Skip to content

Skip to table of contents

Liafuan hasé iha kbiit

Liafuan hasé iha kbiit

“BONDIA! Diʼak ka lae?”

Dala ruma ita hasé ema hanesan neʼe, loos ka lae? Karik ita mós kaer liman ka hakoʼak malu. Maski fatin ida-idak iha sira-nia kostume no liafuan rasik atu hasé ema, maibé maizumenus, dalan atu hasé ema mak hanesan deʼit. Tuir loloos, se ita la hasé ema, ema bele hanoin ita la iha domin, ka ulun la iha.

Maibé laʼós ema hotu gosta hasé ema. Balu dada an tanba moe ka sente sira-nia an la iha folin. Balu tan sente susar atu hasé ema neʼebé mai husi rasa, kultura ka pozisaun iha komunidade neʼebé la hanesan. Maibé tuir loloos, hasé ema, maski lalais deʼit, bele lori rezultadu neʼebé diʼak.

Husu ba Ita-nia an: ‘Hasé ema lori rezultadu saida? Maromak nia Liafuan hanorin saida mai haʼu kona-ba hasé ema?’

HASÉ “EMA OIOIN”

Bainhira ema jentiu primeiru, Cornélio, tama kongregasaun kristaun, apóstolu Pedro hatete: “Maromak la todan ba sorin.” (Apóstolu 10:34) Liutiha tempu neʼe, Pedro hakerek katak Maromak “hakarak ema hotu atu hakribi sala”. (2 Pedro 3:9) Bainhira ita lee eskritura neʼe, baibain ita hanoin kedas katak neʼe aplika ba ema neʼebé aprende lia-loos. Maibé Pedro mós anima ema kristaun sira atu “hatudu respeitu ba ema oioin, hadomi maluk fiar-naʼin hotu”. (1 Pedro 2:17) Ita haree katak, diʼak atu hasé ema hotu, maski sira husi rasa ka kultura naran deʼit. Neʼe mak dalan ida ita hatudu respeitu no domin.

Apóstolu Paulo anima ema sira iha kongregasaun: “Simu malu bá, hanesan Kristu mós simu ita.” (Roma 15:7) Paulo temi kona-ba irmaun sira neʼebé “fó kmaan”, ka hametin nia. Ohin loron, irmaun-irmán sira presiza tebes atu hametin malu tanba Satanás hirus tebes no ataka daudauk Maromak nia povu.​—Koloso 4:11; Apokalipse 12:12, 17.

Hasé ema seluk bele halo ema sente kontente, maibé ezemplu sira husi Bíblia hatudu katak neʼe bele lori rezultadu diʼak liután.

BENEFÍSIU HUSI HASÉ EMA

Bainhira Maromak atu muda ninia oan nia moris ba Maria nia knotak, Jeová haruka anju ida atu koʼalia ho nia. Anju neʼe dehan: “Dame hela ho ó, ó neʼebé hetan bensaun boot. Jeová hamutuk ho ó.” Maria “hakfodak tebetebes” tanbasá anju ida koʼalia ho nia. Anju neʼe dehan: “Keta taʼuk Maria, tanba ó monu loos ba Maromak nia laran.” Nia esplika katak Maromak nia planu mak atu Maria tuur ahi ba Mesias. Duké laran nakdedar nafatin, Maria prontu atu halo tuir. Nia hatete: “Haree! Haʼu mak Jeová nia atan-feto! Halo buat hotu sai loos ba haʼu hodi tuir liafuan neʼebé Ita fó sai.”​—Lucas 1:26-38.

Priviléjiu boot ba anju neʼe atu fó sai Jeová nia mensajen, maibé nia la hanoin katak neʼe hatún ninia dignidade atu koʼalia ho ema neʼebé la perfeitu. Nia hahú hodi hasé Maria. Saida mak ita bele aprende husi ezemplu neʼe? Ita presiza prontu atu hasé no anima ema. Ho liafuan balu deʼit, ita bele ajuda ema seluk hodi sente katak sira mós parte ida husi Jeová nia povu.

Apóstolu Paulo koñese irmaun-irmán barak iha Ásia Menór no Europa. Iha ninia karta sira, nia temi ema oioin. Ita bele haree ida-neʼe iha Roma kapítulu 16. Paulo haruka kumprimentus ba ema kristaun barak. Nia temi kona-ba Febe, “ita-nia feton” no husu irmaun sira: “Imi simu nia bá iha Naʼi no iha dalan neʼebé merese ba santu sira,  no imi bele fó ajuda naran deʼit neʼebé nia presiza.” Paulo mós fó kumprimentus ba Priska no Ákuila. Kona-ba sira, nia dehan: “Laʼós haʼu deʼit maibé mós kongregasaun hotu husi ema nasaun seluk nian fó obrigadu ba sira.” Nia mós fó kumprimentus ba ema balu neʼebé ohin loron ita la koñese, hanesan “Epéneto neʼebé [nia] hadomi”, no mós “Trifena no Trifosa, feto sira-neʼe serbisu makaʼas iha Naʼi”. Loos duni, Paulo kontente atu fó kumprimentus ba ninia irmaun-irmán sira.​—Roma 16:1-16.

Hanoin toʼok, karik sira sente kontente tebes tanba hatene katak Paulo hanoin-hetan sira. Ita bele fiar katak sira-nia domin ba Paulo no ba malu sai metin liután! No neʼe fó duni laran-manas ba maluk kristaun sira seluk, ajuda sira atu bele hamriik metin iha sira-nia fiar. Sin, liuhusi liafuan hasé neʼebé mai husi laran hatudu sai ita-nia interese ba malu no hametin ita-nia unidade nuʼudar Maromak nia atan.

Bainhira Paulo toʼo iha portu Putéoli no atu bá fali Roma, ema kristaun sira mai husi súl atu hasoru nia. Maski Paulo haree sira husi dook deʼit, nia “fó-agradese ba Maromak no sai aten-brani”. (Apóstolu 28:13-15) Dala ruma, karik ita bele hasé ema ho oin-midar ka foti liman deʼit, maibé ida-neʼe mós bele halo ema sente kontente, karik ema ida neʼebé laran-kraik hela.

HASÉ HUSI LARAN

Iha tempu ida, dixípulu Tiago presiza fó konsellu makaʼas tanba ema kristaun balu la laran-metin hodi sai belun ho mundu. (Tiago 4:4) Maibé haree toʼok oinsá Tiago hahú ninia karta:

“Husi Tiago, Maromak nia atan no mós Naʼi Jesus Kristu nia atan, ba suku sanulu-resin-rua neʼebé namkari iha raiklaran: Kumprimentus!” (Tiago 1:1) Karik ema kristaun sira neʼebé lee ninia karta sente fasil liu atu simu ninia konsellu bainhira sira haree husi dalan neʼebé nia kumprimenta sira katak nia mós hanesan deʼit ho sira iha Maromak nia oin. Loos, kumprimenta ho haraik-an bele mós loke dalan atu koʼalia kona-ba buat neʼebé sériu.

Maski ita-nia kumprimenta mak badak deʼit no ita hanoin ema sei la nota, maibé se neʼe mai husi ita-nia laran no hatudu domin, neʼe bele duni lori rezultadu diʼak. (Mateus 22:39) Porezemplu, irmán ida iha rai-Irlanda toʼo iha Reuniaun-Fatin iha tempu neʼebé reuniaun atu komesa ona. Bainhira nia tama lalais, irmaun ida fila oin ba nia, hatudu oin-midar no dehan: “Bonoite, kontente haree Ita.” Irmán neʼe buka deʼit ninia tuur-fatin no tuur.

Semana balu liutiha, nia hakbesik irmaun neʼe no dehan katak, ba tempu balu ona nia hasoru hela problema iha uma. Irmán dehan ba nia: “Iha kalan neʼebá, haʼu sente triste tebes toʼo haʼu besik atu la bá reuniaun. Haʼu la hanoin-hetan kona-ba buat hotu neʼebé hatoʼo iha reuniaun neʼe, maibé haʼu sei hanoin-hetan dalan neʼebé Ita hasé haʼu. Neʼe halo haʼu sente kontente tebes. Obrigada.”

Irmaun neʼe la hatene ninia liafuan sira-neʼe iha kbiit atu book irmán neʼe. Nia dehan: “Bainhira irmán neʼe hatete ba haʼu katak haʼu-nia liafuan kona ninia laran, haʼu kontente tanba iha loron neʼebá haʼu hakaʼas an atu hasé nia.”

Salomão hakerek: “Soe ó-nia paun iha bee leten, tanba liutiha loron barak ó sei hetan fali ida-neʼe.” (Eclesiastes [Pengkhotbah] 11:1) Hodi sai prontu atu hasé ema, liuliu ita-nia maluk kristaun sira, neʼe lori benefísiu barak ba sira no mós ba ita. Tan neʼe, nunka hanoin katak liafuan hasé mak la iha kbiit.