Skip to content

Skip to table of contents

“Sai aten-brani . . . no bá halo serbisu”

“Sai aten-brani . . . no bá halo serbisu”

“Sai aten-brani no sai forte, no bá halo serbisu. Keta taʼuk ka nakdedar, tanba Maromak Jeová . . . hamutuk ho ó.”—1 CRÔNICAS (TAWARIKH) 28:20.

KNANANUK: 23, 29

1, 2. (a) Salomão simu knaar importante saida? (b) Tanbasá mak David hanoin barak kona-ba Salomão?

SALOMÃO simu knaar espesiál. Jeová hili nia atu tau matan hodi harii templu ida iha Jeruzalein. Neʼe mak projetu neʼebé importante tebes iha tempu neʼebá. Templu neʼe sei sai fatin neʼebé “kmanek liu hotu” no ema hotu sei haree ninia furak. Importante liu mak, templu neʼe sei sai “Maromak loos Jeová nia uma”.​—1 Crônicas (Tawarikh) 22:1, 5, 9-11.

2 Liurai David fiar katak Maromak sei fó apoiu ba Salomão. Maibé Salomão mak “joven deʼit no la iha esperiénsia”. Nia aten-brani atu simu knaar neʼe ka lae? Ninia idade no la iha esperiénsia bele hanetik nia ka lae? Atu bele halaʼo knaar neʼe ho susesu, Salomão presiza tebes aten-brani no bá atu halo serbisu neʼe.

3. Salomão aprende saida husi ninia aman kona-ba aten-brani?

3 Ita bele fiar katak Salomão hatene saida loos mak aten-brani husi ninia aman David. Tanba bainhira David sei joven, nia luta hasoru animál fuik sira neʼebé hakarak oho ninia aman nia bibi. (1 Samuel 17:34, 35) Nia mós hatudu aten-brani hodi luta hasoru jigante Golias neʼebé forte no halo ema taʼuk. Liuhusi Maromak nia ajuda, David oho  Golias ho fatuk kiʼik ida.​—1 Samuel 17:45, 49, 50.

4. Tanbasá mak Salomão presiza hatudu aten-brani?

4 Tan neʼe, David mak ema neʼebé diʼak liu atu fó laran-manas ba Salomão atu sai aten-brani hodi harii templu. (Lee 1 Crônicas [Tawarikh] 28:20. *) Se Salomão mak la hatudu aten-brani, sentimentu taʼuk sei hanetik nia atu hahú harii templu. No neʼe aat liu fali simu tiha knaar neʼe maibé la halo toʼo ramata.

5. Tanbasá mak ita presiza aten-brani?

5 Hanesan neʼe mós ho ita, ita presiza ajuda husi Jeová atu bele aten-brani hodi halo serbisu neʼebé nia fó mai ita. Mai ita haree ezemplu balu kona-ba ema neʼebé hatudu aten-brani iha tempu antigu. Depois, hanoin toʼok oinsá mak ita bele hatudu aten-brani atu halo ita-nia serbisu toʼo ramata.

EZEMPLU BALU KONA-BA ATEN-BRANI

6. Tanbasá mak Ita bele gaba José nia aten-brani?

6 José hatudu aten-brani bainhira Potifar nia feen tenta nia atu halo sala-foʼer seksuál. Karik nia hatene ona katak se nia la halo tuir, neʼe sei lori perigu ba ninia moris. Maibé duké halo tuir deʼit, nia hatudu aten-brani hodi halai kedas husi Potifar nia feen.—Gênesis (Kejadian) 39:10, 12.

7. Rahab hatudu aten-brani iha dalan saida? (Haree dezeñu iha pájina 28.)

7 Rahab mak ezemplu ida tan kona-ba hatudu aten-brani. Bainhira espiaun husi Izraél bá ninia uma iha Jerikó, neʼe bele halo nia taʼuk atu fó ajuda ba sira. Maibé tanba nia tau fiar ba Jeová, ho aten-brani nia subar mane naʼin-rua neʼe no ajuda sira halai sai husi sidade. (Josué [Yosua] 2:4, 5, 9, 12-16) Rahab fiar katak Jeová mak Maromak neʼebé loos, no nia fiar katak Jeová sei foti sira-nia rai hodi fó ba ema Izraél. Nia la husik taʼuk ba ema, inklui mós liurai Jerikó ho ninia guarda sira atu domina nia. Nia hatudu aten-brani hodi salva ninia an no mós ninia família.—Josué (Yosua) 6:22, 23.

8. Jesus nia aten-brani book apóstolu sira hodi halo saida deʼit?

8 Jesus nia apóstolu sira neʼebé laran-metin mós hatudu aten-brani tebes. Sira haree ona oinsá Jesus hatudu aten-brani no neʼe ajuda sira hodi banati-tuir nia. (Mateus 8:28-32; João 2:13-17; 18:3-5) Bainhira ema saduseu koko atu hapara sira hodi la bele hanorin kona-ba Jesus, apóstolu sira la taʼuk no kontinua hanorin.—Apóstolu 5:17, 18, 27-29.

9. Oinsá mak 2 Timóteo 1:7 ajuda ita atu hatene hahalok aten-brani mai husi neʼebé?

9 José, Rahab, Jesus, no apóstolu sira hakarak halo buat neʼebé loos. Sira hatudu aten-brani laʼós tanba sira fiar ba sira-nia kbiit, maibé tanba sira sadere ba Jeová. Nuneʼe mós se ita presiza aten-brani, ita tenke sadere ba Jeová, laʼós ba ita-nia an. (Lee 2 Timóteo 1:7.) Mai ita haree toʼok situasaun balu neʼebé ita presiza hatudu aten-brani: iha ita-nia família no iha kongregasaun.

SITUASAUN SIRA NEʼEBÉ PRESIZA ATEN-BRANI

10. Tanbasá mak joven sira presiza aten-brani?

10 Iha situasaun barak neʼebé joven sira presiza hatudu aten-brani atu serbí Jeová. Sira bele aprende husi Salomão nia ezemplu kona-ba aten-brani bainhira nia halo desizaun ho matenek hodi harii templu toʼo ramata. Maski inan-aman tenke fó matadalan ba sira-nia oan, maibé joven sira mak presiza halo rasik desizaun importante sira. (Provérbios [Amsal] 27:11) Sira presiza aten-brani atu halo desizaun neʼebé matenek kona-ba hili kolega, atividade halimar nian, oinsá atu iha morál neʼebé moos nafatin, no bainhira mak sira atu hetan batizmu. Sira presiza aten-brani tanba halo desizaun sira-neʼe kontra hasoru  Satanás nia hakarak, ida neʼebé sempre koʼalia aat Maromak.

11, 12. (a) Moisés hatudu aten-brani kona-ba saida? (b) Oinsá mak joven sira bele halo tuir Moisés nia ezemplu?

11 Desizaun importante ida neʼebé joven sira presiza halo mak kona-ba halo planu. Iha rai balu, ema hakaʼas beibeik joven sira atu tau fokus ba eskola boot no atu buka serbisu neʼebé manán osan barak. Iha rai seluk tan situasaun ekonomia ladún diʼak, tan neʼe joven sira sente katak sira-nia fokus mak atu buka serbisu hodi ajuda sira-nia família. Se Ita mak iha situasaun sira-neʼe, hanoin didiʼak kona-ba Moisés nia ezemplu. Faraun nia oan-feto mak haboot nia, tan neʼe nia bele halo planu atu sai ema riku ka importante tebes. Karik ninia família ema Ejitu, profesora sira, no konsellu-naʼin sira sempre hakaʼas nia atu iha planu sira-neʼe. Maibé Moisés hatudu aten-brani hodi hili atu serbí Jeová. Bainhira nia sai husi rai-Ejitu no fila kotuk ba rikusoin sira, nia hatudu aten-brani hodi sadere deʼit ba Jeová. (Ebreu 11:24-26) Rezultadu mak nia hetan bensaun barak husi Jeová no Jeová mós sei fó bensaun barak liután ba nia iha futuru.

12 Kuandu joven sira mak hatudu aten-brani hodi halo planu iha Jeová nia serbisu no tau uluk ninia Ukun iha sira-nia moris, Jeová mós sei fó bensaun ba sira. Nia sei fó ajuda hodi joven sira bele tau matan ba sira-nia família nia presiza. Iha apóstolu sira-nia tempu, mane joven Timóteo tau fokus deʼit hodi serbí Maromak Jeová. Ita mós bele halo nuneʼe. *​—Lee Filipe 2:19-22.

Ita hakarak atu hatudu aten-brani iha situasaun oioin ka lae?(Haree parágrafu 13-17)

13. Tanbasá mak irmán joven ida presiza aten-brani atu kumpre ninia planu sira?

13 Irmán ida husi Alabama, Estadus Unidus, nia presiza duni aten-brani atu halo planu iha Maromak nia serbisu. Nia dehan: “Husi kiʼik haʼu mak ema neʼebé moedór tebes. Haʼu sente susar tebes atu koʼalia ho ema seluk iha Reuniaun-Fatin, sá tan dere ema neʼebé haʼu la koñese nia odamatan.” Maibé liuhusi nia inan-aman no ema seluk iha kongregasaun nia ajuda, nia konsege kumpre duni ninia planu hodi foti pioneiru regulár. Nia dehan: “Satanás nia mundu tenta ema atu buka edukasaun boot, sai naran-boot, iha osan barak, sasán barak, no katak neʼe mak planu sira neʼebé diʼak.” Nia mós rekoñese katak, ema barak neʼebé duni tuir planu sira-neʼe nunka hetan susesu maibé hetan deʼit estrese ho susar. No nia hatutan tan, dehan: “Maibé serbí Jeová lori ksolok neʼebé boot ba haʼu no haʼu sente hetan susesu iha haʼu-nia moris.”

14. Iha situasaun saida deʼit mak inan-aman presiza hatudu aten-brani?

14 Inan-aman sira mós presiza aten-brani. Porezemplu, karik Ita-nia patraun husu beibeik Ita atu aumenta oras serbisu iha loron neʼebé Ita halo planu atu halaʼo adorasaun família, haklaken, ka tuir reuniaun. Ita presiza hatudu aten-brani atu la halo tuir patraun nia hakarak hodi hatudu ezemplu neʼebé diʼak ba Ita-nia oan. Ka dala ruma inan-aman balu husi Ita-nia kongregasaun husik sira-nia oan atu halo buat neʼebé Ita lakohi Ita-nia oan sira atu halo. Se sira husu tanbasá Ita la husik Ita-nia oan halo atividade sira-neʼe, Ita aten-brani atu esplika ba sira iha dalan neʼebé respeitu ka lae?

15. Oinsá mak Salmo 37:25 no Ebreu 13:5 bele ajuda inan-aman?

15 Ita presiza aten-brani atu ajuda oan halo planu no kumpre planu sira-neʼe iha Maromak nia serbisu. Porezemplu, karik inan-aman balu taʼuk atu fó laran-manas ba sira-nia oan hodi foti serbisu pioneiru, serbí iha fatin neʼebé presiza liután haklaken-naʼin, serbí iha Betel, ka fó ajuda iha serbisu konstrusaun atu harii Reuniaun-Fatin no fatin ba reuniaun boot sira. Karik sira taʼuk katak, se sira sai ferik-katuas, sira-nia oan la bele tau matan ba sira. Maibé inan-aman neʼebé matenek hatudu aten-brani no fiar katak Jeová  sei kumpre ninia promesa sira. (Lee Salmo [Mazmur] 37:25 *; Ebreu 13:5.) Inan-aman neʼebé hatudu aten-brani iha dalan sira-neʼe no sadere ba Jeová sei ajuda mós sira-nia oan atu halo tuir sira.​—1 Samuel 1:27, 28; 2 Timóteo 3:14, 15.

16. Iha dalan saida deʼit mak inan-aman balu ajuda sira-nia oan halo planu iha Maromak nia serbisu, no oinsá mak neʼe ajuda sira-nia oan?

16 Inan-aman ida husi Estadus Unidus ajuda sira-nia oan atu tau fokus hodi serbí Jeová. Laʼen neʼe dehan: “Antes ami-nia oan hatene laʼo no koʼalia, ami sempre koʼalia ba sira kona-ba ksolok husi serbí nuʼudar pioneiru no serbí iha kongregasaun. Ohin loron, neʼe mak sira-nia planu.” Nia mós dehan katak, tanba sira-nia oan halo planu no kumpre planu sira-neʼe, neʼe ajuda sira hodi luta hasoru tentasaun husi Satanás nia mundu hodi bele tau fokus atu serbí Jeová. Irmaun ida neʼebé iha oan rua hatete: “Inan-aman barak uza tempu no osan barak hodi ajuda sira-nia oan atu duni tuir planu oioin hanesan desportu, halimar, no edukasaun. Diʼak atu uza forsa no osan sira-neʼe atu ajuda oan kumpre planu neʼebé sei ajuda sira atu iha relasaun diʼak ho Jeová. Ami kontente hodi haree ami-nia oan kumpre sira-nia planu espirituál no neʼe halo sira mós haksolok.” Ita bele fiar katak Jeová kontente tebes ho inan-aman neʼebé ajuda sira-nia oan halo planu espirituál no hodi kumpre planu sira-neʼe.

HATUDU ATEN-BRANI IHA KONGREGASAUN

17. Fó toʼok ezemplu balu tanbasá presiza aten-brani iha kongregasaun.

17 Ita mós presiza hatudu aten-brani iha kongregasaun. Porezemplu, katuas sira presiza aten-brani atu tau matan ba problema boot  hanesan ema ruma halo sala boot, ka fó ajuda ba irmaun-irmán ruma neʼebé hasoru daudauk problema emerjénsia médiku. Katuas balu halo vizita ba prizaun atu estuda Bíblia ho ema ka halaʼo reuniaun iha fatin sira-neʼe. Oinsá ho irmán sira neʼebé seidauk kaben? Sira iha oportunidade barak atu hatudu aten-brani no serbí Jeová. Sira bele foti pioneiru, muda ba fatin neʼebé presiza liután haklaken-naʼin, serbisu iha konstrusaun, no tuir Eskola ba Haklaken-Naʼin Tempu-Tomak. Balu mós hetan konvite hodi tuir Eskola Gilead.

18. Irmán idade sira bele hatudu aten-brani kona-ba saida deʼit?

18 Ita hadomi ita-nia irmán sira neʼebé idade ona, no ita agradese bele iha irmán sira-neʼe iha ita-nia kongregasaun. Maski balu karik la iha ona kbiit hanesan uluk atu halo Maromak nia serbisu, maibé sira bele hatudu nafatin aten-brani no halo serbisu. (Lee Tito 2:3-5.) Porezemplu, bainhira katuas husu irmán neʼebé idade ona atu koʼalia ba irmán neʼebé idade kiʼik kona-ba hatais iha dalan neʼebé diʼak, irmán neʼe presiza hatudu aten-brani. Maski nia la siʼak kona-ba dalan irmán neʼe hatais, maibé nia koʼalia iha dalan neʼebé diʼak atu ajuda irmán ida seluk hodi hanoin katak ninia hatais bele halo ema seluk sidi. (1 Timóteo 2:9, 10) Bainhira irmán idade sira hatudu domin iha dalan hanesan neʼe, sira sei hametin liután ema iha kongregasaun.

19. (a) Oinsá mak irmaun sira neʼebé hetan ona batizmu bele hatudu aten-brani? (b) Oinsá mak Filipe 2:13 no 4:13 bele ajuda irmaun sira atu sai aten brani?

19 Irmaun sira neʼebé hetan ona batizmu mós presiza hatudu aten-brani hodi halo serbisu. Sira-nia hakarak atu serbí nuʼudar atan ba kongregasaun ka katuas, neʼe lori bensaun ba kongregasaun. (1 Timóteo 3:1) Maibé karik balu dada an husi knaar sira-neʼe. Karik irmaun ida uluk halo sala ruma no agora nia sente katak nia la merese atu serbí fali nuʼudar atan ka katuas. Irmaun ida bele sente katak nia la iha kbiit atu serbí ona. Se Ita mak sente hanesan neʼe, Jeová bele ajuda Ita atu sai aten-brani. (Lee Filipe 2:13; 4:13.) Hanoin kona-ba Moisés nia ezemplu. Nia mós sente katak nia la iha kbiit atu halo buat neʼebé Maromak hakarak nia atu halo. (Êxodo [Keluaran] 3:11) Maibé Jeová ajuda nia sai aten-brani hodi halo buat neʼebé nia presiza halo. Oinsá mak irmaun neʼebé hetan ona batizmu bele sai aten-brani hanesan neʼe? Nia bele halo orasaun husu Jeová nia ajuda no lee Bíblia loroloron. Nia bele hanoin kleʼan kona-ba ezemplu husi ema sira iha Bíblia neʼebé hatudu aten-brani. Ho haraik-an nia bele husu irmaun katuas sira fó treinu ba nia no fó ninia an atu ajuda kongregasaun. Ami husu ba irmaun hotu neʼebé hetan ona batizmu atu hatudu aten-brani no serbisu ho badinas ba kongregasaun.

“JEOVÁ . . . HAMUTUK HO Ó”

20, 21. (a) David fó-hanoin ba Salomão kona-ba saida? (b) Ita bele fiar kona-ba saida?

20 Liurai David fó-hanoin ba Salomão katak Jeová sei hamutuk ho nia toʼo nia ramata harii templu neʼe. (1 Crônicas [Tawarikh] 28:20) Ita bele fiar katak Salomão hanoin kleʼan kona-ba liafuan sira-neʼe, no nia la husik ninia idade no la iha esperiénsia atu hanetik nia hodi halaʼo serbisu neʼe. Nia hatudu aten-brani tebes no liuhusi Jeová nia ajuda, nia harii duni templu neʼebé kmanek iha tinan hitu ho balu nia laran.

21 Jeová ajuda ona Salomão no nia mós bele ajuda ita hatudu aten-brani hodi kumpre ita-nia serbisu iha família, no mós iha kongregasaun. (Isaías [Yesaya] 41:10, 13) Se ita mak hatudu aten-brani hodi serbí Jeová, ita bele fiar katak nia sei fó bensaun ba ita ohin loron no iha futuru. Tan neʼe, “sai aten-brani . . . no bá halo serbisu”.

^ par. 4 1 Crônicas 28:20 David hatete ba ninia oan-mane Salomão: “Sai aten-brani no sai forte, no bá halo serbisu. Keta taʼuk ka nakdedar, tanba Maromak Jeová, haʼu-nia Maromak, hamutuk ho ó. Nia sei la hadook an ka la husik ó, maibé nia sei hamutuk ho ó toʼo ó halo hotu serbisu sira iha Jeová nia uma.

^ par. 12 Ita bele hetan sujestaun balu kona-ba oinsá atu halo planu iha Maromak nia serbisu husi Menara Pengawal 15 Jullu 2004 ho títulu “Gunakanlah Cita-Cita Rohani untuk Memuliakan Pencipta Saudara”.

^ par. 15 Salmo 37:25 Uluk haʼu joven no agora haʼu katuas ona, Maibé haʼu seidauk haree Maromak husik hela ema laran-loos, No seidauk haree ninia oan sira husu hahán.