Skip to content

Skip to table of contents

Hatudu laran-metin ba Jeová

Hatudu laran-metin ba Jeová

“Jeová sei sai sasin entre ó no haʼu no entre ó-nia bei-oan no haʼu-nia bei-oan ba nafatin.”—1 SAMUEL 20:42.

KNANANUK: 43, 31

1, 2. Tanbasá mak Jónatas ho David nia ezemplu diʼak tebes kona-ba laran-metin ba malu?

KARIK Jónatas hakfodak bainhira nia haree katak maski David sei idade kiʼik, maibé nia aten-brani tebes. David konsege oho jigante Golias no “kaer hela mane Filístia neʼe nia ulun” hodi bá hasoru Jónatas nia aman, Liurai Izraél, Saul. (1 Samuel 17:57) Jónatas bele haree katak Maromak hamutuk duni ho David. No komesa husi tempu neʼe sira mós sai belun diʼak. Sira jura ba malu katak husi neʼe ba oin sira sei laran-metin ba malu. (1 Samuel 18:1-3) Jónatas hatudu duni laran-metin ba David iha ninia moris tomak.

2 Bainhira Jeová hili David mak atu sai liurai, laʼós Jónatas, Jónatas hatudu nafatin laran-metin ba David. Iha tempu neʼebé Saul buka atu oho David, Jónatas nia laran sai taridu tebes ba David. Nia hatene katak David halai subar hela iha rai-fuik maran ida iha Hores, no nia bá buka David hodi fó laran-manas ba David katak David presiza sadere nafatin ba Jeová. Jónatas hatete ba nia: “Keta taʼuk, tanba haʼu-nia aman Saul sei la hetan ó; ó sei sai liurai iha Izraél, no haʼu sei sai ema segundu ba ó.”—1 Samuel 23:16, 17.

3. Saida mak importante liu hotu ba Jónatas, no oinsá mak ita hatene? (Haree dezeñu iha pájina 21.)

 3 Baibain, ita gaba tebes ema neʼebé hatudu laran-metin ba malu. Maibé ita gaba Jónatas laʼós tan deʼit ninia laran-metin ba David. Ninia laran-metin ba David mai husi ninia laran-metin ba Maromak. Ba nia, laran-metin ba Jeová mak buat neʼebé importante liu hotu. Tan neʼe mak bainhira Jeová hili David atu sai liurai, nia la laran-moras ba David, maibé hatudu laran-metin nafatin ba David, no fó tan laran-manas ba David atu sadere ba Jeová. Sira naʼin-rua halo tuir duni sira-nia juramentu hodi hatudu laran-metin ba malu, sira jura katak: “Jeová sei sai sasin entre ó no haʼu no entre ó-nia bei-oan no haʼu-nia bei-oan ba nafatin.”—1 Samuel 20:42.

4. (a) Laran-metin ba sé mak halo ita sente kontente no solok? (b) Ita sei koʼalia kona-ba saida iha lisaun neʼe?

4 Ita mós tenkesér hatudu laran-metin ba ita-nia família, belun, no irmaun-irmán sira. (1 Tesalónika 2:10, 11) Maibé importante liu atu hatudu laran-metin ba sé? Ba Jeová, tanba nia mak Ida neʼebé fó moris ba ita! (Apokalipse 4:11) Bainhira ita hatudu laran-metin ba Jeová, neʼe halo ita sente kontente no solok. No maski iha situasaun neʼebé susar tebes, ita mós tenke hatudu laran-metin nafatin ba nia. Iha lisaun neʼe, ita sei koʼalia kona-ba oinsá mak Jónatas nia ezemplu bele ajuda ita hatudu laran-metin ba Jeová iha situasaun susar haat: (1) bainhira ita sente ema neʼebé sai ita-nia ulun la merese atu hetan respeitu, (2) bainhira ita presiza hili atu laran-metin ba sé, (3) bainhira irmaun neʼebé dirije ita komprende sala ka hatudu hahalok la justu ba ita, (4) bainhira ita sente susar atu kaer-metin ba ita-nia liafuan.

BAINHIRA ITA SENTE EMA NEʼEBÉ SAI ITA-NIA ULUN LA MERESE ATU HETAN RESPEITU

5. Tanbasá mak Saul nia ukun koko tebes povu nia laran-metin ba Jeová?

5 Maski Jeová mak foti Jónatas nia aman, Saul hodi sai liurai, maibé ikusmai tanba nia la halo tuir Jeová, Jeová lakohi tan nia atu sai liurai. (1 Samuel 15:17-23) Bainhira neʼe akontese, Jeová la hasai kedas Saul husi ninia kadunan. Tan neʼe ninia hahalok ladiʼak sira koko tebes povu nia laran-metin ba Jeová, tanba liurai neʼebé tuur iha “Jeová nia kadunan” mak halo hela hahalok aat sira.—1 Crônicas (Tawarikh) 29:23.

6. Oinsá mak ita hatene katak Jónatas laran-metin tebes ba Jeová?

6 Bainhira Saul foin komesa hatudu hahalok kontra Jeová, ninia oan Jónatas laran-metin nafatin ba Jeová. (1 Samuel 13:13, 14) Iha tempu neʼebá, ema Filístia mai ho tropa lubun boot hamutuk 30.000 ho kuda-karreta funu nian atu ataka Izraél. Saul iha deʼit soldadu 600, no nia ho Jónatas deʼit mak kaer surik. Maibé Jónatas la taʼuk hodi hakbesik ba ema Filístia nia postu ho deʼit ema ida neʼebé lori ninia surik. Jónatas halo nuneʼe tanba nia sei hanoin-hetan profeta Samuel nia liafuan neʼebé hatete: “Tanba Jeová nia naran neʼebé boot, nia sei la husik ninia povu.” (1 Samuel 12:22) Tan neʼe nia hatete ba ninia soldadu neʼe: “La iha buat ida mak bele hanetik Jeová atu salva nia povu hodi uza ema barak ka uitoan.” Tuirmai sira naʼin-rua oho ema Filístia naʼin-20 iha postu neʼe. No tanba Jónatas nia fiar, Jeová halo rai-nakdoko hodi halo taʼuk ema Filístia toʼo sira sai konfuzaun, depois, sira rasik mak oho malu fali. No neʼe halo ema Izraél sira manán funu neʼe.—1 Samuel 13:5, 15, 22; 14:1, 2, 6, 14, 15, 20.

7. Oinsá mak Jónatas trata ninia aman?

7 Maski Saul hatudu beibeik hahalok kontra Jeová, maibé Jónatas koko nafatin atu serbisu hamutuk ho Saul. Ezemplu ida mak sira naʼin-rua funu hamutuk nafatin hodi defende Jeová nia povu.—1 Samuel 31:1, 2.

8, 9. Tanbasá mak hatudu respeitu ba ema neʼebé sai ita-nia ulun hatudu katak ita laran-metin ba Jeová?

8 Ita bele halo tuir Jónatas nia ezemplu hodi laran-metin ba Jeová liuhusi hatudu respeitu ba governu sira. Jeová hakarak ita atu halo nuneʼe, maski ita sente ema balu la merese atu hetan respeitu.  Porezemplu, karik iha ema ida husi governu halo korrupsaun, maski nuneʼe, ita hakarak hatudu respeitu nafatin ba ninia pozisaun, tanba Jeová hakarak ita “tenke hakruʼuk ba ukun-naʼin sira”. (Lee Roma 13:1, 2.) Loos duni, ho Jeová nia lisensa mak ukun-naʼin sira bele ukun ita, tan neʼe ita tenke hatudu respeitu ba sira.—1 Korinto 11:3; Ebreu 13:17.

Dalan ida atu hatudu laran-metin ba Jeová mak liuhusi hatudu respeitu ba ita-nia kaben neʼebé laʼós fiar-naʼin (Haree parágrafu 9)

9 Iha Amérika Súl, iha irmán ida naran Olga. [1] (Haree nota husi lisaun.) Ba tinan barak ona ninia laʼen trata nia iha dalan neʼebé ladiʼak tan deʼit nia mak Testemuña ba Jeová ida. Ninia laʼen sempre hatún nia, lakohi koʼalia ho nia, ameasa atu lori oan sira halai no soe nia. Maibé tanba Olga hakarak hatudu laran-metin ba Jeová, nia hatudu respeitu nafatin ba ninia laʼen. Maski ninia laʼen trata nia ladiʼak, nia lakohi selu aat ho aat. Nia hakaʼas an nafatin atu sai feen diʼak ba ninia laʼen hodi teʼin ba nia, fase ninia roupa, no tau matan ba família tomak. (Roma 12:17) Dala ruma kuandu ninia laʼen bá vizita família ka kolega sira atu han hamutuk, nia mós akompaña ninia laʼen bá. Porezemplu, loron ida ninia banin-mane mate iha sidade seluk, Olga halibur oan sira no prepara buat hotu hodi bá ho ninia laʼen atu hakoi ninia banin-mane. Toʼo tiha neʼebá, bainhira sira halo misa ba banin-mane iha igreja laran, nia hein deʼit iha liʼur toʼo misa remata. Tanba nia hatudu hahalok respeitu no pasiénsia tinan ba tinan, ikusmai halo mamar ninia laʼen. Agora ninia laʼen mós lori nia ba reuniaun sira, anima nia atu la bele falta reuniaun, no dala ruma mós ninia laʼen bá tuir reuniaun hamutuk ho nia.—1 Pedro 3:1.

BAINHIRA ITA PRESIZA HILI ATU LARAN-METIN BA SÉ

10. Oinsá mak Jónatas hatene nia atu laran-metin ba sé?

10 Saul hakarak tebes atu oho David, neʼe koko tebes Jónatas nia laran-metin, tanba nia halo ona juramentu ho David, no nia mós lakohi kontra ninia aman. Maibé Jónatas hatene katak Maromak apoia David, laʼós Saul, tan neʼe nia hili atu laran-metin ba David, laʼós ba ninia aman. Nia fó avizu ba David atu David bele subar an no depois koʼalia buat diʼak kona-ba David ba Saul.—Lee 1 Samuel 19:2, 4. [2]

11, 12. Oinsá mak domin ba Maromak bele ajuda ita hatudu laran-metin ba nia?

11 Irmán ida naran Alice husi rai-Austrália, nia mós hasoru situasaun susar ida kona-ba laran-metin. Iha tempu neʼebé nia sei estuda Bíblia, nia konta ba ninia família buat diʼak saida deʼit mak  nia estuda husi Bíblia. Maibé ikusmai nia fó-hatene ba sira katak nia la bele selebra tan Natál. Nia esplika ninia razaun ba sira, no foufoun ninia família haree hanesan la simu deʼit, maibé ikusmai sira sai hirus tebes ho Alice. Sira sente katak nia hakarak nega sira. Alice dehan: “Haʼu-nia amá rasik hatete ba haʼu katak nia nega ona haʼu. Haʼu hakfodak no laran-triste tebes tanba haʼu hadomi haʼu-nia família. Maibé haʼu-nia hakarak mak atu tau uluk Jeová no ninia Oan-Mane iha haʼu-nia fuan, no tuirmai haʼu hetan batizmu iha reuniaun boot ida.”—Mateus 10:37.

12 Se ita la kuidadu, ita bele laran-metin ba nasaun, eskola, ka ekipa desportu liu fali laran-metin ba Jeová. Porezemplu, irmaun Henry gosta halimar catur. Ninia eskola sempre manán kuandu tuir kompetisaun catur, tan neʼe nia hakarak hakaʼas an atu manán ba ninia eskola. Maibé nia dehan: “Neineik-neineik haʼu fó haʼu-nia laran ba eskola liu fali ba Maromak. Kada findesemana haʼu halimar deʼit catur toʼo laiha tempu atu bá haklaken ka tuir reuniaun sira. Tan neʼe haʼu foti desizaun ida atu sai husi ami-nia ekipa catur neʼe.”—Mateus 6:33.

13. Oinsá mak laran-metin ba Maromak bele ajuda ita rezolve problema iha uma-laran?

13 Dala ruma, atu hatudu laran-metin ba sé iha uma laran mós bele koko ita. Porezemplu, irmaun ida naran Ken hatete: “Haʼu hakarak bá vizita beibeik haʼu-nia amá neʼebé idade boot ona no dala ruma haʼu mós hakarak lori nia mai toba iha uma. Maibé haʼu-nia amá no haʼu-nia feen haree malu ladiʼak. Foufoun, problema neʼe halo susar tebes ba haʼu-nia moris, tanba haʼu la bele halo kontente ba ida deʼit.” Ken hanoin didiʼak fali Bíblia nia matadalan kona-ba situasaun neʼe no nia rekoñese katak nia tenkesér tau uluk ninia feen nia hakarak no laran-metin ba nia. Entaun, nia buka solusaun ida atu ninia feen mós bele kontente ho desizaun neʼebé nia atu halo. Tuirmai nia esplika didiʼak ba ninia feen tanbasá mak ninia feen tenke laran-diʼak ba ninia amá, no nia mós esplika ba ninia amá tanbasá mak ninia amá tenke hatudu respeitu ba ninia feen.—Lee Gênesis (Kejadian) 2:24; [3] 1 Korinto 13:4, 5.

BAINHIRA IRMAUN NEʼEBÉ DIRIJE ITA KOMPRENDE SALA KA HATUDU HAHALOK LA JUSTU BA ITA

14. Saul trata Jónatas iha dalan saida?

14 Bainhira irmaun neʼebé dirije ita komprende sala ka hatudu hahalok la justu ba ita, neʼe mós bele koko ita-nia laran-metin ba Jeová. Jónatas hasoru duni situasaun neʼe. Maromak mak foti Saul sai liurai, maibé nia trata Jónatas iha dalan neʼebé ladiʼak. Saul la komprende tansá mak Jónatas hadomi David. Tan neʼe bainhira Jónatas koko atu ajuda David, Saul sai hirus tebes ho nia, no Saul mós hamoe Jónatas iha ema barak nia oin. Maibé Jónatas hatudu respeitu nafatin ba nia. Jónatas laran-metin nafatin ba Jeová no ba David, ida-neʼebé Maromak hili atu troka Saul hodi sai Izraél nia liurai.—1 Samuel 20:30-41.

15. Se irmaun ida mak trata ita la ho justisa, ita tenke halo saida?

15 Ohin loron, irmaun sira neʼebé dirije kongregasaun laʼós ema perfeitu, tan neʼe dala ruma sira bele trata ita iha dalan neʼebé la justu, no dala ruma sira mós bele komprende sala kona-ba ita-nia hahalok ruma. (1 Samuel 1:13-17) Se ida-neʼe mak akontese, ita hakarak laran-metin nafatin ba Jeová.

BAINHIRA ITA SENTE SUSAR ATU KAER METIN BA ITA-NIA LIAFUAN

16. Iha situasaun saida deʼit mak ita la bele hanoin an deʼit, maibé tenke laran-metin ba Maromak?

16 Saul hakarak Jónatas mak atu sai liurai, laʼós David. (1 Samuel 20:31) Maibé Jónatas nia domin no laran-metin ba Jeová book nia hodi sai David nia belun no kaer metin ninia promete ba David. Se ema ida mak hadomi no laran-metin ba Jeová, nia mós hakarak halo tuir Jónatas nia ezemplu atu kaer metin ba ninia liafuan “maski ninia promete la fó buat diʼak ba ninia an, maibé nia la troka”. (Salmo [Mazmur] 15:4) Neʼe duni,  ita hakarak kaer metin ba ita-nia promete tanba ita-nia laran-metin ba Jeová. Porezemplu, se ita halo akordu ba negósiu ruma, maibé akordu neʼe ladún laʼo ho susesu, tanba ita-nia laran-metin ba Maromak no iha respeitu ba ninia Liafuan mak ita hakarak kaer metin nafatin ba buat neʼebé ita promete ona. No se ita mak iha problema iha kaben laran, ita hakarak laran-metin nafatin ba ita-nia kaben tanba neʼe hatudu laran-metin ba Jeová.—Lee Malaquias (Maleakhi) 2:13-16. [4]

Halo tuir ita-nia promete ba akordu negósiu bele koko ita-nia laran-metin ba Jeová no respeitu ba Bíblia (Haree parágrafu 16)

17. Ita aprende saida husi lisaun neʼe?

17 Diʼak tebes atu banati-tuir Jónatas nia ezemplu, tanba nia mak ema neʼebé laran-metin ba Maromak no mós nunka hanoin ninia an deʼit. Mai ita mós hatudu laran-metin ba irmaun-irmán sira, maski dala ruma sira halo ita triste. Se ita laran-metin ba Jeová maski iha situasaun neʼebé susar, ita halo Jeová kontente, no ita mós sente kontente. (Provérbios [Amsal] 27:11) Jeová sempre hanoin kona-ba ita-nia diʼak, tan neʼe ita hakarak hatudu laran-metin nafatin ba nia. Iha lisaun tuirmai, ita sei koʼalia kona-ba ezemplu balu husi ema neʼebé hatudu laran-metin no sira neʼebé la hatudu laran-metin iha David nia tempu.

^ [1] (parágrafu 9) Naran balun laʼós naran neʼebé loos.

^ [2] (parágrafu 10) 1 Samuel 19:2, 4 Maibé tanba Saul nia oan Jónatas gosta David, Jónatas hatete ba David: “Haʼu-nia aman Saul hakarak atu oho tiha ó. Favór ida kuidadu ó-nia an bá aban dadeer, no bá subar iha fatin segredu.” Entaun Jónatas koʼalia diʼak kona-ba David ba ninia aman Saul: Nia hatete ba nia aman: “Liurai lalika halo sala hasoru ninia atan David, tanba nia la halo sala hasoru Ita no buat neʼebé nia halo ona ba Ita mak diʼak ba Ita.”

^ [3] (parágrafu 13) Gênesis 2:24 Tan neʼe mak mane ida sei husik ninia aman no inan no nia sei hela hamutuk ho nia feen, no sira sei sai isin ida deʼit.

^ [4] (parágrafu 16) Malaquias 2:13-16 13 Neʼe mak buat seluk tan neʼebé imi halo, neʼebé halo Jeová nia altár sai nakonu ho matan-been tanba tanis no laran-todan. Tan neʼe haʼu la simu tan buat neʼebé imi hasaʼe nuʼudar prezente ka la sente haksolok tan ho buat neʼebé imi fó ho imi-nia liman. 14 No imi hatete: ‘Tanba saida?’ Tanba ida-neʼe: Jeová rasik mak fó sasin entre ó no ó-nia feen husi tempu joven, neʼebé ó rasik lohi, maski nia mak ó-nia pár no ó-nia feen aliansa nian. 15 Maibé iha ida mak la halo nuneʼe, tanba nia sei iha buat neʼebé mai husi espíritu. No nia atu buka saida? Bei-Oan husi Maromak. Tan neʼe proteje imi-nia laran bá, no keta trata imi-nia feen neʼebé imi hetan husi tempu joven ho laran-makerek. 16 Tanba haʼu odi soe-malu,” Jeová, Izraél nia Maromak hatete; “ho mós ema neʼebé halo nakonu ninia unuk ho violénsia,” Jeová, ukun-naʼin ba tropa lalehan nian hatete. “No imi tenke tau matan ba imi-nia an kona-ba imi-nia espíritu, no imi labele iha laran-makerek.”