Skip to content

Skip to table of contents

Haburas hahalok laran-sadiʼa ba “ema hotu”

Haburas hahalok laran-sadiʼa ba “ema hotu”

BAINHIRA Jesus hanorin ninia dixípulu sira oinsá atu haklaken, nia fó avizu ba sira katak, laʼós ema hotu sei simu sira-nia mensajen. (Lucas 10:3, 5, 6) Hanesan neʼe mós kona-ba haklaken ohin loron. Ema balu karik hatudu hahalok ladiʼak ba ita no dala ruma siʼak. Hahalok hanesan neʼe bele halo susar ba ita atu hatudu laran-sadiʼa hodi haklaken ba sira.

Ema neʼebé laran-sadiʼa komprende ema seluk nia presiza no problema sira. Nia hanoin sira, no hakarak ajuda sira. Maibé oinsá se ita-nia laran-sadiʼa komesa sai fraku kona-ba ema neʼebé ita hasoru iha serbisu haklaken? Ita sei la badinas tan atu haklaken ba sira hodi ajuda sira. Ita bele kompara ita-nia badinas hanesan ahi. Se ita hakarak ahi atu kontinua lakan, ita presiza aumenta beibeik ai ba ahi. Hanesan neʼe mós, se ita hakarak badinas nafatin, ita presiza haburas laran-sadiʼa.​—1 Tesalónika 5:19.

Oinsá mak ita bele hatudu laran-sadiʼa liután maski la fasil atu halo nuneʼe? Mai ita haree ezemplu balu neʼebé bele ajuda ita: Jeová, Jesus, no apóstolu Paulo.

BANATI-TUIR JEOVÁ NIA LARAN-SADIʼA

Ema koʼalia lia-bosok kona-ba Jeová ba tinan rihun ba rihun ona, maibé Jeová hatudu nafatin “laran-diʼak ba ema neʼebé la fó-agradese no ba ema aat”. (Lucas 6:35) Oinsá? Nia hatudu pasiénsia ba ema hotu. Nia hakarak “ema hotu” atu hetan salvasaun. (1 Timóteo 2:3, 4) Maski Jeová odi hahalok neʼebé aat, maibé ema iha folin-boot nafatin ba nia no nia lakohi ema ida atu mate.​—2 Pedro 3:9.

Jeová hatene katak Satanás matenek tebes lohi ema hodi fiar ba lia-bosok sira. (2 Korinto 4:3, 4) Husi kiʼik kedas ema barak rona lia-bosok sira kona-ba Maromak. Tan neʼe, sira-nia hanoin no sentimentu halo susar ba sira atu simu lia-loos. Maibé Jeová hakarak tebes ajuda sira. Oinsá mak ita hatene?

Mai ita haree ezemplu ida kona-ba Jeová nia sentimentu ba ema Nínive iha tempu antigu. Sira mak ema neʼebé gosta halo violénsia. Sidade neʼe boot ho “ema naʼin–120.000 neʼebé la hatene saida mak loos no saida mak sala”. Jeová hatete ba Jonas: “Haʼu labele hanoin sira ka?” (Jonas [Yunus] 4:11) Jeová hanoin tebes ema sira neʼebé seidauk hatene lia-loos kona-ba nia. Tan neʼe nia haruka Jonas atu fó avizu ba sira.

Ita-nia sentimentu kona-ba ema hanesan ho Jeová. Sira iha folin-boot tebes. Hanesan Jeová, ita mós hakarak tebes atu ajuda sira aprende kona-ba nia maski haree hanesan sira lakohi simu lia-loos.

BANATI-TUIR JESUS NIA LARAN-SADIʼA

Jesus mós hanesan ninia Aman. Nia hanoin tebes ema “tanba nia haree katak ema hanehan no la tau matan ba sira, no sira hanesan bibi neʼebé bibi-atan la iha”. (Mateus 9:36) Jesus komprende kona-ba ema sira-neʼe nia situasaun. Nia hatene katak ulun-naʼin relijiaun sira trata ema sira-neʼe iha dalan neʼebé aat no hanorin lia-bosok oioin ba sira. No maski Jesus hatene katak ema barak neʼebé rona kona-ba ninia hanorin sei la sai ninia dixípulu tanba razaun oioin, Jesus hanorin nafatin buat barak ba sira.​—Marcos 4:1-9.

Keta sai hirus se foufoun ema lakohi rona ba ita

Bainhira situasaun moris troka, karik ema mós sei troka sira-nia sentimentu kona-ba lia-loos

Se ema ruma la simu ita-nia mensajen, koko atu komprende tanbasá mak sira sente hanesan neʼe. Karik sira iha hanoin neʼebé ladiʼak kona-ba Bíblia  ka kona-ba ema kristaun tanba sira haree ema seluk neʼebé bolu sira-nia an ema kristaun maibé halo buat neʼebé aat. Karik ema balu rona lia-bosok kona-ba ita-nia fiar. Ema balu tan karik taʼuk sira-nia família ka ema iha sira-nia komunidade sei goza sira se sira koʼalia ho ita.

Ema balu hasoru situasaun neʼebé ladiʼak iha sira-nia moris no sente trauma nafatin kona-ba situasaun neʼe. Misionária ida naran Kim hatete katak, ema barak iha sira-nia haklaken-fatin, uluk hasoru funu no lakon buat hotu neʼebé sira iha. Sira la iha esperansa kona-ba futuru. Sira sai hirus no la tau fiar tan ba ema seluk. Ema sira husi haklaken-fatin neʼe kontra beibeik Testemuña sira. Loron ida ema ataka Kim bainhira nia haklaken iha fatin neʼebá.

Oinsá mak Kim hatudu nafatin laran-sadiʼa maski ema halo aat ba nia? Nia koko atu hanoin beibeik eskritura iha Provérbios (Amsal) 19:11 neʼebé dehan: “Ema nia matenek sei ajuda duni nia atu la sai hirus lalais.” Hanoin kona-ba buat neʼebé ema hasoru ajuda nia hatudu laran-sadiʼa ba sira. Tuir loloos, iha haklaken-fatin neʼe, laʼós ema hotu hirus ba nia, tanba nia halo vizita fali ba ema balu neʼebé hatudu interese.

Diʼak atu husu ba ita-nia an: ‘Se haʼu seidauk hatene lia-loos, haʼu sei halo saida bainhira Testemuña ba Jeová haklaken ba haʼu?’ Porezemplu, oinsá se ita rona ema koʼalia lia-bosok kona-ba Testemuña sira? Karik ita mós sei la simu sira no ita hakarak sira komprende kona-ba ita. Jesus hatete katak ita tenke haree ema seluk iha dalan neʼebé ita hakarak ema haree ita. Tan neʼe, ita tenke hakaʼas an atu komprende kona-ba ema seluk nia sentimentu no hatudu pasiénsia ba sira maski la fasil atu halo nuneʼe.​—Mateus 7:12.

BANATI-TUIR PAULO NIA LARAN-SADIʼA

Apóstolu Paulo hatudu hahalok laran-sadiʼa nafatin maski ema kontra makaʼas ninia haklaken. Saida mak ajuda nia? Nia hanoin beibeik kona-ba ninia moris antes hetan lia-loos. Nia dehan: “Uluk haʼu koʼalia kontra Maromak no fó-terus no koʼalia aat ninia povu. Maibé nia hatudu laran-sadiʼa ba haʼu, basá uluk haʼu halo buat sira-neʼe tanba la hatene no la iha fiar.” (1 Timóteo 1:13) Paulo hatene katak Jeová no Jesus hatudu ona laran-sadiʼa ba nia. Nia komprende tansá ema hakarak hapara ninia haklaken, tanba uluk nia mós iha sentimentu hanesan sira.

Dala ruma Paulo hasoru ema neʼebé fiar metin ba hanorin falsu sira. Neʼe halo nia sente oinsá? Eskritura iha Apóstolu 17:16 hatete katak, bainhira Paulo iha Atenas, nia “sente la kontente iha laran tanba nia haree katak sidade neʼe nakonu ho estátua  sira”. Maski nuneʼe, Paulo aproveita hodi uza buat neʼebé halo nia hirus atu hanorin fali ema sira-neʼe. (Apóstolu 17:22, 23) Nia halo mudansa ba dalan neʼebé nia haklaken ba ema oioin hodi nia “bele salva sira balu”.​—1 Korinto 9:20-23.

Ita bele banati-tuir Paulo bainhira haklaken ba ema neʼebé simu ita-nia mensajen iha dalan neʼebé ladiʼak ka sira neʼebé fiar ba hanorin falsu. Ita bele aproveita hodi uza buat neʼebé ita hatene kona-ba sira atu ajuda sira aprende “liafuan diʼak kona-ba buat neʼebé diʼak liu”. (Isaías [Yesaya] 52:7) Irmán ida naran Dorothy hatete: “Iha ami-nia haklaken-fatin, ema barak fiar katak Maromak siʼak no sempre buka ema nia sala. Haʼu koʼalia hodi gaba ema sira-neʼe kona-ba sira-nia fiar ba Maromak no tuirmai ajuda sira atu aprende saida mak Bíblia hanorin kona-ba Jeová nia domin no ninia promesa sira ba futuru.”

“KONTINUA MANÁN BUAT AAT HO BUAT NEʼEBÉ DIʼAK”

Mundu aat neʼe nia rohan besik ona, no ema balu nia hahalok mós sei sai “aat ba aat liután”. (2 Timóteo 3:1, 13) Maibé ita la bele husik ita-nia laran-sadiʼa ka ksolok sai fraku maski ema la simu ita iha dalan neʼebé diʼak. Jeová sei fó forsa ba ita atu “kontinua manán buat aat ho buat neʼebé diʼak”. (Roma 12:21) Pioneiru ida naran Jessica hatete katak nia hasoru beibeik ema neʼebé foti-an no sira neʼebé goza Testemuña sira-nia haklaken. Nia hatutan hodi dehan: “Dala ruma neʼe bele halo ita sai hirus. Bainhira atu koʼalia ba ema, haʼu halo orasaun iha laran no husu Jeová ajuda haʼu atu haree ema sira-neʼe iha dalan neʼebé nia haree sira.” Halo nuneʼe ajuda Jessica atu la hanoin demais kona-ba nia rasik nia sentimentu, maibé kona-ba oinsá atu ajuda ema sira-neʼe.

Ita buka nafatin sira neʼebé hakarak hatene lia-loos

Neineik-neineik ema balu sei simu ita-nia ajuda hodi hanorin lia-loos ba sira

Ita mós tenke fó laran-manas ba ita-nia irmaun-irmán bainhira haklaken hamutuk ho sira. Jessica hatete, bainhira nia haklaken hamutuk ho ema seluk no sira hasoru ema neʼebé trata aat sira, nia koko atu la koʼalia kona-ba buat sira-neʼe, maibé koʼalia fali kona-ba buat neʼebé pozitivu, hanesan rezultadu diʼak neʼebé hetan husi haklaken maski ema balu simu iha dalan neʼebé ladiʼak.

Jeová hatene katak, dala ruma la fasil ba ita atu haklaken. Maibé nia kontente tebes hodi haree ita banati-tuir ninia laran-sadiʼa. (Lucas 6:36) Maski nuneʼe, ita hatene katak Jeová nia laran-sadiʼa no pasiénsia ba ema iha limitadu. No ita hatene katak nia marka ona tempu neʼebé loos atu halakon mundu aat neʼe. Maibé antes loron neʼe toʼo mai, ita tenke haklaken ho urjente. (2 Timóteo 4:2) Tan neʼe, mai ita kontinua haklaken ho badinas no hatudu laran-sadiʼa neʼebé kleʼan ba “ema hotu”.