Skip to content

Skip to table of contents

Jacob sai Mesias nia beiʼala tanba nia sosa direitu nuʼudar oan primeiru husi Esaú ka lae?

Pergunta husi lee-naʼin

Pergunta husi lee-naʼin

Iha tempu Izraél antigu, Mesias nia liña jerasaun sempre mai husi ema neʼebé iha direitu nuʼudar oan primeiru ka lae?

Uluk ita sempre liga buat rua neʼe hamutuk. Razaun mak tanba Ebreu 12:16 haree hanesan iha ligasaun. Eskritura neʼe hatete katak Esaú “la hafolin buat neʼebé santu” no nia “faʼan tiha [ba Jacob] ninia direitu nuʼudar oan primeiru hodi troka fali ai-han ba dala ida nian”. Liafuan sira-neʼe haree hanesan bainhira Jacob hetan tiha “direitu nuʼudar oan primeiru”, mak nia sai beiʼala ida ba Mesias nia liña jerasaun.—Mateus 1:2, 16; Lucas 3:23, 34.

Maibé, liuhusi estuda didiʼak kona-ba akontesimentu seluk husi Bíblia hatudu katak, laʼós oan-mane primeiru deʼit mak bele sai Mesias nia beiʼala. Haree toʼok ezemplu balu tuirmai:

Jacob (Izraél) nia oan-mane sira husi Lea, oan-mane primeiru mak Ruben. No Jacob nia oan-mane primeiru husi ninia feen Raquel mak José. Bainhira Ruben halo buat neʼebé la morál, ninia direitu nuʼudar oan primeiru entrega fali ba José. (Gênesis [Kejadian] 29:31-35; 30:22-25; 35:22-26; 49:22-26; 1 Crônicas [Tawarikh] 5:1, 2) Maski nuneʼe, Mesias nia liña jerasaun la mai husi Ruben ka José, maibé mai husi Judá, Jacob nia oan-mane númeru haat husi Lea.—Gênesis (Kejadian) 49:10.

 Husi lista neʼebé Lucas fó, iha Lucas 3:32 nia temi ema naʼin-lima husi ema hotu neʼebé sai nuʼudar Mesias nia liña jerasaun. Ema ida-idak husi naʼin-lima neʼe mak oan primeiru. Iha lista neʼe dehan katak Boas sai aman ba Obed, no Obed nia oan-mane mak Jesse.—Rute 4:17, 20-22; 1 Crônicas (Tawarikh) 2:10-12.

Maibé Jesse nia oan David laʼós oan primeiru. Nia mak oan-ikun husi oan-mane naʼin-ualu. Maski nuneʼe, Mesias nia liña jerasaun mai husi David. (1 Samuel 16:10, 11; 17:12; Mateus 1:5, 6) Nuneʼe mós ho Salomão, nia laʼós David nia oan primeiru.—2 Samuel 3:2-5.

Neʼe la dehan katak la importante atu sai oan primeiru. Oan-mane primeiru iha pozisaun neʼebé importante no baibain nia mak sai fali ulun ba família se ninia aman mate. Nia mós sei simu família nia liman-rohan ba dala rua.—Gênesis (Kejadian) 43:33; Deuteronômio (Ulangan) 21:17; Josué (Yosua) 17:1.

No direitu nuʼudar oan primeiru bele fó fali ba ema seluk. Porezemplu, bainhira Abraão duni tiha Ismael, Isaac mak simu fali direitu nuʼudar oan primeiru. (Gênesis [Kejadian] 21:14-21; 22:2) No hanesan temi tiha ona iha leten, Ruben nia direitu nuʼudar oan primeiru entrega fali ba José.

Agora mai ita koʼalia fali Ebreu 12:16 neʼebé apóstolu Paulo dehan atu haree didiʼak katak “iha imi-nia leet la iha ema neʼebé halo sala-foʼer ka ema neʼebé la hafolin buat neʼebé santu, hanesan Esaú, neʼebé faʼan tiha ninia direitu nuʼudar oan primeiru hodi troka fali ai-han ba dala ida nian”. Entaun eskritura neʼe koʼalia kona-ba saida?

Iha eskritura neʼe, apóstolu Paulo laʼós koʼalia kona-ba Mesias nia liña jerasaun. Tanba antes temi eskritura neʼe, nia fó laran-manas ba ema kristaun sira atu ‘halo loos dalan ba sira-nia ain’ hodi sira la bele “lakon Maromak nia laran-diʼak neʼebé boot”. Triste tebes se sira mak monu ba hahalok sala-foʼer, sira sei lakon duni Maromak nia laran-sadiʼa. (Ebreu 12:12-16) Neʼe bele halo sira sai hanesan Esaú. Ninia hahalok hatudu duni katak nia “la hafolin buat neʼebé santu”.

Esaú moris iha tempu neʼebé família nia ulun mak serbí nuʼudar amlulik ba sira-nia família. No karik dala ruma Esaú mós hetan priviléjiu hodi hasai sakrifísiu sira. (Gênesis [Kejadian] 8:20, 21; 12:7, 8; Jó [Ayub] 1:4, 5) Maibé tanba hakarak isin nian, Esaú troka priviléjiu sira-neʼe ho koto-mean manko ida deʼit. Karik nia hakarak hasees an husi terus neʼebé fó-hatene nanis kona-ba Abraão nia oan no bei-oan sira. (Gênesis [Kejadian] 15:13) Esaú mós kaben ho feto jentiu rua neʼebé halo triste ninia inan-aman, ida-neʼe hatudu katak nia la hafolin buat neʼebé santu. (Gênesis [Kejadian] 26:34, 35) Nia la hanesan duni ho Jacob neʼebé hakarak kaben deʼit ho ema neʼebé adora Maromak loos!—Gênesis (Kejadian) 28:6, 7; 29:10-12, 18.

Neʼe duni, ita bele halo konkluzaun saida kona-ba liña jerasaun neʼebé lori ba Jesus, ka Mesias? Dala ruma liña jerasaun neʼe mai duni husi oan-mane primeiru, maibé dala ruma lae. Ema judeu sira mós konkorda no simu realidade sira-neʼe. Ita hatene ida-neʼe tanba sira rekoñese katak Kristu sei mai husi David, Jesse nia oan-mane ikun.—Mateus 22:42.