Skip to content

Skip to table of contents

Hakarak hatene?

Hakarak hatene?

Tanbasá Jesus la gosta ema judeu nia toman kona-ba halo juramentu?

TUIR Moisés nia Ukun-Fuan, ema judeu bele halo juramentu kona-ba buat balu. Sira baibain hatete buat ruma hanesan, “Haʼu jura hodi Jeová nia naran.” Maibé toʼo tiha Jesus nia tempu, juramentu sai hanesan buat baibain deʼit, tan neʼe ema judeu sira halo juramentu ba buat naran deʼit. Sira halo hanesan neʼe atu ema bele fiar ba buat neʼebé sira koʼalia. Maibé ba dala rua, Jesus hirus kona-ba toman neʼe. Nia dehan: “Se imi dehan ‘sin’, tenkesér sin, no ‘lae’, tenkesér lae.”—Mateus 5:33-37; 23:16-22.

Ema judeu nia livru ida kona-ba sira-nia lei, naran Talmude, esplika barabarak kona-ba juramentu saida mak sira tenkesér kumpre no juramentu saida mak sira la presiza halo tuir. Disionáriu ida (Theological Dictionary of the New Testament) esplika katak, husi livru Talmude, ita bele haree katak ema judeu sira iha duni toman hodi halo juramentu beibeik.

Tuir loloos, laʼós Jesus mesak mak hirus kona-ba toman la loos neʼe. Porezemplu, istória-naʼin Flávio Josefo hakerek katak iha sekte ida husi ema judeu neʼebé hasees an husi halo juramentu. Sira fiar katak halo juramentu mak aat liu fali bosok. Sira sente katak, se ema ida mak presiza jura hodi ema seluk bele fiar nia, neʼe katak ema neʼe bosok-teen ida. Ema judeu nia livru ida naran Wisdom of Sirach mós hatete katak: “Ema neʼebé sempre halo juramentu mak ema neʼebé sempre kontra lei.” Jesus hirus bainhira ema halo juramentu kona-ba buat neʼebé la importante. Se ita mak sempre koʼalia lia-loos, ita la presiza halo juramentu atu halo ema seluk fiar ba ita.