Skip to content

Skip to table of contents

La tesi lia ba ema husi buat neʼebé ita haree husi liʼur

La tesi lia ba ema husi buat neʼebé ita haree husi liʼur

DON mak Testemuña ba Jeová iha rai-Kanadá, no nia sempre hakaʼas an atu koʼalia ba ema neʼebé moris iha dalan ninin. Don hatete: “Mane ida naran Peter, nia uma la iha, no haʼu nunka haree ema ida neʼebé isin no roupa sempre foʼer tebes hanesan neʼe. Nia mak ema neʼebé la hatudu respeitu no la gosta ema seluk hakbesik ba nia. Se ema koko hatudu laran-diʼak ba nia, nia lakohi simu.” Maski nuneʼe, durante tinan 14 liu, Don hatudu pasiénsia no hatudu laran-diʼak ba mane neʼe.

Loron ida, Peter husu ba Don: “Tanbasá mak ó nafatin soe tempu ba haʼu? Ema seluk la hanesan ó. Tanbasá mak ó hanoin haʼu?” Don hatudu eskritura tolu hodi koko book Peter nia laran. Primeiru nia husu se Peter hatene Maromak nia naran, no husu nia atu lee husi Salmo (Mazmur) 83:18. Tuirmai, atu hatudu tanbasá Don hanoin nia, Don husu Peter lee Roma 10:13, 14 neʼebé dehan katak, “ema hotu neʼebé bolu Jeová nia naran sei hetan salvasaun”. Ikusmai, Don lee Mateus 9:36, depois husu Peter atu lee rasik. Eskritura neʼe dehan: “Kuandu nia haree ema-lubun neʼe, nia hanoin tebes sira, tanba nia haree katak ema hanehan no la tau matan ba sira, no sira hanesan bibi neʼebé bibi-atan la iha.” Ho ida-neʼe, Peter nia matan-been nakonu, nia husu: “Haʼu mak hanesan bibi sira-neʼe ida ka?”

Husi tempu neʼe, Peter komesa halo mudansa. Nia hariis, tesi ninia hasarahun halo kabeer, no hatais fali roupa neʼebé Don fó ba nia. Peter kontinua tau matan ninia an atu sai moos.

Peter toman atu hakerek beibeik iha ninia diáriu. Foufoun, nia sempre hakerek kona-ba buat neʼebé negativu no triste. Maibé ikus-ikus neʼe, buat neʼebé nia hakerek mak la hanesan. Iha loron ida, nia hakerek: “Ohin haʼu foin aprende Maromak nia naran. Agora, se haʼu halo orasaun, haʼu bele halo orasaun ba Jeová. Furak tebes atu hatene katak nia iha naran rasik. Don dehan mai haʼu katak haʼu bele sai belun ho Jeová. Jeová sei sempre  rona ba haʼu iha tempu naran deʼit, no haʼu bele koʼalia ba nia kona-ba buat hotu.”

Buat ikus neʼebé Peter hakerek iha ninia diáriu mak hatoʼo ba ninia biin no alin-mane. Nia dehan:

“Ohin haʼu sente ladún diʼak. Karik tanba agora haʼu katuas ona. Maibé se karik ida-neʼe mak haʼu-nia loron ikus, haʼu hatene katak haʼu sei hasoru fali haʼu-nia belun [Don] iha mundu foun. Se imi lee hela diáriu neʼe, neʼe katak haʼu la iha ona. Maibé bainhira imi tuir haʼu-nia funerál, se imi haree mane ida neʼebé imi la koñese, favór, bá koʼalia ho nia, no haʼu hakarak imi mós lee livru kiʼik kór azúl neʼe. * [Haree nota iha kraik.] Livru neʼe dehan katak haʼu sei hasoru fali ho haʼu-nia belun iha mundu foun. Haʼu fiar ida-neʼe ho haʼu-nia laran tomak. Husi imi-nia maun no alin, Peter.”

Bainhira funerál hotu tiha, Peter nia biin Ummi hatete: “Maizumenus tinan rua liubá, Peter kontaktu haʼu. Kleur ona nia la kontente iha ninia moris maibé iha tempu neʼebá, haʼu haree nia sente kontente fali. Nia mós hamnasa.” Ummi hatete ba Don: “Haʼu sei lee livru neʼe, tanba se livru neʼe bele book haʼu-nia alin atu halo mudansa, neʼe katak livru neʼe espesiál tebes.” Ummi mós simu atu koʼalia hamutuk ho Testemuña ba Jeová kona-ba livru Tuir Loloos, Saida mak Bíblia Hanorin?

Ita mós bele hakaʼas an atu la tesi lia ba ema husi buat neʼebé ita haree husi liʼur, maibé hatudu domin neʼebé loos no pasiénsia ba ema hotu. (1 Timóteo 2:3, 4) Se ita halo hanesan neʼe, karik ita bele ajuda ema hanesan Peter, neʼebé iha liʼur la haree furak, maibé nia iha laran neʼebé diʼak. Ita bele fiar katak Maromak, neʼebé “haree borus ba ema nia laran” sei halo fini lia-loos nian sai buras iha ema laran-loos sira-nia laran.​—1 Samuel 16:7; João 6:44.

^ par. 7 Peter koʼalia kona-ba livru ida husi Testemuña ba Jeová ho títulu, “The Truth That Leads to Eternal Life”, maibé agora la halo ona.