Skip to content

Skip to table of contents

“Ksolok ba imi kuandu imi halo tuir”

“Ksolok ba imi kuandu imi halo tuir”

“Haʼu-nia ai-han mak halo tuir Ida neʼebé haruka haʼu mai nia hakarak no atu halo hotu ninia serbisu.”—JOÃO 4:34.

KNANANUK: 1, 102

1. Oinsá mak mundu nia toman atu hanoin an deʼit bele fó impaktu ba ita-nia haraik-an?

TANBASÁ la fasil atu aplika buat neʼebé ita aprende husi Maromak nia Liafuan? Razaun ida mak tanba ita presiza haraik-an atu halo buat neʼebé loos. Iha “loron ikus” sira-neʼe, la fasil atu hatudu hahalok haraik-an tanba ema barak iha mundu neʼe “hadomi deʼit sira-nia an, hadomi osan, gaba an, loko an” no “la kontrola an”. (2 Timóteo 3:1-3) Nuʼudar Maromak nia atan, ita hatene katak hahalok sira-neʼe ladiʼak, maibé ita haree ema neʼebé hatudu hahalok sira-neʼe iha moris neʼebé susesu, karik neʼe bele halo ita laran-moras. (Salmo [Mazmur] 37:1; 73:3) Karik ita bele hanoin: ‘Tau uluk ema seluk nia interese lori benefísiu saida mai haʼu? Se haʼu hatudu haraik-an, ema sei respeitu haʼu ka lae?’ (Lucas 9:48) Se ita mak husik mundu nia toman atu hanoin an deʼit kona ita, neʼe bele estraga ita-nia relasaun diʼak ho irmaun-irmán sira no halo susar ba ema seluk atu rekoñese katak ita mak ema kristaun neʼebé loos. Maibé se ita mak estuda didiʼak no banati-tuir ezemplu sira husi Bíblia, neʼe sei lori rezultadu neʼebé diʼak.

2. Ita bele aprende saida husi fiar-naʼin sira iha tempu uluk?

2 Saida mak ajuda fiar-naʼin sira iha tempu uluk hodi sai Jeová nia belun? Oinsá mak sira mantein sira-nia relasaun diʼak ho Jeová? Sira hetan kbiit husi neʼebé hodi halo tuir Maromak nia  hakarak? Lee no medita kona-ba sira-nia esperiénsia husi Bíblia bele ajuda hametin ita-nia fiar liután.

OINSÁ ATU HAMETIN ITA-NIA FIAR?

3, 4. (a) Jeová uza dalan saida deʼit hodi hanorin ita? (b) Tanbasá mak iha deʼit koñesimentu latoʼo atu iha fiar neʼebé metin?

3 Jeová uza dalan oioin atu ajuda hametin ita-nia fiar. Ita simu matadalan no treinu neʼebé diʼak liuhusi Bíblia, ita-nia livru sira, jw.org, JW Broadcasting, reuniaun no reuniaun boot sira. Maibé Jesus hatete katak latoʼo atu iha deʼit koñesimentu. Nia dehan: “Haʼu-nia ai-han mak halo tuir Ida neʼebé haruka haʼu mai nia hakarak no atu halo hotu ninia serbisu.”João 4:34.

4 Halo tuir Maromak nia hakarak mak hanesan hahán ba Jesus. Han ai-han neʼebé diʼak halo ita sente diʼak no fó forsa ba ita, hanesan neʼe mós halo tuir Maromak nia hakarak bele halo ita sente diʼak no hametin ita-nia fiar. Porezemplu, bainhira atu tuir grupu haklaken, dala ruma Ita sente kole tebes, maibé bainhira Ita fila husi haklaken Ita sente kontente no fresku, loos ka lae?

5. Matenek lori bensaun saida mai ita?

5 Ema matenek halo tuir Jeová nia matadalan no treinu. (Tiago 3:13) Bensaun husi matenek iha folin-boot tebes. “Neʼe diʼak liu fali buat hotu neʼebé [ema] gosta. . . . Se ema kaer metin ba matenek, neʼe sei sai nuʼudar ai-hun moris nian ba sira, no ema neʼebé kontinua kaer metin ba matenek sei sai kontente.” (Provérbios [Amsal] 3:13-18) Jesus hatete: “Se imi hatene buat sira-neʼe, ksolok ba imi kuandu imi halo tuir.” (João 13:17) Jesus nia dixípulu sira-nia ksolok depende ba halo tuir beibeik buat neʼebé Jesus haruka sira atu halo. Sira tenke halaʼo sira-nia moris hodi halo tuir Jesus nia hanorin no ezemplu.

6. Tanbasá mak ita presiza kontinua aplika buat neʼebé ita aprende?

6 Ohin loron, ita mós presiza kontinua aplika buat neʼebé ita aprende. Porezemplu, mekanik iha ekipamentu oioin no matenek. Maibé se nia la uza buat sira-neʼe, neʼe la iha folin ba nia. Maski nia hetan ona esperiénsia ba tinan barak, nia tenke uza beibeik buat neʼebé nia aprende ona atu bele sai nafatin mekanik neʼebé diʼak. Hanesan neʼe mós bainhira ita foin aprende kona-ba lia-loos, ita sente kontente tanba aplika buat neʼebé ita lee iha Bíblia. Maibé se ita hakarak iha nafatin ksolok, ita tenke hatudu haraik-an no kontinua aplika loron-loron buat neʼebé Jeová hanorin ba ita.

7. Ita tenke halo saida hodi aprende husi ezemplu sira iha Bíblia?

7 Iha lisaun neʼe ita sei koʼalia kona-ba situasaun balu neʼebé bele koko ita-nia haraik-an. Ita sei haree oinsá mak fiar-naʼin sira iha tempu uluk hatudu haraik-an iha situasaun sira neʼebé atu hanesan. Latoʼo atu lee deʼit informasaun sira-neʼe. Ita mós presiza hanoin kona-ba oinsá mak ita bele aplika informasaun sira-neʼe, no tuirmai halo tuir duni iha ita-nia moris.

LA BELE HANOIN ITA DIʼAK LIU FALI EMA SELUK

8, 9. Ita bele aprende saida kona-ba Paulo nia haraik-an neʼebé temi iha Apóstolu 14:8-15? (Haree dezeñu iha leten.)

8 Maromak hakarak ema hotu atu “hetan salvasaun no hatene didiʼak kona-ba lia-loos”. (1 Timóteo 2:4) Ita sente oinsá kona-ba ema barak neʼebé seidauk aprende kona-ba lia-loos? Apóstolu Paulo haklaken ba ema judeu sira neʼebé hatene ona buat balu kona-ba Jeová. Maibé nia mós haklaken ba ema neʼebé adora maromak falsu. Haklaken ba sira koko tebes Paulo nia haraik-an. Oinsá?

9 Bainhira Paulo halaʼo viajen primeiru  nuʼudar misionáriu, nia ho Barnabé bá sidade Listra. Ema Likaónia neʼebé hela iha neʼebá hanoin sala katak Paulo no Barnabé mak sira-nia maromak falsu sira, naran Zeus no Hermes. Paulo no Barnabé sai foti-an ka lae? Sira sente kontente tanba ema la fó-terus tan ba sira hanesan sidade rua neʼebé uluk sira bá ka lae? Sira hanoin katak sira-nia naran boot bele fó oportunidade ba ema barak atu rona kona-ba lia-loos ka lae? Lae. Sira la kontente no koʼalia ho lian makaʼas: “Tansá mak imi halo buat sira-neʼe? Ami mós ema no iha fraku hanesan imi.”—Apóstolu 14:8-15.

10. Tanbasá mak Paulo no Barnabé la sente katak sira diʼak liu fali ema Likaónia?

10 Bainhira Paulo no Barnabé hatete katak sira mós ema, sira la hatudu katak dalan neʼebé sira adora Maromak hanesan deʼit ho ema Likaónia nia adorasaun. Paulo no Barnabé mak misionáriu neʼebé hetan knaar husi Maromak. (Apóstolu 13:2) Jeová mak hili sira liuhusi espíritu santu no sira iha esperansa neʼebé furak tebes. Maski nuneʼe, sira la sente katak sira diʼak liu fali ema Likaónia. Sira rekoñese katak ema sira-neʼe mós bele hetan esperansa atu bá lalehan se sira simu lia-loos.

11. Oinsá mak ita bele hatudu haraik-an hanesan Paulo kuandu haklaken?

11 Oinsá mak ita bele banati-tuir Paulo nia ezemplu diʼak kona-ba hatudu haraik-an? Dalan ida mak ita la bele sente katak ita mak ema espesiál tanba ita kumpre ona knaar ruma ho Jeová nia ajuda. Ita ida-idak presiza husu ba ita-nia an: ‘Haʼu sente oinsá kona-ba ema iha haʼu-nia haklaken-fatin? Haʼu halo diskriminasaun ba ema husi rasa seluk ka lae?’ Iha mundu tomak, Testemuña ba Jeová koko atu buka ema oioin neʼebé hakarak rona kona-ba lia-loos. Balu hakaʼas an hodi aprende língua ka kostume neʼebé ema seluk la hafolin. Maski nuneʼe, sira nunka sente katak sira diʼak liu fali ema seluk. Sira koko atu komprende ema ida-idak nia situasaun hodi bele ajuda ema simu lia-loos.

TEMI EMA NIA NARAN IHA ORASAUN

12. Epafras halo saida hodi hatudu katak nia hanoin tebes ema seluk?

12 Dalan seluk atu hatudu haraik-an mak halo orasaun kona-ba irmaun-irmán sira neʼebé ‘hetan ona fiar neʼebé folin-boot hanesan ita-nian’. (2 Pedro 1:1) Epafras halo hanesan neʼe. Bíblia temi kona-ba Epafras dala tolu deʼit. Bainhira Paulo sai dadur uma nian iha Roma, nia hakerek karta ba ema kristaun iha Koloso kona-ba Epafras hodi dehan: “Nia sempre halo orasaun kona-ba imi ho laran-manas.” (Koloso 4:12) Epafras hatene didiʼak irmaun-irmán sira, no nia hanoin tebes sira. Paulo bolu Epafras nuʼudar ninia “maluk iha dadur”, entaun Epafras mós iha ninia problema rasik. (Filemon 23) Maski nuneʼe, nia hanoin nafatin ema seluk no koko atu ajuda sira. Epafras halo orasaun kona-ba irmaun-irmán sira no ita mós bele halo buat neʼebé hanesan hodi temi irmaun-irmán sira-nia naran iha ita-nia orasaun. Orasaun hanesan neʼe iha kbiit boot.—2 Korinto 1:11; Tiago 5:16.

13. Oinsá mak Ita bele banati-tuir Epafras nia ezemplu kona-ba halo orasaun?

13 Hanoin kona-ba sesé deʼit mak Ita bele temi iha Ita-nia orasaun. Karik Ita-nia belun husi kongregasaun ka família ruma neʼebé hasoru daudauk problema balu. Karik sira presiza halo desizaun neʼebé susar ka hasoru daudauk tentasaun ruma. Ita bele halo orasaun kona-ba irmaun-irmán sira neʼebé temi iha jw.org no JW Broadcasting. Ita mós bele halo orasaun kona-ba sira neʼebé lakon ema neʼebé sira hadomi iha mate, sira neʼebé foin daudauk moris liu funu  ka dezastre ruma, no sira neʼebé hasoru problema ekonomia nian. Iha irmaun-irmán barak neʼebé presiza ita halo orasaun kona-ba sira. Hodi halo nuneʼe ita hatudu katak ita la buka deʼit ita rasik nia diʼak, maibé ita mós hanoin kona-ba ema seluk nia presiza. (Filipe 2:4) Jeová rona ba orasaun sira-neʼe.

“LALAIS ATU RONA”

14. Oinsá mak Jeová hatudu ezemplu diʼak liu hotu kona-ba rona ho pasiénsia?

14 Dalan seluk tan atu hatudu haraik-an mak hodi rona didiʼak ba ema seluk. Tiago 1:19 hatete katak ita tenke “lalais atu rona”. Jeová hatudu ezemplu neʼebé diʼak liu hotu kona-ba neʼe. (Gênesis [Kejadian] 18:32; Josué [Yosua] 10:14) Porezemplu, lee toʼok buat neʼebé temi iha Êxodo 32:11-14. * (Lee.) Maski Jeová la presiza rona ba Moisés nia opiniaun, maibé Jeová husik Moisés atu fó sai ninia sentimentu. Ita sei lakohi rona ho pasiénsia ba ema neʼebé uluk halo sala, no halo tuir ninia sujestaun, loos ka lae? Maibé, Jeová halo nuneʼe duni, nia rona ho pasiénsia ba ema hotu nia orasaun neʼebé hatudu fiar ba nia.

15. Oinsá mak ita bele banati-tuir Jeová hodi hatudu respeitu ba ema seluk?

15 Husu ba Ita-nia an: ‘Se Jeová hatudu haraik-an hodi rona ba ema hanesan Abraão, Rakel, Moisés, Josué, Manoá, Elias, no Ezekias, oinsá mak haʼu bele banati-tuir ninia ezemplu? Haʼu bele hatudu respeitu liután ba irmaun-irmán sira hotu hodi rona sira-nia sujestaun no halo tuir sira-nia sujestaun neʼebé diʼak ka lae? Iha ema balu husi kongregasaun ka família neʼebé presiza haʼu-nia atensaun ka lae? Haʼu bele halo saida kona-ba neʼe?’—Gênesis (Kejadian) 30:6; Juízes (Hakim-Hakim) 13:9; 1 Reis (Raja-Raja) 17:22; 2 Crônicas (Tawarikh) 30:20.

“KARIK JEOVÁ SEI HAREE HAʼU-NIA TERUS”

David hatete: “Husik nia bá!” Se Ita iha David nia situasaun, Ita sei halo saida? (Haree parágrafu 16, 17)

16. Liurai David halo saida bainhira Simei trata aat nia?

16 Hahalok haraik-an mós bele ajuda ita atu kontrola an bainhira ema provoka ita. (Éfeso 4:2) Ita bele haree ezemplu neʼebé kapás husi 2 Samuel 16:5-13. * (Lee.) Simei  mak ema ida husi Liurai Saul nia família. Nia trata aat no ataka David ho David nia atan sira. Maski David iha kbiit atu hapara situasaun neʼe, maibé nia hatudu hahalok tahan. Oinsá mak David bele hatudu nafatin hahalok kontrola an? Ita bele buka-hatene resposta husi terseiru Salmo.

17. Saida mak ajuda David hodi kontrola an, no oinsá mak ita bele banati-tuir nia?

17 David hakerek terseiru Salmo bainhira ninia oan Absalão koko atu oho nia. Durante tempu neʼe mak Simei ataka David, maibé David sai kalma nafatin. David hetan kbiit husi neʼebé? Salmo 3:4 fó sai David nia liafuan hodi dehan: “Haʼu sei bolu Jeová ho lian makaʼas, no nia sei hatán haʼu husi ninia foho santu.” Se ema trata ita iha dalan neʼebé aat, ita mós presiza halo orasaun hanesan ho David. Hodi nuneʼe Jeová haraik espíritu santu ba ita hodi ajuda ita atu tahan. Ita bele hanoin kona-ba situasaun ruma neʼebé Ita presiza kontrola an ka atu fó perdua ba ema neʼebé trata aat Ita ka lae? Ita fiar katak Jeová hatene kona-ba Ita-nia terus no nia sei ajuda no fó bensaun ba Ita ka lae?

“MATENEK MAK BUAT NEʼEBÉ IMPORTANTE LIU”

18. Ita bele hetan benefísiu saida se Ita aplika nafatin Jeová nia matadalan?

18 Halo buat neʼebé ita hatene mak loos sei lori bensaun oioin. Provérbios 4:7 hatete: “Matenek mak buat neʼebé importante liu.” Maski matenek mai husi koñesimentu, maibé matenek envolve desizaun neʼebé ita halo, duké hatene deʼit kona-ba faktu sira. Nehek sira mós hatudu matenek hodi rai hahán neʼebé sira presiza iha tempu bailoro. (Provérbios [Amsal] 30:24, 25) Kristu, ida-neʼebé bolu nuʼudar “matenek Maromak nian” sempre halo buat neʼebé halo ninia Aman kontente. (1 Korinto 1:24; João 8:29) Maromak sei fó bensaun ba ita se ita hatudu nafatin haraik-an no hatudu matenek hodi halo buat neʼebé ita hatene mak loos. (Lee Mateus 7:21-23.) Tan neʼe, hakaʼas an nafatin atu halo kongregasaun sai fatin neʼebé ita bele serbí Jeová ho haraik-an. Presiza tempu no pasiénsia atu aplika buat neʼebé ita hatene mak loos. Maibé hodi halo nuneʼe ita hatudu katak ita haraik-an, no hahalok haraik-an sei halo ita kontente agora no ba nafatin.

^ par. 14 Êxodo 32:11-14 11 Tuirmai Moisés husu ho laran ba Jeová, ninia Maromak, hodi dehan: “Oh Jeová, tanbasá mak Ita-Boot tenke sai hirus makaʼas ba Ita-nia povu bainhira Ita lori ona sira sai husi rai-Ejitu ho kbiit boot no ho liman neʼebé forte? 12 Se Ita halo ida-neʼe, ema Ejitu sei dehan: ‘Nia iha ona hanoin aat ba sira bainhira nia lori sira sai. Nia hakarak oho sira iha área foho nian no halakon sira husi rai leten.’ Entaun, favór ida tahan netik Ita-nia hirus makaʼas no hanoin fali kona-ba Ita-nia desizaun atu lori susar ba Ita-nia povu. 13 Hanoin-hetan Ita-nia atan Abraão, Isaac, no Izraél, Ita jura ba sira hodi Ita-nia an rasik no dehan: ‘Haʼu sei halo imi-nia bei-oan sai barak hanesan fitun iha lalehan, no haʼu sei fó rai hotu neʼe neʼebé haʼu hili ona ba imi-nia bei-oan sira, atu nuneʼe sira bele foti rai neʼe nuʼudar sira-nian ba nafatin.’” 14 Entaun Jeová hahú hanoin fali kona-ba ninia desizaun atu lori susar ba ninia povu hanesan nia fó sai ona.

^ par. 16 2 Samuel 16:5-13 Bainhira Liurai David toʼo iha Baurim, mane ida husi Saul nia umakain naran Simei sai mai. Nia hakbesik hodi hakilar atu fó-malisan ba liurai. Simei mak Gera nia oan-mane. Nia tuda fatuk ba Liurai David no ninia atan sira, no mós ba ema hotu no asuwaʼin sira neʼebé iha liurai nia liman-loos no liman-karuk. Simei fó-malisan, hodi dehan: “Sai tiha, sai tiha husi neʼe, ó neʼebé ohodór! Ó mak mane folin-laek! Jeová selu fali ba ó tanba ó oho Saul nia umakain no foti tiha ukun husi nia. Entaun Jeová fó fali ukun neʼe ba ó-nia oan-mane Absalão. Agora ó iha susar laran, tanba ó mak ohodór!” Entaun Zeruia nia oan-mane Abisai dehan ba liurai: “Tanbasá mak asu neʼebé mate ona neʼe fó-malisan ba haʼu-nia naʼi liurai? Favór ida, husik haʼu bá neʼebá, no tesi tiha ninia ulun.” 10 Maibé liurai hatete: “Oh Zeruia nia oan-mane sira, tanbasá mak imi hakarak mete ho ida-neʼe? Husik nia fó-malisan haʼu, tanba Jeová dehan ona ba nia: ‘Fó-malisan ba David!’ Entaun sé mak bele dehan: ‘Tanbasá mak ó halo nuneʼe?’” 11 Tuirmai David dehan ba Abisai no ninia atan sira hotu: “Agora haʼu-nia oan-mane neʼebé sai husi haʼu-nia isin rasik mak buka atu oho haʼu, sá tan ho ema Benjamim ida! Husik nia bá, atu nuneʼe nia bele fó-malisan ba haʼu, tanba Jeová mak haruka nia atu halo nuneʼe! 12 Karik Jeová sei haree haʼu-nia terus, no Jeová sei haraik bensaun ba haʼu duké malisan sira neʼebé Simei hakilar ba haʼu ohin.” 13 Ho ida-neʼe, David no ninia ema sira kontinua laʼo tun iha dalan neʼe. Simei mós laʼo iha foho sorin tuir nia, no hakilar hodi fó-malisan no tuda fatuk no kari rai-rahun barak ba sira.