (Pengkhotbah) 4:12. [3]

14. Se Ita-nia kaben mak la adora Jeová, saida mak Ita bele halo atu hametin nafatin Ita-nia moris kaben nian?

14 Bíblia fó-hatene ho momoos katak ita labele kaben ho ema neʼebé la adora Jeová. (2 Korinto 6:14) Maibé iha irmaun ka irmán balu neʼebé sira-nia kaben laʼós Testemuña. Neʼe tanba antes sira aprende lia-loos, sira kaben ona. Balu kaben duni ho ema neʼebé adora Jeová, maibé ikusmai sira-nia kaben sees husi kongregasaun. Iha situasaun sira hanesan neʼe, diʼak atu hakaʼas an hodi hametin moris kaben nian liuhusi halo tuir konsellu sira husi Bíblia. Dala ruma la fasil atu halo nuneʼe. Porezemplu, irmán ida naran Mary ho nia laʼen David serbí Jeová hamutuk. Ikusmai David la tuir tan reuniaun sira. Maibé Mary koko nafatin atu hatudu hahalok diʼak ba nia laʼen. Nia mós hanorin ninia oan naʼin-neen kona-ba Jeová no nafatin tuir reuniaun ho reuniaun boot sira. Tinan balu liutiha, bainhira ninia oan sira sai boot no muda sai husi uma, Mary kontinua serbí Jeová maski susar ba nia. Maibé, David komesa lee fali livru sira neʼebé Mary rai hela ba nia. Nuʼudar tempu liu daudaun, David komesa tuir fali reuniaun sira. Ninia bei-oan mane ida neʼebé tinan neen sempre prepara hela tuur-fatin ba nia iha reuniaun, no se David la bá reuniaun, ninia bei-oan neʼe sei dehan: “Haʼu hanoin tebes avó iha reuniaun.” Loos, maski liutiha tinan 25 David la tuir reuniaun, maibé agora nia ho ninia feen haksolok tebes tanba bele serbí Jeová hamutuk fali.

15. Oinsá mak sira neʼebé kaben ba tempu kleur ona bele ajuda sira neʼebé foin kaben?

15 Ohin loron Satanás hakarak tebes atu sobu moris família nian. Tan neʼe mak importante tebes ba feen-laʼen sira neʼebé adora Jeová tenke serbisu hamutuk no apoia malu nafatin. Maski ita kaben kleur ona ka foin kaben, ita tenke kuidadu nafatin dalan neʼebé ita koʼalia no buat neʼebé ita halo atu moris kaben nian bele metin nafatin. Se Ita mak kaben ba tempu kleur ona, Ita bele sai nuʼudar ezemplu diʼak ba sira neʼebé foin kaben. Karik Ita bele konvida sira tuir Ita-nia adorasaun família nian. Neʼe sei ajuda sira atu haree katak kaben-naʼin sira presiza hatudu domin ba malu nafatin no iha unidade iha sira-nia moris kaben nian maski sira kaben kleur ona ka foin kaben.—Tito 2:3-7.

“MAI ITA SAʼE BA JEOVÁ NIA FOHO”

16, 17. Maromak nia povu neʼebé iha unidade hein namanas ba saida?

16 Bainhira ema Izraél bá tuir selebrasaun iha Jeruzalein, sira sempre serbisu hamutuk no apoia malu. Sira hamutuk prepara buat hotu neʼebé sira presiza durante sira-nia viajen  neʼe. Sira mós laʼo hamutuk no ajuda malu. Iha templu, sira hotu fó hahiʼi no adora Maromak Jeová hamutuk. (Lucas 2:41-44) Nuneʼe mós ho ita ohin loron, nuʼudar ita prepara daudaun atu tama ba mundu foun, ita hotu tenke iha unidade. Ita mós tenke serbisu hamutuk no apoia malu nafatin. Ita rasik bele halo ida-neʼe iha dalan neʼebé diʼak liután ka lae?

17 Ema iha mundu neʼe la iha unidade no iha hanoin neʼebé la hanesan kona-ba buat barak. Maibé ita agradese tebes ba Jeová tanba nia ajuda ita ohin loron atu iha dame iha ita leet no ajuda ita komprende lia-loos. Maromak Jeová nia povu iha mundu tomak adora nia hodi moris tuir ninia hakarak. Liuliu iha loron ikus sira-neʼe, ita bele haree Jeová nia povu iha unidade tebes. Neʼe hotu kumpre buat neʼebé profeta Isaías no Miquéias fó-hatene nanis katak ita hotu “saʼe ba Jeová nia foho” hamutuk ho unidade. (Isaías [Yesaya] 2:2-4; lee Miquéias [Mikha] 4:2.) [4] Loos duni, ita hotu hein namanas ba tempu neʼebé ita sei haksolok tebes iha mundu foun tanba haree ema hotu iha rai moris hamutuk ho unidade, serbisu hamutuk no apoia malu hodi adora Jeová.

^ [1] (parágrafu 11) Salmo 110:3 Ita-nia povu sei fó sira-nia an ho hakarak rasik iha loron Ita-nia tropa nian. Nuʼudar buat santu no furak, Ita iha joven mane sira hanesan mahon-been iha dadeer-saan.

^ [2] (parágrafu 11) Eclesiastes 12:1 Nuneʼe, hanoin bá ó-nia Kriadór Boot iha ó-nia tempu joven, antes loron susar mosu mai, ka tinan sira toʼo mai bainhira ó sei dehan: “Haʼu la hetan haksolok iha loron sira-neʼe.”

^ [3] (parágrafu 13) Eclesiastes 4:12 No se ema ida bele manán hasoru ida deʼit, naʼin-rua hamutuk bele hamriik hasoru nia. No tali tolu neʼebé bobar hamutuk la bele kotu lalais.

^ [4] (parágrafu 17) Miquéias 4:2 Nasaun barak sei bá no dehan: “Mai, mai ita saʼe ba Jeová nia foho no ba Jacob nia Maromak nia uma. Nia sei hanorin ita kona-ba nia dalan sira, no ita sei laʼo iha ninia dalan sira.” Tanba lei sei sai husi Siaun, no Jeová nia liafuan husi Jeruzalein.