Skip to content

Skip to table of contents

“Hadomi . . . ho hahalok no lia-loos”

“Hadomi . . . ho hahalok no lia-loos”

“Ita labele hadomi ho liafuan ka ho ibun deʼit, maibé ho hahalok no lia-loos.”—1 JOÃO 3:18.

KNANANUK: 3, 50

1. Domin neʼebé importante liu hotu mak saida, no tanbasá? (Haree foto iha leten.)

JEOVÁ mak domin nia Hun. (1 João 4:7) Domin importante liu hotu mak domin neʼebé bazeia ba prinsípiu husi Bíblia. Bíblia iha lia-gregu bolu domin neʼe agape. Domin neʼe inklui hatudu sentimentu hanoin ema. Maibé laʼós liuhusi sentimentu deʼit, domin neʼe mós book ita atu halo buat diʼak ba ema seluk hodi la hanoin an deʼit. Domin neʼe lori ksolok ba ita no halo ita-nia moris iha folin.

2, 3. Iha dalan saida mak Jeová hatudu nia domin neʼebé la hanoin an deʼit ba ema?

2 Jeová hatudu domin nanis antes nia kria Adão no Eva. Oinsá? Nia kria buat hotu iha mundu neʼe atu ema bele moris. Laʼós neʼe deʼit, nia mós kria mundu neʼe atu sai ema nia hela-fatin hodi ema bele goza moris. Jeová kria buat sira-neʼe laʼós ba nia an, maibé ba ita. Bainhira nia kria buat hotu kompletu ona iha mundu neʼe mak nia foin kria ema no fó ba ema esperansa atu moris ba nafatin iha Paraízu.

3 Bainhira Adão no Eva kontra Jeová, nia hatudu tan domin neʼebé boot tebes ba ema. Jeová halo kedas arranju atu fó nia  Oan-Mane nia moris hodi salva Adão nia oan no bei-oan sira tanba Jeová hatene katak sira balu sei hakarak atu hadomi nia. (Gênesis [Kejadian] 3:15; 1 João 4:10) Iha tempu neʼebé Jeová promete atu fó nia Oan-Mane nia sakrifísiu, nia hatene katak ninia arranju neʼe sei sai susesu. Ikusmai, liutiha tinan 4.000, Jeová fó duni nia Oan-Mane mesak nia moris sai hanesan sakrifísiu ba ema. (João 3:16) Ita agradese tebes ba Jeová nia domin neʼe!

4. Oinsá mak ita hatene katak ema la perfeitu mós bele hatudu domin neʼebé la hanoin an deʼit?

4 Ita ema la perfeitu bele hatudu domin neʼebé la hanoin an deʼit ka lae? Bele. Jeová kria ita tuir nia ilas, tan neʼe ita iha kbiit atu banati-tuir nia hodi hatudu domin neʼe, maski la fasil. Porezemplu, Abel la hanoin an deʼit hodi hatudu domin liuhusi fó buat neʼebé diʼak liu hotu ba Jeová. (Gênesis [Kejadian] 4:3, 4) Noé mós hatudu domin neʼebé la hanoin an deʼit hodi haklaken Maromak nia mensajen ba tinan barak maski ema la rona ba nia. (2 Pedro 2:5) No Abraão mós hatudu katak nia iha domin ba Maromak liu fali buat hotu tanba nia prontu atu hasaʼe nia oan doben Isaac nuʼudar sakrifísiu. (Tiago 2:21) Ita mós hakarak hatudu domin hanesan ema laran-metin sira-neʼe maski la fasil atu halo nuneʼe.

SAIDA MAK DOMIN NEʼEBÉ LOOS?

5. Ita bele hatudu domin neʼebé loos iha dalan saida deʼit?

5 Bíblia hakarak ita atu “labele hadomi ho liafuan ka ho ibun deʼit, maibé ho hahalok no lia-loos”. (1 João 3:18) Neʼe dehan katak ita labele hatudu domin ho liafuan ka lae? Lae. (1 Tesalónika 4:18) Maibé temi deʼit ho liafuan katak “Haʼu hadomi ó” seidauk toʼo. Ita tenke hatudu mós ho hahalok. Porezemplu, se irmaun ka irmán ruma falta hahán ka roupa atu hatais, latoʼo atu koʼalia deʼit liafuan kmaan ba sira. (Tiago 2:15, 16) Hanesan neʼe mós kona-ba haklaken, tanba ita hadomi Jeová no ita-nia maluk, latoʼo atu halo deʼit orasaun hodi husu Maromak haruka ema barak liután atu haklaken ho ita, maibé ita rasik tenke hakaʼas an hodi haklaken ho badinas.—Mateus 9:38.

6, 7. (a) Saida mak “domin neʼebé la laran-makerek”? (b) Ezemplu saida deʼit mak hatudu sai domin neʼebé falsu?

6 Apóstolu João hatete katak ita tenke hadomi ho “hahalok no lia-loos”. Tan neʼe, ita tenke hatudu domin ho “laran-moos” ka “domin neʼebé la laran-makerek”. (Roma 12:9; 2 Korinto 6:6) Dala ruma ema bele finje hatudu domin. Maibé domin hanesan neʼe, loos no mai husi laran ka lae? Ninia motivu mak saida? Tuir loloos domin neʼebé laran-makerek la bele bolu nuʼudar domin, tanba domin hanesan neʼe falsu no la folin buat ida.

7 Mai ita haree toʼok ezemplu balu kona-ba domin neʼebé falsu. Bainhira Satanás koʼalia ba Eva iha jardín Eden, liafuan neʼebé nia hatoʼo rona hanesan nia hakarak buat neʼebé diʼak ba Eva. Maibé nia hahalok hatudu sai oin-seluk. (Gênesis [Kejadian] 3:4, 5) Iha tempu David ukun nuʼudar liurai, nia iha belun ida naran Aitofel. Maibé tanba nia buka diʼak ba nia an, nia trai David. Nia hahalok hatudu sai katak nia laʼós belun neʼebé loos. (2 Samuel 15:31) Ohin loron, ema soe-fiar no ema seluk tan koko atu sobu kongregasaun nia unidade liuhusi “liafuan midar no liafuan gaba nian”. (Roma 16:17, 18) Sira finje katak sira hanoin ema seluk, maibé tuir loloos sira atu buka diʼak deʼit ba sira-nia an.

8. Ita tenke husu pergunta saida ba ita-nia an?

8 Domin falsu mak hahalok neʼebé lori moe boot tanba ema uza domin neʼe atu lohi ema seluk. Karik ita bele lohi ema, maibé ita la bele lohi Jeová. Jesus hatete  katak sira neʼebé iha hahalok laran-makerek sei hetan “kastigu todan”. (Mateus 24:51) Nuʼudar Jeová nia atan, ita labele hatudu domin neʼebé laran-makerek. Tan neʼe husu ba ita-nia an, ‘Haʼu hadomi husi laran ka lae, ka haʼu hadomi tanba atu buka diʼak no atu lohi ema deʼit?’ Mai ita koʼalia kona-ba dalan sia oinsá atu hatudu “domin neʼebé la laran-makerek”.

HATUDU DOMIN LIUHUSI “HAHALOK NO LIA-LOOS”

9. Domin neʼebé loos sei book ita atu halo saida?

9 Kontente atu halo serbisu maski ema seluk la haree. Ita tenke halo buat hotu ho domin no diʼak ba ema seluk maski la iha ema ida mak hatene kona-ba buat neʼebé ita halo. (Lee Mateus 6:1-4.) Ananias no Safira la hatudu hahalok hanesan neʼe. Bainhira sira fó kontribuisaun, sira hakarak ema hotu hatene kona-ba sira-nia kontribuisaun. Sira bosok kona-ba osan neʼebé sira fó, no ikusmai sira simu kastigu todan ba sira-nia hahalok laran-makerek. (Apóstolu 5:1-10) Se ita mak hadomi tebes ita-nia irmaun-irmán sira, ita sei halo buat neʼebé diʼak ba sira maski ema seluk la hatene kona-ba buat neʼebé ita halo. Porezemplu, irmaun sira neʼebé ajuda Grupu Administradór atu prepara ai-han espirituál, sira nunka dada atensaun ba sira-nia an, no sira mós nunka fó sai katak sira mak ajuda prepara informasaun ruma.

10. Oinsá mak ita bele hatudu respeitu ba ema seluk?

10 Hatudu respeitu ba ema seluk. (Lee Roma 12:10.) Jesus hatudu respeitu ba ninia apóstolu sira bainhira nia fase sira-nia ain. (João 13:3-5, 12-15) Ita tenke hakaʼas an atu sai haraik-an hanesan Jesus hodi serbí ema seluk. Jesus nia apóstolu sira la komprende kona-ba buat neʼebé Jesus halo ba sira toʼo sira simu espíritu santu. (João 13:7) Ita bele hatudu respeitu ba ema seluk hodi la hanoin katak ita diʼak liu fali ema seluk tanba ita iha edukasaun, rikusoin, ka knaar espesiál. (Roma 12:3) Ita la laran-moras ba ema seluk bainhira ema gaba sira, maibé haksolok ho sira maski ita sente katak ita mós merese atu simu gaba.

11. Tanbasá mak ita tenke gaba ema husi laran?

11 Gaba ema husi laran. Buka dalan atu gaba ema seluk. Ita hatene katak gaba bele “hametin ema seluk”. (Éfeso 4:29) Maibé ita-nia liafuan gaba tenkesér mai husi laran. Ita labele koʼalia liafuan midar deʼit ka sees husi ita-nia responsabilidade atu fó konsellu ba ema. (Provérbios [Amsal] 29:5) Se ita mak gaba ema no depois kritika fali ema neʼe subasubar, neʼe hatudu katak ita laran-makerek. Apóstolu Paulo hatudu domin neʼebé loos. Porezemplu, bainhira nia hakerek karta ba ema kristaun iha Korinto, nia gaba sira kona-ba buat diʼak neʼebé sira halo. (1 Korinto 11:2) Maibé bainhira sira halo buat neʼebé sala, nia fó konsellu ba sira no esplika razaun iha dalan neʼebé diʼak no klaru ba sira.—1 Korinto 11:20-22.

Ita bele hatudu domin no laran-diʼak ba irmaun-irmán liuhusi fó ajuda ba sira (Haree parágrafu 12)

12. Oinsá mak ita bele hatudu domin neʼebé loos liuhusi hatudu laran-diʼak ba ema?

12 Hatudu laran-diʼak ba malu. Jeová hakarak ita atu la bele karak ba ita-nia irmaun-irmán sira. (Lee 1 João 3:17.) Maibé ita tenke hatudu laran-diʼak ho motivu neʼebé loos. Husu ba ita-nia an: ‘Haʼu konvida deʼit haʼu-nia belun diʼak, sira neʼebé iha pozisaun importante iha kongregasaun ka sira neʼebé bele halo fali buat ruma ba haʼu ka lae? Ka haʼu konvida irmaun-irmán hotu neʼebé haʼu ladún koñese no sira neʼebé la iha kbiit atu halo fali buat ruma ba haʼu?’ (Lucas 14:12-14) Hanoin toʼok kona-ba situasaun sira tuirmai neʼe: Oinsá se irmaun ida presiza ajuda tanba nia halo ona desizaun neʼebé la matenek? Ka oinsá se ita konvida ema ida ba ita-nia uma maibé nia  nunka fó-agradese ba ita? Iha situasaun hanesan neʼe diʼak atu halo tuir konsellu neʼe: “Hatudu laran-diʼak ba malu hodi la muramura.” (1 Pedro 4:9) Se ita mak hatudu laran-diʼak ho motivu neʼebé loos, neʼe sei lori ksolok ba ita.—Apóstolu 20:35.

13. (a) Saida mak bele koko ita-nia pasiénsia? (b) Ita bele halo saida atu ajuda sira neʼebé fraku?

13 Fó ajuda ba sira neʼebé fraku. Bíblia haruka ita atu fó apoiu ba “sira neʼebé fraku, hatudu pasiénsia ba ema hotu”, no halo nuneʼe bele koko ita-nia domin. (1 Tesalónika 5:14) Maski irmaun-irmán barak neʼebé uluk fraku iha fiar ikusmai sai metin fali, maibé seluk presiza nafatin ita-nia pasiénsia no ajuda barak liután. Oinsá mak ita bele ajuda sira? Ita bele uza Bíblia atu fó laran-manas ba sira, konvida sira atu haklaken hamutuk, ka rona ho pasiénsia ba sira. No mós, keta hanoin deʼit kona-ba irmaun ka irmán sira-nia fiar metin ka la metin, diʼak atu hanoin-hetan katak ita hotu iha ita rasik nia kbiit no fraku. Apóstolu Paulo mós rekoñese katak nia iha fraku oioin. (2 Korinto 12:9, 10) Ita hotu presiza ajuda no hetan laran-manas husi ema seluk.

14. Ita presiza halo saida atu bele iha dame nafatin ho irmaun-irmán sira?

14 Buka dame. Importante tebes atu iha dame ho ita-nia irmaun-irmán sira. Maski ita sente katak ema seluk komprende sala ita ka trata ita iha dalan neʼebé la justisa, ita tenkesér hakaʼas an atu buka nafatin dame. (Lee Roma 12:17, 18.) Se ita mak hakanek ema ruma nia sentimentu, diʼak atu husu deskulpa. Maibé ita tenke halo ho laran. Porezemplu, duké hatete deʼit katak, “Haʼu triste tanba Ita sente kanek”, diʼak atu rekoñese katak ita mak sala hodi dehan, “Haʼu husu deskulpa tanba haʼu-nia liafuan hakanek Ita.” Dame mós importante iha moris kaben nian. Ladiʼak ba feen-laʼen atu hatudu katak sira hadomi malu iha ema nia oin, maibé iha uma sira lakohi koʼalia ba malu, hasai liafuan hodi hakanek malu, ka hatudu hahalok violénsia ba malu.

15. Iha dalan saida deʼit mak ita bele hatudu katak ita fó perdua ho laran?

15 Fó perdua ho laran. Se ema ruma hakanek ita-nia sentimentu, fó perdua ba nia no haluha deʼit. Ita tenke halo nuneʼe maski ema hakanek ita la ho neon. Bíblia dehan, “tahan malu iha domin, no hakaʼas an atu nafatin iha unidade liuhusi espíritu santu, atu imi iha dame iha imi-nia leet”. Sin, halo nuneʼe hatudu sai katak ita fó perdua ho laran. (Éfeso 4:2, 3) Se ita mak fó perdua ho laran, ita sei la hanoin beibeik kona-ba buat neʼebé ema halo ba ita. Tanba “domin la hanoin fali buat aat neʼebé nia simu”. (1 Korinto 13:4, 5) Tuir loloos, se ita mak rai odi, neʼe bele estraga ita-nia relasaun diʼak ho irmaun-irmán sira no mós ho Jeová. (Mateus 6:14, 15) Ita mós bele hatudu katak ita fó perdua ho laran liuhusi halo  orasaun ba ema neʼebé hakanek ita.—Lucas 6:27, 28.

16. Ita tenke hanoin oinsá kona-ba ita-nia knaar espesiál iha Jeová nia serbisu?

16 Hanoin uluk buat diʼak ba ema seluk. Bainhira ita simu knaar espesiál iha Jeová nia serbisu, ita bele hatudu domin neʼebé loos liuhusi “buka uluk ema seluk nia diʼak, laʼós [ita] rasik nia diʼak”. (1 Korinto 10:24) Porezemplu, iha tempu halaʼo reuniaun boot, baibain asistente sira mak toʼo uluk no dala ruma sira hakarak atu rai uluk tuur-fatin neʼebé diʼak ba sira-nia an ka ba sira-nia família. Maibé duké halo hanesan neʼe, sira barak fó uluk tuur-fatin neʼebé diʼak ba ema seluk. Hodi halo nuneʼe, hatudu katak sira iha domin neʼebé la hanoin an deʼit. Oinsá mak Ita bele halo tuir sira-nia ezemplu?

17. Se ema ida monu ba sala boot, domin neʼebé loos sei book nia atu halo saida?

17 Fó sai no husik tiha sala. Ema balu neʼebé monu ba sala boot koko atu taka sira-nia sala. Karik sira halo nuneʼe tanba sira sente moe ka tanba lakohi halo ema seluk laran-tun. (Provérbios [Amsal] 28:13) Maibé taka sala mak hahalok neʼebé la iha domin tanba bele estraga ema neʼebé halo sala no mós ema seluk. Oinsá? Karik neʼe bele hanetik Jeová atu haraik ninia espíritu santu ba kongregasaun, no kongregasaun mós sei la iha dame. (Éfeso 4:30) Tan neʼe, se ema ida mak monu ba sala boot, domin neʼebé loos sei book nia atu koʼalia ba katuas kongregasaun sira hodi husu ajuda.—Tiago 5:14, 15.

18. Tanbasá mak importante atu iha domin neʼebé loos?

18 Domin mak hahalok neʼebé importante liu hotu. (1 Korinto 13:13) Domin hatudu sai sé mak Jesus nia dixípulu neʼebé loos, no sé mak halo tuir Jeová, domin nia Hun. (Éfeso 5:1, 2) Apóstolu Paulo hatete katak se nia mak la iha domin, nia la folin buat ida. (1 Korinto 13:2) Tan neʼe, mai ita hotu kontinua hatudu domin, laʼós ho “liafuan” deʼit, maibé ho “hahalok no lia-loos”.