Skip to content

Skip to table of contents

Eric no Emy

Sira fó sira-nia an ho hakarak rasik—iha rai-Gana

Sira fó sira-nia an ho hakarak rasik—iha rai-Gana

KARIK ita koñese irmaun ka irmán ida neʼebé muda atu serbí iha rai neʼebé presiza liu haklaken-naʼin sira. Dala ruma ita hanoin ka lae, saida mak book sira atu halo mudansa neʼe? No saida mak sira tenke halo atu prepara an hodi serbí Jeová iha rai seluk? Haree toʼok irmaun-irmán balu nia esperiénsia no husu ita-nia an: “Haʼu mós bele halo hanesan ho sira ka lae?”

SAIDA MAK BOOK SIRA?

Saida mak halo Ita hakarak muda ba rai neʼebé presiza haklaken-naʼin sira? Emy, neʼebé agora maizumenus tinan 35, mai husi Estadus Unidus. Nia hatete: “Ba tinan barak haʼu hanoin atu serbí iha rai seluk, maibé sempre hanoin neʼe mehi deʼit.” Tanbasá mak nia troka ninia hanoin? Nia dehan: “Iha 2004, irmaun-irmán ida neʼebé serbí iha rai-Belize konvida haʼu atu vizita no pioneiru hamutuk ho sira iha neʼebá ba fulan ida. Haʼu gosta tebes, no tinan ida liutiha, haʼu muda ba rai-Gana atu serbí iha neʼebá nuʼudar pioneiru.”

Aaron no Stephanie

Stephanie mós husi Estadus Unidus, no agora nia tinan 25 liu ona. Tinan balu liubá, nia hanoin didiʼak kona-ba ninia situasaun moris nian. Nia hanoin: ‘Haʼu-nia saúde sei diʼak hela no haʼu la iha responsabilidade iha família laran. Tuir loloos haʼu bele halo buat barak liután atu serbí Jeová.’ Hanoin hanesan neʼe book nia atu muda ba Gana. Filip no Aida mak feen-laʼen neʼebé husi rai-Dinamarka, sira maizumenus tinan 60, no kleur ona sira hakarak muda ba fatin neʼebé presiza liu haklaken-naʼin. Filip no Aida buka dalan oioin atu kumpre sira-nia hakarak neʼe. Filip dehan: “Bainhira oportunidade ida loke ba ami, ami sente hanesan Jeová dehan: ‘Muda bá!’” Iha tinan 2008 sira muda ba Gana no serbí iha neʼebá ba tinan tolu liu.

Brook no Hans

Hans no Brook mak feen-laʼen pioneiru maizumenus tinan 30 husi Estadus Unidus. Iha tinan 2005  sira hola parte atu fó ajuda bainhira anin boot ida naran Katrina kona sira-nia rai. Sira mós prenxe formuláriu atu ajuda ho projetu konstrusaun nian iha rai seluk maibé sira la hetan konvite. Iha reuniaun boot loron tolu, sira rona diskursu ida neʼebé dehan katak Liurai David hakarak tebes harii Maromak nia templu, maibé Maromak la husik nia. Maski nuneʼe, nia la triste, nia simu realidade neʼe no troka ninia planu sira. Hans hatete: “Husi neʼe, ami komprende katak la sala atu troka ita-nia planu espirituál nian.” (1 Crônicas [Tawarikh] 17:1-4, 11, 12; 22:5-11) Brook mós hatete: “Jeová hakarak ami atu dere fali odamatan seluk.”

Tanba Hans no Brook rona esperiénsia barak husi sira-nia kolega sira neʼebé serbí iha rai seluk, sira mós hanoin atu koko pioneiru iha rai seluk. Tan neʼe, iha tinan 2012, sira bá Gana no serbí iha kongregasaun tilun-diuk nian ba fulan haat. Ikusmai, sira tenke fila fali ba Estadus Unidus, maibé sira-nia tempu iha rai-Gana hametin sira-nia hakarak atu nafatin tau uluk Maromak iha sira-nia moris. Husi tempu neʼebá, sira ajuda ona hodi harii sukursál iha Mikronézia.

HALO TUIR SIRA-NIA PLANU

Ita halo saida deʼit atu prepara serbí iha fatin neʼebé presiza liu haklaken-naʼin sira? Stephanie hatete: “Haʼu lee informasaun iha Livru Haklaken kona-ba muda bá serbí iha rai seluk. * (Haree nota iha kraik.) Haʼu mós koʼalia ba katuas kongregasaun sira no katuas área nian no ninia feen kona-ba haʼu-nia hakarak atu muda ba rai seluk. No importante liu mak haʼu temi haʼu-nia planu iha haʼu-nia orasaun ba Jeová.” Stephanie mós halo ninia moris simples nafatin, no neʼe ajuda nia atu rai osan neʼebé nia bele uza iha ninia fatin foun.

Hans hatete: “Ami hakarak halo tuir Jeová nia hakarak ba ami, entaun  ami husu ninia matadalan liuhusi orasaun. Ami mós temi data saida mak ami hakarak hahú implementa ami-nia planu sira.” Hans no Brook haruka karta ba sukursál haat no sukursál Gana haruka fali karta ba sira. Tan neʼe sira deside atu vizita Gana ba fulan rua. Hans hatete: “Ami gosta tebes haklaken hamutuk ho kongregasaun entaun ami deside atu hela ba tempu uitoan tan.”

Adria no George

George no Adria mak feen-laʼen ida tinan 35 liu husi rai-Kanadá. Sira fó-hanoin beibeik ba sira-nia an katak Jeová fó bensaun bainhira ema foti desizaun neʼebé diʼak. Tan neʼe, sira komesa halo tuir sira-nia planu no foti desizaun atu kontaktu irmán ida neʼebé serbí iha Gana hodi husu pergunta sira ba nia. Sira mós hakerek ba sukursál iha Kanadá no Gana. Adria hatete: “Ami buka dalan oinsá atu halo simples liután ami-nia moris.” Foti desizaun sira-neʼe ajuda sira atu muda ba Gana iha tinan 2004.

HASORU SUSAR SIRA

Susar saida mak Ita hasoru bainhira toʼo iha rai-Gana, no saida mak ajuda Ita atu tahan? Ba irmán Emy, buat neʼebé susar mak nia hanoin fali ninia rai rasik. Nia hatete: “Buat hotu la hanesan haʼu-nia rai.” Saida mak ajuda nia? Nia hatete: “Bainhira haʼu-nia família telefone haʼu, sira dehan oinsá sira hafolin tebes haʼu-nia serbisu. Neʼe ajuda haʼu atu kontinua serbí iha fatin neʼe. No bainhira ami komesa koʼalia ba malu liuhusi vídeo, haʼu sente sira ladún dook husi haʼu, tanba haʼu bele haree sira-nia oin.” Emy mós sai belun diʼak ho irmán ida iha ninia kongregasaun neʼebé ajuda nia komprende  ema nia toman sira iha neʼebá. Emy dehan: “Se haʼu la komprende tanbasá ema halo buat ruma, haʼu sempre husu ba haʼu-nia belun neʼe. Haʼu aprende saida mak haʼu bele no la bele halo, no neʼe ajuda haʼu atu halaʼo haʼu-nia haklaken ho haksolok.”

George no Adria hatete katak foufoun bainhira sira muda ba Gana, sira sente sira moris iha tempu antigu. Adria hatete: “Atu fase roupa ami uza deʼit balde duké mákina. No presiza tempu kleur tebes atu teʼin, la hanesan iha ami-nia rai. Maibé ikusmai ami haree susar sira-neʼe hanesan esperiénsia foun deʼit ba ami.” Brook hatete: “Maski ami pioneiru sira hasoru problema balu, maibé ami-nia moris kontente. Se ami halibur hamutuk esperiénsia kapás sira husi ami-nia moris iha fatin neʼe, neʼe sai hanesan memória furak ida neʼebé ami nunka haluha.”

BENSAUN SIRA HUSI HAKLAKEN

Tanbasá mak Ita hakarak ema seluk atu koko serbí iha rai seluk? Stephanie hatete: “Haʼu sente kontente tanba loroloron bele hasoru ho ema neʼebé hakarak tebes aprende lia-loos no estuda Bíblia ho ita. Atu bá serbí iha rai neʼebé presiza haklaken-naʼin sira mak desizaun diʼak tebes neʼebé haʼu halo iha haʼu-nia moris.” Iha tinan 2014, Stephanie kaben ho Aaron, no agora sira serbí iha sukursál iha Gana.

Christine mak pioneiru ida husi rai-Alemaña, no agora nia tinan 30 liu. Antes nia muda ba Gana, nia serbí iha rai-Bolívia. Nia hatete: “Neʼe mak esperiénsia neʼebé kapás tebes.” Nia hatutan tan: “Tanba haʼu dook husi família, haʼu sempre sadere ba Jeová atu ajuda haʼu. Haʼu-nia relasaun ho nia sai besik liu. Iha fatin neʼe, haʼu mós bele haree rasik oinsá Jeová nia povu iha unidade. Hodi serbí iha rai seluk, neʼe halo haʼu-nia moris iha folin-boot liután.” Ikusmai, Christine kaben ho Gideon, no agora sira rua kontinua serbí iha rai-Gana.

Christine no Gideon

Filip no Aida konta kona-ba saida mak sira halo atu sira-nia estudante sira bele laʼo ba oin. Filip hatete: “Uluk ami-nia estudante sira toʼo 15, maibé ami koko atu estuda ho ema naʼin-10 deʼit hodi ami bele uza tempu atu hanorin sira ho loloos.” Sira-nia dalan neʼe ajuda estudante sira ka lae? Filip hatete: “Haʼu estuda ho mane joven ida naran Michael. Nia hakarak estuda loroloron no nia prepara didiʼak ba lisaun ida-idak. Iha fulan ida deʼit nia laran, ami estuda hotu livru Bíblia Hanorin. Depois neʼe, Michael sai haklaken-naʼin ona. Iha ninia loron primeiru haklaken, nia husu ba haʼu: ‘Ita bele ajuda haʼu ho haʼu-nia estudante sira ka?’ Haʼu hakfodak loos, no Michael esplika katak nia komesa ona estuda ho ema naʼin-tolu, no presiza haʼu-nia ajuda atu halaʼo estudu ho sira.” Hanoin toʼok, iha rai-Gana, ema barak tebes interese ba Bíblia toʼo estudante sira mós sai nuʼudar mestre!

Aida no Filip

Emy hatete: “Lakleur depois ami toʼo iha Gana, ami bá haklaken iha suku kiʼik ida atu buka ema neʼebé tilun-diuk. Ami hetan, laʼós ema ida deʼit, maibé naʼin-ualu iha suku neʼe!” Ikusmai, Emy kaben ho Eric, no hamutuk sira serbí nuʼudar pioneiru tempu-tomak. Sira tuir kongregasaun tilun-diuk nian. Iha rai-Gana, iha haklaken-naʼin 300 liu ho mós ema neʼebé iha interese ba Bíblia neʼebé mak tilun-diuk. Ba George no Adria, hodi serbí iha rai-Gana sira bele sente misionáriu nia moris mak hanesan saida. Sira kontente tebes bainhira sira simu konvite atu tuir Eskola Gilead klase 126. Agora, sira serbí nuʼudar misionáriu iha rai-Mosambike.

DOMIN MAK BOOK SIRA

Bainhira ita haree irmaun-irmán barak husi rai seluk hakaʼas an bá ajuda fali irmaun-irmán sira iha sira-nia rai iha serbisu koʼa nian, neʼe book tebes ita-nia laran, loos ka lae? (João 4:35) Semana-semana, maizumenus ema naʼin-120 hetan batizmu iha Gana. No hanesan irmaun-irmán naʼin-17 neʼebé muda ba rai neʼe atu haklaken, ema rihun ba rihun iha mundu tomak mós fó sira-nia an “ho hakarak rasik” tanba domin ba Jeová book sira. No sira muda ba serbí iha fatin neʼebé presiza liu ema atu haklaken kona-ba Maromak nia Ukun. Ita bele fiar katak ema neʼebé fó sira-nia an hanesan neʼe halo Jeová nia laran kontente duni!—Salmo (Mazmur) 110:3; Provérbios (Amsal) 27:11.

^ par. 9 Porezemplu, haree informasaun ho títulu “Dapatkah Saudara Melayani di Tempat yang Lebih Membutuhkan Penyiar Kerajaan?” husi Menara Pengawal, 15 Abríl 2009 no “Ita bele mai toʼo Masedónia ka lae?” husi Livru Haklaken, 15 Dezembru 2009.