Skip to content

Skip to table of contents

Espíritu fó sasin iha ami-nia laran

Espíritu fó sasin iha ami-nia laran

“Espíritu neʼe rasik fó sasin iha ita-nia laran katak ita mak Maromak nia oan sira.”—ROMA 8:16.

KNANANUK: 5, 14

1-3. Akontesimentu saida mak halo loron Pentekostes sai loron espesiál tebes, no oinsá mak eskritura fó-hatene nanis kona-ba loron neʼe? (Haree dezeñu iha leten.)

LORON neʼe loron-domingu, maizumenus tuku sia dadeer. Domingu neʼe mak loron espesiál ida ba ema neʼebé hela iha Jeruzalein. Neʼe mak loron selebrasaun ida. Iha dadeer neʼe, amlulik boot foin hasaʼe tiha sakrifísiu sira iha templu. Iha tempu neʼebá mós ema hotu haksolok tebes tanba amlulik boot hasaʼe hela sakrifísiu doko bá-mai husi paun fermentu rua neʼebé halo husi fini foun. (Levítico [Imamat] 23:15-20) Hasaʼe sakrifísiu neʼe mós fó sinál ida katak tempu koʼa trigu nian komesa ona. Loron neʼe mak loron Pentekostes, tinan 33.

2 Iha momentu neʼebá, ema la hatene katak akontesimentu importante ida atu akontese daudauk husi uma-andár ida iha sidade laran. Iha fatin neʼe, ema kristaun grupu kiʼik ida hamutuk ema naʼin-120 halibur hela hodi halo orasaun. (Apóstolu 1:13-15) Buat neʼebé atu akontese daudauk mak kona-ba profesia ida neʼebé profeta Joel hatoʼo iha tinan 800 liubá. No akontesimentu neʼe mós atu halo buat hotu neʼebé amlulik boot halo tinan-tinan iha loron Pentekostes sai realidade. (Joel 2:28-32; Apóstolu 2:16-21) Tanbasá mak akontesimentu neʼe importante tebes?

 3 Lee Apóstolu 2:2-4. Iha tempu neʼebá, Maromak haraik ninia espíritu santu ba ema kristaun grupu kiʼik neʼebé halibur daudaun iha andár neʼe. (Apóstolu 1:8) Simu tiha espíritu santu, sira mós komesa fó sasin kona-ba buat neʼebé sira haree no rona, ba ema neʼebé hobur haleʼu sira. Tuirmai apóstolu Pedro esplika ba ema lubun neʼe kona-ba akontesimentu neʼebé foin akontese daudauk neʼe, no nia dehan ba sira: “Hakribi sala bá, no imi ida-idak hetan batizmu hodi Jesus Kristu nia naran atu imi-nia sala bele hetan perdua, no imi sei simu prezente neʼebé lalika selu, katak espíritu santu.” Iha loron neʼe, ema naʼin-3.000 mak hetan batizmu, no espíritu santu mós tun ba sira-neʼe hotu.—Apóstolu 2:37, 38, 41.

4. (a) Tanbasá mak ita hakarak hatene kona-ba loron Pentekostes? (b) Akontesimentu importante saida mak karik mós monu iha loron Pentekostes iha Moisés nia tempu? (Haree nota husi lisaun.)

4 Tanbasá mak loron Pentekostes tinan 33 mós importante ba ita ohin loron? Neʼe tanba amlulik boot neʼebé halaʼo ninia knaar iha templu iha Jeruzalein, nia reprezenta Jesus Kristu. [1] (Haree nota husi lisaun.) Paun fermentu rua neʼebé amlulik boot hasaʼe ba Jeová reprezenta dixípulu sira neʼebé hili husi ema sala-naʼin atu sai Jeová nia oan-hakiak. Husi neʼe mak loke dalan ba ema atu sai “ai-fuan primeiru” neʼebé atu saʼe ba lalehan hodi ukun hamutuk ho Jesus iha Maromak nia Ukun. Ukun neʼe mak Maromak sei uza atu haraik ninia bensaun ba ema hotu neʼebé halo tuir nia. (Tiago 1:18; 1 Pedro 2:9) Tan neʼe mak loron Pentekostes neʼe importante tebes ba ema neʼebé iha esperansa atu moris iha lalehan no mós ba ema neʼebé iha esperansa atu moris iha rai.

OINSÁ EMA HETAN KOSE-MINA

5. Oinsá mak ita hatene katak laʼós ema hotu hetan kose-mina iha dalan neʼebé hanesan deʼit?

5 Se ita mak dixípulu neʼebé simu Maromak nia espíritu santu neʼebé haree hanesan ahi ida tuur iha ita-nia ulun leten, karik ita sei nunka haluha kona-ba akontesimentu neʼe. No liuliu, se ita mak derrepente hatene koʼalia língua oioin, karik ita la duvida tan katak Maromak hili ona ita liuhusi espíritu santu atu sai ema kose-mina ida. (Apóstolu 2:6-12) Maibé ema hotu hetan kose-mina iha dalan neʼebé hanesan deʼit ho grupu kiʼik naʼin-120 iha Jeruzalein ka lae? Lae. Tanba ema rihun ba rihun iha Jeruzalein neʼebé hetan batizmu iha loron neʼebá, sira hetan kose-mina kedas, maibé Bíblia la hatete katak ahi mós tuur iha sira-nia ulun leten. (Apóstolu 2:38) No mós laʼós ema hotu mak hetan kose-mina iha tempu batizmu nian. Ezemplu ida mak kona-ba ema Samaria. Sira hetan batizmu ba tempu uitoan tiha mak foin hetan kose-mina. (Apóstolu 8:14-17) Iha mós situasaun úniku ida neʼebé hatudu katak ema balu neʼebé seidauk hetan batizmu mós hetan ona kose-mina. Ema sira-neʼe mak Cornélio ho ninia uma laran.—Apóstolu 10:44-48.

6. Ema kose-mina hotu simu saida, no neʼe halo sira fiar saida?

6 Neʼe duni, laʼós ema hotu mak hetan kose-mina iha dalan neʼebé hanesan. Balu bele hatene kedas katak Jeová hili ona sira, maibé balu presiza tempu uitoan mak foin simu realidade neʼe. Maski nuneʼe, ema kose-mina hotu simu buat neʼebé apóstolu Paulo hatete tuirmai neʼe: “Bainhira imi fiar ona, Maromak uza ninia espíritu santu neʼebé nia promete ona atu tau sinál ba imi no nia halo ida-neʼe liuhusi Kristu. Espíritu santu mak hanesan garantia ida neʼebé hatudu katak ita sei simu ita-nia liman-rohan.” (Éfeso 1:13, 14) Jeová uza ninia espíritu santu mak atu fó garantia ba ema ida katak nia hetan ona kose-mina. No liuhusi espíritu santu mak ema ida bele hatene ho ninia laran katak nia iha evidénsia atu moris ba nafatin iha lalehan.—Lee 2 Korinto 1:21, 22; 5:5.

7. Ema kose-mina ida-idak tenke halo saida atu bele simu ninia kolen iha lalehan?

 7 Se nuneʼe, ema neʼebé hetan ona kose-mina hetan mós garantia katak nia sei bá duni lalehan iha futuru ka lae? Lae. Tanba hetan kose-mina hanesan hetan konvite deʼit. Se ema neʼe mak hakarak simu ninia kolen atu saʼe ba lalehan, nia tenke hatudu laran-metin ba Jeová toʼo rohan. Hodi nuneʼe mak apóstolu Pedro dehan: “Tan neʼe maun-alin sira, hakaʼas an liután atu laran-metin nafatin nuʼudar ema neʼebé Maromak bolu no hili ona; se imi kontinua halo buat sira-neʼe imi sei la monu. Tuir loloos, hodi halo nuneʼe, imi sei simu bensaun furak atu tama ba ukun rohan-laek husi ita Naʼi no Salvadór Jesus Kristu.” (2 Pedro 1:10, 11) Loos duni, ema kose-mina ida-idak tenkesér hakaʼas an atu hatudu laran-metin ba Jeová, selae ninia konvite atu bá lalehan mós sei sai saugati deʼit.—Ebreu 3:1; Apokalipse 2:10.

OINSÁ MAK EMA IDA HATENE?

8, 9. (a) Tanbasá mak ema barak sente susar atu bele komprende kona-ba prosesu kose-mina nian? (b) Oinsá mak ema ida hatene katak nia hetan ona konvite atu bá lalehan?

8 Ohin loron, Jeová nia povu barak mak sente susar tebes atu bele komprende kona-ba prosesu kose-mina nian. Neʼe baibain, tanba Jeová nunka kria ema atu bá lalehan, maibé atu moris ba nafatin iha rai. No se ema ida mak laʼós ema kose-mina, nia mós sei nunka komprende kona-ba prosesu neʼe. (Gênesis [Kejadian] 1:28; Salmo [Mazmur] 37:29) Jeová hili ema atu bá ukun nuʼudar liurai no amlulik iha lalehan, neʼe laʼós prosesu baibain, neʼe arranju espesiál ida. Tan neʼe mak bainhira ema ida hetan konvite hanesan neʼe, neʼe troka hotu ema neʼe nia hanoin no esperansa.—Lee Éfeso 1:18.

9 Maibé oinsá mak ema ida bele hatene katak nia hetan ona konvite atu bá lalehan? Bainhira apóstolu Paulo hakerek karta ba ema kose-mina sira iha Roma, nia hatete ba sira: “Maromak nia espíritu la lori ita atu sai atan no halo ita taʼuk, maibé lori ita atu sai nuʼudar oan-hakiak, no ho espíritu neʼe mak ita bolu: ‘Abba, Aman!’ Espíritu neʼe rasik fó sasin iha ita-nia laran katak ita mak Maromak nia oan sira.” (Roma 1:7; 8:15, 16) Husi neʼe ita bele haree katak Maromak uza ninia espíritu santu mak hodi halo ema neʼe hatene katak nia hetan ona konvite atu bá lalehan ukun hamutuk ho Jesus iha futuru.—1 Tesalónika 2:12.

10. Eskritura iha 1 João 2:27 hatete ba ema kose-mina sira katak “imi la presiza tan atu ema ida hanorin imi”, neʼe katak sá?

10 Ema kose-mina la presiza ema seluk mak fó-hatene sira katak sira hetan ona kose-mina. Jeová mak ida neʼebé book sira-nia neon no laran hodi hatene katak sira mak ema kose-mina duni. Hodi nuneʼe mak apóstolu João hatete ba ema kose-mina sira: “Maromak neʼebé santu hili ona imi no imi hotu hatene lia-loos. No kona-ba imi, tanba Maromak hili ona imi liuhusi espíritu santu no espíritu neʼe nafatin hela iha imi, entaun imi la presiza tan atu ema ida hanorin imi; maibé Maromak uza espíritu neʼe atu hanorin imi kona-ba buat hotu, no neʼe loos no la bosok. Entaun kontinua sai ida deʼit ho nia hanesan espíritu hanorin ona imi atu halo.” (1 João 2:20, 27) Ema kose-mina sira hanesan ho ita hotu, sira mós presiza simu hanorin husi Jeová. Maibé kona-ba hetan kose-mina, sira la presiza ema seluk mak fó-hatene sira katak sira hetan ona kose-mina, tanba buat neʼebé halo sira fiar ho laran tomak katak sira hetan ona kose-mina mak Jeová nia forsa neʼebé makaʼas liu hotu, ninia espíritu santu!

SIRA “MORIS DALA IDA TAN”

11, 12. Ema kose-mina ida bele hanoin oinsá, maibé nia rasik fiar oinsá?

11 Bainhira espíritu santu halo ema ida fiar  katak nia mak ema neʼebé hetan ona kose-mina, neʼe halo mudansa boot ida ba ninia moris. Jesus esplika katak ba ema neʼe, ninia laran sente hanesan “moris dala ida tan” ka nia sente hanesan hetan “moris ida mai husi leten”. [2] (Haree nota husi lisaun.) (João 3:3, 5; nota-rodapé.) No Jesus esplika liután katak: “Keta hakfodak tanba deʼit haʼu dehan ba ó: Imi tenke moris dala ida tan. Anin huu ba fatin neʼebé nia hakarak, no imi rona ninia lian, maibé imi la hatene neʼe mai husi neʼebé no atu bá neʼebé. Nuneʼe mós ho ema sira neʼebé moris ona husi espíritu.” (João 3:7, 8) Tan neʼe susar atu esplika ba ema neʼebé laʼós ema kose-mina kona-ba ema kose-mina ida sente oinsá bainhira Maromak hili sira.

12 Ema sira neʼebé hetan kose-mina karik bele hanoin hanesan neʼe: ‘Tanbasá mak hili haʼu? Tanbasá la hili ema seluk?’ Karik sira bele hanoin katak sira la serve atu hetan priviléjiu neʼe. Maibé sira rasik fiar katak Jeová hili ona sira. Neʼe halo sira-nia laran sente agradese tebes no nakonu ho solok. Ema sira-neʼe nia sentimentu mak hanesan ho buat neʼebé Pedro dehan: “Hahiʼi bá Maromak no Aman husi ita Naʼi Jesus Kristu, tanba tuir ninia laran-sadiʼa neʼebé boot mak nia halo ita moris mai dala ida tan ho esperansa rohan-laek nian liuhusi Jesus Kristu nia moris-hiʼas husi mate. Nia halo ita moris mai fali atu simu liman-rohan neʼebé la sai dodok, santu, no sei tahan ba nafatin. Maromak rai hela liman-rohan neʼe ba imi iha lalehan.” (1 Pedro 1:3, 4) Bainhira ema kose-mina ida lee liafuan sira-neʼe, sira fiar ho laran tomak katak Jeová mak koʼalia rasik ho sira.

13. Iha dalan saida mak ema ida nia hanoin troka bainhira nia hetan kose-mina, no saida mak halo nia troka ninia hanoin neʼe?

13 Antes ema hetan kose-mina, sira mós hafolin tebes sira-nia esperansa atu moris ba nafatin iha rai. Sira mós hakarak tebes atu hein ba tempu neʼebé Jeová atu halakon hotu buat aat sira husi mundu neʼe no halo mundu sai fali paraízu. Karik sira mós hanoin hela oinsá atu simu fali sira-nia família ka belun sira neʼebé sei hetan moris-hiʼas iha mundu foun. Sira mós hein atu harii rasik sira-nia uma no han husi sira rasik nia toʼos. (Isaías [Yesaya] 65:21-23) Maibé agora sira la hanoin ona atu halo buat sira-neʼe, tanbasá? Neʼe laʼós tanba sira la hafolin ona esperansa sira-neʼe, ka tanba sira estrese hela ho susar ruma mak sira troka sira-nia hanoin neʼe. Sira laiha ona esperansa atu moris iha rai laʼós tanba sira sente katak moris ba nafatin iha rai sei halo sira sente baruk, ka tanba sira hakarak hatene moris iha lalehan sente oinsá. Lae, sira-nia esperansa troka tanba espíritu santu. Iha tempu neʼebé sira hetan kose-mina, espíritu santu mós halo sira-nia hanoin no esperansa troka hotu.

14. Oinsá mak ema kose-mina sira hanoin kona-ba sira-nia moris iha mundu neʼe?

14 Se nuneʼe, ita bele dehan katak ema neʼebé hetan kose-mina hakarak tebes atu mate ka lae? Apóstolu Paulo fó sai sira-nia sentimentu katak tuir loloos sira lakohi atu mate. (2 Korinto 5:4) Sira gosta atu moris nafatin hodi serbí Jeová hamutuk ho sira-nia belun no família sira. Maibé iha sira-nia neon, sira hanoin nafatin katak Maromak fó ona esperansa furak ida ba sira atu bá lalehan iha futuru.—1 Korinto 15:53; 2 Pedro 1:4; 1 João 3:2, 3; Apokalipse 20:6.

MAROMAK HILI ONA ITA KA LAE?

15. Buat saida deʼit mak la hatudu katak ema ida hetan ona kose-mina?

15 Dala ruma ita hanoin ka lae, karik ita mós ema kose-mina ida? Se ita mak sente katak karik ita mós ema kose-mina ida, hanoin toʼok pergunta importante sira tuirmai neʼe. Ita sente ita iha laran-manas la hanesan baibain  atu bá haklaken ka lae? Ita badinas tebes atu estuda Maromak nia Liafuan no ita gosta keʼe “buat kleʼan husi Maromak” ka lae? (1 Korinto 2:10) Ita simu ona bensaun espesiál husi Jeová ba ita-nia haklaken ka lae? Ita badinas tebes atu halo Jeová nia hakarak ka lae? Iha ita-nia laran ita sente katak ita iha responsabilidade atu ajuda ema seluk laʼo ba oin iha lia-loos ka lae? Ita haree ona ho matan rasik katak Jeová ajuda ona ita iha ita-nia moris ka lae? Se ita-nia hatán mak, “Loos, neʼe mak buat sira neʼebé haʼu halo no sente daudauk,” neʼe dehan katak ita mak ema kose-mina duni ka lae? Lae. Tanbasá? Tanba laʼós ema kose-mina deʼit mak sente ka halo buat sira-neʼe. Jeová fó ninia espíritu santu ba ninia atan hotu, ema neʼebé hetan esperansa atu moris iha rai mós simu. Maibé realidade mak neʼe, se ita mak hanoin hela karik ita mós ema kose-mina ida, liafuan “karik” neʼe hatudu katak ita laʼós ema kose-mina. Tanba ema neʼebé hetan kose-mina, nia la dehan karik, maibé nia hatene duni katak nia mak ema kose-mina ida!

16. Oinsá mak ita hatene katak laʼós ema hotu neʼebé Jeová fó espíritu santu hetan mós esperansa atu moris iha lalehan?

16 Husi Bíblia ita bele lee kona-ba Jeová nia atan barak mak nia fó ninia espíritu santu ba sira, maibé Bíblia la temi katak sira mós iha esperansa atu moris ba nafatin iha lalehan. Ezemplu ida mak kona-ba João Batista. Maski Jesus gaba tebes nia, maibé Jesus hatete katak João Batista sei la simu kolen iha lalehan. (Mateus 11:10, 11) Ezemplu seluk mak kona-ba David. Nia mós ema neʼebé Jeová haraik espíritu santu. No nia hatene buat kleʼan barak kona-ba Jeová no Jeová mós leno nia hodi hakerek eskritura balu. (1 Samuel 16:13; Marcos 12:36) Maibé iha loron Pentekostes apóstolu Pedro hatete katak David “la saʼe ba lalehan”. (Apóstolu 2:34) Maski Jeová fó ninia espíritu santu ba ema sira-neʼe hodi halo buat oioin, maibé espíritu santu neʼe la fó sasin ba sira katak sira mós Jeová hili atu moris iha lalehan. Neʼe la dehan katak ema sira-neʼe la serve ka menus buat ruma, maibé tan deʼit esperansa neʼebé Jeová fó ba sira mak atu moris-hiʼas iha mundu foun, laʼós iha lalehan.—João 5:28, 29; Apóstolu 24:15.

17, 18. (a) Ohin loron maioria husi Jeová nia atan iha esperansa saida? (b) Iha lisaun tuirmai ita sei koʼalia kona-ba pergunta saida deʼit?

17 Ohin loron, maioria husi Maromak nia atan la hetan esperansa atu bá lalehan. Sira-nia esperansa mak hanesan ho David, João Batista, no Abraão sira nian, atu moris iha mundu foun bainhira Maromak nia governu ukun ona mundu tomak. (Ebreu 11:10) Ohin loron, iha loron ikus sira-neʼe, ema neʼebé hetan ona kose-mina, hela uitoan deʼit mak sei moris iha rai. (Apokalipse 12:17) Ida-neʼe hatudu katak maioria husi 144.000 neʼebé hetan ona kose-mina mate ona no bá lalehan.

18 Se nuneʼe, oinsá mak ema neʼebé iha esperansa atu moris iha rai haree kona-ba ema neʼebé hatete katak sira hetan ona kose-mina? Se ita haree ema ida husi ita-nia kongregasaun komesa han paun no hemu tua iha Naʼi nia Han Kalan, ita tenke halo saida? Ita presiza hanoin barak ka lae se ita haree katak ema neʼebé hetan kose-mina aumenta barak liután tinan-tinan? Ita sei koʼalia kona-ba pergunta sira-neʼe iha lisaun tuirmai.

^ [1] (parágrafu 4) Karik loron neʼebé monu ba loron Pentekostes mak loron neʼebé uluk Moisés simu Ukun-Fuan iha Sinai. (Êxodo [Keluaran] 19:1) Se neʼe mak loos, entaun loron neʼebé Moisés aprezenta nasaun Izraél ba aliansa Ukun-Fuan nian, monu mós iha loron Pentekostes neʼebé Jesus aprezenta nasaun foun ida, Izraél espirituál nian, ba aliansa foun.

^ [2] (parágrafu 11) Atu hatene liután saida mak moris dala ida tan, lee iha Menara Pengawal, 1 Abríl 2009, pájina 3-11.