Skip to content

Skip to table of contents

“Tanis ho sira neʼebé tanis”

“Tanis ho sira neʼebé tanis”

“Kontinua fó aten-brani ba malu no hametin malu.”—1 TESALÓNIKA 5:11.

KNANANUK: 53, 28

1, 2. Tanbasá mak importante atu fó kmaan ba ema neʼebé triste hela kona-ba família ka belun ruma nia mate? (Haree foto iha leten.)

SUSI hatete: “Ami sente laran moras tebes kona-ba ami-nia oan-mane nia mate besik ba tinan ida.” Irmaun ida tan neʼebé ninia feen mate derrepente hatete katak nia sente triste tebes toʼo ninia “isin hotu moras”. Triste tebes tanba ema barak esperiénsia ona sentimentu hanesan neʼe. Irmaun-irmán barak ohin loron nunka hanoin katak ema neʼebé sira hadomi sei mate antes Armajedón toʼo mai. Karik Ita mós lakon ona ema neʼebé Ita hadomi iha mate, ka karik Ita koñese ema balu neʼebé triste hela tanba ema ruma mate. Dala ruma Ita bele hanoin, ‘Saida mak bele ajuda ema neʼebé triste hela kona-ba sira-nia família ka belun neʼebé mate?’

2 Ema balu hatete katak, tempu mak bele kura laran-kanek. Maibé realidade hanesan neʼe duni ka lae? Feto-faluk ida dehan, “Haʼu sente katak, tuir loloos dalan neʼebé ema uza didiʼak ninia tempu mak sei halo nia sente diʼak fali.” Kanek iha isin presiza duni tempu no tau matan ho kuidadu mak bele sai diʼak fali. Hanesan neʼe mós ho kanek iha laran, presiza duni tempu no tau matan ho domin mak bele sente diʼak fali. Saida deʼit mak bele ajuda hamenus ema nia sentimentu triste bainhira sira-nia família ka belun mate?

 JEOVÁ MAK “MAROMAK NEʼEBÉ FÓ KMAAN BA EMA IHA SITUASAUN HOTU”

3, 4. Tanbasá mak ita bele fiar katak Jeová komprende kona-ba ita-nia triste bainhira ema ruma mate?

3 Ita bele hetan kmaan husi ita-nia Aman Jeová neʼebé laran-diʼak. (Lee 2 Korinto 1:3, 4.) Nia hatudu ezemplu neʼebé diʼak liu hotu kona-ba hanoin ema, no nia promete ba ninia povu hodi dehan: “Haʼu mak Ida neʼebé fó kmaan ba imi.”—Isaías (Yesaya) 51:12; Salmo (Mazmur) 119:50, 52, 76.

4 Ita-nia Aman laran-diʼak mós lakon ona ema balu neʼebé nia hadomi iha mate, hanesan ninia atan Abraão, Isaac, Jacob, Moisés, no Liurai David. (Números [Bilangan] 12:6-8; Mateus 22:31, 32; Apóstolu 13:22) Bíblia hatete katak Jeová hein namanas atu fó moris-hiʼas fali ba ema laran-metin sira-neʼe. (Jó [Ayub] 14:14, 15) Iha tempu neʼebá, sira sei hetan ksolok neʼebé boot no iha saúde neʼebé perfeitu. Jeová mós lakon ona ninia Oan-Mane iha mate. Bíblia hatete katak Jesus mak ida neʼebé Maromak “gosta tebes husi loron ba loron”. (Provérbios [Amsal] 8:22, 30) Ita la bele komprende kona-ba Jeová nia sentimentu bainhira nia haree ninia Oan-Mane mate iha dalan neʼebé terus tebes.—João 5:20; 10:17.

5, 6. Oinsá mak Jeová fó kmaan ba ita?

5 Ita bele fiar ho laran tomak katak Jeová sei ajuda ita. Tan neʼe mak ita bele halo orasaun ba nia iha tempu naran deʼit atu fó sai ita-nia sentimentu triste kona-ba ema neʼebé ita hadomi mate. Hodi hatene katak Jeová komprende kona-ba ita-nia sentimentu no nia sei fó ajuda ba ita, neʼe fó kmaan tebes ba ita! Maibé oinsá mak nia halo nuneʼe?

6 Dalan ida neʼebé Jeová fó kmaan ba ita mak liuhusi ninia espíritu santu. (Apóstolu 9:31) Jesus promete katak Aman Jeová sei fó ninia espíritu santu neʼebé forsa boot ba ema neʼebé husu. (Lucas 11:13) Susi neʼebé temi iha leten, hatete: “Dala barak ami hakneʼak hodi husu makaʼas ba Jeová atu fó kmaan mai ami. Tempu ida-idak neʼebé ami husu, Maromak nia dame fó duni kmaan ba ami-nia laran no neon.”—Lee Filipe 4:6, 7.

JESUS MÓS KOMPRENDE ITA-NIA SENTIMENTU

7, 8. Tanbasá mak ita bele fiar katak Jesus sei fó kmaan ba ita?

7 Bainhira Jesus iha rai, nia haleno ninia Aman liuhusi ninia liafuan no hahalok. (João 5:19) Jeová haruka Jesus mai rai atu fó kmaan ba “ema neʼebé laran-kanek” ho “ema hotu neʼebé triste”. (Isaías [Yesaya] 61:1, 2; Lucas 4:17-21) Ema hatene duni katak Jesus komprende kona-ba sira-nia terus no nia hakarak tebes atu ajuda sira.—Ebreu 2:17.

8 Iha tempu Jesus sei joven, ita fiar katak nia mós iha belun ka família ruma mate. Porezemplu, ninia aman hakiak José, karik mate ona bainhira Jesus sei joven. * Maski Jesus mak joven neʼebé laran-maus, maibé karik susar tebes ba nia atu tahan ninia triste no mós bainhira haree ninia inan, no alin sira seluk sente triste.

9. Bainhira Lázaro mate, oinsá mak Jesus hatudu katak nia hanoin ema?

9 Durante tempu neʼebé Jesus halaʼo serbisu haklaken, nia hatudu katak nia komprende kona-ba ema nia sentimentu no hanoin ema. Porezemplu, bainhira Jesus nia  belun diʼak Lázaro mate, nia sente triste tebes hodi haree Maria ho Marta nia laran-susar. Nia hanoin tebes sira toʼo nia rasik mós tanis, maski nia hatene katak nia sei halo Lázaro moris fali.—João 11:33-36.

10. Tanbasá mak ita bele fiar katak Jesus komprende kona-ba ita-nia sentimentu ohin loron?

10 Oinsá mak Jesus nia liafuan sira husi tempu uluk bele fó kmaan ba ita ohin loron? Jesus nunka troka, tanba Bíblia hatete: “Jesus Kristu sei hanesan deʼit husi uluk, agora, no ba nafatin.” (Ebreu 13:8) Nia simu naran nuʼudar “Ulun-Naʼin Moris nian” tanba liuhusi nia mak ita bele hetan moris ba nafatin. Jesus rasik mós komprende ema nia triste bainhira ema neʼebé sira hadomi mate no nia “bele sai nuʼudar ajuda-naʼin ba sira neʼebé hetan koko”. (Apóstolu 3:15; Ebreu 2:10, 18) Tan neʼe ita bele fiar katak Jesus sente triste nafatin bainhira haree ema hetan terus. Nia komprende sira-nia laran-susar, no nia bele fó kmaan ba sira “iha tempu neʼebé loos”.—Lee Ebreu 4:15, 16.

ESKRITURA SIRA NEʼEBÉ FÓ KMAAN BA ITA

11. Eskritura saida mak fó kmaan ba Ita rasik?

11 Eskritura neʼebé koʼalia kona-ba Jesus nia sentimentu bainhira Lázaro mate lori kmaan duni ba ita, maibé sei iha eskritura seluk tan neʼebé bele fó kmaan ba ita. Ita la hakfodak bainhira lee eskritura sira-neʼe tanba “buat hotu neʼebé hakerek ona horiuluk kedas, hakerek hodi hanorin ita no fó ita esperansa, basá Eskritura sira-neʼe ajuda ita atu tahan no fó kmaan mai ita”. (Roma 15:4) Se Ita mak triste hela kona-ba ema ruma mate, Ita mós bele hetan kmaan husi eskritura sira tuirmai neʼe:

  • “Jeová besik ba ema sira neʼebé laran-kanek; nia salva sira neʼebé laran-triste.”Salmo (Mazmur) 34:18, 19.

  • “Bainhira neon-susar sai barak iha haʼu-nia laran, Ita [Jeová] fó kmaan ba haʼu no halo haʼu kontente.”Salmo (Mazmur) 94:19.

  • “Ami harohan katak Naʼi Jesus Kristu rasik no mós ita-nia Aman Maromak, neʼebé hadomi ita no fó kmaan ba ita nafatin no fó ita esperansa furak liuhusi laran-diʼak neʼebé boot, sei fó kmaan ba imi-nia laran no hametin imi.”2 Tesalónika 2:16, 17. *

HETAN KMAAN HUSI KONGREGASAUN

12. Oinsá mak ita bele fó kmaan ba ema?

12 Ema neʼebé triste tanba ema neʼebé sira hadomi mate mós bele hetan kmaan husi kongregasaun. (Lee 1 Tesalónika 5:11.) Oinsá mak Ita bele hametin no fó kmaan ba sira neʼebé “laran-triste”? (Provérbios [Amsal] 17:22) Tenke hanoin-hetan katak iha “tempu atu nonook no tempu atu koʼalia”. (Eclesiastes [Pengkhotbah] 3:7) Feto-faluk ida naran Dalene hatete katak sira neʼebé laran-triste hakarak fó sai buat neʼebé iha sira-nia hanoin no sentimentu. Tan neʼe, buat neʼebé importante tebes ba ita atu halo mak rona didiʼak bainhira sira koʼalia. Junia nia maun ida oho an no Junia dehan: “Maski ita la komprende ho loloos sentimentu husi ema neʼebé triste kona-ba ema mate, maibé importante atu hatudu katak ita hakarak atu hatene nia sente oinsá.”

13. Ita presiza hanoin-hetan saida kona-ba ema nia sentimentu?

13 Ita presiza hanoin-hetan katak ema ida-idak nia sentimentu la hanesan no dalan neʼebé ita sente triste kona-ba ema ruma mate mós la hanesan. Dala ruma susar  atu esplika ho loloos ita-nia laran-moras. Maromak nia Liafuan hatete: “Ema hatene ninia triste neʼebé iha nia laran rasik, no ema seluk la bele komprende ksolok neʼebé iha ema ida nia laran.” (Provérbios [Amsal] 14:10) Maski dala ruma ema ida esplika duni ninia sentimentu, maibé sei susar nafatin ba ema seluk atu komprende.

14. Ita bele koʼalia saida atu fó kmaan ba ema neʼebé triste hela?

14 Dala ruma susar mós atu hatene saida mak ita bele koʼalia ba ema neʼebé triste hela bainhira ema ruma mate. Maibé Bíblia hatete katak “ema matenek nia nanál mak bele kura”. (Provérbios [Amsal] 12:18) Ema barak hetan liafuan kmaan husi broxura Kuandu Ema neʼebé Ita Hadomi Mate. * Maibé dala ruma buat neʼebé bele ajuda tebes mak “tanis ho sira neʼebé tanis”. (Roma 12:15) Gaby nia laʼen mate, no nia hatete katak dala ruma tanis mak dalan neʼebé diʼak liu hotu ba nia atu fakar sai ninia triste. Nia dehan tan: “Tan neʼe mak bainhira haʼu-nia belun sira tanis hamutuk ho haʼu, neʼe halo haʼu sente kmaan fali. Iha tempu hanesan neʼe, haʼu la sente mesamesak bainhira haʼu triste.”

15. Se ita sente susar atu koʼalia kedas ba ema, saida mak ita bele halo atu fó kmaan ba nia? (Haree mós kaixa “ Liafuan sira neʼebé fó kmaan no konsola.”)

15 Se Ita sente susar atu koʼalia liafuan balu hodi fó kmaan ba ema ida iha ninia oin, karik diʼak liu se ita haruka e-mail, mensajen, ka karta. Karik Ita bele hakerek eskritura ida neʼebé sei lori kmaan ba ema neʼe, temi hahalok diʼak ida husi ema neʼebé mate, ka fahe memória ksolok ida neʼebé Ita hafolin. Junia dehan: “Simu mensajen  neʼebé fó kmaan ka irmaun-irmán sira konvida haʼu atu halimar hamutuk ajuda tebes haʼu. Sira-nia liafuan hanesan neʼe halo haʼu sente sira-nia domin no katak sira tau matan haʼu.”

16. Dalan diʼak saida tan mak ita bele halo atu fó kmaan ba ema?

16 Ita-nia orasaun mós bele ajuda irmaun-irmán sira neʼebé triste kona-ba ema ruma mate. Ita bele halo orasaun ba sira ka bele mós halo orasaun hamutuk ho sira. Maski karik ita sente susar atu halo nuneʼe tanba ita sente ita sei tanis, maibé orasaun hanesan neʼe iha kbiit boot atu fó konsola ba sira. Dalene dehan: “Dala ruma kuandu irmán sira mai vizita atu konsola haʼu, haʼu husu se sira bele halo orasaun hamutuk ho haʼu. Bainhira sira komesa halo orasaun, foufoun sira sente susar atu koʼalia, maibé dala barak kuandu sira komesa koʼalia ona, sira-nia lian mós komesa sai boot no orasaun neʼebé sira halo kona tebes haʼu-nia laran. Sira-nia fiar neʼebé metin, sira-nia domin, no tanba sira hanoin haʼu, neʼe hametin tebes haʼu-nia fiar.”

FÓ NAFATIN KMAAN BA EMA

17-19. Tanbasá mak ita tenkesér fó beibeik kmaan ba sira neʼebé triste?

17 Tempu ba ema ida-idak neʼebé sente triste bainhira ema ida mate la hanesan. Bainhira ema mate, foufoun belun no família barak mai atu fó konsola. Liutiha tempu balu, ema hotu fila fali ba sira-nia atividade, maibé ema neʼebé kona susar sei presiza nafatin atu hetan kmaan. Tan neʼe ita tenkesér sai prontu atu ajuda nia. Bíblia dehan: “Belun neʼebé loos hatudu domin iha tempu hotu, no nia sai hanesan maun ka alin ida iha tempu susar.” (Provérbios [Amsal] 17:17) Sin, durante tempu neʼebé ema triste hela, ita presiza fó konsola ba sira.—Lee 1 Tesalónika 3:7.

18 Ita presiza hatene katak buat balu bele halo ema derrepente sente triste kona-ba ema neʼebé nia hadomi mate. Porezemplu, karik tanba aniversáriu, múzika, foto, atividade, ka morin ruma, lian, ka klima bele halo nia hanoin fali ema neʼebé mate. No bainhira ema ida nia kaben mate, dala primeiru nia tuir reuniaun boot ka Memoriál mesak, neʼe bele halo nia sente triste tebes. Irmaun ida hatete: “Haʼu hatene katak tinan primeiru sei susar ba haʼu bainhira toʼo ona ami-nia aniversáriu. Maibé irmaun-irmán balu halo festa kiʼik ida hodi bolu belun sira neʼebé besik ho haʼu atu nuneʼe haʼu la sente mesamesak.”

19 Presiza hanoin-hetan katak laʼós iha tempu espesiál deʼit mak atu fó konsola ba sira neʼebé triste hela. Junia dehan: “Baibain, tanba ema seluk hamaluk ita no fó ajuda ita iha tempu naran deʼit mak buat neʼebé importante tebes. Tempu sira hanesan neʼe iha folin-boot no fó duni kmaan ba ita.” Maski ita la bele halakon hotu sira-nia triste ka sentimentu mesamesak, maibé ita bele fó kmaan ba sira liuhusi buat neʼebé ita halo ba sira. (1 João 3:18) Gaby dehan: “Haʼu agradese tebes ba Jeová tanba katuas kongregasaun sira ajuda haʼu iha buat oioin. Sira halo haʼu sente duni Jeová nia domin mak haleʼu haʼu.”

20. Tanbasá mak Jeová nia promesa lori kmaan ba ita?

20 Hodi hatene katak Maromak Jeová sei halakon triste hotu iha tempu nia fó moris-hiʼas ba ema, neʼe halo ita sente kmaan tebes. (João 5:28, 29) Maromak promete katak “nia sei halakon mate ba nafatin, no Jeová, Naʼi Ukun-Naʼin Boot Liu, sei hamaran matan-been husi ema hotu nia oin”. (Isaías [Yesaya] 25:8) Iha tempu neʼebá, ita sei la tanis tan ho sira neʼebé tanis, maibé ema hotu iha mundu neʼe sei “haksolok ho sira neʼebé haksolok”.—Roma 12:15.

^ par. 8 Bíblia hatudu katak bainhira Jesus tinan 12, José sei moris. Maibé iha tempu neʼebé Jesus halo milagre primeiru hodi halo bee nakfila ba tua, ka liutiha tempu neʼe, Bíblia la temi tan kona-ba José. Ida-neʼe hatudu katak, karik José mate tiha ona husi tempu neʼebá. No bainhira Jesus iha ai-riin terus nian, nia husu apóstolu João mak atu tau matan ba ninia inan. Se José mak sei moris karik, Jesus sei la entrega ninia inan ba apóstolu João atu tau matan.—João 19:26, 27.

^ par. 14 Haree mós informasaun ho títulu “Hiburlah Yang Berduka, seperti Yesus” iha Menara Pengawal, 1 Novembru 2010.