Skip to content

Skip to table of contents

Banati-tuir Jeová nia hahalok justisa no laran-sadiʼa

Banati-tuir Jeová nia hahalok justisa no laran-sadiʼa

“Tesi-lia ho loloos tuir justisa, no hatudu domin neʼebé laran-metin no hatudu laran-sadiʼa ba malu.”—ZACARIAS (ZAKHARIA) 7:9.

KNANANUK: 21, 11

1, 2. (a) Jesus sente oinsá kona-ba Maromak nia Ukun-Fuan? (b) Oinsá mak ema eskriba no farizeu uza sala Ukun-Fuan?

JESUS hadomi tebes Moisés nia Ukun-Fuan, tanba Ukun-Fuan neʼe mai husi ninia Aman Jeová neʼebé nia hadomi. Eskritura husi Salmo 40:8 hatudu sai Jesus nia domin kleʼan ba Maromak nia Ukun-Fuan hodi dehan: “Oh haʼu-nia Maromak, haʼu kontente atu halo Ita-nia hakarak, no Ita-nia ukun-fuan iha haʼu-nia fuan-laran.” Liuhusi Jesus nia liafuan no hahalok, nia hatudu katak Maromak nia Ukun-Fuan mak perfeitu, lori rezultadu diʼak, no liafuan hotu husi Ukun-Fuan neʼe sei sai loos.—Mateus 5:17-19.

2 Ita bele fiar katak Jesus sente triste tebes bainhira nia haree ema eskriba no farizeu uza sala ninia Aman nia Ukun-Fuan! Nia hatete ba sira: “Imi fó parte sanulu husi ortelaun no endru no mós komiñu.” Sira gosta tebes halo tuir Ukun-Fuan kona-ba buat kiʼik-kiʼik sira. Entaun, problema mak saida? Jesus esplika: “Maibé imi la halo tuir buat neʼebé importante iha Ukun-Fuan, hanesan hahalok loos, laran-sadiʼa no laran-metin.” (Mateus 23:23) Ema farizeu sira nunka hanoin kona-ba Ukun-Fuan nia objetivu mak saida, no sira hanoin katak sira mak diʼak liu fali ema seluk. Maibé Jesus hatene ho loloos Ukun-Fuan nia objetivu no ukun-fuan ida-idak fó sai hahalok saida kona-ba Jeová.

3. Ita sei koʼalia kona-ba saida iha lisaun neʼe?

 3 Nuʼudar ema kristaun, ita la moris tan iha Moisés nia Ukun-Fuan. (Roma 7:6) Se nuneʼe, tanbasá mak Jeová rai Moisés nia Ukun-Fuan iha Bíblia? Tanba nia hakarak ita komprende no halo tuir “buat neʼebé importante”, ka prinsípiu husi Ukun-Fuan neʼe. Porezemplu, prinsípiu saida deʼit mak ita aprende husi arranju kona-ba sidade protesaun? Lisaun uluk nian esplika kona-ba hakat ida-idak husi ema neʼebé oho ema seluk la ho neon tenke halo tuir. Iha lisaun neʼe, ita sei aprende kona-ba sidade protesaun hanorin saida kona-ba Jeová no oinsá mak ita bele banati-tuir ninia hahalok sira. Ita sei koʼalia kona-ba pergunta tolu: Oinsá mak sidade protesaun hatudu katak Jeová laran-sadiʼa? Sidade sira-neʼe hanorin saida kona-ba Maromak nia haree ba moris? No oinsá mak sidade sira-neʼe hatudu sai Jeová nia justisa neʼebé perfeitu? Husi pergunta sira-neʼe, koko atu haree oinsá mak Ita bele banati-tuir Ita-nia Aman iha lalehan.—Lee Éfeso 5:1.

MAROMAK HATUDU LARAN-SADIʼA LIUHUSI HILI SIDADE NIA FATIN SIRA

4, 5. (a) Arranju saida mak halo fasil ba ema atu halai ba sidade protesaun, no tanbasá? (b) Ita bele aprende saida kona-ba Jeová husi arranju neʼe?

4 Jeová halo arranju atu halo fasil ba ema hodi halai ba sidade protesaun sira. Nia haruka ema Izraél hili sidade neen, tolu iha Mota Jordaun nia sorin ida no tolu tan iha sorin seluk. Tanbasá? Neʼe hodi halo fasil ba ema neʼebé halai atu toʼo lalais iha sidade protesaun. (Números [Bilangan] 35:11-14) Sira tenke tau matan didiʼak ba estrada neʼebé lori ema ba sidade sira neʼe. (Deuteronômio [Ulangan] 19:3) Livru judeu ida hatete katak, ema mós monta sinál iha estrada sira hodi halo fasil ba ema atu halai ba sidade sira-neʼe. Tanba iha ona sidade sira-neʼe iha Izraél mak, se ema Izraél oho ema ida la ho neon, nia la presiza halai ba nasaun seluk hodi hetan protesaun, tanba neʼe bele halo nia ikusmai adora fali maromak falsu.

5 Hanoin toʼok: Jeová fó mandamentu katak, tenkesér fó kastigu-mate ba ema neʼebé oho ema seluk ho neon. Maibé nia mós halo arranju ba ema neʼebé oho ema seluk la ho neon atu bele hetan protesaun no laran-sadiʼa. Matenek-naʼin ida kona-ba Bíblia hatete: “Buat hotu arranja ho klaru, simples, no fasil atu halo tuir.” Sin, Jeová laʼós juis neʼebé la hatene hanoin ema, neʼebé sempre buka dalan atu fó kastigu deʼit ba ninia atan. Maibé nia mak “Maromak neʼebé riku ho laran-sadiʼa”.—Éfeso 2:4.

6. Ema farizeu sira banati-tuir Jeová nia laran-sadiʼa ka lae? Esplika toʼok.

6 Maibé ema farizeu sira lakohi atu hatudu laran-sadiʼa ba ema seluk. Porezemplu, livru judeu nian hatete katak, ema farizeu lakohi atu fó perdua se ema neʼe halo sala neʼebé hanesan liu ona dala tolu. Jesus uza ai-knanoik ida kona-ba ema farizeu neʼebé halo orasaun iha kobradór impostu nia sorin hodi hatudu katak ema farizeu iha hanoin neʼebé sala, tanba ema farizeu neʼe hatete: “Oh Maromak, haʼu fó obrigadu ba Ita-Boot,  tanba haʼu la hanesan ema seluk neʼebé naʼok-teen, ema aat, neʼebé halo sala-foʼer, no haʼu mós la hanesan ho ema kobradór impostu neʼe.” Husi ai-knanoik neʼe, Jesus hakarak hanorin saida? Nia dehan katak ema farizeu “haree ema seluk folin-laek”, no sira hanoin katak sira la presiza hatudu laran-sadiʼa ba ema seluk.—Lucas 18:9-14.

Ita halo fasil ba ema seluk atu hetan perdua husi Ita ka lae? Hatudu haraik-an no husik ema hakbesik ba Ita (Haree parágrafu 4-8)

7, 8. (a) Oinsá mak Ita bele halo tuir Jeová nia laran-sadiʼa? (b) Tanbasá mak ita tenke hatudu haraik-an atu bele fó perdua ba ema seluk?

7 Banati-tuir Jeová bá, no keta halo tuir ema farizeu sira. Hatudu laran-sadiʼa no hanoin ema seluk. (Lee Koloso 3:13.) Halo fasil ba ema seluk atu hetan Ita-nia perdua. (Lucas 17:3, 4) Husu ba Ita-nia an: ‘Haʼu fasil atu fó perdua lalais, maski ema seluk hakanek haʼu dala barak ka lae? Haʼu prontu ka lae atu buka dame ho ema neʼebé hakanek haʼu?’

8 Ita tenke haraik-an atu bele fó perdua. Ema farizeu lakohi fó perdua tanba sira hanoin katak sira diʼak liu fali ema seluk. Maibé nuʼudar ema kristaun, ita tenke hatudu haraik-an hodi “haree ema seluk boot liu” ita no fó perdua ba sira ho laran. (Filipe 2:3) Bele husu ba ita-nia an, ‘Haʼu halo tuir Jeová no hatudu haraik-an ka lae?’ Se ita mak haraik-an, neʼe halo fasil ba ema seluk atu husu perdua husi ita no fasil mós ba ita atu fó perdua ba sira. Tan neʼe, lalais atu hatudu laran-sadiʼa no neineik atu sai laran-kanek.—Eclesiastes (Pengkhotbah) 7:8, 9.

RESPEITU MORIS HODI “LA SIMU SALA KONA-BA RAAN”

9. Oinsá mak Jeová ajuda ema Izraél sira atu komprende katak moris mak buat neʼebé sagradu tebes?

9 Razaun importante ida husi arranju kona-ba sidade protesaun mak atu proteje ema Izraél sira hodi la simu sala kona-ba raan. (Deuteronômio [Ulangan] 19:10) Jeová hafolin tebes moris, no nia odi ema neʼebé oho ema seluk ho neon. (Provérbios [Amsal] 6:16, 17) Nuʼudar Maromak neʼebé justisa no santu, nia mós la taka matan ba ema neʼebé oho ema seluk la ho neon. Maski ema neʼebé oho ema seluk la ho neon bele hetan protesaun, maibé ulukliu nia tenke esplika situasaun ba katuas sira. Se katuas sira haree katak ema neʼe laʼós oho ho neon, nia tenke hela iha sidade protesaun toʼo amlulik boot mate. Neʼe hatudu katak, karik ema neʼe tenke hela iha neʼebá iha ninia moris tomak. Arranju neʼe hatudu ba ema Izraél sira katak moris mak buat neʼebé sagradu tebes. Tan neʼe sira presiza kuidadu tebes atu la tau ema seluk nia moris iha perigu laran hodi hatudu katak sira respeitu Jeová, moris nia Hun.

10. Tuir Jesus, oinsá mak ema eskriba no farizeu sira hatudu katak sira la hafolin ema seluk nia moris?

10 Ema eskriba no farizeu sira la hanesan ho Jeová, tanba sira la hafolin ema seluk nia moris. Jesus hatete ba sira: “Imi halakon tiha oportunidade ba ema atu hatene kona-ba Maromak; imi rasik la tama, no imi mós hanetik sira neʼebé hakarak tama!” (Lucas 11:52) Jesus nia liafuan katak sá? Tuir loloos ema eskriba no farizeu sira iha responsabilidade atu hanorin ema seluk no ajuda sira atu hetan moris rohan-laek. Maibé sira hanetik fali ema atu tuir Jesus, “Ulun-Naʼin Moris nian”. (Apóstolu 3:15) Iha dalan hanesan neʼe mak sira lori ema mate ba nafatin. Ema eskriba no farizeu mak ema neʼebé foti an no hanoin an deʼit. Sira nunka hanoin kona-ba ema seluk nia moris. Sira mak ema laran-aat no la iha duni domin!

11. (a) Oinsá mak Paulo hatudu katak nia hafolin ema nia moris hanesan Jeová? (b) Saida mak bele ajuda ita atu banati-tuir Paulo hodi haklaken ho badinas?

 11 Oinsá mak ita bele banati-tuir Jeová no hasees an atu la halo tuir ema eskriba no farizeu sira? Liuhusi hatudu respeitu no hafolin moris. Apóstolu Paulo halo duni nuneʼe liuhusi haklaken liafuan diʼak kona-ba Maromak nia Ukun ba ema hotu. Tan neʼe nia bele dehan: “Haʼu moos ona husi ema hotu nia raan.” (Lee Apóstolu 20:26, 27.) Maibé apóstolu Paulo haklaken ba ema tan deʼit nia lakohi simu sala kona-ba raan, ka tan deʼit Jeová mak haruka nia ka lae? Lae. Paulo hadomi ema seluk. Nia haree ema seluk nia moris iha folin-boot tebes, no nia hakarak sira mós atu hetan moris rohan-laek. (1 Korinto 9:19-23) Ita mós tenke hafolin moris hanesan Jeová. Nia hakarak ema hotu atu arrepende an, hodi nuneʼe sira bele hetan moris. (2 Pedro 3:9) Ita presiza hatudu domin ba ema hodi banati-tuir Jeová. Laran-sadiʼa bele book ita atu haklaken ho badinas no lori ksolok ba ita.

12. Tanbasá mak seguransa importante ba Maromak nia povu?

12 Jeová nia haree kona-ba moris, mós kona dalan neʼebé ita halo seguru buat hotu. Ita tenke kuidadu kona-ba lori karreta no halo serbisu, inklui mós bainhira ita harii, tau matan, ka bá ita-nia fatin adorasaun nian. Keta tau tempu ka osan importante liu fali ema, seguransa no saúde. Ita-nia Maromak sempre halo buat hotu ho loloos, no ita hakarak banati-tuir nia. Liuliu ba katuas kongregasaun sira atu kuidadu kona-ba sira rasik no ema seluk nia seguransa. (Provérbios [Amsal] 22:3) Se katuas ida fó-hanoin Ita kona-ba matadalan ba seguransa ruma, halo tuir nia. (Galásia 6:1) Haree moris tuir Jeová nia haree hodi ita “la simu sala kona-ba raan”.

TESI-LIA “TUIR UKUN-FUAN SIRA-NEʼE”

13, 14. Oinsá mak ema Izraél nia katuas sira bele banati-tuir Jeová nia justisa?

13 Jeová fó mandamentu ba ema Izraél nia katuas sira atu halo tuir ninia justisa. Primeiru, katuas sira tenkesér buka-hatene uluk kona-ba faktu hotu. Tuirmai, sira tenke haree didiʼak ema neʼe nia motivu hodi oho ema seluk, ninia atitude, no hahalok sira husi tempu uluk, atu deside bele hatudu laran-sadiʼa ba nia ka lae. Katuas sira tenke buka-hatene ema neʼe rai odi ba vítima mak hodi oho nia ka lae. (Lee Números [Bilangan] 35:20-24. *) Se iha sasin balu, tenkesér iha sasin naʼin-rua hodi bele deside kona-ba ema neʼe.—Números (Bilangan) 35:30.

14 Bainhira katuas sira buka-hatene ona kona-ba saida mak akontese, tuirmai sira tenke haree kona-ba ema neʼe rasik, laʼós deʼit kona-ba buat neʼebé nia halo. Katuas sira presiza kbiit atu komprende hodi la haree deʼit kona-ba buat neʼebé akontese, maibé haree mós tanbasá mak ida-neʼe akontese. Importante liu mak sira presiza Jeová nia espíritu santu atu ajuda sira banati-tuir ninia laran-sadiʼa, justisa no kbiit atu komprende.—Êxodo (Keluaran) 34:6, 7.

15. Oinsá mak dalan neʼebé Jesus haree ema la hanesan ho ema farizeu sira?

15 Ema farizeu nunka hatudu laran-sadiʼa bainhira tesi-lia ba ema. Sira haree deʼit kona-ba ema neʼe halo ona sala saida duké haree kona-ba ema neʼe. Porezemplu, bainhira ema farizeu balu haree Jesus han iha Mateus nia uma, sira husu ba Jesus nia dixípulu sira: “Tansá mak imi-nia mestre han hamutuk ho ema kobradór impostu nian no sala-naʼin sira?” Jesus hatán: “Ema neʼebé isin-diʼak la presiza doutór, maibé ema moras mak presiza. Tan neʼe, imi laʼo bá no buka-hatene liafuan  sira-neʼe katak sá: ‘Haʼu hakarak laran-sadiʼa, laʼós imi-nia prezente.’ Tanba haʼu mai laʼós atu bolu ema loos sira, maibé atu bolu ema sala-naʼin.” (Mateus 9:9-13) Jesus nia hahalok neʼe atu defende deʼit ema sira-neʼe nia sala ka lae? Lae. Nia hakarak sira atu arrepende an. No arrepende an mak mensajen importante ida iha Jesus nia haklaken. (Mateus 4:17) Jesus hatene katak ema balu “husi kobradór impostu no sala-naʼin sira” hakarak troka. Sira mai iha Mateus nia uma laʼós atu han deʼit. Sira mai tanba sira hakarak tuir Jesus. (Marcos 2:15) Triste tanba husi ema farizeu sira, barak mak la haree ema hanesan Jesus haree. Sira la tau fiar katak ema bele troka, no sira haree ema neʼebé halo sala hanesan la iha ona esperansa. Sira la hanesan duni ho Jeová neʼebé hatudu justisa no laran-sadiʼa ba ema!

16. Grupu tesi-lia nian tenke haree didiʼak kona-ba saida?

16 Katuas sira ohin loron tenke halo tuir Jeová hodi “hadomi justisa”. (Salmo [Mazmur] 37:28) Primeiru, sira presiza “buka-hatene didiʼak” atu foti desizaun kona-ba ema neʼe halo duni sala ka lae. Se ema neʼe halo sala, katuas sira sei halo tuir Bíblia nia matadalan atu deside saida mak sira presiza halo. (Deuteronômio [Ulangan] 13:12-14) Se sira mak hola parte iha grupu tesi-lia nian, sira tenkesér kuidadu tebes atu haree didiʼak ema neʼebé monu ba sala boot hatudu duni arrepende an ka lae. Neʼe laʼós buat neʼebé fasil. Arrepende an envolve sala-naʼin nia haree kona-ba buat neʼebé nia halo ona no ninia laran sente oinsá kona-ba ninia sala. (Apokalipse 3:3) Ema neʼebé halo sala tenke arrepende an atu bele hetan perdua. *

17, 18. Oinsá mak katuas sira bele hatene katak ema ida arrepende an duni ka lae? (Haree foto iha pájina 13.)

17 Katuas sira la hanesan ho Jeová no Jesus neʼebé bele haree ema nia laran. Entaun, se Ita mak katuas ida, oinsá mak Ita bele hatene ema ida arrepende duni husi laran ka lae? Primeiru, halo orasaun atu iha matenek no kbiit atu hatene. (1 Reis [Raja-Raja] 3:9) Segundu, uza Maromak nia Liafuan no livru sira husi atan laran-metin atu ajuda Ita tetu kona-ba ema neʼe hatudu “triste tuir mundu” ka nia arrepende an husi laran hodi “triste tuir Maromak”. (2 Korinto 7:10, 11) Haree didiʼak Bíblia esplika oinsá kona-ba ema neʼebé arrepende an no la arrepende an, no analiza didiʼak kona-ba nia sente oinsá, hanoin oinsá, no iha hahalok saida.

18 Terseiru, hanoin kona-ba ema neʼe rasik, laʼós ba ninia sala deʼit. Porezemplu, tanbasá mak nia sai hanesan neʼe? Tanbasá mak nia halo desizaun neʼe? Nia hasoru susar no ninia limitadu mak saida deʼit? Bíblia fó-hatene nanis katak Jesus, ulun ba kongregasaun kristaun, “sei la tesi lia tuir deʼit buat neʼebé nia matan haree, no nia sei la fó dixiplina tuir deʼit buat neʼebé nia tilun rona. Nia sei tesi lia ba ema kiʼik sira ho loloos, no ho laran-loos nia sei fó dixiplina ba ema hodi apoia ema laran-maus sira iha rai”. (Isaías [Yesaya] 11:3, 4) Jesus mak hili katuas sira atu tau matan ba ninia kongregasaun, tan neʼe nia sei ajuda sira atu tesi-lia ho justisa no hatudu laran-sadiʼa. (Mateus 18:18-20) Ita agradese tebes tanba iha katuas sira neʼebé tau matan ba ita! Sira mós ajuda ita atu hatudu justisa no laran-sadiʼa ba ema seluk.

19. Ita hakarak halo tuir lisaun saida husi arranju sidade protesaun nian?

19 Iha Moisés nia Ukun-Fuan bele hetan “matenek no lia-loos simples kona-ba Maromak”. Ukun-Fuan neʼe hanorin ita kona-ba Jeová no ninia prinsípiu sira. (Roma 2:20) Porezemplu, sidade protesaun hanorin katuas sira oinsá atu “tesi-lia ho loloos tuir justisa”, no mós hanorin ita hotu oinsá atu hatudu “domin neʼebé laran-metin no hatudu laran-sadiʼa ba malu”. (Zacarias [Zakharia] 7:9) Maski ita la presiza atu halo tuir tan Moisés nia Ukun-Fuan, maibé Jeová nunka troka. Ba nia, hahalok justisa no laran-sadiʼa importante nafatin. Ita iha priviléjiu atu adora Maromak hanesan neʼe. Mai ita banati-tuir ninia hahalok furak sira no buka protesaun husi nia!

^ par. 13 Números 35:20-24 20 Se ema ida mate tanba ema seluk mak dudu nia ho odi ka tuda buat ruma ba ema neʼe ho hanoin neʼebé aat, 21 ka se ema ida ho odi baku ema seluk ho ninia liman, no ema neʼe mate, ida neʼebé baku ema neʼe tenke mate. Nia mak ohodór. Família husi ema neʼebé mate tenke oho tiha ema neʼebé ohodór bainhira hasoru nia. 22 “‘Maibé se nia halo neʼe la ho neon no laʼós tanba odi mak nia dudu ema neʼe ka nia soe buat ruma ba ema neʼe la ho hanoin neʼebé aat, 23 ka se nia la haree ema neʼe no soe fatuk ruma no fatuk neʼe monu ba ema neʼe nia leten no loloos nia la odi ema neʼe ka la buka atu hakanek ema neʼe, no ema neʼe mate, 24 povu tenke tesi-lia entre ema neʼebé oho ema seluk no família husi ema neʼebé mate, hodi tuir ukun-fuan sira-neʼe.

^ par. 16 Haree “Pertanyaan Pembaca” iha Menara Pengawal, 15 Setembru 2006, pájina 30.