Skip to content

Skip to table of contents

Jeová nia hakarak sei sai loos!

Jeová nia hakarak sei sai loos!

“Haʼu koʼalia ona, no haʼu sei kumpre ida-neʼe. Haʼu deside ona ida-neʼe, no haʼu sei kumpre.”—ISAÍAS (YESAYA) 46:11.

KNANANUK: 147, 149

1, 2. (a) Jeová fó sai ona ba ita kona-ba saida? (b) Eskritura iha Isaías 46:10, 11 no 55:11 promete saida ba ita?

ESKRITURA primeiru husi Bíblia hakerek ho liafuan badak deʼit maibé iha signifika kleʼan neʼebé dehan: “Horiuluk kedas Maromak kria lalehan no rai.” (Gênesis [Kejadian] 1:1) Husi buat sira neʼebé Maromak kria, ita hatene uitoan deʼit. Ezemplu balu mak kona-ba naroman, gravitasaun no espasu nia luan. Iha mós buat barak mak ita seidauk haree iha universu neʼe. (Eclesiastes [Pengkhotbah] 3:11) Maski nuneʼe, Jeová fó sai ona ba ita ninia hakarak kona-ba ema no rai. Nia kria ema tuir ninia ilas no hakarak sira atu moris ba nafatin iha rai. (Gênesis [Kejadian] 1:26) Sira sei moris nuʼudar ninia oan no nia sei sai nuʼudar sira-nia Aman.

2 Iha Gênesis kapítulu tolu esplika katak iha problema ida mosu neʼebé hanetik hela Jeová nia hakarak atu sai loos. (Gênesis [Kejadian] 3:1-7) Maibé ba Jeová, neʼe laʼós problema neʼebé susar, tanba la iha buat ida mak bele hapara nia. (Isaías [Yesaya] 46:10, 11; 55:11) Tan neʼe ita bele fiar katak Jeová nia hakarak ba ema no rai sei sai loos tuir ninia tempu.

3. (a) Hanorin importante saida deʼit mak ajuda ita atu komprende Bíblia? (b) Tanbasá mak agora tempu diʼak atu hanoin fali kona-ba hanorin sira-neʼe? (c) Ita sei koʼalia kona-ba pergunta saida deʼit?

3 Ita hatene ona kona-ba Maromak nia hakarak ba ema no rai, no ita mós hatene Jesus nia knaar atu halo Maromak nia hakarak neʼe sai loos. Hanorin sira-neʼe importante tebes no bainhira ita foin aprende Bíblia, karik ita aprende uluk kona-ba hanorin sira-neʼe. Ita mós hakarak ajuda ema seluk atu komprende buat  sira-neʼe. Agora daudauk ita iha oportunidade espesiál tebes atu hanorin ema kona-ba lia-loos sira-neʼe tanba ita konvida daudauk ema atu tuir komemorasaun ba Kristu nia mate. (Lucas 22:19, 20) Se ema mak tuir komemorasaun importante neʼe, sira bele aprende liután kona-ba Maromak nia hakarak neʼebé furak tebes. Sei falta loron balu tan atu halaʼo Memoriál, tan neʼe diʼak atu hanoin kona-ba pergunta saida deʼit mak ita bele husu atu fó laran-manas ba ema hodi tuir Memoriál. Lisaun neʼe iha pergunta tolu neʼebé ita sei koʼalia hamutuk: Saida mak Maromak nia hakarak ba ema no rai? Problema saida mak mosu? Tanbasá Jesus nia sakrifísiu mak xave importante ida atu loke dalan ba Maromak nia hakarak atu sai loos?

SAIDA MAK KRIADÓR NIA HAKARAK ULUK NIAN?

4. Oinsá mak kriasaun “fó sai Maromak nia glória”?

4 Jeová mak Kriadór neʼebé iha kbiit no forsa boot tebes. Buat hotu neʼebé nia kria mak diʼak tebes. (Gênesis [Kejadian] 1:31; Jeremias [Yeremia] 10:12) Saida mak ita bele aprende husi kriasaun furak neʼebé la mosu runguranga deʼit? Ita aprende katak buat hotu neʼebé Jeová kria, husi buat neʼebé kiʼik tebes toʼo buat neʼebé boot, la iha ida mak la iha folin, hotu-hotu diʼak. Bainhira Ita haree fitun iha kalan, tasi neʼebé furak, ka bee neʼebé suli husi foho leten, Ita sente oinsá? Ita hafolin tebes kona-ba buat sira-neʼe, loos ka lae? Sin, tanba Jeová mak kria ita ho kbiit atu hafolin buat furak sira-neʼe.Lee Salmo (Mazmur) 19:1; * 104:24. *

5. Jeová halo saida atu kriasaun hotu bele laʼo ho diʼak?

5 Jeová halo ukun-fuan oioin ba ninia kriasaun ida-idak. Nia halo ukun-fuan natureza nian, no nia mós halo ukun-fuan morál nian hodi buat hotu iha lalehan no rai bele laʼo ho diʼak. (Salmo [Mazmur] 19:7-9) Buat hotu iha lalehan no rai iha sira-nia fatin no knaar ida-idak. Porezemplu, gravitasaun ajuda atu halo atmosfera besik nafatin ho mundu, no ajuda atu kontrola mós tasi no laloran sira. Se la iha gravitasaun, buat hotu la bele moris iha mundu. Kriasaun hotu, inklui mós ema, bele moris no book an iha mundu tanba Jeová halo ukun-fuan natureza sira-neʼe. Buat sira-neʼe hatudu katak Jeová iha hakarak ida mak nia kria ema no rai. Bainhira haklaken ba ema, ita bele ajuda sira atu hatene Kriadór ba lalehan no rai neʼe.Apokalipse 4:11.

6, 7. Prezente saida deʼit mak Jeová fó ba Adão no Eva?

6 Jeová nia hakarak mak atu ema moris ba nafatin iha rai. (Gênesis [Kejadian] 1:28; Salmo [Mazmur] 37:29) Nia laran-luak tebes ba Adão no Eva. Nia fó sira kbiit oioin atu bele goza moris. (Lee Tiago 1:17.) Jeová fó sira liberdade no kbiit atu hanoin, atu hatudu domin no kbiit atu habelun. Jeová koʼalia ba Adão no fó matadalan ba nia oinsá atu halo buat neʼebé diʼak. Adão mós aprende oinsá atu tau matan ba ninia an rasik, ba animál sira, no ba rai. (Gênesis [Kejadian] 2:15-17, 19, 20) Jeová mós fó Adão no Eva kbiit atu bele koko hahán, kbiit atu sente, horon, rona, no haree buat furak oioin neʼebé nia kria ba sira. Hodi nuneʼe, sira bele goza moris iha Paraízu neʼebé furak tebes. Adão no Eva iha serbisu furak barak atu halo. Sira bele aprende buat foun oioin iha sira-nia moris neʼebé laiha rohan.

7 Maromak nia hakarak inklui saida tan? Nia fó ba Adão no Eva kbiit atu iha oan neʼebé  perfeitu. Sira-nia oan mós bele iha oan hodi halo mundu tomak nakonu ho ema. Jeová hakarak inan-aman atu hadomi sira-nia oan hanesan Jeová hadomi ninia oan perfeitu primeiru Adão no Eva. Nia fó mundu tomak no mós buat furak oioin iha mundu neʼe ba ema. Nia halo mundu atu sai ema nia hela-fatin ba nafatin.Salmo (Mazmur) 115:16.

PROBLEMA SAIDA MAK MOSU?

8. Tanbasá mak Jeová fó ba Adão no Eva mandamentu neʼebé hakerek iha Gênesis 2:16, 17?

8 Buat hotu la sai loos kedas tuir Jeová nia hakarak, tanbasá? Jeová fó mandamentu simples ida ba Adão no Eva, atu sira bele hatene katak sira-nia liberdade iha limitadu. Nia hatete ba sira: “Ai-fuan husi ai-hun hotu iha jardín neʼe ó bele han toʼo bosu. Maibé kona-ba ai-hun neʼebé bolu nuʼudar hatene buat diʼak no aat, ó labele han ninia fuan, tanba iha loron neʼebé ó han ai-fuan neʼe, ó sei mate duni.” (Gênesis [Kejadian] 2:16, 17) Tuir loloos mandamentu neʼe la susar ba sira atu komprende ka halo tuir tanba iha jardín Eden sei iha ai-han gostu oioin neʼebé sira bele han.

9, 10. (a) Satanás duun Jeová kona-ba saida? (b) Adão no Eva foti desizaun saida? (Haree dezeñu iha pájina 3.)

9 Diabu Satanás uza samea ida lohi Eva hodi kontra Jeová. (Lee Gênesis [Kejadian] 3:1-5; * Apokalipse 12:9) Tanba Jeová hatete ba Adão no Eva katak laʼós ai-fuan husi ai-hun hotu iha jardín Eden mak sira bele han, tan neʼe Satanás uza Jeová nia mandamentu neʼe hodi hamosu duvida katak Jeová lakohi fó buat neʼebé diʼak ba sira. Buat neʼebé nia koʼalia mak hanesan liafuan sira-neʼe: ‘Imi la iha liberdade atu halo buat neʼebé imi gosta halo ka?’ Tuirmai nia lohi Eva hodi dehan: “Tuir loloos, imi sei la mate.” Depois Satanás bosok nia atu la presiza rona ba Maromak, nia dehan: “Maromak hatene katak iha loron neʼebé imi han ai-fuan neʼe, imi-nia matan sei nakloke.” Satanás nia liafuan neʼe hanesan hatete katak Jeová lakohi sira han ai-fuan neʼe tanba ai-fuan neʼe bele fó matenek espesiál ida ba sira. Ikusliu nia halo promesa falsu ba sira hodi dehan: “Imi sei sai hanesan Maromak hodi hatene buat diʼak no aat.”

10 Adão no Eva presiza halo desizaun rasik atu halo tuir Jeová ka rona ba samea nia liafuan. Triste tebes tanba sira foti desizaun atu kontra Jeová. Sira fila kotuk ba sira-nia Aman Jeová no apoia fali Satanás. Tan neʼe mak Jeová la proteje tan sira.Gênesis (Kejadian) 3:6-13.

11. Tanbasá mak Jeová la husik deʼit Adão no Eva nia sala?

11 Bainhira Adão no Eva kontra Maromak, sira sai nuʼudar ema neʼebé la perfeitu tan. Laʼós neʼe deʼit, sira mós sai Maromak nia inimigu. Jeová nia “matan mak santu liu atu hateke ba buat neʼebé aat”, tan neʼe nia odi hahalok aat sira neʼebé Adão no Eva halo. (Habacuque [Habakuk] 1:13) Se Jeová mak husik deʼit no la halo buat ida ba Adão no Eva nia sala, neʼe bele estraga Jeová nia kriatura sira-nia dame no unidade. Neʼe mós bele halo anju no ema seluk la tau fiar tan ba Maromak nia liafuan sira. Maibé Jeová sempre kaer metin ba ninia prinsípiu sira no nia nunka halo buat neʼebé kontra fali nia rasik nia lei. (Salmo [Mazmur] 119:142) Tan  neʼe, maski Adão no Eva iha liberdade, maibé neʼe la dehan katak sira bele sees husi konsekuénsia kona-ba sala neʼebé sira halo. Toʼo ikus sira tenke mate no fila fali ba rai-rahun neʼebé Jeová uza hodi kria sira.Gênesis (Kejadian) 3:19.

12. Saida mak akontese ba Adão nia oan no bei-oan hotu?

12 Iha tempu neʼebé Adão no Eva han ai-fuan neʼe, Jeová la bele simu tan sira atu sai parte ida ba ninia família. Maromak hasai sira husi jardín Eden no la iha tan esperansa ba sira atu fila fali. (Gênesis [Kejadian] 3:23, 24) Tuir Jeová nia justisa, sira tenke simu konsekuénsia husi sira-nia desizaun rasik. (Lee Deuteronômio [Ulangan] 32:4, 5. *) Nuʼudar sala-naʼin, sira la iha tan kbiit atu haleno Maromak nia hahalok furak sira iha dalan neʼebé perfeitu. Adão halo lakon duni futuru neʼebé furak, laʼós ba ninia an deʼit, maibé mós ba ninia oan no bei-oan hotu. Buat neʼebé nia bele fó ba ninia oan mak moris neʼebé la perfeitu, sala, no mate. (Roma 5:12) Adão nia sala hanetik ninia oan no bei-oan atu la bele moris ba nafatin. Sira la bele iha tan oan ka bei-oan neʼebé perfeitu. Komesa husi tempu neʼebé Diabu Satanás lohi Adão no Eva hodi kontra Jeová, nia mós kontinua nafatin lohi ema seluk toʼo ohin loron.João 8:44.

JESUS NIA SAKRIFÍSIU HADAME FALI ITA HO MAROMAK

13. Saida mak Jeová hakarak ba ema?

13 Jeová sei hadomi nafatin ema. Maski Adão no Eva kontra Jeová, nia hakarak nafatin atu iha relasaun diʼak ho ema. Nia lakohi haree sira mate. (2 Pedro 3:9) Tan neʼe mak bainhira Adão no Eva kontra Jeová, nia halo kedas arranju atu ema bele iha fali relasaun neʼebé diʼak ho nia. Maibé saida mak Jeová halo hodi la kontra fali nia rasik nia prinsípiu?

14. (a) Tuir João 3:16, Maromak halo ona saida atu salva ema husi sala no mate? (b) Pergunta saida mak ita uza atu koʼalia ho ema?

14 Lee João 3:16. Karik ema balu neʼebé ita konvida atu tuir Memoriál hatene ona eskritura neʼe. Maibé oinsá mak Jesus nia sakrifísiu bele lori moris rohan-laek ba ema? Ita bele ajuda ema komprende kona-ba pergunta neʼe bainhira konvida sira atu tuir Memoriál, ka iha tempu halaʼo daudauk Memoriál, ka Memoriál liutiha ita bá vizita fali sira. Se ema sira-neʼe mak komprende liután kona-ba Jesus nia sakrifísiu, sira sei hatene katak Jeová hadomi tebes ema no nia mak Maromak neʼebé matenek tebes. Informasaun saida mak ita bele uza atu koʼalia ba ema kona-ba Jesus nia sakrifísiu?

15. Tanbasá mak Jesus la hanesan ho Adão?

15 Jeová fó mane perfeitu ida nia moris nuʼudar sakrifísiu. Mane neʼe tenkesér laran-metin ba Jeová. Nia tenkesér ho hakarak rasik atu fó ninia moris ba ema. (Roma 5:17-19) Mane neʼe mak Jesus, Jeová nia kriatura primeiru. Jeová muda ninia moris husi lalehan mai rai. (João 1:14) Hodi nuneʼe mak Jesus moris mai nuʼudar ema perfeitu hanesan Adão nia moris. Maibé Jesus la hanesan ho Adão. Jesus moris tuir Jeová nia ukun-fuan hotu nuʼudar ema perfeitu. Maski Jesus hasoru terus neʼebé makaʼas tebes, nia nunka halo buat ida atu kontra Jeová nia ukun-fuan.

16. Tanbasá Jesus nia sakrifísiu mak prezente neʼebé furak tebes?

16 Jesus fó ninia moris nuʼudar ema perfeitu, tan neʼe nia bele salva ema husi sala no mate. Jesus kumpre duni buat hotu neʼebé Adão la halo. Jesus mak ema perfeitu,  nia laran-metin tebes no halo tuir Maromak. (1 Timóteo 2:6) Jesus mate ba ita, no ninia sakrifísiu loke dalan ba ema hotu, mane, feto, no labarik atu hetan moris rohan-laek. (Mateus 20:28) Jesus nia sakrifísiu mak xave importante neʼebé loke dalan ba Maromak nia hakarak atu sai loos.2 Korinto 1:19, 20.

JEOVÁ LOKE ODAMATAN BA ITA ATU FILA

17. Jesus nia sakrifísiu kumpre saida deʼit?

17 Jeová halo sakrifísiu boot hodi fó Jesus nia moris. (1 Pedro 1:19) Nia hafolin tebes ita toʼo nia bele husik ninia Oan-Mane mesak hodi mate ba ita. (1 João 4:9, 10) Neʼe hanesan Jesus troka fali Adão nia fatin nuʼudar ita-nia aman. (1 Korinto 15:45) Jesus nia sakrifísiu fó oportunidade ba ita atu hetan moris rohan-laek, no mós bele sai fali parte ba Maromak nia família iha aban-bainrua. Liuhusi Jesus nia sakrifísiu mak ita bele sai fali ema perfeitu no Jeová mós bele simu fali ita ba ninia família hodi la kontra nia rasik nia prinsípiu sira. Hanoin toʼok iha futuru ema hotu neʼebé laran-metin ba Jeová sei sai perfeitu fali, neʼe furak tebes, loos ka lae? Toʼo ikusmai, kriatura hotu iha lalehan no rai sei sai família ida deʼit. Ita hotu sei sai fali Maromak nia oan.Roma 8:21.

18. Bainhira mak Jeová sei sai “buat hotu ba ema hotu”?

18 Maski ita-nia inan-aman primeiru husik tiha Jeová, maibé Jeová sei hadomi nafatin ita, no nia mós fó Jesus nia moris ba ita. Maski ita la perfeitu, maibé Satanás la iha kbiit atu hanetik ita hodi hatudu laran-metin ba Jeová. Jeová sei uza Jesus nia sakrifísiu atu ajuda ita sai ema neʼebé laran-loos. Imajina toʼok bainhira ema hotu neʼebé rekoñese Jesus no tau fiar ba nia, sei hetan moris rohan-laek. (João 6:40) Ita-nia Aman neʼebé nakonu ho domin no iha matenek sei kumpre ninia hakarak neʼe atu ajuda ita sai fali ema perfeitu. Iha tempu neʼebá Jeová sei sai “buat hotu ba ema hotu”.1 Korinto 15:28.

19. (a) Ita-nia agradese ba Jesus nia sakrifísiu tenkesér book ita atu halo saida? (Haree kaixa “ Mai ita kontinua buka sira neʼebé merese.”) (b) Ita sei koʼalia kona-ba saida iha lisaun tuirmai?

19 Ita-nia agradese ba Jesus nia sakrifísiu tenkesér book ita atu fó sai ba ema seluk kona-ba prezente folin-boot neʼe. Ema presiza hatene katak liuhusi Jesus nia sakrifísiu mak Jeová atu fó oportunidade ba ema atu hetan moris rohan-laek. Maibé Jesus nia sakrifísiu mós sei kumpre tan buat boot ida, neʼe mak atu rezolve lia neʼebé Satanás hasaʼe hasoru Jeová iha jardín Eden. Ita sei koʼalia liután kona-ba neʼe iha lisaun tuirmai.

^ par. 4 Salmo 19:1 Buat sira neʼebé iha lalehan fó sai Maromak nia glória; sira haklaken kona-ba serbisu neʼebé nia halo ho ninia liman.

^ par. 4 Salmo 104:24 Oh Jeová, Ita-nia serbisu sira mak barak tebes! Ita halo buat sira-neʼe hotu ho matenek. Rai nakonu ho buat neʼebé Ita halo ona.

^ par. 9 Gênesis 3:1-5 Samea mak animál ida neʼebé matan-moris liu animál fuik hotu iha rai-luan neʼebé Maromak Jeová kria ona. Entaun samea dehan ba feto neʼe: “Maromak dehan duni katak imi labele han ai-fuan husi ai-hun hotu iha jardín neʼe ka?” Nuneʼe, feto neʼe hatán ba samea: “Ami bele han ai-fuan husi ai-hun sira iha jardín neʼe. Maibé kona-ba ai-fuan husi ai-hun neʼebé iha jardín nia klaran Maromak dehan ona: ‘Imi labele han ai-fuan husi ai-hun neʼe, imi labele kaer nia; se lae imi sei mate.’” Ho ida-neʼe, samea dehan ba feto neʼe: “Tuir loloos, imi sei la mate. Tanba Maromak hatene katak iha loron neʼebé imi han ai-fuan neʼe, imi-nia matan sei nakloke no imi sei sai hanesan Maromak hodi hatene buat diʼak no aat.”

^ par. 12 Deuteronômio 32:4, 5 Nia mak Fatuk ida, no ninia serbisu mak perfeitu, tanba ninia dalan sira hotu mak loos. Maromak laran-metin, nia sempre hatudu justisa, nia iha hahalok loos no laran-loos. Sira rasik mak halo hahalok aat. Sira laʼós ninia oan, sira rasik mak halo sala. Sira mak jerasaun neʼebé aat no kleʼuk!