Skip to content

Skip to table of contents

“Rona ba dixiplina atu imi bele sai matenek”

“Rona ba dixiplina atu imi bele sai matenek”

“Haʼu-nia oan sira . . . rona ba dixiplina atu imi bele sai matenek.”​—PROVÉRBIOS (AMSAL) 8:32, 33.

KNANANUK: 34, 6

1. Oinsá mak ita bele hetan matenek husi Maromak, no matenek neʼe bele ajuda ita iha dalan saida deʼit?

JEOVÁ mak matenek nia hun, no nia la karak atu fahe ninia matenek ba ema seluk. Eskritura iha Tiago 1:5 hatete: “Se imi ida presiza matenek, nia tenke kontinua husu ba Maromak, no ida-neʼe sei fó ba nia, basá Maromak fó ho laran-luak ba ema hotu hodi la siʼak.” Dalan ida atu hetan matenek husi Maromak mak simu ninia dixiplina. Matenek neʼe bele proteje ita atu la halo buat neʼebé sala no ajuda ita hakbesik nafatin ba Jeová. (Provérbios [Amsal] 2:10-12) No ita mós bele hetan esperansa furak atu moris ba nafatin iha futuru.​—Judas 21

2. Oinsá mak ita bele haburas hanoin neʼebé loos kona-ba Maromak nia dixiplina?

2 Tanba ita la perfeitu ka tanba ita-nia kultura, dala ruma neʼe bele halo susar ba ita atu simu dixiplina ka iha hanoin neʼebé loos kona-ba dixiplina. Maibé se ita mak esperiénsia rasik rezultadu diʼak husi Maromak nia dixiplina, ita bele haree katak Maromak hadomi duni ita. Eskritura iha Provérbios 3:11, 12 hatete: “Haʼu-nia oan, keta fila kotuk ba Jeová nia dixiplina, . . . tanba Jeová korrije sira neʼebé nia hadomi.” Sin, ita bele fiar katak Jeová hakarak buat neʼebé diʼak liu hotu ba ita. (Lee Ebreu 12:5-11.) Maromak komprende tebes kona-ba ita, tan neʼe nia sempre fó dixiplina neʼebé natoon no tuir buat neʼebé ita presiza. Iha lisaun neʼe,  ita sei koʼalia pontu importante haat husi dixiplina: (1) dixiplina an, (2) dixiplina neʼebé inan-aman fó ba oan, (3) dixiplina neʼebé ita simu husi kongregasaun, no (4) buat neʼebé sei halo ita moras liu fali dixiplina neʼebé ita simu.

TANBASÁ MATENEK ATU DIXIPLINA ITA-NIA AN?

3. Oinsá mak oan bele haburas hahalok dixiplina an? Fó toʼok ezemplu.

3 Se ita mak dixiplina an, ita bele kontrola ita-nia hahalok no dalan neʼebé ita hanoin. Ita la moris mai iha ona dixiplina an, ita tenke aprende hahalok neʼe. Porezemplu, bainhira labarik ida aprende saʼe bisikleta, baibain ninia inan ka aman kaer bisikleta neʼe hodi nia la monu. Maibé liutiha tempu uitoan, labarik neʼe hatene ona oinsá atu kaer metin bisikleta no ninia inan ka aman bele husik neineik-neineik bisikleta neʼe toʼo la presiza kaer tan. Hanesan neʼe mós bainhira inan-aman hatudu pasiénsia hodi fó treinu beibeik ba oan liuhusi “dixiplina no matadalan neʼebé tuir Jeová nia hakarak”, oan mós bele aprende oinsá atu haburas hahalok dixiplina an no matenek.​—Éfeso 6:4.

4, 5. (a) Tanbasá mak dixiplina an parte importante ida husi “hahalok foun”? (b) Tanbasá mak ita la presiza sai laran-kraik maski ita halo sala ruma?

4 Hanesan neʼe mós kona-ba ema boot sira neʼebé foin aprende kona-ba Jeová. Maski sira hatene ona uitoan kona-ba dixiplina an, maibé sira seidauk maduru iha lia-loos. Tan neʼe, bainhira sira komesa “tau hahalok foun” no hakaʼas an atu sai hanesan Kristu, sira sei sai maduru liután. (Éfeso 4:23, 24) Dixiplina an ajuda ita atu “la simu hahalok neʼebé la tuir [Maromak] nia hakarak, no atu la simu hakarak mundu nian, maibé atu moris ho hanoin neʼebé loos no hahalok loos no serbí Maromak ho laran-metin iha mundu ohin neʼe nian”.​—Tito 2:12.

5 Maibé ita hotu la perfeitu. (Eclesiastes [Pengkhotbah] 7:20) Tan neʼe, se ita halo sala ruma, neʼe la dehan katak ita ladún dixiplina an ka la iha dixiplina. Tanba Provérbios 24:16 hatete: “Maski karik ema laran-loos monu ba dala hitu, nia sei hamriik fali.” Saida mak bele ajuda nia atu “hamriik fali”? Laʼós liuhusi ninia forsa rasik, maibé liuhusi espíritu santu. (Lee Filipe 4:13.) Hahalok sira neʼebé mai husi espíritu santu inklui mós kontrola an, hahalok neʼe iha ligasaun metin ho dixiplina an.

6. Oinsá mak ita bele sai estudante neʼebé diʼak ba Maromak nia Liafuan? (Haree dezeñu iha pájina 28.)

6 Orasaun, estuda Bíblia, no medita mós bele ajuda ita atu haburas hahalok dixiplina an. Maibé oinsá se Ita sente susar tebes atu estuda Bíblia ka Ita la gosta estuda Bíblia? Keta sente triste. Se Ita husik Jeová ajuda Ita, nia sei ajuda ita atu “haburas hakarak” hodi estuda ninia Liafuan. (1 Pedro 2:2) Husu Jeová ajuda Ita atu dixiplina an hodi Ita bele buka tempu atu estuda Bíblia. Foufoun, karik Ita bele uza minutu balu deʼit hodi estuda. Halo hanesan neʼe neineik-neineik sei sai fasil no halo Ita gosta atu estuda. Medita kona-ba Jeová nia hahalok furak iha tempu neʼebé nonook bele halo Ita gosta liután atu estuda.​—1 Timóteo 4:15.

7. Oinsá mak dixiplina an bele ajuda ita atu kumpre ita-nia planu iha Jeová nia serbisu?

7 Dixiplina an ajuda ita atu kumpre ita-nia planu iha Jeová nia serbisu. Porezemplu, aman ida sente katak nia ladún badinas ona hanesan uluk, tan neʼe nia halo planu hodi foti pioneiru regulár. Oinsá mak dixiplina an ajuda nia? Nia lee informasaun sira kona-ba pioneiru no mós halo orasaun. Halo buat sira-neʼe ajuda hametin ninia relasaun ho Jeová. No bainhira situasaun husik nia, nia mós foti pioneiru estra. Nia nunka husik buat ida atu hanetik nia. Nia tau fokus ba ninia planu, no tempu balu liu tiha, nia foti duni pioneiru regulár.

 HABOOT OAN TUIR JEOVÁ NIA DIXIPLINA

Oan moris mai la hatene saida mak loos no sala, sira presiza hetan treinu (Haree parágrafu 8)

8-10. Saida mak bele ajuda inan-aman atu haboot oan hodi serbí Jeová? Fó toʼok ezemplu.

8 Jeová fó responsabilidade ba inan-aman atu haboot oan liuhusi “dixiplina no matadalan neʼebé tuir Jeová nia hakarak”. (Éfeso 6:4) Susar tebes atu halo nuneʼe iha mundu ohin loron. (2 Timóteo 3:1-5) Iha tempu neʼebé oan sira moris mai, sira la hatene saida mak loos no sala, no sira-nia konxiénsia seidauk hetan treinu. Tan neʼe sira presiza dixiplina hodi treinu sira-nia konxiénsia. (Roma 2:14, 15) Matenek-naʼin ida kona-ba Bíblia esplika katak liafuan gregu neʼebé tradús “dixiplina” bele mós signifika “labarik nia dezenvolvimentu”, ka haboot oan atu sai ema maduru neʼebé hatene kaer responsabilidade.

9 Se inan-aman dixiplina oan ho domin, oan mós sei sente seguru. Sira bele aprende katak liberdade iha limitadu no buat hotu neʼebé sira halo iha moris sei lori konsekuénsia ida-idak. Tan neʼe mak importante tebes ba inan-aman atu sadere ba Jeová nia matenek atu ajuda sira haboot oan. Ema iha ideia oioin kona-ba oinsá atu haboot oan depende ba fatin neʼebé ema hela bá, no ideia sira mós troka beibeik. Maibé inan-aman neʼebé rona ba Maromak la presiza siʼik kona-ba saida mak sira tenke halo ka sadere ba ema nia matenek ka hanoin.

10 Ita bele aprende husi Noé nia ezemplu. Bainhira Jeová haruka nia atu harii arka, Noé la hatene oinsá atu halo ró. Nia presiza sadere ba Jeová, no eskritura hatete katak nia halo “nuneʼe duni” hanesan buat neʼebé Jeová hatete ba nia. (Gênesis [Kejadian] 6:22) Neʼe lori rezultadu saida? Arka neʼe salva Noé ho ninia família nia moris! Noé mós sai aman neʼebé susesu. Tanbasá? Tanba nia tau fiar ba Maromak nia matenek. Noé hanorin didiʼak ninia oan no hatudu ezemplu diʼak ba sira maski susar tebes atu halo nuneʼe iha tempu antes Rai-Nabeen.​—Gênesis (Kejadian) 6:5.

11. Tanbasá importante ba inan-aman atu hakaʼas an hanorin oan?

11 Oinsá mak inan-aman bele halo tuir Noé nia ezemplu? Rona ba Jeová. Buka matadalan husi Jeová atu hanorin Ita-nia oan liuhusi ninia Liafuan no organizasaun. Ikusmai karik Ita-nia oan sei fó agradese ba Ita kona-ba buat hotu neʼebé Ita halo ona hodi ajuda nia! Irmaun ida hatete: “Haʼu agradese tebes ba dalan neʼebé haʼu-nia inan-aman haboot haʼu. Sira koko dalan oioin hodi buat neʼebé sira hanorin haʼu kona haʼu-nia laran.” Irmaun neʼe dehan katak ninia inan-aman mak ajuda nia hodi hakbesik ba Jeová. Maibé, maski inan-aman hakaʼas an ona, karik oan bele husik nafatin Jeová. Se nuneʼe, inan-aman neʼebé hakaʼas an ona bele iha konxiénsia neʼebé moos no keta lakon esperansa katak loron ida sira-nia oan sei fila fali ba Jeová.

12, 13. (a) Bainhira oan ida hasai husi kongregasaun, oinsá mak inan-aman bele hatudu katak sira halo tuir Maromak? (b) Inan-aman ida hetan benefísiu saida hodi halo tuir Jeová?

 12 Buat neʼebé koko tebes inan-aman nia laran-metin ba Jeová mak bainhira oan ida hasai husi kongregasaun. Porezemplu, irmán ida nia oan-feto hasai husi kongregasaun no oan-feto neʼe muda sai husi uma. Irmán neʼe dehan: “Haʼu buka dalan oioin husi ita-nia livru sira hodi fó razaun ba haʼu atu bele gasta tempu hamutuk ho haʼu-nia oan-feto no bei-oan.” Maibé irmán neʼe nia laʼen ajuda nia hodi komprende katak sira la iha ona responsabilidade ba sira-nia oan-feto no sira presiza hatudu laran-metin ba Jeová.

13 Tinan balu liutiha, kongregasaun simu fali sira-nia oan-feto. Irmán neʼe dehan: “Agora ami-nia oan-feto bolu no haruka mensajen ba ami kuaze loron-loron! Nia hatudu respeitu tebes ba ami tanba nia hatene katak ami halo tuir Maromak. Agora ami iha relasaun neʼebé diʼak tebes.” Se Ita-nia oan ida hasai husi kongregasaun, Ita sei ‘tau fiar ba Jeová ho Ita-nia laran tomak’ ka lae? Ita sei hatudu ba Jeová katak Ita sei la ‘sadere ba Ita-nia matenek rasik’ ka lae? (Provérbios [Amsal] 3:5, 6) Presiza hanoin-hetan katak, Jeová nia dixiplina hatudu sai ninia matenek no domin boot ba ita. Keta haluha katak nia fó ninia Oan-Mane ba ema hotu, neʼe inklui mós Ita-nia oan. Maromak hakarak ema hotu atu hetan moris rohan-laek. (Lee 2 Pedro 3:9.) Tan neʼe inan-aman sira, kontinua tau fiar ba Jeová nia dixiplina no matadalan maski la fasil atu halo nuneʼe. Sin, apoia Jeová nia dixiplina no la bele kontra.

IHA KONGREGASAUN

14. Oinsá mak ita hetan benefísiu husi Jeová nia matadalan neʼebé “atan laran-metin no matenek” fó ba ita?

14 Jeová promete katak nia sei tau matan, proteje, no fó edukasaun ba kongregasaun. Nia halo nuneʼe liuhusi dalan oioin. Porezemplu, nia fó responsabilidade ba ninia Oan-Mane atu tau matan ba kongregasaun, no Jesus uza “atan laran-metin no matenek” hodi fó ai-han espirituál ba ita atu ajuda ita laran-metin ba Jeová. (Lucas 12:42) Matadalan ka dixiplina neʼebé “atan” neʼe fó iha folin-boot tebes ba ita. Karik Ita sei hanoin-hetan diskursu ka informasaun ruma husi ita-nia livru neʼebé ajuda Ita hodi troka Ita-nia hanoin ka hahalok ruma. Ita agradese hodi halo mudansa sira-neʼe tanba Ita hatudu katak Ita husik Jeová fó dixiplina ba Ita, loos ka lae?​—Provérbios (Amsal) 2:1-5.

15, 16. (a) Oinsá mak ita bele hetan benefísiu husi knaar neʼebé katuas sira halo? (b) Oinsá mak ita bele fó ksolok ba katuas sira atu halaʼo sira-nia knaar?

15 Kristu mós uza katuas sira hodi tau matan ba kongregasaun. Tan neʼe Bíblia hatete katak “nia fó ema nuʼudar prezente”. (Éfeso 4:8, 11-13) Serbisu neʼebé katuas sira halo lori benefísiu saida ba ita? Ita bele halo tuir sira-nia fiar no ezemplu diʼak, no ita mós bele halo tuir konsellu neʼebé sira fó liuhusi Bíblia. (Lee Ebreu 13:7, 17.) Katuas sira hadomi ita no hakarak ita atu hakbesik ba Maromak. Se sira haree ita falta reuniaun ka lakon ita-nia ksolok, sira sei koko atu fó ajuda lalais ba ita. Sira hakarak rona ba ita no fó laran-manas no konsellu husi Bíblia ba ita. Ita haree ajuda neʼebé sira fó hatudu sai Jeová nia domin ba Ita ka lae? 

16 Presiza hatene katak dala ruma la fasil ba katuas sira atu fó konsellu ba ita. Tuir Ita-nia hanoin, profeta Natan sente oinsá bainhira nia presiza koʼalia ba Liurai David kona-ba sala sériu neʼebé David koko atu subar? (2 Samuel 12:1-14) Hanoin toʼok apóstolu Paulo sente oinsá bainhira nia presiza fó konsellu ba apóstolu Pedro kona-ba ninia hahalok todan ba sorin neʼebé nia hatudu ba ema kristaun judeu sira? Apóstolu Paulo presiza duni aten-brani hodi bele halo  nuneʼe, loos ka lae? (Galásia 2:11-14) Entaun, oinsá mak Ita bele halo fasil ba katuas sira atu fó konsellu Ita? Hatudu haraik-an, keta taka dalan ba sira hodi koʼalia ho Ita, no simu ho laran. Haree ajuda neʼebé sira fó mak evidénsia ida husi Maromak nia domin. Halo nuneʼe sei lori benefísiu ba Ita no mós fó ksolok ba katuas sira atu halaʼo sira-nia knaar.

17. Oinsá mak katuas sira ajuda irmán ida?

17 Irmán ida hatete katak buat neʼebé akontese ba nia iha tempu uluk halo susar ba nia atu hadomi Jeová, no nia sente depresaun kona-ba neʼe. Nia dehan: “Haʼu hatene katak haʼu presiza koʼalia ba katuas sira. Sira nunka hatún ka kritika haʼu, maibé anima no hametin fali haʼu. Bainhira reuniaun ida-idak ramata, katuas ida husu haʼu sente oinsá maski sira iha buat barak atu halo. Haʼu sente la merese atu simu Maromak nia domin tanba hanoin beibeik kona-ba buat uluk nian. Maibé iha tempu ida-idak Jeová uza kongregasaun no katuas sira hodi hatudu sai ninia domin ba haʼu. Haʼu harohan katak haʼu sei nunka husik nia.”

SAIDA MAK MORAS LIU FALI DIXIPLINA?

18, 19. Saida mak moras liu fali dixiplina? Fó toʼok ezemplu.

18 Dixiplina bele halo ita sente hanesan tudik mak sona fuan, maibé hakribi Maromak nia dixiplina sei lori rezultadu neʼebé halo ita sente fuan rahun tebes. (Ebreu 12:11) Porezemplu, hanoin toʼok kona-ba buat neʼebé Caim no Liurai Zedekias halo. Caim odi tebes Abel toʼo hakarak oho nia. Tan neʼe Maromak koʼalia ba Caim: “Tanbasá mak ó sai hirus tebes no oin triste? Se ó halo fali buat neʼebé diʼak, haʼu sei simu ó, loos ka lae? Maibé se ó la fila hodi halo buat diʼak, sala mak hein hela iha odamatan atu ataka, no hakarak tebes atu domina ó; no ó bele luta hasoru hodi manán nia ka lae?” (Gênesis [Kejadian] 4:6, 7) Caim lakohi rona. Nia hakribi Jeová nia dixiplina, oho ninia alin, no moris ho konsekuénsia aat husi ninia desizaun iha ninia moris tomak. (Gênesis [Kejadian] 4:11, 12) Se Caim rona ba Maromak, nia la presiza halaʼo moris neʼebé lori terus ba nia.

19 Zedekias mak liurai neʼebé fraku no laran-aat. Iha ninia ukun, povu iha Jeruzalein moris iha situasaun neʼebé aat tebes. Profeta Jeremias fó avizu dala barak ba nia katak nia tenke troka. Maibé liurai neʼe lakohi simu Jeová nia dixiplina, no neʼe lori rezultadu neʼebé aat tebes. (Jeremias [Yeremia] 52:8-11) Jeová lakohi ita atu moris ho konsekuénsia aat neʼebé tuir loloos ita bele sees.​—Lee Isaías (Yesaya) 48:17, 18. *

20. Saida mak sei akontese ba ema neʼebé simu Maromak nia dixiplina no ema neʼebé hakribi dixiplina neʼe?

20 Ohin loron, ema barak goza Maromak nia dixiplina no sira lakohi simu ninia dixiplina. Maibé, lakleur tan ema neʼebé hakribi Maromak nia dixiplina sei simu konsekuénsia neʼebé aat. (Provérbios [Amsal] 1:24-31) Tan neʼe, mai ita “rona ba dixiplina atu [ita] bele sai matenek”. Eskritura iha Provérbios 4:13 hatete, “kaer metin ba dixiplina; keta husik nia. Proteje nia, tanba nia mak ó-nia moris.”

^ par. 19 Isaías 48:17, 18 17 Jeová, Ida neʼebé Sosa Fali imi, Izraél nia Maromak neʼebé Santu, dehan nuneʼe: “Haʼu, Jeová, mak imi-nia Maromak, haʼu hanorin imi kona-ba buat neʼebé diʼak liu ba imi, no dirije imi iha dalan neʼebé imi tenke laʼo bá. 18 Haʼu hakarak atu imi rona ba haʼu-nia mandamentu sira! Se imi halo nuneʼe, imi-nia dame sei sai hanesan mota ida no imi-nia hahalok loos sei sai hanesan tasi nia laloran.