Skip to content

Skip to table of contents

Kontente​​—Hahalok ida husi Maromak

Kontente​​—Hahalok ida husi Maromak

EMA hotu hakarak sai kontente. Maibé moris iha loron ikus sira-neʼe, ema hotu hasoru daudaun problema oioin neʼebé “susar atu tahan”. (2 Timóteo 3:1) Ema balu lakon sira-nia ksolok tanba ema hatudu hahalok la justisa ba sira, moras, lakon serbisu, ka ema ruma mate. Ema seluk tan lakon ksolok tanba buat ruma akontese neʼebé halo sira hanoin barak ka sente triste. Jeová nia atan mós bele sai laran-triste no neineik-neineik lakon sira-nia ksolok. Se buat hanesan neʼe mak kona Ita, oinsá mak Ita bele hetan fali ksolok?

Antes hatán ba pergunta neʼe, mai ita buka-hatene uluk saida mak kontente neʼebé loos no oinsá mak ema seluk bele kontente nafatin maski hasoru susar ruma. Depois, ita sei haree oinsá mak ita rasik bele mantein no haburas liután ita-nia ksolok.

SAIDA MAK KONTENTE?

Kontente neʼebé loos laʼós temporáriu deʼit. Porezemplu, karik ema neʼebé lanu hamnasa hela deʼit. Maibé bainhira nia oin moos fali, nia la hamnasa ona no karik ninia problema sira sei iha nafatin. Nia kontente ba tempu uitoan deʼit no neʼe laʼós kontente neʼebé loos.​—Provérbios (Amsal) 14:13.

Maibé kontente neʼebé loos mak sentimentu ida husi ita-nia laran iha tempu neʼebé ita hetan ka hein daudaun ba buat diʼak ruma. Ita kontente iha tempu hotu, susar ka diʼak. (1 Tesalónika 1:6) Maski ita bele hirus kona-ba buat ruma maibé ita kontente nafatin. Porezemplu, ema baku apóstolu sira tanba sira haklaken kona-ba Jesus. Maibé sira “sai husi Sinédriu nia oin no sira haksolok, basá Maromak husik ema atu hamoe sira tanba Jesus nia naran”. (Apóstolu 5:41) Sira haksolok laʼós tanba hetan baku maibé tanba sira laran-metin ba Maromak.

Kontente laʼós hahalok neʼebé mosu derrepente deʼit. Tanbasá? Tanba kontente neʼebé loos mak hahalok ida husi Maromak nia espíritu santu. Espíritu santu mak ajuda ita hodi haburas “hahalok foun”, inklui mós kontente. (Éfeso 4:24; Galásia 5:22) Se ita iha kontente, neʼe sei halo fasil ba ita atu tahan hasoru problema sira.

EZEMPLU SIRA NEʼEBÉ DIʼAK ATU BANATI-TUIR

Jeová nia hakarak mak atu haree mundu tomak nakonu ho buat neʼebé diʼak, laʼós buat aat oioin neʼebé ita haree ohin loron. Maibé maski ema halo buat neʼebé aat, Jeová nunka lakon ninia ksolok. Bíblia dehan: “Kbiit no ksolok mak iha ninia hela-fatin.” (1 Crônicas [Tawarikh] 16:27) No mós, bainhira ninia atan halo buat neʼebé diʼak, nia sente kontente.​—Provérbios (Amsal) 27:11.

Ita hakarak banati-tuir Jeová hodi la lakon ita-nia ksolok maski buat hotu la sai loos tuir ita-nia hakarak. Duké hanoin resin, diʼak atu  fokus ba buat neʼebé ita iha daudaun no hein ho pasiénsia ba buat neʼebé diʼak iha futuru. *

Iha ezemplu barak husi Bíblia neʼebé hatudu katak, maski ema balu hasoru daudaun problema, sira kontente nafatin. Porezemplu, Abraão kontente nafatin iha tempu neʼebé ninia moris hetan perigu no bainhira ema seluk hamosu problema ba nia. (Gênesis [Kejadian] 12:10-20; 14:8-16; 16:4, 5; 20:1-18; 21:8, 9) Oinsá mak nia bele halo nuneʼe? Nia hanoin kona-ba ninia esperansa atu moris iha mundu foun bainhira Mesias ukun. (Gênesis [Kejadian] 22:15-18; Ebreu 11:10) Jesus dehan: “Imi-nia aman Abraão haksolok tebes ho esperansa atu haree haʼu-nia loron.” (João 8:56) Ita bele banati-tuir Abraão hodi hanoin beibeik kona-ba ksolok neʼebé ita sei hetan iha futuru.​—Roma 8:21.

Paulo no Silas mós iha fiar neʼebé metin no kontente nafatin maski hasoru problema barak. Porezemplu, bainhira ema baku tiha sira no hatama ba komarka, sira “halo orasaun no hahiʼi Maromak ho knananuk”. (Apóstolu 16:23-25) Sira tahan hasoru problema hotu tanba sira hanoin beibeik kona-ba Maromak nia promesa sira ba futuru. Sira sente haksolok hodi hatene katak sira hetan terus tanba sira laʼo tuir Kristu. Ita bele banati-tuir Paulo no Silas hodi hanoin beibeik kona-ba rezultadu furak sira neʼebé mai husi serbí Maromak ho laran-metin.​—Filipe 1:12-14.

Ohin loron mós hanesan. Iha irmaun-irmán barak neʼebé kontente nafatin maski hasoru daudaun problema oioin. Porezemplu, iha Novembru 2013, anin-fuik Haiyan estraga Testemuña nia uma 1.000 liu iha rai-Filipinas. George hela iha sidade Tacloban no ninia uma anin estraga toʼo la aproveita tan, nia dehan: “Maski buat hanesan neʼe akontese, irmaun sira kontente nafatin. Susar atu esplika kona-ba ksolok neʼebé haʼu sente iha laran.” Se ita mak hanoin kona-ba buat hotu neʼebé Jeová halo ona ba ita no fó agradese beibeik ba nia, neʼe sei ajuda ita mantein ita-nia ksolok maski ita hasoru problema neʼebé boot. Buat saida tan mak Jeová fó ba ita hodi ita iha razaun atu kontente nafatin?

ITA-NIA RAZAUN ATU KONTENTE

Razaun importante liu hotu atu kontente mak tanba ita iha relasaun neʼebé diʼak ho Jeová. Hanoin toʼok bá, Ita koñese Liurai neʼebé Boot Liu Hotu iha lalehan no rai. Nia mak ita-nia Aman, Maromak, no Belun!​—Salmo (Mazmur) 71:17, 18.

Ita mós agradese tanba Jeová fó ita moris no abilidade atu goza moris. (Eclesiastes [Pengkhotbah] 3:12, 13) Jeová dada ona ita ba nia, tan neʼe ita bele komprende kona-ba ninia hakarak ba ita no oinsá atu moris ho loloos. (Koloso 1:9, 10) Maibé ema barak la hatene kona-ba Jeová nia planu ba moris. Tan neʼe mak Paulo halo komparasaun hodi dehan: “‘Matan seidauk haree no tilun seidauk rona, no nunka mosu iha ema ida nia hanoin kona-ba buat neʼebé Maromak prepara ona ba sira neʼebé hadomi nia.’ Tanba Maromak hatudu sai ona neʼe ba ita liuhusi ninia espíritu.” (1 Korinto 2:9, 10) Hatene kona-ba Jeová nia hakarak no planu halo ita kontente.

Saida tan mak Jeová halo ona ba ninia povu? Nia loke dalan ba ita atu hetan perdua ba ita-nia sala sira. (1 João 2:12) Nia fó esperansa ba ita atu moris iha mundu foun neʼebé lakleur tan atu sai ona realidade. (Roma 12:12) Maski agora daudaun Jeová mós fó ba ita belun barak hodi ita bele adora nia hamutuk. (Salmo [Mazmur] 133:1) Nia mós proteje ita husi Satanás no anju aat sira. (Salmo [Mazmur] 91:11) Se ita mak hanoin beibeik kona-ba buat furak sira neʼebé Jeová fó ona ba ita, ita sei haksolok liután.​—Filipe 4:4.

 OINSÁ ATU SAI KONTENTE LIUTÁN?

Ema kristaun neʼebé kontente ona bele sente kontente liután ka lae? Jesus dehan: “Haʼu koʼalia buat sira-neʼe ba imi, atu haʼu-nia ksolok bele hela ho imi no imi-nia ksolok bele sai nakonu.” (João 15:11) Jesus nia liafuan hatudu katak ita bele iha kontente neʼebé boot liután. Ita bele kompara kontente hanesan ahi. Se ita hakarak ahi sai boot liután, ita tenke aumenta ai. Hanesan neʼe mós, se ita hakarak iha kontente neʼebé boot liután, ita tenke husu beibeik Maromak nia espíritu santu liuhusi orasaun. Tanba espíritu santu bele ajuda ita atu sai kontente iha laran. Ita mós presiza medita beibeik kona-ba Bíblia, tanba espíritu santu mak leno ema hodi hakerek Bíblia.​—Salmo (Mazmur) 1:1, 2; Lucas 11:13.

Buat seluk tan neʼebé lori kontente mak halo serbisu neʼebé Jeová gosta ho badinas. (Salmo [Mazmur] 35:27; 112:1) Tanbasá? Bíblia dehan: “Hamtaʼuk Maromak loos no halo tuir ninia mandamentu sira, tanba neʼe mak ema nia obrigasaun.” (Eclesiastes [Pengkhotbah] 12:13) Maromak kria ita atu halo ninia hakarak. Tan neʼe mak bainhira ita serbí Jeová, ita sei hetan ksolok neʼebé boot liu hotu iha ita-nia moris. *

KONTENTE LORI BENEFÍSIU OIOIN

Se ita-nia kontente mak aumenta boot liután, neʼe sei lori benefísiu oioin ba ita. Porezemplu, Jeová sei sente kontente tebes ho ita se ita serbí nafatin nia ho ksolok maski hasoru problema ruma. (Deuteronômio [Ulangan] 16:15; 1 Tesalónika 5:16-18) No mós tanba ita iha kontente neʼebé loos, ita sei la husik rikusoin atu hanetik ita atu tau uluk Jeová iha ita-nia moris. Ita sei hakaʼas an liután atu halo sakrifísiu ruma ba Maromak nia Ukun. (Mateus 13:44) Se ita haree rezultadu diʼak husi ita-nia sakrifísiu sira neʼebé ita halo, neʼe sei lori ksolok liután, ita sei sente iha folin, no ema seluk mós sei sente kontente liután.​—Apóstolu 20:35; Filipe 1:3-5.

Se ita-nia ksolok mak aumenta, ita-nia saúde mós bele sai diʼak liután. Bíblia dehan: “Laran neʼebé kontente mak ai-moruk neʼebé diʼak.” (Provérbios [Amsal] 17:22) Peskizadór ida neʼebé estuda kona-ba saúde iha universidade Nebraska, rai-Estadus Unidus, ninia liafuan mós konkorda ho eskritura neʼe, nia dehan: “Se Ita mak kontente iha Ita-nia moris agora, karik Ita-nia saúde sei sai diʼak liután iha futuru.”

Tan neʼe mak, maski ita moris daudaun iha tempu susar sira-neʼe, ita bele haburas kontente neʼebé loos liuhusi halo orasaun atu husu espíritu santu, estuda, no medita kona-ba Maromak nia Liafuan. Ita mós bele sai haksolok liután se ita hanoin kona-ba buat diʼak oioin neʼebé Jeová fó ba ita ohin loron, banati-tuir ema seluk nia fiar, no koko atu halo Maromak nia hakarak. Halo buat sira-neʼe sei ajuda ita atu esperiénsia rasik Salmo (Mazmur) 64:10 nia liafuan neʼebé hatete: “Ema neʼebé iha hahalok loos sei haksolok tanba Jeová no buka protesaun husi nia.”

^ par. 10 Ita sei koʼalia kona-ba hahalok pasiénsia iha série neʼebé hanesan kona-ba “hahalok sira neʼebé mai husi espíritu santu”.

^ par. 20 Atu hatene dalan seluk hodi hetan kontente neʼebé boot liután, haree kaixa “ Dalan seluk atu aumenta kontente.”