Skip to content

Skip to table of contents

Tau fiar ba ita-nia Ulun-Naʼin​—Kristu

Tau fiar ba ita-nia Ulun-Naʼin​—Kristu

“Imi-nia Ulun-Naʼin ida deʼit, Kristu.”​—MATEUS 23:10.

KNANANUK: 146, 23

1, 2. Josué simu knaar boot saida bainhira Moisés mate?

JEOVÁ hatete ba Josué: “Haʼu-nia atan Moisés mate ona. Agora, ó no povu sira-neʼe hotu hamriik bá, hakur Mota Jordaun neʼe, no tama ba rai neʼebé haʼu sei fó ba povu Izraél.” (Josué [Yosua] 1:1, 2) Josué sai Moisés nia ajudante besik tinan 40, no agora nia hasoru mudansa neʼebé boot tebes.

2 Moisés lori ema Izraél ba tinan barak ona, maibé agora Josué mak sei lori fali sira. Tan neʼe karik nia hanoin: ‘Maromak nia povu sei simu haʼu nuʼudar sira-nia ulun-naʼin ka lae?’ (Deuteronômio [Ulangan] 34:8, 10-12) Matenek-naʼin ida koʼalia kona-ba Josué 1:1, 2 hodi hatete katak tempu neʼebé susar no perigu liu hotu ba nasaun ida iha tempu uluk no ohin loron mak bainhira troka ulun-naʼin ida.

3, 4. Oinsá mak Maromak haraik bensaun ba Josué tanba tau fiar ba nia, no karik ita bele husu pergunta saida ba ita-nia an?

3 Maski Josué iha dúvida, maibé nia tau fiar ba Jeová no la demora atu halo tuir Jeová nia matadalan sira. (Josué [Yosua] 1:9-11) Maromak haraik bensaun ba Josué tanba tau fiar ba nia no nia haruka anju ida hodi dirije Josué no ema Izraél sira. Ita bele fiar katak anju neʼe mak bolu nuʼudar Liafuan, Maromak nia  Oan-Mane primeiru.​—Êxodo (Keluaran) 23:20-23; João 1:1.

4 Jeová ajuda nasaun Izraél atu simu mudansa neʼe hodi tuir sira-nia ulun-naʼin foun, Josué. Ohin loron, ita mós hasoru mudansa boot oioin. Karik ita bele husu pergunta ba ita-nia an: ‘Maromak nia organizasaun kontinua laʼo ba oin, oinsá mak ita bele tau fiar ba Ulun-Naʼin Jesus neʼebé Jeová hili ona?’ (Lee Mateus 23:10.) Atu hatán ba pergunta neʼe, mai ita haree toʼok oinsá mak Jeová dirije ninia povu iha tempu uluk durante mudansa sira neʼebé akontese iha tempu neʼebá.

LORI MAROMAK NIA POVU TAMA BA RAI-KANAÁN

5. Josué hasoru esperiénsia úniku saida besik Jerikó? (Haree dezeñu iha leten.)

5 Bainhira ema Izraél hakur tiha Mota Jordaun, Josué hasoru esperiénsia úniku ida. Nia hasoru mane ida kaer surik besik sidade Jerikó. Josué husu ba mane neʼe: “Ó apoia ami ka apoia ami-nia inimigu?” Josué hakfodak bainhira mane neʼe hatete ba nia katak nia mak “ulun-naʼin ba Jeová nia tropa”, anju neʼebé prontu atu defende Maromak nia povu. (Lee Josué [Yosua] 5:13-15. *) Maski iha eskritura seluk hatete katak Jeová koʼalia diretamente ba Josué, maibé ita bele fiar katak Maromak uza anju ida hodi reprezenta nia no koʼalia ba Josué, hanesan nia halo iha tempu seluk.​—Êxodo (Keluaran) 3:2-4; Josué (Yosua) 4:1, 15; 5:2, 9; Apóstolu 7:38; Galásia 3:19.

6-8. (a) Tanbasá mak matadalan balu husi anju haree hanesan la matenek? (b) Tanbasá mak ita hatene katak matadalan sira-neʼe matenek no mai iha tempu neʼebé diʼak?

6 Anju neʼe fó matadalan neʼebé klaru ba Josué oinsá atu funu manán Jerikó. Foufoun, karik matadalan balu haree hanesan planu neʼebé ladún diʼak. Porezemplu, anju neʼe haruka Josué atu halo sirkunsizaun ba soldadu hotu. Ida-neʼe signifika katak sira sei la bele halo funu ba loron balu. Neʼe mak tempu neʼebé diʼak atu halo sirkunsizaun ba mane sira-neʼe ka lae?​—Gênesis (Kejadian) 34:24, 25; Josué (Yosua) 5:2, 8.

7 Karik soldadu sira hanoin: ‘Oinsá mak ami bele proteje ami-nia família se inimigu sira ataka ami?’ Maibé tuirmai iha buat ida la hanesan baibain akontese. Ema Jerikó sira sai taʼuk fali ba ema Izraél. Bíblia dehan: “Sidade Jerikó nia portaun taka metin loos tanba ema Izraél; la iha ema ida mak sai no la iha ema ida mak tama ba sidade neʼe.” (Josué [Yosua] 6:1) Ita bele fiar katak novidade neʼe halo ema Izraél tau fiar liután ba Maromak nia matadalan.

8 Anju neʼe hatete ba Josué katak sira la bele ataka Jerikó, maibé marxa haleʼu deʼit sidade neʼe loron ida dala ida ba loron neen. No iha loron hitu sira tenke marxa ba dala hitu. Karik sira hanoin: ‘Neʼe soe tempu deʼit!’ Maibé ema Izraél nia Ulun-Naʼin Jeová hatene saida mak nia sei halo. Halo tuir Jeová nia matadalan sira hametin liután ema Izraél sira-nia fiar, no sira la presiza halo funu hasoru soldadu sira husi Jerikó. (Josué [Yosua] 6:2-5; Ebreu 11:30). *

9. Tanbasá mak ita tenke halo tuir matadalan hotu husi Maromak nia organizasaun? Fó toʼok ezemplu.

 9 Ita bele aprende saida husi istória neʼe? Dala ruma Jeová nia organizasaun uza dalan foun atu halo buat ruma, no dala barak ita la komprende tanbasá. Porezemplu, karik foufoun ita iha dúvida kona-ba uza sasán eletróniku hodi estuda mesak, haklaken, ka tuir reuniaun sira. Maibé agora karik ita haree se ita uza sasán sira-neʼe lori benefísiu mai ita. Bainhira ita haree mudansa sira lori duni benefísiu diʼak oioin, ita-nia fiar no unidade sai metin liután.

OINSÁ MAK KRISTU DIRIJE EMA KRISTAUN IHA TEMPU ULUK?

10. Sé mak arranja atu lori kazu kona-ba sirkunsizaun ba grupu administradór iha Jeruzalein?

10 Bainhira Cornélio sai tiha ema kristaun ba maizumenus tinan 13, ema kristaun judeu balu hatete katak presiza nafatin atu halo sirkunsizaun. (Apóstolu 15:1, 2) Irmaun sira haksesuk kona-ba tópiku neʼe iha Antiokia. Tan neʼe katuas sira halo arranju hodi Paulo saʼe ba Jeruzalein atu hasoru grupu administradór hodi koʼalia kona-ba kazu neʼe. Maibé sé mak book sira hodi halo arranju neʼe? Paulo esplika katak Naʼi mak fó matadalan hodi lori kazu ba grupu administradór.​—Galásia 2:1-3.

Kristu mak dirije kongregasaun iha apóstolu sira-nia tempu (Haree parágrafu 10, 11)

11. (a) Ema kristaun judeu balu fiar nafatin saida kona-ba sirkunsizaun? (b) Oinsá mak Paulo hatudu haraik-an hodi apoia katuas sira iha Jeruzalein? (Haree nota iha kraik.)

11 Kristu dirije grupu administradór hodi fó sai katak ema kristaun neʼebé laʼós ema judeu la presiza atu halo sirkunsizaun. (Apóstolu 15:19, 20) Maski nuneʼe, tinan balu liutiha, ema kristaun judeu barak halo nafatin sirkunsizaun ba sira-nia oan-mane. Depois, katuas sira iha Jeruzalein rona lia-anin katak Paulo la halo tuir Moisés nia Ukun-Fuan. Tan neʼe sira haruka Paulo halo buat ruma atu hatudu katak nia respeitu Moisés nia Ukun-Fuan. * (Apóstolu 21:20-26) Sira haruka Paulo lori mane naʼin-haat ba templu atu halo serimónia hamoos nian, atu nuneʼe ema bele haree katak nia hatudu nafatin respeitu ba Moisés nia Ukun-Fuan. Karik Paulo bele hatete: ‘Haʼu la komprende. Tanbasá sira husu haʼu atu halo ida-neʼe? Ema kristaun judeu sira neʼebé la  komprende kona-ba arranju sirkunsizaun, sira mak iha problema.’ Maibé Paulo komprende katak katuas sira hakarak ema kristaun hotu atu iha unidade, tan neʼe, ho haraik-an nia halo tuir katuas sira-nia matadalan sira. Karik ita bele husu: ‘Tanbasá mak Jesus husik kazu kona-ba sirkunsizaun kontinua ba tempu kleur, maski Moisés nia Ukun-Fuan la vale ona husi tempu neʼebé Jesus mate?’​—Koloso 2:13, 14.

12. Karik tanbasá mak Kristu husik tempu balu liutiha hodi rezolve problema kona-ba sirkunsizaun?

12 Ema balu presiza tempu atu simu esplikasaun neʼebé foun. Ema kristaun judeu balu presiza duni tempu atu hadiʼa sira-nia hanoin. (João 16:12) Ema balu sente susar atu simu katak sirkunsizaun laʼós tan sinál neʼebé hatudu katak ema iha relasaun espesiál ho Maromak. (Gênesis [Kejadian] 17:9-12) Balu tan taʼuk katak komunidade judeu sei fó-terus ba sira tanba la hanesan ho sira. (Galásia 6:12) Maibé neineik-neineik, Kristu hatudu tan matadalan ba sira liuhusi Paulo nia karta sira.​—Roma 2:28, 29; Galásia 3:23-25.

KRISTU DIRIJE NAFATIN NINIA KONGREGASAUN

13. Saida mak bele ajuda ita atu apoia dalan neʼebé Kristu dirije ita ohin loron?

13 Se Maromak nia organizasaun halo mudansa ruma neʼebé ita la komprende tanbasá, diʼak atu hanoin kona-ba dalan neʼebé Kristu dirije Maromak nia povu iha tempu uluk. Maski iha Josué ka apóstolu sira-nia tempu, Kristu sempre fó matadalan neʼebé matenek hodi proteje Maromak nia povu, hametin sira-nia fiar, no ajuda sira atu iha unidade.​—Ebreu 13:8.

14-16. Oinsá mak matadalan husi “atan laran-metin no matenek” hatudu katak Kristu hakarak ajuda ita atu iha fiar neʼebé metin?

14 Ohin loron, “atan laran-metin no matenek” sempre fó matadalan ba ita iha tempu neʼebé loos. (Mateus 24:45) Matadalan sira-neʼe hatudu katak Kristu tau matan ba ita. Marc neʼebé iha oan naʼin-haat hatete: “Satanás hakaʼas an atu halo fraku kongregasaun liuhusi ataka família sira. Tan neʼe, arranju kona-ba halaʼo adorasaun família semana-semana diʼak tebes ba família nia ulun atu proteje sira-nia família!”

15 Bainhira ita haree dalan neʼebé Kristu dirije ita, ita bele haree duni katak nia hakarak ajuda ita atu iha fiar neʼebé metin. Porezemplu, katuas kongregasaun ida naran Patrick hatete: “Foufoun, ema balu sente laran-kraik tanba arranju kona-ba grupu haklaken la bele boot liu iha findesemana.” Maibé nia esplika katak arranju neʼe hatudu duni katak Jesus hanoin ema ida-idak iha kongregasaun. Porezemplu, irmaun-irmán balu neʼebé moedór ka ladún bá haklaken, agora sente katak sira iha folin. Ida-neʼe hametin sira-nia fiar.

16 Kristu mós ajuda ita atu tau fokus nafatin ba serbisu haklaken neʼebé importante tebes. (Lee Marcos 13:10.) Katuas kongregasaun foun ida naran André sempre koko atu halo tuir matadalan foun husi Maromak nia organizasaun. Nia dehan: “Hamenus ema iha sukursál ajuda haʼu atu haree katak ita-nia tempu urjente tebes no ita presiza uza ita-nia forsa atu haklaken.”

APOIA DALAN NEʼEBÉ KRISTU DIRIJE ITA

17, 18. Tanbasá mak ita tenke hanoin kona-ba oinsá ita hetan benefísiu tanba halo tuir mudansa sira?

17 Matadalan neʼebé ita simu husi ita-nia Liurai Jesus Kristu neʼebé ukun daudauk sei ajuda ita agora no iha futuru. Koko atu hanoin kona-ba oinsá Ita hetan benefísiu tanba halo tuir mudansa sira foin daudauk neʼe. Iha tempu Ita halaʼo adorasaun família, koko atu koʼalia kona-ba mudansa sira iha reuniaun ka iha serbisu haklaken neʼebé ajuda ona Ita-nia família rasik.

Ita ajuda família no ema seluk atu simu mudansa sira husi Jeová nia organizasaun ka lae? (Haree parágrafu 17, 18)

 18 Se ita mak hanoin beibeik katak halo tuir matadalan husi Jeová nia organizasaun lori rezultadu diʼak oioin, neʼe sei halo fasil ba ita atu halo tuir ho haksolok. Porezemplu, ita la print ona livru barak hanesan uluk, tan neʼe la uza osan barak. No tanba ita uza teknolojia foun oioin, ita-nia organizasaun bele uza osan barak liu atu haklaken ba ema oioin. Ita rasik uza daudauk sasán eletróniku hodi asesu ita-nia publikasaun sira ka lae? Neʼe mak dalan ida atu apoia Kristu, nia hakarak ita atu uza didiʼak organizasaun nia sasán sira.

19. Tanbasá mak ita tenke apoia dalan neʼebé Kristu dirije ita?

19 Hodi apoia dalan neʼebé Kristu dirije ita, neʼe bele ajuda irmaun-irmán atu iha fiar no unidade neʼebé metin liután. Bainhira koʼalia kona-ba mudansa neʼebé Betel halo iha mundu tomak atu hamenus ema, André hatete: “Hahalok diʼak husi ema sira neʼebé uluk serbí iha Betel hodi simu mudansa sira-neʼe ajuda haʼu atu hatudu respeitu ba sira no tau fiar ba dalan neʼebé Kristu dirije ita. Irmaun sira-neʼe halo tuir duni Jeová nia organizasaun hodi halo knaar saida deʼit neʼebé Jeová fó ba sira ho haksolok.”

HATUDU FIAR BA ITA-NIA ULUN-NAʼIN

20, 21. (a) Tanbasá mak ita bele tau fiar ba ita-nia Ulun-Naʼin Kristu? (b) Ita sei koʼalia kona-ba saida iha lisaun tuirmai?

20 Lakleur tan ita-nia Ulun-Naʼin Jesus Kristu sei funu “manán ninia inimigu sira hotu” no “kumpre buat sira neʼebé kmanek tebes”. (Apokalipse 6:2; Salmo [Mazmur] 45:4) Maibé ohin loron nia prepara daudauk Maromak nia povu atu moris iha mundu foun no iha neʼebá ita sei hanorin ema neʼebé hetan moris-hiʼas no ajuda atu halo mundu sai fali paraízu.

21 Ita-nia Liurai sei lori ita tama toʼo mundu foun, naran katak ita tau fiar ba nia iha situasaun hotu. (Lee Salmo [Mazmur] 46:1. *) Dala ruma la fasil ba ita atu simu mudansa sira ohin loron, liuliu se ita-nia moris troka derrepente deʼit. Se ida-neʼe akontese, oinsá mak ita bele sai kalma nafatin no hatudu fiar neʼebé metin ba Jeová? Ita sei koʼalia kona-ba pergunta neʼe iha lisaun tuirmai.

^ par. 5 Josué 5:13-15 13 Bainhira Josué besik Jerikó, nia hateke saʼe no haree mane ida neʼebé kaer surik hamriik iha ninia oin. Josué laʼo besik nia no husu: “Ó apoia ami ka apoia ami-nia inimigu?” 14 Nia dehan: “Lae, maibé haʼu mai nuʼudar ulun-naʼin ba Jeová nia tropa.” Ho ida-neʼe, Josué hakneʼak no hakruʼuk ho oin ba rai no husu: “Saida mak haʼu-nia naʼi hakarak fó sai ba Ita-nia atan?” 15 Ulun-naʼin ba Jeová nia tropa hatán ba Josué: “Hasai ó-nia sandálias husi ó-nia ain, tanba fatin neʼebé ó hamriik bá mak santu.” Josué halo tuir kedas.

^ par. 8 Arkeólogu sira buka-hetan trigu fini barak iha Jerikó nia sidade neʼebé rahun ona. Neʼe apoia duni buat neʼebé Bíblia hatete katak, ema Izraél sira la halo serku ba tempu kleur no la han Jerikó nia trigu fini sira. Iha tempu neʼebá mak tempu koʼa nian, tan neʼe sai tempu neʼebé diʼak ba ema Izraél sira atu ataka, tanba sira bele hetan hahán barak husi fatin seluk.​—Josué (Yosua) 5:10-12.

^ par. 11 Haree kaixa “Paulus dengan Rendah Hati Menyambut Ujian”, iha Menara Pengawal, 15 Marsu 2003, pájina 24.

^ par. 21 Salmo 46:1 Maromak mak ita-nia fatin protesaun no ita-nia kbiit, ita sempre hetan ajuda husi nia iha tempu susar.