Skip to content

Skip to table of contents

Banati tuir Jeová nia laran-sadiʼa no laran-diʼak

Banati tuir Jeová nia laran-sadiʼa no laran-diʼak

“Jeová, Jeová, Maromak neʼebé laran-sadiʼa no laran-diʼak.”—ÊXODO (KELUARAN) 34:6.

KNANANUK: 142, 12

1. Jeová nia hahalok saida mak nia fó sai uluk ba Moisés, no tanbasá mak neʼe importante?

IHA tempu neʼebé Maromak fó sai ninia an ba Moisés, nia fó sai kona-ba ninia naran no hahalok sira. Hahalok primeiru neʼebé Jeová fó sai mak kona-ba ninia laran-sadiʼa no laran-diʼak. (Lee Êxodo [Keluaran] 34:5-7. *) Tanbasá mak Jeová la fó sai uluk kona-ba ninia forsa ka matenek? Tanba iha tempu neʼebá, Moisés hakarak hatene katak Jeová sei fó duni apoiu ba nia ka lae. Tan neʼe mak Jeová fó sai hahalok sira neʼebé hatudu katak nia hakarak tebes atu fó ajuda ba ninia atan sira. (Êxodo [Keluaran] 33:13) Hodi hatene katak Jeová hanoin tebes ita hotu, neʼe halo Ita sente oinsá? Lisaun neʼe sei koʼalia liuliu kona-ba  hahalok laran-sadiʼa no laran-diʼak. Hahalok sira-neʼe ajuda ita atu imajina ita-nia an iha ema seluk nia situasaun no book ita atu fó ajuda ba sira.

2, 3. (a) Saida mak hatudu katak ema hotu iha kbiit atu hatudu hahalok laran-sadiʼa no laran-diʼak? (b) Tanbasá mak diʼak ba ita atu aprende husi Bíblia kona-ba hahalok sira-neʼe?

2 Jeová kria ema tuir ninia ilas, no tanba nia mak Maromak neʼebé laran-sadiʼa no laran-diʼak, ema hotu, inklui mós sira neʼebé la hatene Maromak, iha kbiit atu hatudu hahalok laran-sadiʼa no laran-diʼak ba ema seluk. (Gênesis [Kejadian] 1:27) Ita bele hetan ezemplu barak husi Bíblia kona-ba ema neʼebé hatudu hahalok sira-neʼe. Porezemplu, bainhira Liurai Salomão halaʼo tesi-lia ba feto naʼin-rua kona-ba sé mak inan neʼebé loos ba bebé ida, nia haruka ema atu tesi bebé hodi fahe ba rua atu koko feto sira-neʼe nia laran. Bebé nia inan neʼebé loos hanoin tebes bebé neʼe no nia husu ba liurai atu fó deʼit bebé neʼe ba feto ida seluk. (1 Reis [Raja-Raja] 3:23-27) Ezemplu ida tan mak kona-ba Faraun nia oan-feto iha tempu neʼebé nia hetan bebé Moisés iha mota. Nia haree katak bebé neʼe mak ema ebreu no tuir loloos tenkesér oho tiha. Maibé tanba “nia hanoin loos bebé neʼe”, nia deside atu hakiak bebé neʼe nuʼudar ninia oan rasik.​—Êxodo (Keluaran) 2:5, 6.

3 Tanbasá mak ita hakarak aprende liután kona-ba hahalok laran-sadiʼa no laran-diʼak? Tanba Jeová hakarak ita banati-tuir nia. (Éfeso 5:1) Maski ita moris mai iha ona hahalok sira-neʼe, maibé tanba la perfeitu, ita sempre hanoin ita-nia an uluk. Dala ruma karik la fasil ba ita atu halo desizaun kona-ba ajuda uluk ema seluk ka tau fokus deʼit ba ita-nia an. Se nuneʼe, saida mak bele ajuda ita atu hanoin uluk ema seluk? Primeiru, mai ita haree toʼok oinsá mak Jeová no ema seluk hatudu hahalok laran-sadiʼa no laran-diʼak. Segundu, haree toʼok oinsá mak ita bele banati-tuir Maromak nia hahalok laran-sadiʼa no laran-diʼak no tanbasá mak halo nuneʼe diʼak ba ita.

JEOVÁ MAK EZEMPLU PERFEITU KONA-BA LARAN-SADIʼA NO LARAN-DIʼAK

4. (a) Tanbasá mak Jeová haruka anju tun ba Sodoma? (b) Buat neʼebé akontese ba Lot nia família hanorin saida mai ita?

4 Ita bele hetan ezemplu barak kona-ba Jeová nia hahalok laran-sadiʼa no laran-diʼak husi Bíblia. Porezemplu, haree toʼok buat neʼebé Jeová halo ba Lot. Lot mak ema neʼebé laran-loos no nia sente “laran-susar tebes” ba ema nia hahalok la morál iha sidade Sodoma no Gomorra. Ema sira-neʼe la hatudu respeitu ba Maromak Jeová, no Jeová deside atu halakon sira. (2 Pedro 2:7, 8) Jeová haruka anju ba Lot hodi fó-hatene ba nia katak Jeová atu halakon Sodoma no Gomorra no nia tenke halai sai husi sidade neʼe. Bíblia dehan: “Bainhira [Lot] demora, Jeová hatudu laran-diʼak ba nia, tan neʼe [anju sira-neʼe] kaer Lot nia liman no ninia feen nia liman no mós ninia oan-feto sira-nia liman, no lori sira sai ba sidade nia liʼur.” (Gênesis [Kejadian] 19:16) Jeová komprende kona-ba Lot nia situasaun no ita mós bele fiar katak nia komprende kona-ba ita-nia susar hotu neʼebé ita hasoru daudauk.—Isaías (Yesaya) 63:7-9; Tiago 5:11; 2 Pedro 2:9.

5. Ita aprende saida husi Bíblia kona-ba hatudu hahalok laran-sadiʼa no laran-diʼak?

5 Jeová laʼós hatudu deʼit hahalok laran-sadiʼa no laran-diʼak, nia mós hanorin ninia povu oinsá atu hatudu hahalok sira-neʼe. Hanoin toʼok ukun-fuan ida neʼebé nia fó ba ema Izraél. Ukun-fuan neʼe dehan katak, se ema ida debe osan, ema neʼebé fó empresta bele rai ema neʼe nia unuk atu sai nuʼudar garantia katak nia sei selu fali ninia debe sira. (Lee Êxodo [Keluaran] 22:26, 27. *) Maibé osan nia naʼin tenke fó fali unuk neʼe ba ninia naʼin antes loro-matan monu atu ema neʼe la sai malirin iha kalan. Se ema ruma la hatudu hahalok  laran-sadiʼa no laran-diʼak, karik nia sei la fó fali unuk neʼe, maibé Jeová hanorin ninia povu atu hatudu hahalok sira-neʼe. Prinsípiu husi ukun-fuan neʼe hanorin saida ba ita? Se maluk fiar-naʼin ida presiza ajuda, tenkesér fó ajuda ba nia. Se ita mak iha kbiit atu fó ajuda ba irmaun ka irmán ida neʼebé hetan daudauk susar, ita hakarak fó ajuda ba nia.​—Koloso 3:12; Tiago 2:15, 16; lee 1 João 3:17.

6. Ita bele aprende saida husi dalan neʼebé Jeová hatudu laran-sadiʼa no laran-diʼak ba ema Izraél neʼebé halo sala?

6 Jeová hatudu laran-sadiʼa no laran-diʼak ba ema Izraél maski sira halo sala hasoru nia. Bíblia dehan: “Jeová, sira-nia beiʼala nia Maromak, kontinua fó avizu ba sira liuhusi ninia atan sira. Nia fó avizu fila-fila ba sira, tanba nia hanoin tebes ninia povu no hanoin ninia templu.” (2 Crônicas [Tawarikh] 36:15) Hanesan neʼe mós ho ita, ita tenke hatudu laran-sadiʼa no laran-diʼak ba ema neʼebé seidauk hatene Jeová, sira neʼebé sei iha tempu atu arrepende an hodi sai Jeová nia belun. Jeová lakohi haree ema ida lakon ninia moris iha loron tesi-lia nian. (2 Pedro 3:9) Tan neʼe, antes loron neʼe toʼo mai, ita hakarak hakaʼas an atu fó sai Jeová nia avizu ba ema hotu no koko atu ajuda ema hotu atu simu Maromak nia laran-sadiʼa no laran-diʼak.

7, 8. Tanbasá mak família ida sente katak Jeová hatudu duni laran-sadiʼa no laran-diʼak ba sira?

7 Ohin loron, Jeová mós hatudu daudauk ninia laran-sadiʼa no laran-diʼak ba ninia atan sira. Porezemplu, liutiha tinan 1990, iha rai-Bóznia ema baku malu no oho malu tanba rasa la hanesan. Iha família ida husi neʼebá no sira-nia oan-mane ida naran Milan neʼebé foin tinan 12. Milan, ninia alin-mane, ninia inan-aman, no mós Testemuña sira seluk saʼe bís husi rai-Bóznia atu bá rai-Sérvia. Sira atu bá tuir reuniaun boot ida, no Milan nia inan-aman atu hetan batizmu iha reuniaun boot neʼe. Toʼo tiha fronteira, soldadu balu haree katak ninia família mai husi rasa neʼebé la hanesan no haruka sira tun husi bís. Soldadu sira husik irmaun-irmán seluk iha bís laran kontinua bá nafatin. Soldadu sira kaer Milan nia família ba loron rua. Ikusmai soldadu neʼebé kaer sira koʼalia husi rádiu ba ninia komandante hodi husu atu halo saida ba família neʼe. Iha tempu neʼebá, família neʼe bele rona komandante nia lian neʼebé dehan, “Lori sira bá no tiru mate deʼit sira!”

8 Nuʼudar soldadu sira koʼalia daudauk, derrepente ema naʼin-rua neʼebé sira la koñese hakbesik ba família neʼe. Sira bisu-bisu ba família neʼe katak sira mós Testemuña ba Jeová no irmaun sira iha bís laran konta ona ba sira kona-ba buat neʼebé akontese. Testemuña naʼin-rua neʼe hatete ba Milan ho ninia alin atu saʼe sira-nia karreta, tanba baibain soldadu sira la ravista labarik sira iha fronteira. Depois irmaun naʼin-rua neʼe haruka Milan nia inan-aman atu laʼo liuhusi postu nia kotuk hodi bá hasoru malu iha fronteira nia sorin. Milan la hatene atu hamnasa ka atu tanis bainhira rona sira hatete hanesan neʼe ba sira. No ninia inan-aman husu, “Imi hanoin soldadu sira sei husik ami laʼo liu deʼit ka?” Maibé bainhira sira komesa laʼo, soldadu sira la haree sira. Milan ho ninia alin hasoru fali sira-nia inan-aman iha fronteira sorin, no sira kontinua bá tuir reuniaun boot neʼe. Sira fiar ho laran tomak katak Jeová rona duni sira-nia orasaun iha tempu neʼebá! Ita hatene husi Bíblia katak dala ruma, Jeová la proteje ninia atan sira iha dalan hanesan neʼe. (Apóstolu 7:58-60) Maibé iha situasaun neʼe, Milan dehan: “Haʼu sente hanesan anju sira taka tiha soldadu sira-nia matan no Jeová mak salva duni ami.”​—Salmo (Mazmur) 97:10.

9. Jesus sente oinsá kona-ba ema-lubun neʼebé tuir nia? (Haree dezeñu iha pájina 8.)

9 Jesus mós hatudu ezemplu neʼebé diʼak tebes kona-ba hahalok laran-sadiʼa no laran-diʼak. Bainhira nia haree ema-lubun, nia hanoin tebes sira tanba nia haree katak “ema hanehan no la tau matan ba sira, no sira hanesan bibi neʼebé bibi-atan la iha”. Tuirmai nia halo saida? “Nia hahú hanorin sira buat barak.” (Mateus 9:36; lee Marcos 6:34.) Ema farizeu la hatudu laran-sadiʼa no laran-diʼak tanba sira lakohi fó ajuda ba povu. (Mateus  12:9-14; 23:4; João 7:49) Ita iha hakarak atu fó ajuda ba ema no hanorin sira kona-ba Jeová, hanesan buat neʼebé Jesus halo ka lae?

10, 11. Ita presiza hatudu laran-sadiʼa no laran-diʼak iha situasaun hotu ka lae? Esplika toʼok.

10 Maibé neʼe la dehan katak ita tenkesér hatudu laran-sadiʼa no laran-diʼak iha situasaun hotu. Porezemplu, Liurai Saul la oho Agag, liurai husi ema Ámalek sira neʼebé odi Maromak nia povu, karik tanba nia hanoin katak nia hatudu hahalok laran-sadiʼa no laran-diʼak ba liurai neʼe. No ema Ámalek nia animál balu mós Saul la oho. Maibé Jeová hatete ona ba nia katak nia tenkesér oho hotu ema Ámalek ho sira-nia animál hotu. Tanba Saul la halo tuir Jeová, Jeová lakohi tan nia atu sai liurai. (1 Samuel 15:3, 9, 15) Jeová mak Juis neʼebé hatudu laran-loos. Nia bele haree ema nia laran, no nia hatene tanbasá mak la presiza hatudu laran-sadiʼa no laran-diʼak iha situasaun ruma. (Lamentações [Ratapan] 2:17; Ezequiel [Yehezkiel] 5:11) Lakleur tan Jeová sei halaʼo tesi-lia ba ema hotu neʼebé lakohi halo tuir nia. (2 Tesalónika 1:6-10) Iha tempu neʼebá Jeová sei la hatudu tan laran-sadiʼa no laran-diʼak ba ema aat sira. Maibé nia sei halakon sira atu hatudu katak nia laran-sadiʼa no laran-diʼak ba ema laran-loos hodi salva sira.

11 Ita hatene katak, ita la iha direitu atu tesi-lia ba sé mak sei moris ka mate. Ita-nia knaar mak atu hakaʼas an agora hodi ajuda ema seluk. Iha dalan saida deʼit mak ita bele hatudu laran-sadiʼa no laran-diʼak ba ema seluk? Mai ita haree toʼok sujestaun balu.

DALAN ATU HATUDU LARAN-SADIʼA NO LARAN-DIʼAK

12. Iha dalan saida mak ita bele hatudu laran-sadiʼa no laran-diʼak atu fó ajuda ba ema?

12 Buka oportunidade atu fó ajuda ba ema nia presiza loroloron nian. Jeová hakarak ema kristaun hotu atu hatudu laran-sadiʼa no laran-diʼak ba sira-nia maluk no irmaun-irmán sira. (João 13:34, 35; 1 Pedro 3:8) Signifika ida husi liafuan laran-sadiʼa no laran-diʼak mak “terus hamutuk”. Ema neʼebé hatudu laran-sadiʼa no laran-diʼak koko atu fó ajuda ba sira neʼebé hasoru daudauk terus. Tan neʼe mak ita tenke buka oportunidade atu ajuda ema seluk, karik bele ajuda sira atu halo serbisu iha uma laran.​—Mateus 7:12.

Hatudu laran-sadiʼa no laran-diʼak liuhusi fó ajuda ba ema seluk (Haree parágrafu 12)

13. Jeová nia povu halo saida bainhira dezastre naturais kona sira-nia maluk?

13 Fó ajuda ba sira neʼebé kona dezastre naturais. Bainhira ita haree ema seluk terus tanba  dezastre ruma, ita hakarak atu hatudu laran-sadiʼa no laran-diʼak ba sira. Ema barak hatene Jeová nia povu sempre fó ajuda ba ema seluk iha tempu hanesan neʼe. (1 Pedro 2:17) Porezemplu, irmán ida husi rai-Japaun, nia hela iha fatin ida neʼebé hetan estraga makaʼas husi tsunami bainhira rai-nakdoko iha tinan 2011. Nia dehan katak bainhira nia haree irmaun-irmán husi fatin oioin iha Japaun no mós husi rai seluk mai hodi ajuda hadiʼa fali uma ho Reuniaun-Fatin sira, neʼe “fó kmaan no book tebes” nia. Nia hatutan hodi dehan: “Esperiénsia neʼe ajuda haʼu hodi hatene katak Jeová hanoin ita, maluk Testemuña sira hanoin malu no irmaun-irmán barak iha mundu tomak mós halo orasaun ba ami.”

14. Iha dalan saida deʼit mak Ita bele fó ajuda ba ema neʼebé moras no idade?

14 Fó ajuda ba sira neʼebé moras no idade. Bainhira ita haree ema terus tanba moras no idade, ita hanoin tebes sira. Ita hakarak tebes atu haree loron ida problema sira-neʼe sei lakon, tan neʼe ita halo orasaun atu Maromak nia Ukun toʼo mai. Maibé agora daudauk, ita presiza hakaʼas an atu fó ajuda ba sira neʼebé moras no idade. Hanoin toʼok kona-ba ezemplu neʼe. Loron ida, ferik neʼebé terus husi moras Alzheimer halo foʼer ninia roupa. Bainhira nia koko atu hamoos, ema dere ninia odamatan. Testemuña naʼin-rua neʼebé vizita beibeik nia mak mai. Irmán naʼin-rua neʼe husu atu ajuda nia. Ferik neʼe dehan: “Haʼu moe maibé haʼu presiza imi-nia ajuda.” Irmán sira ajuda nia hamoos, depois sira halo buat ruma hodi nia hemu no tuur dada lia ho ferik neʼe. Ferik nia oan-mane mak hakerek-naʼin ida, nia agradese ba irmán sira-nia hahalok no nia hatete katak Testemuña sira “halo tuir duni buat neʼebé sira haklaken ba ema”. Hahalok laran-sadiʼa no laran-diʼak mós book Ita atu hakaʼas an hodi ajuda ema hanesan neʼe ka lae?​—Filipe 2:3, 4.

15. Oinsá mak serbisu haklaken bele ajuda ema seluk?

15 Ajuda ema atu hatene Jeová. Bainhira ita haree ema hasoru problema oioin, neʼe book ita atu ajuda sira iha dalan espirituál. Dalan diʼak liu hotu atu ajuda ema mak hanorin sira kona-ba Maromak no ninia Ukun. Dalan seluk tan mak atu ajuda sira hatene tanbasá halo tuir Maromak nia morál diʼak ba sira. (Isaías [Yesaya] 48:17, 18) Serbisu haklaken mak dalan neʼebé kapás atu fó glória ba Jeová no hatudu laran-sadiʼa no laran-diʼak ba ema seluk. Ita bele haklaken liután ka lae?​—1 Timóteo 2:3, 4.

LARAN-SADIʼA NO LARAN-DIʼAK MÓS DIʼAK BA ITA RASIK!

16. Tanbasá mak diʼak ba ita atu hatudu laran-sadiʼa no laran-diʼak?

16 Matenek-naʼin sira neʼebé estuda kona-ba saúde mentál hatete katak, hatudu laran-sadiʼa no laran-diʼak bele ajuda ita-nia saúde no iha relasaun diʼak ho ema seluk. Se Ita fó ajuda ba ema neʼebé hasoru daudauk terus, Ita sei sente kontente liután, pozitivu, la sente mesamesak, no la hanoin negativu. Sin, hatudu laran-sadiʼa no laran-diʼak mak diʼak duni ba Ita. (Éfeso 4:31, 32) Bainhira ita fó ajuda ba ema tanba domin, ita sente iha konxiénsia neʼebé diʼak tanba ita hatene katak ita halo daudauk buat neʼebé Jeová gosta ita atu halo. Hahalok laran-sadiʼa no laran-diʼak bele ajuda ita atu sai nuʼudar inan-aman, feen ka laʼen, no belun neʼebé diʼak liután. No mós, baibain ema sei fó fali ajuda ba ema neʼebé hatudu laran-sadiʼa no laran-diʼak iha tempu neʼebé nia presiza ajuda.​—Lee Mateus 5:7; Lucas 6:38.

17. Tanba razaun saida deʼit mak ita hakarak hatudu laran-sadiʼa no laran-diʼak?

17 Hatudu laran-sadiʼa no laran-diʼak mak hahalok neʼebé diʼak ba ita, maibé importante liu mak neʼe hatudu katak ita hakarak banati-tuir Jeová no lori glória ba nia. Nia mak domin, laran-sadiʼa no laran-diʼak nia Hun. (Provérbios [Amsal] 14:31) Nia hatudu ezemplu neʼebé diʼak liu hotu ba ita. Tan neʼe, mai ita hakaʼas an atu halo tuir nia hodi hatudu laran-sadiʼa no laran-diʼak ba ema seluk. Halo nuneʼe bele ajuda ita hakbesik liután ba ita-nia irmaun-irmán sira no mós iha relasaun neʼebé diʼak ho ema hotu.—Galásia 6:10; 1 João 4:16.

^ par. 1 Êxodo 34:5-7 Tuirmai, Jeová tun iha kalohan laran no hamriik besik Moisés iha foho neʼe no fó sai ninia naran Jeová. Jeová liu iha Moisés nia oin no dehan: “Jeová, Jeová, Maromak neʼebé laran-sadiʼa no laran-diʼak, la hirus lalais no nakonu ho domin neʼebé laran-metin no lia-loos, Maromak neʼebé hatudu domin neʼebé laran-metin ba ema rihun ba rihun, fó perdua ba sala sira no ba hahalok kontra lei no hahalok aat, maibé nia sei fó duni kastigu ba ema neʼebé halo sala, kastigu ba oan no bei-oan tanba aman nia sala, ba jerasaun tolu no ba jerasaun haat.”

^ par. 5 Êxodo 22:26, 27 26 “Se imi foti imi-nia maluk nia roupa nuʼudar garantia ba buat neʼebé nia empresta, imi tenke fó fali roupa neʼe ba nia antes loro-matan monu. 27 Tanba nia iha deʼit roupa neʼe atu taka ninia isin. Se lae nia sei uza saida kuandu nia toba? Bainhira nia halerik ba haʼu, haʼu sei rona duni ninia lian, tanba haʼu mak Maromak neʼebé laran-sadiʼa.