Skip to content

Skip to table of contents

“Halo imi-nia naroman nabilan” hodi fó glória ba Jeová

“Halo imi-nia naroman nabilan” hodi fó glória ba Jeová

“Halo imi-nia naroman nabilan iha ema nia oin, atu sira bele . . . fó hahiʼi ba imi-nia Aman neʼebé iha lalehan.”​—MATEUS 5:16.

KNANANUK: 77, 10

1. Razaun saida mak halo ita kontente?

ITA kontente tebes hodi haree Jeová nia atan sira halo sira-nia naroman nabilan. Tinan kotuk, Jeová nia povu halaʼo estudu Bíblia hamutuk 10.000.000 liu! No ema millaun ba millaun asiste Memoriál hodi aprende kona-ba oinsá Jeová fó Jesus nia moris nuʼudar prezente boot ba ita.​—1 João 4:9.

2, 3. (a) Saida mak la hanetik ita atu “sai nabilan hodi lori naroman”? (b) Ita sei koʼalia kona-ba saida iha lisaun neʼe?

2 Iha mundu tomak Testemuña ba Jeová koʼalia língua neʼebé la hanesan, maibé ida-neʼe la hanetik ita atu fó hahiʼi ba Jeová nuʼudar família ida neʼebé iha unidade. (Apokalipse 7:9) Maski ita koʼalia língua neʼebé la hanesan ka mai husi fatin oioin, ita hotu bele “sai nabilan hodi lori naroman iha mundu”.​—Filipe 2:15.

3 Ita-nia serbisu haklaken, ita-nia unidade, no dalan neʼebé ita matan-moris nafatin lori glória ba Jeová. Iha lisaun neʼe, ita sei koʼalia kona-ba oinsá ita bele halo ita-nia naroman nabilan liuhusi pontu tolu neʼe.​—Lee Mateus 5:14-16.

 AJUDA EMA SELUK ATU ADORA JEOVÁ

4, 5. (a) Iha dalan saida mak ita bele halo ita-nia naroman nabilan? (b) Bainhira ita hatudu laran-diʼak, neʼe lori rezultadu saida? (Haree dezeñu iha pájina 21.)

4 Dalan importante ida neʼebé ita bele halo ita-nia naroman nabilan mak hodi haklaken no hanorin ema atu sai Jesus nia dixípulu sira. (Mateus 28:19, 20) Iha tinan 1925, informasaun ida ho títulu “Naroman iha nakukun laran” esplika katak, se ema la aproveita “oportunidade atu halo ninia naroman nabilan” iha loron ikus sira, ema neʼe la bele dehan katak nia laran-metin ba Naʼi. Informasaun neʼe hatutan tan dehan: “Nia presiza halo ida-neʼe liuhusi fó sai liafuan diʼak ba ema iha mundu, no hodi moris tuir Jeová nia morál sira.” (The Watch Tower, 1 Juñu 1925) Ita fó glória ba Jeová, laʼós liuhusi haklaken deʼit, maibé liu mós husi ita-nia hahalok. Ema sempre haree ita bainhira ita haklaken. Sira hanoin diʼak kona-ba ita no ita-nia Maromak bainhira ita hasé sira ho oin-midar no laran-diʼak.

5 Jesus hatete ba ninia dixípulu sira: “Kuandu imi tama iha uma ida, kumprimenta ema iha uma neʼe.” (Mateus 10:12) Iha fatin neʼebé Jesus haklaken, ema iha kostume atu konvida ema neʼebé sira la koñese tama sira-nia uma. Iha fatin barak ohin loron, ema balu la iha kostume atu halo hanesan neʼe. Bainhira ema haree ema oin-foun mai sira-nia uma, baibain sira sente taʼuk ka la gosta. Maibé se ita mak hatudu laran-diʼak, karik neʼe bele halo sira sente diʼak. Bainhira Ita uza karrosa haklaken iha fatin públiku, karik Ita mós haree ona katak ema hakbesik Ita no foti livru sira tanba Ita hatudu oin-midar no hasé sira ho laran-diʼak. Ita-nia hahalok iha tempu neʼe bele book sira atu koʼalia ho Ita.

6. Saida mak feen-laʼen ida neʼebé idade halo atu hola parte nafatin iha serbisu haklaken?

6 Feen-laʼen ida neʼebé idade ona hela iha rai-Inglaterra, sira-nia saúde ladún diʼak, tan neʼe, sira la bele haklaken uma ba uma hanesan uluk. Saida mak sira halo? Sira monta meza iha sira-nia uma liʼur no tau ita-nia livru sira. Tanba sira hela besik eskola ida, sira tau livru sira neʼebé inan-aman sei gosta bainhira sira mai atu foti sira-nia oan. Inan-aman balu foti livru sira-neʼe, hanesan livru Pertanyaan Kaum Muda​—Jawaban yang Praktis, volume 1 no 2. Irmán pioneiru ida dala ruma hein hamutuk ho sira. Aman ida haree katak feen-laʼen neʼe hakarak tebes ajuda ema seluk no irmán neʼe mós laran-diʼak, neʼe book nia atu estuda Bíblia.

7. Saida mak ita bele halo atu ajuda refujiadu sira iha Ita-nia rai?

7 Foin daudaun, ema barak halai husi sira-nia rai no agora moris nuʼudar refujiadu iha rai seluk. Saida mak ita bele halo atu ajuda refujiadu sira iha Ita-nia rai hodi aprende kona-ba Jeová? Karik Ita bele aprende oinsá atu hasé ema iha sira-nia língua. Ita mós bele uza aplikasaun JW Language atu aprende fraze balu neʼebé bele book sira atu hakarak koʼalia ho Ita. Depois, Ita bele hatudu vídeo no livru iha sira-nia língua neʼebé hetan iha jw.org.​—Deuteronômio (Ulangan) 10:19.

8, 9. (a) Oinsá mak ita-nia reuniaun loron baileet nian ajuda ita? (b) Oinsá mak inan-aman sira bele ajuda oan atu halo diʼak liután sira-nia komentáriu iha reuniaun?

8 Jeová fó ba ita buat neʼebé ita presiza atu hetan rezultadu diʼak bainhira ita haklaken. Porezemplu, buat neʼebé ita aprende iha reuniaun Moris Kristaun no Haklaken, ajuda ita atu fiar an  hodi halo vizita fali no estuda Bíblia ho ema.

9 Bainhira ema foun mai tuir ita-nia reuniaun sira, dala barak sira hakfodak oinsá labarik sira bele hatoʼo komentáriu. Inan-aman sira bele hanorin sira-nia oan oinsá atu hatoʼo komentáriu ho sira-nia liafuan rasik. Labarik sira-nia resposta neʼebé simples no husi laran book ona ema balu atu simu lia-loos.​—1 Korinto 14:25.

HABURAS UNIDADE

10. Oinsá mak adorasaun família nian ajuda ita-nia família atu iha unidade liután?

10 Dalan ida tan ita halo ita-nia naroman nabilan mak haburas unidade iha família no kongregasaun. Inan-aman sira bele halo nuneʼe hodi halaʼo Adorasaun Família nian semana-semana. Família barak haree hamutuk JW Broadcasting no depois, sira koʼalia hamutuk kona-ba saida mak sira aprende. Bainhira halaʼo adorasaun família nian, inan-aman sira presiza hanoin-hetan katak matadalan neʼebé labarik kiʼik sira presiza, la hanesan ho joven sira. Tan neʼe, diʼak atu Ita ajuda ema hotu iha família hodi hetan benefísiu husi adorasaun família nian.​—Salmo (Mazmur) 148:12, 13.

Hatudu interese ba irmaun-irmán idade sira bele fó laran-manas (Haree parágrafu 11)

11-13. Oinsá mak ita bele ajuda haburas unidade iha kongregasaun?

11 Oinsá mak labarik no joven sira bele haburas unidade iha kongregasaun? Maski Ita-nia idade mak sei kiʼik, Ita bele hakaʼas an hodi habelun ho ferik-katuas sira. Husu sira saida mak ajuda sira hodi serbí Jeová ba tinan barak. Irmaun-irmán sira-neʼe bele hanorin Ita lisaun importante barak. Halo nuneʼe sei fó laran-manas ba sira no mós ba Ita! No ita hotu, maski kiʼik ka boot, ita bele simu bainaka sira neʼebé mai tuir reuniaun. Hasé sira, hatudu oin-midar, ajuda sira buka tuur-fatin, no fó koñese sira ba ema seluk. Se Ita halo nuneʼe, sira sei la sente taʼuk.

12 Se Ita mak hetan knaar atu dirije grupu haklaken, Ita bele ajuda irmaun-irmán idade sira atu halo sira-nia naroman nabilan nafatin. Halo arranju hodi sira bele haklaken iha fatin neʼebé diʼak ba sira, no hodi sira bele haklaken hamutuk joven neʼebé bele ajuda sira. Irmaun-irmán sira neʼebé idade ona  no saúde ladiʼak dala ruma sente laran-kraik tanba sira la bele haklaken barak hanesan uluk. Maibé sira bele sente kontente se Ita hatudu katak Ita hanoin no komprende sira-nia sentimentu. Ita-nia laran-diʼak bele anima ema hotu atu haklaken ho laran-manas, maski sira idade kiʼik ka boot, no maski sira iha lia-loos kleur ona ka lae.​—Levítico (Imamat) 19:32.

13 Ema Izraél sira gosta tebes adora Jeová hamutuk. Ema neʼebé hakerek salmu ida hatete: “Diʼak tebes no kmanek loos bainhira maun-alin sira hela hamutuk ho unidade!” (Lee Salmo [Mazmur] 133:1, 2.) * Nia kompara ida-neʼe hanesan mina neʼebé morin no halo isin sente fresku. Hanesan neʼe mós, ita bele lori kmaan ba ita-nia maluk sira se ita hatudu laran-diʼak. Neʼe bele halo kongregasaun atu iha unidade liután. Oinsá ho Ita rasik? Ita bele koko atu koñese liután ita-nia irmaun-irmán sira ka lae?​—2 Korinto 6:11-13.

14. Oinsá mak Ita bele halo Ita-nia naroman nabilan iha Ita-nia bairru rasik?

14 Ita bele hakaʼas an liután atu halo ita-nia naroman nabilan iha ita-nia bairru rasik ka lae? Ita-nia laran-diʼak bele book ita-nia viziñu sira hakarak aprende kona-ba Jeová. Husu ba Ita-nia an: ‘Haʼu-nia viziñu sira hanoin oinsá kona-ba haʼu? Haʼu-nia uma moos no kabeer, hodi halo haʼu-nia bairru haree diʼak liután ka lae? Haʼu mak ema neʼebé ajuda haʼu-nia viziñu sira ka lae?’ Husu ba Testemuña seluk oinsá sira-nia laran-diʼak no ezemplu diʼak book ona sira-nia família, viziñu, kolega serbisu ka kolega eskola.​—Éfeso 5:9.

MATAN-MORIS NAFATIN

15. Tanbasá importante atu matan-moris nafatin?

15 Se ita hakarak halo ita-nia naroman nabilan nafatin, ita presiza matan-moris kona-ba tempu neʼebé ita moris daudaun. Dala barak, Jesus hatete ba ninia dixípulu sira: “Matan-moris nafatin bá.” (Mateus 24:42; 25:13; 26:41) Se ita sente katak “terus boot” sei dook hela, ita sei la matan-moris ba oportunidade hotu atu ajuda ema seluk aprende kona-ba Jeová. (Mateus 24:21) Neineik-neineik ita-nia naroman sei sai fraku no karik bele mós lakon.

16, 17. Saida mak ita bele halo atu matan-moris nafatin?

16 Tanba mundu neʼe sai aat ba daudaun, ita presiza matan-moris liután. Ita hatene katak mundu aat neʼe nia rohan sei mai tuir tempu neʼebé Jeová hili tiha ona. (Mateus 24:42-44) Maibé antes tempu neʼe toʼo, ita presiza pasiénsia no fokus ba ita-nia futuru. Lee Bíblia loron-loron no halo orasaun beibeik ba Jeová. (1 Pedro 4:7) Aprende husi irmaun-irmán sira neʼebé serbí Jeová ba tinan barak. Ezemplu diʼak ida mak esperiénsia husi Livru Haklaken, 15 Abríl 2012, pájina 18-21, “Haʼu kaer ema judeu nia roupa ba tinan hitunulu ona”.

17 Halo Ita-nia moris nakonu ho atividade adorasaun nian no uza tempu hamutuk Ita-nia irmaun-irmán sira. Neʼe sei lori kontente ba Ita no Ita sei sente katak tempu liu lalais. (Éfeso 5:16) Jeová nia povu kumpre ona buat barak tebes durante tinan atus ida nia laran. No ohin loron, ita kumpre buat barak liután ho Jeová nia ajuda. Ita halo ita-nia naroman nabilan liután!

Ita bele aprende matenek husi Maromak nia Liafuan bainhira katuas sira vizita ita (Haree parágrafu 18, 19)

18, 19. Oinsá mak katuas sira bele ajuda ita serbí Jeová ho laran-manas? Fó toʼok ezemplu.

 18 Maski ita halo sala barak, Jeová simu ita-nia adorasaun. Atu ajuda ita, nia fó ita “ema nuʼudar prezente”, neʼe mak katuas kongregasaun sira. (Lee Éfeso 4:8, 11, 12.) Se katuas sira vizita atu koʼalia ho Ita, aproveita tempu neʼe hodi aprende husi sira-nia matenek no konsellu.

19 Feen-laʼen ida iha rai-Inglaterra hasoru problema balu iha sira-nia moris kaben nian. Sira husu ajuda husi katuas kongregasaun naʼin-rua. Feen neʼe sente katak ninia laʼen la halaʼo ninia knaar nuʼudar ulun kona-ba sira-nia adorasaun ba Jeová. Laʼen neʼe sente katak nia laʼós mestre neʼebé diʼak no rekoñese katak nia la halaʼo adorasaun família nian beibeik. Katuas sira ajuda feen-laʼen neʼe hanoin kona-ba Jesus nia ezemplu. Sira anima laʼen neʼe atu banati-tuir dalan neʼebé Jesus tau matan ba ninia dixípulu sira. No sira anima feen atu hatudu pasiénsia ba ninia laʼen. Sira mós fó sujestaun kona-ba oinsá sira bele halaʼo adorasaun família nian ho sira-nia oan. (Éfeso 5:21-29) Laʼen neʼe hakaʼas an hodi sai ulun neʼebé diʼak ba família. Katuas sira anima nia atu la rende an no sadere nafatin ba Jeová nia espíritu. Domin no laran-diʼak neʼebé katuas rua neʼe hatudu ajuda duni família neʼe atu halo sira-nia naroman nabilan!

20. Se Ita halo Ita-nia naroman nabilan, neʼe sei lori rezultadu saida?

20 “Ksolok ba ema hotu neʼebé hamtaʼuk Jeová, neʼebé laʼo iha Ninia dalan sira.” (Salmo [Mazmur] 128:1) Ita sei kontente se Ita halo Ita-nia naroman nabilan. Tan neʼe, hanorin ema seluk kona-ba Maromak, hakaʼas an atu haburas unidade iha Ita-nia família no kongregasaun, no matan-moris nafatin. Ema seluk sei haree Ita-nia ezemplu diʼak no sira mós sei hakarak fó glória ba ita-nia Aman Jeová.​—Mateus 5:16.

^ par. 13 Salmo 133:1, 2 Haree bá! Diʼak tebes no kmanek loos bainhira maun-alin sira hela hamutuk ho unidade! Neʼe hanesan mina diʼak neʼebé fui tiha ba ulun neʼebé suli tun ba hasarahun, sin, Aarão nia hasarahun, no suli tun ba ninia unuk.