Skip to content

Skip to table of contents

“Laʼo bá no hanorin ema husi nasaun hotu atu sai haʼu-nia dixípulu”

“Laʼo bá no hanorin ema husi nasaun hotu atu sai haʼu-nia dixípulu”

“Laʼo bá no hanorin ema husi nasaun hotu atu sai haʼu-nia dixípulu, fó batizmu ba sira . . . , hanorin sira atu halo tuir buat hotu neʼebé haʼu haruka ba imi.”—MATEUS 28:19, 20.

KNANANUK: 141, 17

1, 2. Jesus nia liafuan neʼebé temi iha Mateus 24:14 hamosu pergunta saida deʼit?

JESUS fó-hatene nanis katak iha loron ikus sira, liafuan diʼak kona-ba Maromak nia Ukun sei habelar ba mundu tomak. (Mateus 24:14) Ema rekoñese katak Testemuña ba Jeová mak halaʼo daudauk serbisu neʼe iha mundu tomak. Balu gosta mensajen neʼebé ita hatoʼo ba sira, balu lae. Maski sira neʼebé la gosta ita-nia mensajen, maibé sira respeitu ita kona-ba serbisu neʼebé ita halo daudaun. Tanbasá mak ita bele hatete katak só ita mesak deʼit mak halaʼo serbisu neʼe? Oinsá mak ita hatene katak serbisu neʼebé ita halaʼo daudaun mak serbisu neʼebé Jesus fó-hatene nanis?

2 Relijiaun barak hatete katak sira haklaken daudauk Jesus nia mensajen. Maibé sira-nia haklaken mak liuhusi misa deʼit, televizaun, internét, ka karik sira hatete deʼit ba ema oinsá mak sira aprende kona-ba Jesus. Ema balu sente katak halo serbisu atu ajuda ema seluk mós hanesan haklaken ba ema,  serbisu hanesan sai doutór, enfermeiru, ka mestre. Maibé, bainhira Jesus temi haklaken, nia koʼalia kona-ba serbisu sira-neʼe ka lae?

3. Tuir Mateus 28:19, 20, Jesus nia eskolante sira tenke halo buat haat saida?

3 Jesus nia dixípulu sira hein ema mak bá buka sira ka lae? Lae. Tanba bainhira nia hetan tiha moris-hiʼas, nia koʼalia ba ninia dixípulu atus ba atus no haruka sira: “Laʼo bá no hanorin ema husi nasaun hotu atu sai haʼu-nia dixípulu, fó batizmu ba sira . . . , hanorin sira atu halo tuir buat hotu neʼebé haʼu haruka ba imi.” (Mateus 28:19, 20) Iha eskritura neʼe Jesus hakarak ita atu halo buat haat. Buat sira-neʼe mak hanorin ema atu sai ninia dixípulu, fó batizmu ba sira, no hanorin sira. Maibé buat primeiru ita tenke halo mak bá buka ema. Matenek-naʼin ida kona-ba Bíblia hatete katak: “Besik ka dook, fiar-naʼin ida-idak nia knaar mak ‘bá’.”—Mateus 10:7; Lucas 10:3.

4. Atu sai “peskadór ba ema”, presiza saida deʼit?

4 Jesus nia hakarak mak atu ninia dixípulu ida-idak haklaken ketaketak ka nia hakarak sira haklaken nuʼudar organizasaun ida? Susar ba ema ida atu haklaken toʼo mundu tomak, hodi nuneʼe mak dixípulu sira presiza organiza hamutuk atu sai grupu ida hodi haklaken. Tan neʼe, bainhira Jesus bolu ninia dixípulu sira, nia dehan ba sira atu sai “peskadór ba ema”. (Lee Mateus 4:18-22.) Peskadór neʼebé Jesus temi, neʼe laʼós ema neʼebé tuur mesamesak ho ninia kail, ho ninia iska, hein atu hakail ikan. Iha neʼe Jesus koʼalia kona-ba peska ikan ho rede. Peska ho rede presiza forsa, organiza didiʼak, no presiza ema barak atu serbisu hamutuk.—Lucas 5:1-11.

5. Ita presiza hatán ba pergunta haat saida, no tanbasá?

5 Atu hatene sé mak haklaken daudauk ohin loron, ita presiza hatán ba pergunta haat tuirmai neʼe:

  • Jesus nia eskolante tenkesér haklaken kona-ba mensajen saida?

  • Sira-nia motivu atu haklaken mak saida?

  • Tenkesér uza dalan saida deʼit atu haklaken ba ema?

  • Haklaken iha neʼebé deʼit no toʼo bainhira?

Resposta ba pergunta sira-neʼe bele ajuda ita atu hatene sé mak halaʼo daudauk serbisu salvasaun neʼe, no neʼe mós bele hametin ita-nia hakarak atu laran-metin ba serbisu neʼe.—1 Timóteo 4:16.

HAKLAKEN KONA-BA MENSAJEN SAIDA?

6. Tanbasá mak ita bele fiar katak Testemuña ba Jeová haklaken daudauk mensajen neʼebé loos?

6 Lee Lucas 4:43. Jesus uluk haklaken “liafuan diʼak kona-ba Maromak nia Ukun”, no nia mós hakarak ninia dixípulu sira halo hanesan neʼe. Ohin loron, sé mak haklaken hela mensajen neʼe ba ema hotu? Testemuña ba Jeová deʼit! Maski ema neʼebé la gosta ita mós rekoñese kona-ba neʼe. Porezemplu, iha padre misionáriu ida. Nia hatete ba Testemuña ida katak nia bá ona rai barak, no iha rai ida-idak nia sempre husu ba Testemuña mensajen saida mak sira haklaken ba ema. Padre neʼe hatete: “Sira hotu beik-teen tebes tanba sira hotu fó resposta ida deʼit: ‘Liafuan diʼak kona-ba Maromak nia Ukun.’” Tuir loloos ita laʼós beik, maibé tanba ita iha unidade nuʼudar kristaun neʼebé loos. (1 Korinto 1:10)  No tanba mensajen neʼe mak iha ita-nia Livru Haklaken ita fó títulu Livru Haklaken—Fó sai Maromak nia Ukun. Livru neʼe tradús ona ba língua 254 no kada edisaun ita halo maizumenus hamutuk 59.000.000. Livru neʼe sai hanesan livru neʼebé fahe barak liu iha mundu tomak!

7. Tanbasá mak ita hatene katak ulun-naʼin relijiaun kristaun sira la haklaken kona-ba mensajen neʼebé loos?

7 Ulun-naʼin relijiaun kristaun sira la haklaken kona-ba Maromak nia Ukun ka Reinu. Se sira mak koʼalia kona-ba Maromak nia Ukun, sira hatete deʼit katak Reinu neʼe mak iha ita-nia laran deʼit. (Lucas 17:21) Sira nunka ajuda ema atu komprende katak Maromak nia Ukun mak governu lalehan nian, no Liurai ba Ukun neʼe mak Jesus Kristu. Sira nunka esplika katak Ukun neʼe mak solusaun ba ema nia problema hotu, no katak lakleur tan ukun neʼe sei halakon hotu buat aat husi mundu neʼe. (Apokalipse 19:11-21) Buat neʼebé sira halo mak koʼalia kona-ba Jesus iha tempu Natál ka Páskua deʼit. Ulun-naʼin sira-neʼe la hatene Jesus halo daudaun saida nuʼudar Liurai ba Maromak nia Ukun. No tanba sira la komprende kona-ba mensajen neʼebé Jesus temi, sira mós la komprende tanbasá mak ita tenke haklaken mensajen neʼe.

MOTIVU ATU HAKLAKEN MAK SAIDA?

8. Haklaken ho motivu saida mak la loos?

8 Bainhira haklaken, Jesus nia dixípulu sira la bele kobra osan ka atu halo uma boot jeitu-jeitu, tanba Jesus hatete ba sira: “Imi simu la selu, fó mós hodi la hein atu ema selu imi.” (Mateus 10:8) Tan neʼe, bainhira ita haklaken ita la simu osan no mós ita la labele faʼan Maromak nia Liafuan. (2 Korinto 2:17) Ema neʼebé haklaken la bele buka atu manán buat ruma ka hein atu selu. (Lee Apóstolu 20:33-35.) Maibé, maski Jesus fó ona avizu neʼebé klaru, igreja barak la fó atensaun hodi kobra nafatin osan atu uza ba selu ulun-naʼin relijiaun no ema neʼebé serbisu ba igreja. Tan neʼe mak ulun-naʼin relijiaun kristaun barak sai riku tebes.—Apokalipse 17:4, 5.

9. Oinsá mak Testemuña ba Jeová hatudu katak sira haklaken ho motivu neʼebé loos?

9 Iha Reuniaun-Fatin ka iha reuniaun boot sira, Testemuña ba Jeová kobra osan ka lae? Lae. Sira-nia osan hotu mai husi kontribuisaun neʼebé ema fó ho laran tuir sira-nia hakarak deʼit. (2 Korinto 9:7) Maski nuneʼe, tinan kotuk Testemuña ba Jeová uza oras besik 2.000.000.000 hodi haklaken ba ema no fulan-fulan sira estuda ho ema naʼin-9.000.000 resin. Serbisu sira-neʼe halo ho voluntáriu no uza sira rasik nia osan, maibé sira halo serbisu neʼe ho solok. Bainhira koʼalia kona-ba buat neʼebé Testemuña sira halo, peskizadór ida hatete: “Sira-nia objetivu mak haklaken no hanorin ema. . . . Sira laiha amlulik, tan neʼe la presiza hasai osan barak.” Maibé se laʼós tanba osan, saida mak book ita atu halo serbisu neʼe? Ita halo serbisu neʼe ho ita rasik nia hakarak tanba ita hadomi Jeová no ita hadomi ema. Hahalok neʼe mak Salmo (Mazmur) 110:3 fó-hatene nanis neʼebé sai loos daudaun. (Lee.) [1]

HAKLAKEN HODI UZA DALAN SAIDA DEʼIT?

Ita haklaken iha fatin hotu neʼebé iha ema (Haree parágrafu 10)

10. Dalan saida mak Jesus nia dixípulu sira uza hodi haklaken?

10 Dalan saida deʼit mak Jesus no ninia dixípulu sira uza hodi haklaken liafuan diʼak? Sira bá buka iha fatin hotu neʼebé iha ema, hanesan iha estrada no merkadu.  No sira mós bá ema nia uma atu koʼalia ho sira. (Mateus 10:11; Lucas 8:1; Apóstolu 5:42; 20:20) Haklaken uma ba uma hanesan neʼe hatudu katak sira hakarak haklaken ba ema hotu.

11, 12. Oinsá mak igreja sira la bele kompara ho Testemuña ba Jeová iha dalan haklaken nian?

11 Igreja sira halo tuir Jesus nia ezemplu hodi haklaken ka lae? Baibain padre sira halo misa deʼit ba sira-nia povu. Sira la bá atu buka dixípulu foun tanba sira kontente ona ho ema neʼebé tuir misa sira. Dala ruma sira anima duni sira-nia povu atu bá haklaken. Porezemplu, iha tinan 2001, Amu-Papa João Paulo II iha ninia karta ida nia hatete katak igreja nia membru sira tenkesér haklaken Jesus nia evanjellu atu halo tuir apóstolu Paulo nia laran-manas neʼebé hatete: “Susar ba haʼu se haʼu la haklaken Jesus nia evanjellu.” Tuirmai amu-papa dehan katak serbisu haklaken la bele atu hein ema neʼebé hetan ona treinu mak bele halo, tanba membru hotu iha responsabilidade atu haklaken. Maibé ema uitoan deʼit mak halo tuir ninia hakarak neʼe.

12 Oinsá ho Testemuña ba Jeová? Sira mak ema mesak deʼit neʼebé haklaken katak Jesus sai ona Liurai husi tinan 1914. Sira halo tuir Jesus hodi tau uluk haklaken iha sira-nia moris. (Marcos 13:10) Livru ida (Pillars of Faith—American Congregations and Their Partners) hatete katak ba Testemuña sira, serbisu haklaken importante tebes. Livru neʼe mós hatete katak se Testemuña sira hetan ema neʼebé hamlaha, mesamesak, no moras, sira hakaʼas an hodi ajuda ema sira-neʼe. Maibé sira mós nunka haluha katak sira-nia objetivu mak atu haklaken kona-ba mundu neʼe nia rohan hodi ajuda ema atu hetan salvasaun. Dalan neʼebé Testemuña ba Jeová sira uza hodi haklaken mak halo tuir duni Jesus no ninia dixípulu sira-nia dalan atu haklaken ba ema.

HAKLAKEN IHA NEʼEBÉ DEʼIT, NO TOʼO BAINHIRA?

13. Iha neʼebé deʼit mak presiza haklaken?

13 Jesus hatete katak ninia dixípulu sira sei haklaken liafuan diʼak kona-ba Maromak nia Ukun “iha mundu tomak”. Sira sei bá “nasaun hotu” atu ajuda ema sai Jesus nia dixípulu. (Mateus 24:14; 28:19, 20) Neʼe dehan katak serbisu haklaken sei habelar toʼo mundu tomak.

14, 15. Saida mak hatudu katak só Testemuña ba Jeová deʼit mak halaʼo hela serbisu neʼebé Jesus fó-hatene nanis iha mundu tomak? (Haree foto iha pájina 8.)

14 Ita la iha duvida katak Testemuña ba Jeová mak kumpre daudaun serbisu haklaken neʼebé Jesus fó-hatene nanis. Oinsá mak ita hatene? Se ita kompara igreja kristaun hotu iha rai-Estadus Unidus iha padre maizumenus hamutuk naʼin-600.000, maibé Testemuña ba Jeová iha ema naʼin-1.200.000 mak haklaken iha neʼebá. Iha mundu tomak, igreja Katólika Roma iha padre maizumenus naʼin-400.000,  maibé Testemuña ba Jeová, iha ema naʼin-8.000.000 mak haklaken hela liafuan diʼak iha rai 240. Husi neʼe ita bele haree katak Testemuña ba Jeová mak haklaken daudauk iha mundu tomak hodi fó glória no hahiʼi ba Jeová!—Salmo (Mazmur) 34:1; 51:15.

15 Ita-nia hakarak nuʼudar Testemuña ba Jeová mak atu haklaken liafuan diʼak kona-ba Maromak nia Ukun ba ema hotu antes mundu nia rohan toʼo mai. Tan neʼe ita tradús no halo livru, tratu, konvite ba reuniaun boot no Memoriál rihun ba rihun iha língua 700 resin, no ita fahe deʼit ba ema hotu. Tinan kotuk deʼit ita halo ona livru hamutuk 4.500.000.000 no Bíblia Sagrada Tradusaun Mundu Foun hamutuk 200.000.000 liu iha língua hamutuk 130 resin. No iha ita-nia sítiu ita bele hetan informasaun iha língua 750 liu. Ida-neʼe hatudu duni katak só Testemuña ba Jeová deʼit mak halaʼo daudauk serbisu neʼebé Jesus temi.

16. Oinsá mak ita hatene katak Testemuña ba Jeová iha Maromak nia espíritu santu?

16 Ita presiza haklaken toʼo bainhira? Jesus hatete katak serbisu haklaken sei halaʼo toʼo mundu nia rohan toʼo mai. Testemuña ba Jeová bele halaʼo serbisu haklaken toʼo ohin loron, neʼe hatudu duni katak ita iha Jeová nia espíritu santu. (Apóstolu 1:8; 1 Pedro 4:14) Ema balu husi relijiaun seluk hatete katak sira mós iha Maromak nia espíritu santu, maibé sira bele halo serbisu hanesan Testemuña ba Jeová sira halo iha loron ikus sira-neʼe ka lae? Balun tan koko atu haklaken hanesan ita, maibé ikusmai laiha susesu. Balu konsege duni bá haklaken, maibé tahan ba tempu badak deʼit. Balu tan koko haklaken husi uma ba uma, maibé sira la haklaken kona-ba Maromak nia Ukun. Ida-neʼe hatudu katak laʼós sira mak halaʼo serbisu haklaken neʼebé Jesus halo.

SÉ LOOS MAK HAKLAKEN LIAFUAN DIʼAK OHIN LORON?

17, 18. (a) Tanbasá mak ita hatene katak Testemuña ba Jeová mesak deʼit mak haklaken hela liafuan diʼak ohin loron? (b) Oinsá mak ita bele halaʼo nafatin serbisu neʼe?

17 Entaun, sé loos mak haklaken hela liafuan diʼak kona-ba Maromak nia Ukun ohin loron? Testemuña ba Jeová! Tanbasá mak ita hatete nuneʼe? Tanba só Testemuña ba Jeová deʼit mak haklaken mensajen neʼebé loos kona-ba Maromak nia Ukun. Só ita deʼit haklaken iha dalan neʼebé loos, tanba ita bá buka ema hodi haklaken ba sira. No tanba domin ba Jeová no domin ba ema mak ita hakarak haklaken, neʼe hatudu katak ita haklaken ho motivu neʼebé loos. Ita mós haklaken iha fatin naran deʼit ba ema husi nasaun hotu no ho língua oioin. Ita sei kontinua atu haklaken toʼo mundu nia rohan toʼo mai.

18 Ita gaba duni serbisu haklaken neʼebé Maromak nia povu halaʼo daudauk iha loron ikus sira-neʼe. Maibé oinsá mak ita bele kumpre buat hotu neʼe? Apóstolu Paulo esplika katak: “Maromak mak ida neʼebé halo imi iha forsa, hodi fó ba imi hakarak no kbiit atu halo buat neʼebé monu loos ba nia laran.” (Filipe 2:13) Ita husu katak Jeová kontinua fó forsa mai ita hodi ita bele hakaʼas an nafatin atu haklaken liafuan diʼak.—2 Timóteo 4:5.

^ [1] (parágrafu 9) Salmo 110:3 Ita-nia povu sei fó sira-nia an ho hakarak rasik iha loron Ita-nia tropa nian. Nuʼudar buat santu no furak, Ita iha joven mane sira hanesan mahon-been iha dadeer-saan.