Skip to content

Skip to table of contents

Burnett, Simone, Eston, no Caleb

Sira fó sira-nia an ho hakarak rasik—iha rai-Oseánia

Sira fó sira-nia an ho hakarak rasik—iha rai-Oseánia

RENEÉ ho tinan maizumenus 35, boot iha família ida neʼebé laran-manas ba lia-loos iha rai-Austrália. Nia hatete: “Dala barak ami muda ba área seluk neʼebé presiza haklaken-naʼin tan. Haʼu-nia apá-amá sempre kria atividade neʼebé halo ami labarik sira kontente hodi ami la bele sai baruk. Tan neʼe, haʼu hakarak haʼu-nia oan naʼin-rua atu iha moris hanesan.”

 Reneé nia la’en, Shane, foin mak besik atu tinan 40, nia mós iha hanoin neʼebé hanesan. Nia hatete: “Bainhira ami-nia oan segundu moris, ami lee iha Livru Haklaken kona-ba família ida neʼebé muda ba rai-Tonga atu haklaken iha illa sira iha neʼebá ho sira-nia ró. * Lee kona-ba neʼe book ami atu hakerek ba sukursál Austrália no Novazelándia nian atu husu iha rai neʼebé mak presiza tan ajuda atu haklaken. * Sira konvida ami ba rai ida neʼebé ami foin lee, neʼe mak rai-Tonga!”

Jacob, Reneé, Skye, no Shane

Shane, Reneé no sira-nia oan, Jacob no Skye hela iha Tonga maizumenus tinan ida. Maibé tanba violénsia mosu iha neʼebá, sira fila fali ba Austrália. Maski nuneʼe, sira la haluha sira-nia hakarak atu aumenta liután sira-nia serbisu ba Maromak. Iha tinan 2011 sira muda fali ba illa Norfolk, iha rai Pasífiku, kilómetru 1.500 dook husi Austrália nia parte Leste. Sira sente oinsá hodi muda ba rai neʼe? Jacob, tinan 14, hatete, “Jeová tau matan didiʼak ami, no ami gosta tebes haklaken iha neʼe!”

HALO PLANU NUʼUDAR FAMÍLIA

Hanesan Shane, Reneé, no sira-nia oan, família seluk mós prontu hodi muda bá serbí iha fatin seluk. Tanba razaun saida mak sira hakarak halo hanesan neʼe?

“Ema barak gosta tebes rona kona-ba lia-loos, no ami hakarak muda iha neʼebá hodi ajuda sira neʼebé interese atu estuda Bíblia semana-semana.”—Burnett

Burnett no Simone, maizumenus tinan 35, no sira-nia oan rua, Eston no Caleb, tinan 12 no 9, muda ba fatin izoladu ida naran Burketown, iha Queensland, rai-Austrália. Burnett hatete: “Testemuña sira bá neʼebá atu haklaken kada tinan tolu ka haat deʼit. Ema barak gosta tebes rona kona-ba lia-loos, no ami hakarak muda iha neʼebá hodi ajuda sira neʼebé interese atu estuda Bíblia semana-semana.”

Jim, Jack, Mark, no Karen

Mark no Karen, neʼebé agora tinan 50 liu, hamutuk ho sira-nia oan Jessica, Jim, no Jack serbí iha kongregasaun sira besik Sídnei, Austrália. Depois neʼe sira muda ba Nhulunbuy, fatin izoladu ida iha Northern Territory. Mark hatete: “Haʼu hadomi ema hotu, tan neʼe haʼu hakarak muda ba fatin ida neʼebé haʼu bele sai okupadu iha kongregasaun no iha serbisu haklaken.” Karen fali laran-rua hela kona-ba sira-nia planu neʼe. Maibé nia hatete: “Bainhira Mark no irmaun-irmán seluk anima haʼu, haʼu troka haʼu-nia hanoin no deside atu koko deʼit. Toʼo agora, haʼu nunka arrepende ba ami-nia desizaun neʼe!”

Benjamin, Jade, Bria, no Carolyn

Iha tinan 2011, Benjamin no Carolyn hamutuk ho sira-nia oan-feto rua neʼebé sei kiʼik, Jade no Bria, muda husi Queensland, Austrália, ba fali Timor-Leste. Ben hatete: “Uluk, haʼu no Carolyn serbí ona iha Timor-Leste nuʼudar pioneiru tempu-tomak. Haklaken iha Timor kapás tebes no irmaun-irmán sira apoia tebes ami. Bainhira ami tenke fila fali ba Austrália, ami laran-triste tebes. Maibé ami hakarak tebes atu loron ida fila fali. Bainhira ami-nia oan sira moris mai, ami lakohi kansela ami-nia planu, maibé troka fali ba tempu seluk deʼit.” Carolyn hatete: “Ami hakarak ami-nia oan atu boot iha misionáriu, ema Betel no pioneiru tempu-tomak sira-nia leet. Hodi nuneʼe, sira bele hetan esperiénsia neʼebé diʼak ba sira iha dalan espirituál.”

PREPARASAUN ANTES ATU MUDA

Jesus fó-hatene ba ninia dixípulu sira: “Kuandu ema ida hakarak harii uma-andár, nia sei tuur uluklai hodi sura ninia osan, loos ka lae?” (Lucas 14:28) Nuneʼe mós, se família ida hakarak muda bá serbí iha fatin seluk, sira presiza halo planu didiʼak. Saida deʼit mak sira presiza atu hanoin?

ESPIRITUÁL: Ben hatete: “Ami hakarak muda bá ajuda ema, laʼós atu fó todan ba ema seluk. Tan neʼe, antes ami muda ami hakarak hametin uluk ami-nia espirituál. Ami mós aumenta ami-nia serbisu haklaken no atividade sira iha kongregasaun.”

Jacob, hatete: “Antes ami bá illa Norfolk, ami lee esperiénsia barak iha Livru Haklaken no Matan-moris bá! kona-ba família sira neʼebé serbí iha fatin seluk. Ami koʼalia hamutuk kona-ba susar neʼebé família sira-neʼe hasoru no oinsá Jeová sempre tau matan ba sira.” Jacob nia alin Skye, neʼebé tinan 11 hatete: “Haʼu halo orasaun barak. Haʼu halo rasik, no mós hamutuk ho apá-amá.”

 SENTIMENTU: Reneé hatete: “Ba haʼu, fasil deʼit atu deside la bá, tanba ami hela besik família no belun sira. Maibé duké hanoin beibeik kona-ba buat hotu neʼebé haʼu sei husik, haʼu hanoin kona-ba oinsá muda atu serbí iha rai seluk sei ajuda ami-nia família.”

KULTURA: Família barak buka-hatene nanis kona-ba fatin neʼebé sira atu bá. Mark hatete: “Ami lee informasaun barak kona-ba Nhulunbuy. Irmaun sira iha neʼebá laran-diʼak no haruka jornál balu ba ami, hodi ami bele hatene uitoan kona-ba sira-nia komunidade no moris iha neʼebá oinsá.”

Shane, neʼebé muda ba illa Norfolk hatete: “Liu fali buat sira seluk, buat neʼebé haʼu halo atu prepara mak hakaʼas an hatudu hahalok kristaun nian. Tanba se haʼu laran-maus, laran-moos no badinas, haʼu hatene neʼe sei sai fasil atu adapta iha fatin neʼebé deʼit.”

HASORU SUSAR SIRA

Irmaun-irmán sira neʼebé muda ba fatin seluk hodi haklaken dehan katak importante tebes atu nafatin hanoin pozitivu no prontu atu koko buat foun. Haree toʼok ezemplu sira-neʼe:

Reneé hatete: “Haʼu sempre koko dalan oioin atu halo buat ruma. Porezemplu, bainhira tasi boot iha illa Norfolk, ró la bele lori sasán tama, no sasán folin saʼe makaʼas. Tan neʼe, bainhira haʼu teʼin, haʼu aprende atu kuidadu didiʼak.” Ninia la’en, Shane hatete: “Ami mós kuidadu atu la gasta osan liu fali buat neʼebé ami planu ba semana ida-neʼe.”

Sira-nia oan Jacob hasoru susar seluk. Nia hatete: “Iha ami-nia kongregasaun foun, iha deʼit ema naʼin-hitu. Haʼu laiha belun neʼebé idade hanesan haʼu! Maibé haʼu haklaken beibeik ho irmaun-irmán sira neʼebé idade ona, no agora sira mak haʼu-nia belun.”

Jim, neʼebé agora tinan 21, mós hasoru susar hanesan neʼe. Nia hatete: “Kongregasaun neʼebé besik ba Nhulunbuy mak dook kilómetru 725. Tan neʼe, bainhira ami bá tuir reuniaun boot sira iha sidade seluk, ami aproveita tempu diʼak neʼe. Ami toʼo sedu hodi ransu ho irmaun-irmán sira. Ba ami, reuniaun boot sira mak tempu neʼebé kapás liu iha tinan ida!”

 “HAʼU KONTENTE TEBES AMI MAI HELA IHA NEʼE!”

Bíblia hatete: “Bensaun husi Jeová, neʼe mak halo ema riku.” (Provérbios [Amsal] 10:22) Irmaun-irmán barak iha mundu tomak neʼebé muda ba rai seluk hodi haklaken, fiar duni katak liafuan sira-neʼe mak loos.

Mark hatete: “Bensaun boot liu mak haree oinsá ami muda, ajuda duni ami-nia oan sira. Ami-nia oan boot rua fiar ho laran tomak katak Jeová sempre ajuda ema neʼebé tau Maromak uluk iha sira-nia moris. Fiar hanesan neʼe la bele sosa ho osan.”

Shane hatete: “Agora haʼu sente besik liu ba haʼu-nia feen no oan sira. Se haʼu rona sira konta kona-ba saida mak Jeová halo ona ba sira, haʼu sente kontente loos.” Ninia oan Jacob dehan: “Ami-nia tempu iha neʼe kapás loos. Haʼu kontente tebes ami mai hela iha neʼe!”

^ par. 3 Haree informasaun “Sahabat-Sahabat Allah di ‘Kepulauan yang Ramah’,” iha Menara Pengawal 15 Dezembru 2004, p. 8-11.

^ par. 3 Iha tinan 2012, sukursál Novazelándia ho sukursál Austrália sai ida deʼit, bolu sukursál Australásia.