Skip to content

Skip to table of contents

Bíblia sei kontinua troka ita-nia hahalok ka lae?

Bíblia sei kontinua troka ita-nia hahalok ka lae?

“Troka imi-nia an hodi hafoun imi-nia hanoin.”—ROMA 12:2.

KNANANUK: 29, 52

1-3. (a) Hahalok saida deʼit mak karik susar ba ita atu halakon maski hetan tiha ona batizmu? (b) Neʼe bele hamosu pergunta saida deʼit? (Haree foto iha leten.)

ULUK, Kevin gosta joga, fuma, lanu, no uza droga. [1] (Haree nota husi lisaun.) Estuda tiha Bíblia, nia hakarak tebes atu iha relasaun neʼebé diʼak ho Jeová. Maibé atu sai Jeová nia belun, Kevin tenke halo mudansa ba ninia moris tomak. Ho Jeová nia ajuda no Bíblia nia kbiit, Kevin konsege duni troka ninia hahalok sira.—Ebreu 4:12.

2 Hetan tiha batizmu, Kevin presiza nafatin halo mudansa ba ninia hahalok atu sai kristaun neʼebé diʼak. (Éfeso 4:31, 32) Porezemplu, uluk nia sai nervozu lalais. Nia dehan katak buat neʼebé difisil tebes ba nia mak atu kontrola ninia nervozu. Nia dehan antes atu hetan batizmu, fasil ba nia atu troka ninia hahalok sira seluk, maibé só neʼe deʼit. Maski nuneʼe, ikusmai nia estuda didiʼak Bíblia no ho Jeová nia ajuda, nia konsege troka duni ninia hahalok neʼe.

 3 Ita balu mós hanesan Kevin, antes batizmu, ita presiza kumpre Bíblia nia kritériu sira no halo mudansa ba ita-nia hahalok. Hetan tiha batizmu, ita mós kontinua halo mudansa hodi bele hakbesik liután ba Maromak no Jesus. (Éfeso 5:1, 2; 1 Pedro 2:21) Porezemplu, karik ita iha hela hahalok hanesan muramura, gosip, koʼalia liafuan neʼebé hakanek ema nia laran, taʼuk ba ema, ka fraku seluk tan. Karik ita koko ona ba tinan barak atu troka hahalok sira-neʼe, maibé ita repete nafatin hahalok sira-neʼe. Tan neʼe ita bele hanoin, ‘Haʼu halo ona mudansa boot ba haʼu-nia moris, maibé tanbasá mak susar ba haʼu atu halakon fraku sira-neʼe? Saida mak bele ajuda haʼu atu halo tuir buat neʼebé Bíblia hatete hodi hadiʼa nafatin haʼu-nia hahalok sira?’

ITA BELE HALO JEOVÁ KONTENTE

4. Tanbasá mak ita la bele halo buat hotu neʼebé tuir Jeová nia hakarak?

4 Tanba ita hadomi Jeová, ita hakarak halo tuir nia ho laran tomak. Maibé triste mak tanba ita ema sala-naʼin, ita la bele halo buat hotu neʼebé tuir Jeová nia hakarak. Apóstolu Paulo mós sente hanesan neʼe, tan neʼe mak nia dehan: “Haʼu hakarak atu halo buat neʼebé loos, maibé haʼu la iha kbiit atu halo ida-neʼe.”—Roma 7:18; Tiago 3:2.

5. Hahalok saida deʼit mak ita tenke halakon antes batizmu, maibé fraku saida mak ita presiza tahan hasoru nafatin?

5 Antes atu sai parte ba kongregasaun, ita tenke husik hotu hahalok neʼebé Jeová odi. (1 Korinto 6:9, 10) Maibé ita sei sala-naʼin nafatin. (Koloso 3:9, 10) Tan neʼe maski ita hetan batizmu ba tinan barak ona mós ita sei halo sala nafatin. Dala ruma ita bele iha hakarak ka sentimentu neʼebé sala, ka karik ita bele sente susar atu kontrola ita-nia hahalok ruma. No karik ita mós presiza luta ba tinan barak hasoru fraku sira-neʼe.

6, 7. (a) Maski ita la perfeitu maibé saida mak ajuda ita atu iha relasaun neʼebé diʼak ho Jeová? (b) Tanbasá mak ita la bele taʼuk atu husu Jeová fó perdua ba ita-nia sala?

6 Maski ita ema sala-naʼin, maibé ita sei bele nafatin atu iha relasaun neʼebé diʼak ho Jeová no serbí nia. Foufoun tanba Jeová dada ita mak ita bele sai ninia belun. (João 6:44) Jeová bele haree ita-nia laran, nia hatene ita-nia fraku hotu no nia hatene katak dala ruma ita bele halo sala. Maibé nia hakarak nafatin atu ita sai ninia belun.

7 Jeová hadomi tebes ita, tan neʼe mak nia fó ninia Oan-Mane nia moris nuʼudar prezente folin-boot ida ba ita. Nia halo nuneʼe hodi nia bele uza Jesus nia sakrifísiu neʼe atu kasu ita-nia sala. (João 3:16) Tan neʼe mak bainhira ita halo sala ruma, ita bele husu Jeová atu fó perdua ba ita-nia sala, no liuhusi Jesus nia sakrifísiu, ita bele fiar katak Jeová sei perdua ita hodi ita sai nafatin ninia belun. (Roma 7:24, 25; 1 João 2:1, 2) Ita presiza hanoin-hetan katak Jesus mate ba ema sala-naʼin neʼebé hakarak arrepende an, tan neʼe mak maski ita sente katak ita halo ona sala barak, ita tenkesér husu beibeik ba Jeová atu fó perdua ba ita-nia sala sira. Se ita mak la husu Jeová nia perdua, neʼe hanesan ita liman foʼer maibé ita lakohi uza bee atu fase ita-nia liman. Ita agradese tebes ba Jeová tanba liuhusi Jesus nia sakrifísiu, nia husik ita atu sai ninia belun maski ita sala-naʼin nafatin.—Lee 1 Timóteo 1:15.

8. Tanbasá mak ita tenke hakaʼas an atu la hatudu nafatin ita-nia fraku sira?

8 Maibé neʼe la dehan katak ita bele husik deʼit atu hatudu nafatin ita-nia fraku sira, tanba Jeová hakarak ita atu banati-tuir nia no Jesus Kristu hodi bele  sai ninia belun. (Salmo [Mazmur] 15:1-5) Ita mós tenke kontrola ita-nia an beibeik atu la bele iha hakarak neʼebé ladiʼak, no se bele, ita tenke halakon hotu hakarak sira-neʼe. Maski ita foin hetan batizmu ka hetan batizmu kleur ona, ita tenke hadiʼa nafatin ita-nia hahalok sira.—2 Korinto 13:11.

9. Tanbasá mak ita hatene katak ita bele kontinua hafoun ita-nia hahalok?

9 Apóstolu Paulo dehan: “Tan neʼe, imi tenke husik tiha hahalok tuan nian, katak imi-nia moris uluk nian, tanba hahalok tuan neʼe sai aat ba beibeik liuhusi imi-nia hakarak aat neʼebé lohi imi. No imi tenke kontinua hafoun imi-nia dalan atu hanoin, no imi tenke tau hahalok foun nuʼudar imi-nia hatais, katak hahalok foun neʼebé Maromak kria tuir ninia hakarak; no hahalok neʼe mak loos no laran-metin.” (Éfeso 4:22-24) Liafuan “kontinua hafoun” signifika katak atu hadiʼa hahalok, presiza hakaʼas an no prosesu neʼebé naruk. Liafuan sira-neʼe fó anima ita tanba atu hadiʼa hahalok, neʼe la haree ba ita serbí Jeová kleur ona ka foin serbí nia. Bíblia bele duni ajuda ita atu kontinua hadiʼa ita-nia hahalok.

TANBASÁ MAK SUSAR?

10. Se ita hakarak troka ita-nia hahalok sira, ita presiza halo saida, no neʼe hamosu pergunta saida deʼit?

10 Ita tenke hakaʼas an atu halo tuir Maromak nia Liafuan hodi troka ita-nia hahalok sira. Maibé tanbasá mak ita rasik tenke hakaʼas an? Tanbasá mak Jeová la halo fasil deʼit ba ita atu halo buat neʼebé loos?

11-13. Tanbasá mak Jeová hakarak ita rasik mak hakaʼas an atu luta hasoru ita-nia fraku sira?

11 Se ita hanoin didiʼak kona-ba lalehan no rai, ita bele haree katak Jeová iha forsa duni. Ezemplu ida mak kona-ba loron-matan neʼebé nia kria. Kada segundu, loron-matan fó sai naroman no manas barak tebes. Maibé uitoan deʼit mak tama toʼo ita-nia mundu no neʼe natoon ona ba moris hotu nia presiza iha mundu neʼe. (Salmo [Mazmur] 74:16; Isaías [Yesaya] 40:26) No bainhira Jeová nia atan presiza forsa, nia mós fó forsa ba sira. (Isaías [Yesaya] 40:29) Husi neʼe ita bele haree katak se Jeová mak hakarak, nia bele halo fasil ba ita atu luta hasoru ita-nia fraku, ka la bele iha hakarak neʼebé sala. Maibé tanbasá mak nia la halo hanesan neʼe?

12 Jeová fó ita liberdade, no nia husik ita mak atu hili hodi halo tuir ka la halo tuir nia. Se ita hili atu halo tuir nia no hakaʼas an halo ninia hakarak, neʼe hatudu katak ita hadomi no hakarak halo nia kontente. Satanás hatete katak Jeová laiha direitu atu ukun, tan neʼe mak bainhira ita halo tuir Jeová, ita hatudu katak ita hakarak Jeová atu sai ita-nia Ukun-naʼin. Ita mós bele fiar katak ita-nia Aman neʼebé domin hafolin tebes ita-nia hakaʼas an atu halo tuir nia. (Jó [Ayub] 2:3-5; Provérbios [Amsal] 27:11) Maibé, se Jeová mak ajuda hela deʼit ita atu halo fasil ba ita hodi luta hasoru ita-nia fraku, ita-nia laran-metin ba nia la sai buat neʼebé iha folin, loos ka lae?

13 Tan neʼe mak Jeová hakarak ita rasik atu hakaʼas an hodi hadiʼa ita-nia hahalok sira. (Lee 2 Pedro 1:5-7; Koloso 3:12) Jeová mós hakarak ita atu hakaʼas an hodi kontrola ita-nia hanoin no sentimentu sira. (Roma 8:5; 12:9) Bainhira ita hakaʼas an atu troka ita-nia hahalok no ita hetan rezultadu neʼebé diʼak husi ita-nia hakaʼas-an sira, neʼe halo ita sente kontente tebes.

 HUSIK BÍBLIA KONTINUA TROKA ITA-NIA HAHALOK

14, 15. Saida mak ita bele halo atu haburas hahalok neʼebé Jeová gosta? (Haree kaixa “ Bíblia no orasaun troka sira-nia moris.”)

14 Ita tenke halo saida atu haburas hahalok neʼebé Jeová gosta? Duké halo desizaun rasik kona-ba hahalok saida mak ita presiza troka, diʼak atu buka-hatene husi Bíblia. Roma 12:2 hatete: “Keta halo tuir mundu ohin neʼe nian, maibé troka imi-nia an hodi hafoun imi-nia hanoin, atu imi bele hatene ho loloos kona-ba Maromak nia hakarak neʼebé diʼak no loos no neʼebé nia simu.” Atu buka-hatene Maromak nia hakarak, ita tenke lee Bíblia loroloron, no hanoin didiʼak kona-ba buat neʼebé ita lee. Halo orasaun ba Jeová atu husu ninia espíritu santu. (Lucas 11:13; Galásia 5:22, 23) Hodi nuneʼe, ita bele hatene saida mak Jeová gosta no neʼe mós bele ajuda ita atu komprende dalan neʼebé Jeová hanoin. Ikusmai, buat neʼebé ita halo, hanoin, no koʼalia, sei halo Jeová kontente, no ita mós hatene oinsá atu kontrola ita-nia fraku sira. Maibé buat neʼebé ita presiza halo husi agora mak kontinua luta hasoru fraku sira-neʼe.—Provérbios (Amsal) 4:23.

Dala ruma diʼak atu rai no haree fali eskritura no informasaun neʼebé koʼalia kona-ba ita-nia fraku sira (Haree parágrafu 15)

15 Latoʼo atu lee Bíblia loroloron deʼit, ita mós presiza lee Bíblia hamutuk ho ita-nia livru sira, hanesan Livru Haklaken no Matan-moris bá! Livru sira-neʼe baibain iha informasaun neʼebé bele ajuda ita haburas hahalok neʼebé Jeová gosta no oinsá atu luta hasoru ita-nia fraku seluk. Bainhira ita lee, ita bele hetan informasaun ka eskritura ruma neʼebé diʼak tebes ba ita. Ita bele rai hela informasaun sira-neʼe hodi lee fali iha tempu seluk tan.

16. Tanbasá mak ita la presiza laran-tun se ita sente katak ita-nia mudansa ba hahalok sira neineik tebes?

16 Atu bele banati-tuir Jeová nia hahalok, presiza tempu. Tan neʼe mak se ita sente katak susar ba ita atu troka kedas hahalok neʼebé ita la gosta, ita tenke pasiénsia. Karik buat neʼebé ita presiza halo uluk mak obriga ita-nia an atu halo tuir buat neʼebé Bíblia hatete. Maibé se ita mak hanoin ka halo beibeik buat neʼebé tuir Jeová nia hakarak, neʼe sei halo fasil ba ita atu hanoin tuir dalan neʼebé Jeová hanoin hodi halo buat neʼebé loos.—Salmo (Mazmur) 37:31; Provérbios (Amsal) 23:12; Galásia 5:16, 17.

HANOIN KONA-BA FUTURU NEʼEBÉ FURAK

17. Se ita laran-metin ba Jeová, ita bele iha futuru hanesan saida?

17 Ita hotu hakarak hein ba tempu neʼebé ita bele serbí Jeová ba nafatin nuʼudar  ema sala-laek iha futuru. Iha tempu neʼebá, ita la presiza tan atu luta hasoru ita-nia fraku sira, no sei fasil mós ba ita atu banati-tuir Jeová nia hahalok furak sira. Maibé, ohin loron mós ita bele adora Jeová tanba Jesus nia sakrifísiu. Maski ita la perfeitu, ita bele halo Jeová kontente se ita hakaʼas an nafatin atu husik Jeová nia Liafuan troka ita-nia hahalok.

18, 19. Tanbasá mak ita bele fiar katak Bíblia iha duni kbiit atu kontinua troka ita-nia hahalok?

18 Kevin halo buat oioin hodi bele kontrola ninia an atu la bele sai nervozu. Nia hanoin kleʼan kona-ba buat neʼebé nia lee husi Bíblia no hakaʼas an hodi troka ninia hahalok sira. Nia mós halo tuir konsellu neʼebé nia simu husi maluk kristaun seluk. Maski liutiha tinan balu mak nia foin bele halakon hahalok sira-neʼe, maibé nia kumpre kritériu hodi serbí nuʼudar atan ba kongregasaun. No ikusmai nia mós serbí nuʼudar katuas ba tinan 20 ona. Maibé nia rekoñese katak nia presiza luta nafatin hasoru ninia fraku sira toʼo ohin loron.

19 Ita mós bele kontinua hadiʼa ita-nia hahalok hanesan Kevin. Halo nuneʼe bele ajuda ita atu hakbesik nafatin ba Jeová. (Salmo [Mazmur] 25:14) No se ita mak hakaʼas an atu troka hahalok sira hodi halo Jeová kontente, nia mós sei ajuda ita hodi ita bele iha susesu. Bainhira ita haree duni ba Jeová nia bensaun neʼebé nia fó ba ita, ita bele haree katak Bíblia iha duni kbiit atu ajuda ita hodi kontinua troka ita-nia hahalok iha ita-nia moris.—Salmo (Mazmur) 34:8.

^ [1] (parágrafu 1) Naran neʼe laʼós naran neʼebé loos.