Skip to content

Skip to table of contents

“Kontinua hadomi malu nuʼudar maun-alin” bá!

“Kontinua hadomi malu nuʼudar maun-alin” bá!

“Kontinua hadomi malu nuʼudar maun-alin.”—EBREU 13:1.

KNANANUK: 3, 20

1, 2. Tanba razaun saida mak apóstolu Paulo hakerek karta ba ema kristaun Ebreu sira?

IHA tinan 61, kongregasaun kristaun sira iha rai-Izraél moris iha situasaun dame. Iha tempu neʼebá apóstolu Paulo iha hela komarka laran iha Roma, no ninia hanoin mak lakleur tan nia besik ona atu sai husi komarka. Ninia belun Timóteo ema foin husik livre, no sira naʼin-rua nia planu mak atu ba vizita irmaun sira seluk iha Judeia. (Ebreu 13:23) Maibé ita hatene katak tuir buat neʼebé Jesus fó sai nanis, tinan lima tan soldadu sira sei bá haleʼu Jeruzalein. Tan neʼe, ema kristaun sira iha Judeia, no liuliu ba sira neʼebé hela iha Jeruzalein tenke foti desizaun lalais kedas. Jesus fó-hatene nanis ba sira katak bainhira sira haree buat hanesan neʼe atu akontese, sira tenke halai ona.—Lucas 21:20-24.

2 Iha tinan 28 nia laran husi tempu Jesus fó sai profesia neʼe, ema kristaun Judeu sira neʼebé hela iha Izraél hasoru ona terus oioin husi ema, no sira hatudu laran-metin nafatin. (Ebreu 10:32-34) Maibé Paulo hatene katak lakleur tan sira sei hasoru terus boot ida neʼebé sei koko tebes sira-nia fiar. (Mateus 24:20, 21; Ebreu 12:4) Paulo hakarak tebes sira atu manán hasoru terus sira-neʼe, tan neʼe sira presiza atu tahan no iha fiar, fiar neʼebé metin hodi bele proteje sira-nia moris. (Lee Ebreu 10:36-39.) Tan  neʼe mak Jeová nia espíritu santu leno Paulo atu hakerek karta ida hodi ajuda sira. Karta neʼe mak ohin loron ita bolu nuʼudar livru Ebreu nian.

3. Tanbasá mak apóstolu Paulo nia karta mós diʼak ba ita hotu neʼebé moris ohin loron?

3 Tanbasá mak apóstolu Paulo nia karta neʼe mós diʼak ba ita hotu neʼebé moris ohin loron? Tanba ita-nia situasaun mós atu hanesan ho sira. Ita moris iha tempu neʼebé mosu daudauk “problema barak neʼebé susar atu tahan”, no nuʼudar Jeová nia povu, ita mós hasoru terus oioin neʼebé ema fó ba ita. (2 Timóteo 3:1, 12) Tanba ita-nia domin ba Maromak no fiar neʼebé metin mak ajuda ita tahan hasoru susar sira-neʼe. Karik barak husi ita mak hela iha dame nia laran, ema seluk la fó terus. Maski nuneʼe, ita hotu tenkesér fó atensaun ba buat importante ida, neʼe mak lakleur tan ita hotu sei hasoru terus neʼebé boot liu hotu neʼebé sei koko makaʼas ita-nia fiar!—Lee Lucas 21:34-36.

4. Eskritura ba tinan 2016 mak saida, no tanbasá mak eskritura neʼe diʼak?

4 Saida mak bele ajuda ita atu hasoru situasaun neʼebé lakleur tan besik mosu? Husi livru Ebreu, apóstolu Paulo hakerek kona-ba buat barak neʼebé bele ajuda ita atu iha fiar neʼebé metin. Buat importante ida mak hakerek iha kapítulu 13, versíkulu 1 husi livru Ebreu neʼebé uza ba eskritura tinan 2016 nian. Liafuan sira-neʼe mak: “Kontinua hadomi malu nuʼudar maun-alin.”—Ebreu 13:1.

Eskritura ba tinan 2016 mak: “Kontinua hadomi malu nuʼudar maun-alin.” —Ebreu 13:1

SAIDA MAK HADOMI MALU NUʼUDAR MAUN-ALIN?

5. Hadomi malu nuʼudar maun-alin mak domin hanesan saida?

5 Hadomi malu nuʼudar maun-alin mak domin hanesan saida? Liafuan “domin” neʼebé Paulo uza foti husi lia-gregu, filadélfia, neʼe dehan katak “iha sentimentu domin no hanoin ba maun-alin ida”. Hadomi malu nuʼudar maun-alin mak domin neʼebé forte, no besik ba malu. Sentimentu domin neʼe mak baibain ema hatudu ba família ka belun neʼebé besik tebes. (João 11:36) Ita la finje deʼit atu sai irmaun-irmán, maibé ita mak irmaun-irmán duni. (Mateus 23:8) Tan neʼe mak liafuan sira tuirmai neʼe esplika sentimentu neʼe iha dalan neʼebé diʼak tebes: “Hadomi malu tebetebes hanesan maun-alin. Buka uluk atu hatudu respeitu ba malu.” (Roma 12:10) Tanba iha domin neʼe no domin kristaun loos mak Maromak nia povu bele iha relasaun neʼebé besik ba malu.

6. Ba ema kristaun neʼebé loos, domin ba malu nuʼudar maun-alin katak sá?

6 Matenek-naʼin ida hatete katak: “Só ema kristaun nia livru sira mak baibain uza liafuan hadomi malu nuʼudar maun-alin, iha liʼur ema ladún uza liafuan sira-neʼe.” Iha ema judeu sira-nia tempu, dala ruma ema uza liafuan “maun-alin” atu refere mós ba ema seluk, laʼós ba família deʼit. Maski nuneʼe, liafuan neʼe sira uza deʼit ba ema judeu sira, laʼós ba ema husi nasaun seluk. Maibé ita ema kristaun neʼebé loos la fihir nasaun, ita simu ema hotu. (Roma 10:12) Nuʼudar irmaun no irmán, ita hotu simu hanorin husi Jeová atu hatudu domin ba malu. (1 Tesalónika 4:9) Maibé tanbasá mak importante atu kontinua hatudu domin ba malu nuʼudar maun-alin?

TANBASÁ MAK IMPORTANTE ATU KONTINUA HADOMI MALU NUʼUDAR MAUN-ALIN?

7. (a) Tanba razaun importante saida mak ita hakarak hadomi malu nuʼudar maun-alin? (b) Razaun saida tan mak ita hakarak hametin domin ba malu nuʼudar maun-alin?

7 Razaun importante liu atu hadomi malu nuʼudar maun-alin mak tanba Jeová hakarak ita halo nuneʼe. Tanba se ita mak la hadomi ita-nia irmaun-irmán sira, ita labele dehan katak ita hadomi Maromak. (1 João  4:7, 20, 21) Razaun seluk tan mak tanba ita moris iha tempu susar sira-neʼe, ita presiza duni ita-nia maluk sira. Bainhira apóstolu Paulo hakerek ninia karta ba ema kristaun ebraiku sira, nia hatene katak lakleur tan sira balu sei halai husik hela sira-nia uma no sasán hotu. Jesus mós fó-hatene nanis katak iha tempu neʼebá mak tempu neʼebé susar tebes ba sira. (Marcos 13:14-18; Lucas 21:21-23) Tan neʼe mak ema kristaun sira-neʼe presiza hametin liután sira-nia domin ba malu.—Roma 12:9.

8. Agora daudaun ita presiza halo saida antes terus boot mosu mai?

8 Lakleur tan ita sei hasoru terus boot ida neʼebé ema nunka hasoru. (Marcos 13:19; Apokalipse 7:1-3) Iha tempu neʼebá ita tenke rona tuir konsellu neʼe: “Bá, haʼu-nia povu, tama ba ó-nia kuartu laran, no taka tiha odamatan. Subar an ba tempu uitoan toʼo Maromak nia hirus liu tiha.” (Isaías [Yesaya] 26:20) Karik “kuartu” neʼe mak ita-nia kongregasaun sira, fatin neʼebé ita halibur hamutuk ho ita-nia irmaun-irmán atu adora Jeová. Maibé halibur hamutuk deʼit latoʼo, tanba Paulo hatete ba kristaun ebraiku sira katak sira tenke mós uza oportunidade neʼe “atu hatudu domin no hahalok diʼak”. (Ebreu 10:24, 25) Agora mak tempu atu haburas domin ba malu nuʼudar maun-alin, tanba neʼe sei ajuda ita atu tahan hasoru terus no susar oioin neʼebé karik ita sei hasoru iha futuru.

9. (a) Oportunidade diʼak saida mak ita iha atu bele hatudu domin ba malu nuʼudar maun-alin? (b) Temi toʼok ezemplu balu neʼebé hatudu katak Jeová nia povu hatudu duni domin ba malu.

9 Ohin loron mós ita presiza iha domin maun-alin neʼebé metin ba malu. Ita-nia irmaun-irmán barak mak hasoru daudauk susar husi rai-nakdoko, bee-saʼe, anin-fuik, tsunami, ka dezastre naturais seluk. Balu tan hetan susar no terus tanba ita-nia fiar. (Mateus 24:6-9) Laʼós problema sira-neʼe deʼit, loroloron ita mós presiza hasoru problema ekonomia nian husi mundu aat neʼe. (Apokalipse 6:5, 6) Maibé nuʼudar problema sira-neʼe aumenta, ida-neʼe mós fó oportunidade diʼak ba ita atu hatudu ita-nia domin neʼebé kleʼan ba malu. Maski “ema barak nia domin sei sai malirin”, maibé ita-nia domin ba malu nuʼudar maun-alin sei kontinua toʼo rohan.—Mateus 24:12. [1]—Haree nota husi lisaun.

OINSÁ MAK ITA BELE KONTINUA HATUDU DOMIN BA MALU NUʼUDAR MAUN-ALIN?

10. Ita sei koʼalia kona-ba saida?

10 Oinsá mak ita bele kontinua atu hatudu domin ba malu nuʼudar maun-alin maski ita hasoru hela problema oioin iha ita-nia moris? Iha dalan saida deʼit mak ita bele hatudu katak ita iha duni domin hanesan neʼe ba ita-nia irmaun-irmán sira? Bainhira apóstolu Paulo temi tiha katak ita tenke “kontinua hadomi malu nuʼudar maun-alin”, nia mós koʼalia kona-ba dalan sira neʼebé ita bele hatudu domin neʼe. Agora mai ita koʼalia kona-ba dalan neen oinsá atu hatudu domin neʼe.

11, 12. Ita presiza hanoin kona-ba saida bainhira hatudu laran-diʼak? (Haree foto iha pájina 7.)

11 “Keta haluha atu hatudu laran-diʼak.” (Lee Ebreu 13:2.) Liafuan orijinál neʼebé foti hodi tradús ba “laran-diʼak” mós iha signifika katak hadomi ema neʼebé ita la koñese. Liafuan sira-neʼe halo ita hanoin fali kona-ba Abraão no Lot. Bainhira bainaka neʼebé sira la koñese bá vizita sira, sira naʼin-rua hatudu laran-diʼak ba bainaka sira-neʼe, no sira la hatene katak afinál bainaka sira-neʼe mak anju. (Gênesis [Kejadian] 18:2-5; 19:1-3) Apóstolu Paulo uza ezemplu kona-ba Abraão no Lot tanba nia hakarak anima kristaun ebreu sira mós atu hatudu domin ba malu liuhusi hatudu laran-diʼak.

12 Ita mós hatudu laran-diʼak ba ema seluk hodi konvida sira ba ita-nia uma atu han ka  halimar hodi anima sira ka lae? Karik ita ladún koñese didiʼak ita-nia katuas área ho ninia feen, maibé ita bele hakaʼas an nafatin atu konvida sira ba ita-nia uma ka lae? (3 João 5-8) Hatudu laran-diʼak laʼós dehan katak ita presiza teʼin hanesan halo festa boot ka hola hahán karun. Ita-nia objetivu loloos mak tenke anima ema, laʼós atu gabasola ita-nia an. No ita mós la bele iha hanoin atu konvida deʼit ema neʼebé aban-bainrua ita bele aproveita. (Lucas 10:42; 14:12-14) Iha ita-nia moris, iha buat barak mak bele preokupa ita-nia tempu, maibé importante tebes ba ita atu la husik buat sira-neʼe atu halo ita haluha “hatudu laran-diʼak”!

13, 14. Oinsá mak ita bele “kontinua hanoin kona-ba sira neʼebé iha dadur laran”?

13 “Kontinua hanoin kona-ba sira neʼebé iha dadur laran.” (Lee Ebreu 13:3.) Ema dadur sira neʼebé apóstolu Paulo temi mak irmaun-irmán sira neʼebé ema kaer tanba sira-nia fiar. Iha tempu neʼebé nia hakerek ninia karta neʼe, nia mós sulan hela iha kadeia ba tinan haat ona. (Filipe 1:12-14) Nia gaba irmaun sira tanba sira mós “hatudu domin ba sira neʼebé iha komarka laran”. (Ebreu 10:34) Bainhira iha prizaun, iha irmaun balu mak bá rasik hodi ajuda Paulo, maibé barak mak la bele bá ajuda tanba hela dook husi neʼebá. Entaun oinsá mak sira mós bele nafatin atu fó ajuda ba Paulo? Sira bele ajuda nia liuhusi sira-nia orasaun.—Ebreu 13:18, 19.

14 Ohin loron, karik ita la bele bá rasik toʼo prizaun atu fó ajuda ba ita-nia irmaun-irmán sira. Maibé ita bele hatudu katak ita hanoin no iha nafatin domin ba sira liuhusi halo orasaun beibeik kona-ba sira. Porezemplu, ita bele halo orasaun kona-ba ita-nia irmaun-irmán ho sira-nia oan neʼebé ema hatama ba kadeia iha rai-Eritreia. Inklui mós irmaun naʼin-tolu neʼebé ema sulan sira iha komarka ba tinan 20 resin ona. Sira mak irmaun Paulos Eyassu, Isaac Mogos, no Negede Teklemariam.

15. Oinsá mak ita bele “respeitu moris kaben nian”?

15 “Ema hotu tenke respeitu moris kaben nian.” (Lee Ebreu 13:4.) Ita mós bele hatudu katak ita iha domin maun-alin ba malu liuhusi morál. (1 Timóteo 5:1, 2) Porezemplu, se ita mak halo sala-foʼer ho irmaun ka irmán ida, neʼe bele estraga ema neʼe no ninia família nia moris. Neʼe mós bele halo ita-nia irmaun-irmán sira la konfia tan ho ita. (1 Tesalónika 4:3-8) Hanesan neʼe mós ho la’en neʼebé haree pornografia, hanoin toʼok ninia feen bele sente oinsá se nia kaer toman ninia la’en. La’en nia hahalok neʼe bele hatudu katak nia hadomi feen ka iha respeitu ba arranju kaben nian ka lae?—Mateus 5:28.

16. Oinsá mak kontente husi laran bele ajuda ita atu hatudu domin ba malu nuʼudar maun-alin?

16 “Haksolok bá ho buat neʼebé imi iha.” (Lee Ebreu 13:5.) Laran kontente neʼebé loos mai husi ita-nia fiar ba Jeová katak nia sei tau matan ba ita-nia presiza sira. Neʼe halo ita la hanoin demais liu kona-ba sasán. (1 Timóteo 6:6-8) Kontente neʼebé mai husi laran bele ajuda ita atu hanoin nafatin katak ita-nia relasaun diʼak ho Jeová no ho irmaun-irmán sira mak importante liu fali osan ka sasán. Ema neʼebé kontente, nia nunka muramura, ibun-ibun, ka buka ema seluk nia sala, no nia la laran-moras ba ema ka la hatudu hahalok kaan ka karak ba ema seluk. Ema hanesan neʼe sempre hatudu laran-luak ba ema seluk tanba nia iha domin ba malu nuʼudar maun-alin.—1 Timóteo 6:17-19.

17. Oinsá mak aten-brani bele ajuda ita atu hatudu domin ba malu?

17 “Sai aten-brani liu.” (Lee Ebreu 13:6.) Fiar ba Jeová bele ajuda ita atu tahan hasoru susar naran deʼit ho aten-brani liután. Aten-brani mak halo ita sempre iha hanoin  neʼebé pozitivu. No bainhira ita hatudu domin ba malu hamutuk ho hanoin neʼebé pozitivu, neʼe sei book ita atu fó anima no konsola ita-nia irmaun-irmán sira. (1 Tesalónika 5:14, 15) No tanba ita-nia aten-brani neʼe mak bainhira terus boot mai iha futuru, ita mós sei la taʼuk atu “hamriik loos” no foti ita-nia ulun nafatin tanba ita hatene katak ita-nia salvasaun besik ona.—Lucas 21:25-28.

Ita hafolin serbisu neʼebé katuas sira halo mai ita ka lae? (Haree parágrafu 18)

18. Oinsá mak ita bele hatudu liután ita-nia domin ba katuas kongregasaun sira?

18 “Hanoin-hetan sira neʼebé dirije imi iha imi-nia leet.” (Lee Ebreu 13:7, 17.) Bainhira ita haree katuas sira serbisu makaʼas ba ita, neʼe halo ita hakarak hatudu liután domin ba sira no hafolin liután sira-nia serbisu. Ita hakarak apoia sira atu sira bele halaʼo sira-nia knaar ho solok, laʼós ho obriga an deʼit. Se ita mak rona no halo tuir sira, ita mós bele hatete katak ita “hafolin tebes sira no hadomi sira tanba sira-nia serbisu”.—1 Tesalónika 5:13.

HALO HO DIʼAK LIUTÁN

19, 20. Oinsá mak ita bele kontinua hatudu domin ba malu nuʼudar maun-alin iha dalan neʼebé diʼak liután?

19 Ema barak hatene katak Jeová nia povu hatudu duni domin ba malu nuʼudar maun-alin. Iha apóstolu Paulo nia tempu mós ema hatene kona-ba neʼe. Tan neʼe mak Paulo anima ninia maluk fiar-naʼin sira atu “kontinua halo ida-neʼe liután”. (1 Tesalónika 4:9, 10) Loos duni, oportunidade atu halo diʼak liután nunka iha rohan!

20 Ba ita ohin loron, bainhira ita haree ba liafuan sira iha eskritura tinan nian, diʼak atu husu ba ita-nia an: Oinsá mak haʼu bele hatudu laran-diʼak liután? Oinsá mak haʼu bele hanoin nafatin ita-nia irmaun-irmán sira neʼebé iha hela prizaun laran? Haʼu hatudu respeitu ba Maromak nia arranju kona-ba kaben ka lae? Saida mak bele ajuda haʼu atu iha solok ho buat neʼebé haʼu iha? Oinsá mak haʼu bele tau fiar liután ba Jeová? Oinsá mak haʼu bele apoia liután sira neʼebé dirije hela ita? Se ita mak halo tuir duni buat hotu neʼe, ita bele hatudu katak liafuan sira iha eskritura tinan nian laʼós tara iha Reuniaun-Fatin atu amostra deʼit. Maibé neʼe fó-hanoin duni mai ita katak ita tenke “kontinua hadomi malu nuʼudar maun-alin”.—Ebreu 13:1.

^ [1] (parágrafu 9) Atu hatene oinsá mak Testemuña ba Jeová hatudu domin ba malu nuʼudar maun-alin iha tempu dezastre naturais, bele haree husi Menara Pengawal, 15 Jullu 2002, pájina 8-9, no Saksi-Saksi Yehuwa—Pemberita Kerajaan Allah, kapítulu 19.