Skip to content

Skip to table of contents

 ESPERIÉNSIA

Bensaun mai husi halo buat neʼebé Jeová hakarak ita atu halo

Bensaun mai husi halo buat neʼebé Jeová hakarak ita atu halo

Haʼu ho haʼu-nia laʼen, haʼu-nia maun ho ninia feen simu knaar espesiál ida atu halo no ami hatán kedas, “Ami sei halo!” Tanbasá mak ami simu knaar neʼe, no ami hetan bensaun saida husi Jeová? Ulukliu, haʼu hakarak konta kona-ba haʼu-nia moris.

HAʼU moris iha tinan 1923, iha Hemsworth, sidade ida iha Yorkshire, rai-Inglaterra. Haʼu iha maun ida naran Bob. Bainhira haʼu tinan sia, apá hetan livru balu neʼebé esplika oinsá relijiaun falsu bosok ema. Apá gosta tebes livru sira-neʼe tanba nia la gosta ulun-naʼin relijiaun sira laran-makerek. Tinan balu liutiha, Bob Atkinson vizita ami no loke irmaun Rutherford nia diskursu ida. Afinál diskursu neʼe mai husi grupu neʼebé halo livru neʼebé apá lee. Haʼu-nia inan-aman konvida irmaun Bob han hamutuk ho ami kalan-kalan no nia hatán ami-nia pergunta hotu kona-ba Bíblia. Nia konvida ami tuir reuniaun sira neʼebé halaʼo iha irmaun ida nia uma neʼebé la dook husi ami. Ami komesa tuir beibeik reuniaun sira no kongregasaun kiʼik ida mós harii iha Hemsworth. Lakleur ami loke ami-nia uma ba katuas área atu hela no konvida pioneiru husi kongregasaun seluk hodi han hamutuk ho ami. Irmaun-irmán sira-neʼe hatudu ezemplu neʼebé diʼak tebes ba haʼu.

Iha tempu neʼebá, ami-nia família iha bisnis. Maibé apá hatete ba haʼu-nia maun, “Se ó hakarak foti pioneiru, ita faʼan tiha bisnis neʼe”. Bob konkorda no nia muda husi uma hodi hahú pioneiru ho idade 21. Tinan rua liutiha, haʼu mós foti pioneiru ho idade 16. Iha findesemana haʼu haklaken ho ema seluk, maibé iha loron baileet baibain haʼu haklaken mesak deʼit. Haʼu uza fonógrafu no kartaun sasin nian mak hodi haklaken ba ema. Jeová fó bensaun ba haʼu hodi hetan estudante Bíblia ida neʼebé laʼo ba oin ho diʼak. Ema barak husi ninia família mós simu lia-loos. Tinan ida liutiha, haʼu simu fali knaar hodi serbí nuʼudar pioneiru tempu-tomak hamutuk ho Mary Henshall. Ami simu knaar hodi haklaken iha área Cheshire, fatin ida neʼebé kongregasaun seidauk tau matan.

Iha Funu Mundiál Segundu, feto hotu tenkesér serbisu hodi fó apoiu ba funu. Mestre relijiaun la presiza tuir funu, tan neʼe ami hanoin katak tanba ami serbí nuʼudar pioneiru tempu-tomak, ami mós la presiza tuir funu. Maibé tribunál la fó lisensa ba ami no hatama haʼu iha komarka ba loron 31. Bainhira haʼu tinan 19, haʼu tenke bá tan tribunál dala rua tanba haʼu lakohi fó apoiu ba funu. Maibé sira husik deʼit haʼu. Durante tempu  susar sira-neʼe, haʼu hatene katak Jeová no ninia espíritu santu mak ajuda haʼu hodi sai metin no la rende an.—Isaías (Yesaya) 41:10, 13.

PÁR FOUN IDA

Haʼu koñese Arthur Matthews iha 1946. Arthur foin hetan tiha kastigu ba fulan tolu iha komarka tanba nia lakohi tuir funu. Bainhira nia sai husi komarka, nia serbí kedas nuʼudar pioneiru tempu-tomak ho ninia maun Dennis iha Hemsworth. Husi kiʼik kedas sira-nia aman hanorin ona sira kona-ba Jeová no sira hetan batizmu iha tempu sei joven. Bainhira sira hahú tiha serbisu pioneiru hamutuk, lakleur Dennis hetan knaar hodi serbí iha rai-Irlanda. Entaun hela Arthur mesak deʼit. Haʼu-nia inan-aman gosta tebes pioneiru badinas neʼe no sira konvida nia hodi hela hamutuk. Bainhira haʼu bá vizita sira, han hotu tiha, baibain Arthur ho haʼu mak fase bikan sira. Ikusmai ami mós komesa hakerek karta ba malu. Iha tinan 1948, Arthur presiza tama komarka dala ida tan ba fulan tolu. Ami kaben iha Janeiru 1949, no ami-nia planu mak atu kontinua serbí tempu-tomak. Ami kuidadu tebes kona-ba dalan ami uza osan. Bainhira ami foti feriadu, ami uza tempu neʼe hodi serbisu kuʼu ai-fuan atu buka netik osan balu. Ho Jeová nia bensaun ami konsege kontinua pioneiru hamutuk.

Iha Hemsworth iha tinan 1949

Tinan ida liutiha, ami hetan knaar hodi serbí iha Irlanda Norte, foufoun iha Armagh no tuirmai iha Newry, sidade rua neʼebé maioria ema katólika. Ema iha área neʼe la gosta relijiaun seluk, tan neʼe ami tenke kuidadu no uza matenek bainhira haklaken. Ami halaʼo reuniaun iha kaben-naʼin ida nia uma neʼebé dook kilómetru 16 husi ami-nia uma. Ema naʼin-ualu mak tuir reuniaun sira. Dala ruma ami toba iha neʼebá. Ami toba deʼit iha rai no iha dadeer ami matabixu hamutuk. Ami haksolok hodi hatene katak ohin loron iha ona Testemuña barak iha fatin neʼe.

“AMI SEI HALO!”

Haʼu-nia maun ho ninia feen, Lottie, serbí nuʼudar pioneiru tempu-tomak iha Irlanda Norte, no iha 1952 ami naʼin-haat tuir reuniaun boot hamutuk iha sidade Belfast. Irmaun ida neʼebé laran-diʼak loke ninia uma ba ami, no ami naʼin-haat hela iha uma neʼe hamutuk ho Pryce Hughes neʼebé serbí nuʼudar atan ba sukursál iha Bretaña. Kalan ida ami koʼalia hela kona-ba livru kiʼik foun ho títulu God’s Way Is Love neʼebé halo ba ema Irlanda. Irmaun Hughes esplika katak susar atu haklaken ba ema katólika iha Repúblika Irlanda. Ema obriga irmaun sira hodi sai husi fatin neʼebé sira hela bá, no padre sira soran ema ataka irmaun sira. Pryce dehan, “Ami presiza kaben-naʼin sira neʼebé iha karreta atu halaʼo kampaña espesiál hodi fahe livru neʼe iha nasaun neʼe.” * Neʼe mak tempu neʼebé ami hatán, “Ami sei halo!”

Ho pioneiru sira iha motór roda tolu

Iha sidade Dublín, pioneiru sira sempre bá Ma Rutland nia uma, nia mak irmán neʼebé laran-metin no serbí Jeová ba tinan barak ona. Ami  mós hela iha ninia uma ba tempu balu. Ami faʼan ami-nia sasán balu no ami naʼin-haat saʼe Bob nia motór roda tolu hodi bá buka karreta. Ami hetan karreta uzadu ida neʼebé sei diʼak hela no ami husu ninia naʼin atu lori karreta neʼe ba ami-nia uma tanba ami seidauk hatene lori karreta. Iha kalan tomak Arthur halo finje lori hela karreta hodi troka mudansa bá-mai iha kama leten. Dadeer tuirmai, nia koko atu lori karreta sai, maibé irmán misionária ida mai naran Mildred Willett (ikusmai irmán neʼe kaben ho John Barr). Nia hatene lori karreta! Nia treinu Arthur toʼo nia hatene lori karreta.

Ami-nia karreta no mós uma-karreta

Tuirmai ami presiza buka hela-fatin. Irmaun sira fó-hatene ami atu la bele hela iha uma-karreta tanba ema neʼebé kontra ita bele sunu karreta neʼe. Tan neʼe ami buka uma maibé la hetan. Iha kalan neʼe ami naʼin-haat toba deʼit iha karreta laran. Loron tuirmai ami bele hetan deʼit uma-karreta ida ho kama-andár rua neʼebé kiʼik iha laran. Neʼe mak sai ami-nia uma. Toʼos-naʼin sira neʼebé laran-diʼak husik ami para uma-karreta iha sira-nia rai no ami hakfodak tanba ema la halo problema ba ami. Bainhira haklaken, ami haklaken dook tiha husi ami-nia uma-karreta ba kilómetru 16 toʼo 24. Depois mak ami bá haklaken fali iha fatin neʼebé uluk ami para ami-nia uma-karreta.

Ami haklaken ba uma hotu iha Repúblika Irlanda parte súl no ema uitoan deʼit mak la simu. Ami konsege fahe livru kiʼik hamutuk 20.000, no ami fó ema sira neʼebé gosta lia-loos nia naran ba sukursál Bretaña. Ohin loron, iha fatin neʼe iha ona Testemuña atus ba atus, neʼe mak bensaun duni!

FILA BA INGLATERRA, DEPOIS BÁ FALI ESKÓSIA

Tinan balu liutiha, ami simu fali knaar atu serbí iha Londres súl. Liutiha semana balu, irmaun sira husi sukursál Bretaña bolu Arthur no husu nia atu serbí kedas nuʼudar katuas área iha loron tuirmai! Ami simu treinu ba semana ida, depois bá serbí iha rai-Eskósia. Arthur la iha tempu barak atu prepara ninia diskursu sira. Maibé nia sempre simu knaar naran deʼit iha Maromak nia serbisu maski knaar neʼe la fasil atu halo. Ninia ezemplu neʼe anima tebes haʼu. Ami gosta tebes halaʼo knaar neʼe, tanba serbí tiha ba tinan balu iha área sira neʼebé kongregasaun seidauk tau matan, agora ami hetan bensaun bele hamutuk fali ho irmaun-irmán sira.

Bainhira Arthur hetan konvite atu tuir Eskola Gilead iha 1962, ami presiza halo desizaun boot. Eskola neʼe ba fulan sanulu, maibé haʼu la bele tuir nia tanba la hetan konvite. Ami-nia desizaun mak husik Arthur atu tuir eskola neʼe. Sukursál haruka haʼu bá Hemsworth serbí nuʼudar pioneiru tempu-tomak tanba iha neʼe haʼu laiha pár atu pioneiru hamutuk. Tinan ida hotu tiha, Arthur mai fali no nia simu knaar hodi serbí nuʼudar katuas área. Ami serbí iha área Eskósia, Inglaterra parte norte, no Irlanda Norte.

KNAAR FOUN IHA RAI-IRLANDA

Iha 1964 Arthur simu knaar hodi serbí nuʼudar koordenadór ba sukursál iha Repúblika Irlanda.  Foufoun haʼu sente taʼuk atu tama Betel tanba haʼu gosta tebes knaar atu vizita kongregasaun sira. Maibé agora haʼu hanoin fali ba tempu uluk, haʼu agradese hodi bele serbí iha Betel. Haʼu fiar katak, maski ita la gosta knaar ruma maibé simu deʼit, Jeová sempre haraik bensaun ba ita. Iha Betel haʼu halo serbisu iha eskritóriu, falun livru, teʼin, no hamoos. Ba tempu balu, Arthur mós serbí nuʼudar katuas vizitante no ami iha oportunidade hasoru irmaun-irmán barak iha rai neʼe. Ami mós iha oportunidade atu haree ami-nia estudante Bíblia sira laʼo ba oin iha lia-loos, neʼe hametin duni ami-nia relasaun ho irmaun-irmán sira iha Irlanda. Sin, neʼe bensaun boot tebes mai ami!

AKONTESIMENTU IMPORTANTE NEʼEBÉ LORI MUDANSA BA IRLANDA

Reuniaun boot internasionál primeiru iha Irlanda halaʼo iha Dublín iha 1965. * Maski ema kontra makaʼas, maibé reuniaun boot neʼe halaʼo ho susesu. Ema naʼin–3.948 mak tuir, no 65 hetan batizmu. Ema naʼin–3.500 husi rai seluk neʼebé tuir reuniaun boot neʼe hela deʼit iha ema nia uma iha Dublín. Hotu tiha, irmaun sira haruka karta ba uma-naʼin sira-neʼe hodi hatoʼo obrigadu ba sira-nia laran-diʼak. No uma-naʼin sira-neʼe mós gaba tebes irmaun-irmán sira-nia hahalok diʼak. Neʼe lori mudansa diʼak tebes ba Irlanda.

Arthur fó benvindu bainhira Nathan Knorr mai atu tuir reuniaun boot iha 1965

Arthur fó sai Livru Istória husi Bíblia iha lia-gaéliku iha 1983

Iha 1966, sukursál Dublín mak tau matan Irlanda parte norte no parte súl. Iha rai neʼe ema la iha unidade tanba polítiku no relijiaun la hanesan. Maibé ami haksolok hodi haree ema barak neʼebé uluk relijiaun katóliku no protestante simu lia-loos hodi serbí Jeová hamutuk.

MUDANSA BOOT BA AMI-NIA KNAAR

Iha 2011, sukursál Bretaña ho sukursál Irlanda sai ida deʼit no neʼe lori mudansa boot ba ami-nia moris tanba ami simu fali knaar hodi serbí iha Betel Londres. Iha tempu neʼebá haʼu komesa hanoin barak kona-ba Arthur nia saúde tanba nia hetan moras Parkinson. Iha 20 Maiu 2015 haʼu triste tebes tanba haʼu-nia pár neʼebé ami moris hamutuk ba tinan 66 mate.

Iha tinan hirak-neʼe, dala ruma haʼu sente laran-kanek, laran-tun, no triste. Uluk, Arthur sempre iha haʼu-nia sorin. Haʼu hanoin tebes nia! Maibé situasaun hanesan neʼe halo haʼu hakbesik liután ba Jeová. Haʼu kontente ema barak hadomi tebes Arthur. Haʼu simu karta barak husi irmaun-irmán sira iha Irlanda, Bretaña, no Estadus Unidus. Arthur nia maun Dennis ho ninia feen Mavis no haʼu-nia sobriña sira Ruth ho Judy mós fó kmaan ba haʼu. Haʼu agradese tebes ba ajuda hotu neʼebé haʼu simu.

Eskritura ida neʼebé fó kmaan tebes ba haʼu mak Isaías (Yesaya) 30:18. Eskritura neʼe dehan: “Jeová hein ho pasiénsia atu hatudu laran-diʼak ba imi, no nia sei hamriik hodi hatudu laran-sadiʼa ba imi. Tanba Jeová mak Maromak justisa nian. Ksolok ba ema sira neʼebé hein nafatin ba nia.” Diʼak atu hatene katak Jeová hein ho pasiénsia atu rezolve problema hotu husi mundu neʼe, no mós atu fó knaar furak ba ita hotu iha mundu foun.

Kuandu haʼu hanoin fali kona-ba ami-nia moris, haʼu bele haree katak Jeová dirije no haraik duni bensaun ba serbisu haklaken iha Irlanda! Haʼu sente neʼe mak priviléjiu boot tebes ba haʼu hodi bele hola parte iha serbisu neʼe. Loos duni, halo buat neʼebé Jeová husu ita atu halo sempre lori bensaun oioin.

^ par. 12 Haree 1988 Yearbook of Jehovah’s Witnesses, pájina 101-102.

^ par. 22 Haree 1988 Yearbook, pájina 109-112.