Skip to content

Skip to table of contents

Ema neʼebé espirituál katak sá?

Ema neʼebé espirituál katak sá?

“Haʼu harohan katak [Maromak] sei ajuda imi hotu atu iha hanoin hanesan Kristu Jesus nian.”​—ROMA 15:5.

KNANANUK: 25, 5

1, 2. (a) Irmaun-irmán barak sente oinsá kona-ba sai ema espirituál? (b) Ita sei koʼalia kona-ba pergunta importante saida deʼit iha lisaun neʼe?

IRMÁN ida husi rai-Kanadá hatete katak, sai ema neʼebé espirituál lori ksolok liután ba nia no ajuda nia tahan hasoru problema loroloron nian. Irmaun ida seluk husi rai-Brazíl neʼebé kaben ona ba tinan 23 dehan katak, buat neʼebé ajuda nia ho ninia feen halaʼo moris kaben neʼebé kontente mak hodi sai ema neʼebé espirituál. Irmaun ida tan husi rai-Filipinas hatete katak, sai ema neʼebé espirituál ajuda duni nia hodi moris hakmatek no iha relasaun diʼak ho irmaun-irmán sira neʼebé mai husi situasaun moris nian la hanesan.

2 Husi komentáriu sira-neʼe ita bele haree ho klaru katak, sai ema espirituál lori duni benefísiu oioin ba ita-nia moris. Maibé saida mak ita bele halo atu sai ema neʼebé espirituál hodi hetan benefísiu sira-neʼe? Ulukliu, ita presiza hatene Bíblia esplika saida kona-ba ema neʼebé espirituál. Iha lisaun neʼe ita sei koʼalia kona-ba pergunta importante tolu: (1) Ema neʼebé espirituál katak sá? (2) Ezemplu saida deʼit mak bele ajuda ita atu sai ema espirituál? (3) Oinsá mak ita-nia hakaʼas an hodi iha “Kristu nia hanoin” bele ajuda ita atu sai ema espirituál?

 EMA NEʼEBÉ ESPIRITUÁL KATAK SÁ?

3. Bíblia esplika saida kona-ba ema neʼebé moris tuir espíritu santu no ema neʼebé moris tuir hakarak isin nian?

3 Husi apóstolu Paulo nia liafuan ita bele haree katak ema espirituál, ka “ema neʼebé moris tuir espíritu santu” la hanesan ho “ema neʼebé moris tuir deʼit hakarak isin nian”. (Lee 1 Korinto 2:14-16.) Ema neʼebé moris tuir hakarak isin nian “la simu buat neʼebé mai husi Maromak nia espíritu, tanba nia haree buat sira-neʼe hanesan buat neʼebé beik; no nia la hatene buat neʼebé Maromak nian”. Maibé ema neʼebé moris tuir espíritu santu “buka-hatene didiʼak buat hotu” no “iha Kristu nia hanoin”. Paulo hakarak tebes ita atu sai ema espirituál. Iha dalan saida tan mak ema neʼebé moris tuir espíritu santu la hanesan ho ema neʼebé moris tuir hakarak isin nian?

4, 5. Ema neʼebé moris tuir hakarak isin nian iha hahalok saida deʼit?

4 Ema neʼebé moris tuir hakarak isin nian iha hanoin oinsá? Mundu nia hahalok mak sempre hanoin an deʼit. Paulo hatete katak neʼe mak “hahalok no hanoin sira neʼebé agora book an iha ema kontradór sira-nia laran”. (Éfeso 2:2) Hahalok sira-neʼe book ona ema barak hodi halo tuir deʼit ema. Sira halo deʼit buat neʼebé sira hanoin mak loos no la hafolin Maromak nia morál. Baibain ema neʼebé moris tuir hakarak isin nian hanoin deʼit kona-ba rikusoin, no sira hanoin katak, pozisaun, osan, ka sira-nia direitu importante liu buat hotu.

5 Ema neʼebé moris tuir hakarak isin nian iha toman atu halo buat neʼebé Bíblia bolu “isin nia hahalok sira”. (Galásia 5:19-21) Iha Paulo nia karta primeiru neʼebé nia hakerek ba ema kristaun iha Korinto, nia temi hahalok seluk tan husi ema neʼebé moris tuir hakarak isin nian. Nia dehan sira sobu unidade, soran ema atu kontra malu, todan ba sorin, lori malu ba tribunál, la hatudu respeitu ba arranju ulun nian, no buka han no hemu deʼit. Bainhira hasoru tentasaun ruma, sira monu lalais deʼit ba sala. (Provérbios [Amsal] 7:21, 22) Dixípulu Judas hatete katak, ema sira-neʼe moris deʼit tuir isin nia hakarak toʼo la iha tan Maromak nia espíritu.​—Judas 18, 19.

6. Saida mak hatudu katak ema ida moris tuir espíritu santu?

6 Maibé ema neʼebé espirituál hafolin ninia relasaun diʼak ho Maromak. Nia “banati-tuir Maromak” no hakaʼas an atu husik espíritu santu dirije nia. (Éfeso 5:1) Nia koko atu komprende Jeová nia hanoin no haleno Jeová nia hanoin iha moris loron-loron nian. Ba nia, Maromak iha duni. Nia la hanesan ho ema neʼebé moris tuir hakarak isin nian, ema espirituál sempre hakaʼas an atu halo tuir Jeová nia morál sira. (Salmo [Mazmur] 119:33; 143:10) Nia la halo buat neʼebé tuir “isin nia hakarak” maibé hakaʼas an atu hatudu “hahalok sira neʼebé mai husi espíritu santu”.​—Galásia 5:22, 23.

7. Bíblia hatete saida kona-ba ema neʼebé moris tuir espíritu santu?

7 Jesus hatete katak ema neʼebé moris tuir espíritu santu sei iha moris neʼebé kontente. Eskritura iha Mateus 5:3 dehan: “Kontente ba sira neʼebé hatene katak sira presiza Maromak nia matadalan, tanba Ukun lalehan nian mak sira-nian.” No eskritura iha Roma 8:6 esplika katak ema neʼebé moris tuir espíritu santu sei hetan benefísiu ba ninia moris. Eskritura neʼe dehan: “Hodi hanoin buat isin nian lori ba mate, maibé hodi hanoin buat espíritu nian lori ba moris no dame.” Neʼe duni, se ita moris tuir espíritu santu, ita  sei iha dame ho Maromak, moris hakmatek, no iha esperansa atu moris ba nafatin iha futuru.

8. Tanbasá mak la fasil atu moris tuir espíritu santu?

8 Maibé, ita moris daudaun iha mundu neʼebé perigu. Ema barak moris tuir hakarak isin nian. Tan neʼe, ita presiza hakaʼas an atu moris tuir espíritu santu no proteje ita-nia hanoin. Se ita mak la kaer metin ba Jeová nia hanoin, mundu neʼe sei dada ita atu tuir mundu nia hanoin no hahalok sira. Saida mak bele ajuda ita atu hasees an husi mundu nia hanoin no hahalok sira? Oinsá mak ita bele hametin liután ita-nia relasaun diʼak ho Maromak?

APRENDE HUSI EZEMPLU DIʼAK SIRA

9. (a) Saida mak bele ajuda ita atu sai ema neʼebé espirituál? (b) Ita sei koʼalia kona-ba sesé nia ezemplu diʼak?

9 Atu oan ida iha hahalok neʼebé diʼak, nia presiza aprende husi inan-aman no halo tuir sira-nia ezemplu diʼak. Hanesan neʼe mós se ita aprende no banati-tuir ezemplu diʼak husi ema neʼebé iha relasaun metin ho Jeová, neʼe bele ajuda ita atu sai ema neʼebé espirituál. No hodi haree rezultadu aat husi ema neʼebé moris tuir hakarak isin nian book ita atu hasees an husi sira-nia hahalok. (1 Korinto 3:1-4) Ita bele hetan ezemplu diʼak no ladiʼak husi Bíblia. Mai ita haree toʼok ezemplu diʼak balu neʼebé ita bele aprende husi Jacob, Maria, no Jesus.

Ita bele aprende saida husi Jacob nia ezemplu? (Haree parágrafu 10)

10. Oinsá mak Jacob hatudu katak nia moris tuir espíritu santu?

10 Jacob nia moris hanesan ema barak nia moris ohin loron. Nia hasoru susar barak. Porezemplu, ninia maun rasik Esaú hakarak oho nia. Ninia banin-mane lohi beibeik nia. Maski nuneʼe, Jacob fiar metin nafatin kona-ba promesa neʼebé Jeová halo ba Abraão. Jacob hatene katak Jeová sei uza ninia família atu kumpre Jeová nia planu furak sira, tan neʼe Jacob tau matan didiʼak ba ninia família. (Gênesis [Kejadian] 28:10-15) Jacob nunka husik ema seluk nia hanoin no hahalok tuir isin nian hodi halo nia haluha kona-ba Jeová nia promesa sira. Porezemplu, bainhira Jacob sente perigu  husi Esaú nia ameasa, nia husu makaʼas ba Jeová atu salva nia no nia halo orasaun hodi dehan: “Ita rasik dehan: ‘Haʼu sei haraik duni buat diʼak ba ó, no haʼu sei halo ó-nia bei-oan sai barak hanesan rai-henek iha tasi.’” (Gênesis [Kejadian] 32:6-12) Jacob iha fiar neʼebé metin ba Jeová nia promesa sira no nia hatudu fiar neʼe liuhusi dalan neʼebé nia halaʼo ninia moris.

Ita bele aprende saida husi Maria nia ezemplu? (Haree parágrafu 11)

11. Oinsá mak ita hatene katak Maria mak ema neʼebé espirituál?

11 Agora mai ita koʼalia kona-ba Maria. Jeová hili nia hodi sai Jesus nia inan tanba nia mak ema neʼebé espirituál tebes. Oinsá mak ita hatene? Ita bele haree husi liafuan sira neʼebé nia koʼalia sai ba Zacarias no Isabel bainhira nia bá vizita sira. (Lee Lucas 1:46-55.) Maria nia liafuan sira hatudu katak nia gosta tebes Maromak nia Liafuan no nia hatene didiʼak kona-ba Eskritura Lia-Ebraiku. (Gênesis [Kejadian] 30:13; 1 Samuel 2:1-10; Malaquias [Maleakhi] 3:12) No maski nia kaben ona ho José, sira hein toʼo Jesus moris tiha mak foin halaʼo relasaun seksuál nian. Sira haree knaar neʼebé sira simu husi Maromak importante liu fali sira-nia hakarak rasik. (Mateus 1:25) Maria mós fó atensaun didiʼak kona-ba buat hotu neʼebé akontese iha Jesus nia moris no nia rai iha ninia laran liafuan hotu neʼebé Jesus hanorin. (Lucas 2:51) Nia hakarak tebes atu hatene Maromak nia promesa sira kona-ba Mesias. Maria nia ezemplu ajuda duni ita atu tau uluk Maromak nia hakarak iha ita-nia moris, loos ka lae?

12. (a) Iha dalan saida mak Jesus haleno ninia Aman Jeová? (b) Oinsá mak ita bele banati-tuir Jesus? (Haree dezeñu iha pájina 18.)

12 Husi ema hotu neʼebé moris iha mundu neʼe, Jesus mak ezemplu neʼebé diʼak liu hotu kona-ba moris tuir espíritu santu. Durante nia halaʼo serbisu haklaken no moris iha rai, nia hakarak banati-tuir deʼit ninia Aman Jeová. Ninia hanoin, sentimentu, no hahalok hotu halo tuir deʼit Maromak nia hakarak no morál sira. (João 8:29; 14:9; 15:10) Porezemplu, kompara toʼok profeta Isaías hatete saida kona-ba Jeová nia sentimentu laran-sadiʼa ho Jesus nia sentimentu neʼebé hakerek iha Evanjellu Marcos. (Lee Isaías [Yesaya] 63:9; * Marcos 6:34.) Ita mós banati-tuir Jesus hodi sempre prontu atu hatudu hahalok hanoin ema no fó ajuda ba ema seluk ka lae? Ita mós halo tuir Jesus hodi tau fokus ba haklaken no hanorin lia-loos ba ema ka lae? (Lucas 4:43) Ema neʼebé moris tuir espíritu santu hanoin ema seluk no koko atu ajuda sira.

13, 14. (a) Saida mak ita bele aprende husi irmaun-irmán barak ohin loron neʼebé moris tuir espíritu santu? (b) Fó toʼok ezemplu ida.

13 Ohin loron, iha irmaun-irmán barak neʼebé hakaʼas an hodi banati-tuir Kristu. Karik Ita bele haree katak irmaun-irmán sira-neʼe badinas atu haklaken, gosta simu ema, no hanoin tebes ema seluk. Maski sira la perfeitu, sira hakaʼas an nafatin atu haburas hahalok furak oioin no halo buat neʼebé Jeová hakarak sira atu halo. Irmán Rachel husi rai-Brazíl hatete: “Haʼu gosta tebes hatais roupa tuir modelu mundu nian. Tan neʼe, dalan neʼebé haʼu hatais la hatudu respeitu. Maibé aprende kona-ba lia-loos book haʼu atu halo mudansa hodi sai ema neʼebé espirituál. La fasil atu halo mudansa sira-neʼe, maibé haʼu sai kontente liu no haʼu sente haʼu-nia moris iha folin.”

 14 Irmán Reylene husi rai-Filipinas hasoru problema seluk. Maski nia iha lia-loos, maibé nia tau fokus liu atu hetan edukasaun boot no serbisu neʼebé diʼak. Neineik-neineik planu espirituál la importante ona ba nia. Nia dehan: “Haʼu komesa sente iha buat ida falta iha haʼu-nia moris, no buat neʼe importante liu fali haʼu-nia serbisu.” Reylene halo mudansa ba ninia moris no tau fiar ba Jeová nia promesa neʼebé hakerek iha Mateus 6:33, 34. Nia dehan: “Haʼu hatene katak Jeová sei tau matan ba haʼu!” Karik Ita mós hatene irmaun-irmán sira hanesan neʼe iha Ita-nia kongregasaun neʼebé halo buat neʼebé hanesan. Bainhira ita haree sira banati-tuir Kristu, ita mós hakarak halo tuir sira-nia ezemplu.​—1 Korinto 11:1; 2 Tesalónika 3:7.

IHA “KRISTU NIA HANOIN”

15, 16. (a) Saida mak ita presiza halo atu bele sai hanesan Kristu? (b) Oinsá mak ita bele iha “Kristu nia hanoin”?

15 Oinsá mak ita bele banati-tuir Kristu? Eskritura iha 1 Korinto 2:16 hatete katak ita presiza iha “Kristu nia hanoin”. No Roma 15:5 fó-hanoin ita katak ita tenke haburas “hanoin hanesan Kristu Jesus nian”. Se ita hakarak sai hanesan Kristu, ita presiza aprende dalan neʼebé nia hanoin no ninia hahalok sira. Jesus tau fokus ba ninia relasaun diʼak ho Jeová liu fali buat hotu. Se ita mak hanesan Jesus, ita mós sei haleno Jeová nia hahalok sira. Tan neʼe mak importante tebes atu hanoin tuir Jesus.

16 Oinsá mak ita bele hanoin tuir Jesus? Ninia dixípulu sira haree nia halo milagre, rona nia hanorin ema-lubun, haree oinsá nia trata ema oioin ho diʼak, no oinsá nia sempre halo buat neʼebé tuir Jeová nia hanoin. Sira dehan: “Ami mak sasin ba buat hotu neʼebé nia halo.” (Apóstolu 10:39) Ohin loron, maski ita la bele haree Jesus, maibé ita bele lee kona-ba Jesus nia hahalok oioin husi Evanjellu sira hodi aprende didiʼak kona-ba nia. Se ita lee Evanjellu Mateus, Marcos, Lucas, no João, ita aprende duni dalan neʼebé Jesus hanoin. Neʼe bele ajuda ita atu “laʼo tuir ninia ain-fatin ho didiʼak” hodi ita bele iha “hanoin neʼebé hanesan Kristu nian”.​—1 Pedro 2:21; 4:1.

17. Hanoin tuir Kristu lori benefísiu saida ba ita?

17 Hanoin tuir Kristu lori benefísiu saida ba ita? Kuandu ita han hahán neʼebé diʼak ba saúde, ita-nia isin sei sai forte. Hanesan neʼe mós se ita mak enxe ita-nia neon nakonu ho Kristu nia hanoin, ita sei sai ema neʼebé espirituál liután. Neineik-neineik, ita mós sei komprende kona-ba situasaun ida-idak neʼebé Kristu hasoru, nia halo saida deʼit. Neʼe bele ajuda ita atu halo desizaun ho matenek hodi halo Maromak kontente no mós iha konxiénsia neʼebé moos. Tanba razaun sira-neʼe, ita hakarak duni atu ‘tau ita Naʼi Jesus Kristu nia hahalok sira nuʼudar ita-nia hatais’, loos ka lae?​—Roma 13:14.

18. Ita rasik aprende ona saida husi lisaun neʼe kona-ba ema espirituál?

18 Lisaun neʼe ajuda duni ita atu komprende ema neʼebé espirituál katak sá. Ita aprende kona-ba ezemplu diʼak husi ema balu neʼebé moris tuir espíritu santu. Ita mós aprende katak, iha “Kristu nia hanoin” ajuda ita atu sai ema neʼebé espirituál liután. Maibé iha buat barak tan neʼebé ita bele aprende. Porezemplu, oinsá mak ita bele analiza ita-nia kondisaun espirituál? Oinsá mak ita bele sai ema neʼebé espirituál liután? No oinsá mak moris tuir espíritu santu ajuda ita iha moris loron-loron nian? Ita sei aprende kona-ba informasaun sira-neʼe iha lisaun tuirmai.

^ par. 12 Isaías 63:9 Durante sira-nia susar hotu, nia mós sente neon-susar. No ninia atan rasik neʼebé lori ninia mensajen mak salva sira. Ho ninia domin no laran-sadiʼa mak nia sosa fali sira, no iha tempu neʼebá nia foti sira no lori sira loroloron.