Skip to content

Skip to table of contents

Joven sira “kontinua hakaʼas an atu hetan imi-nia salvasaun”

Joven sira “kontinua hakaʼas an atu hetan imi-nia salvasaun”

“Hanesan imi sempre halo tuir, . . . kontinua hakaʼas an atu hetan imi-nia salvasaun ho taʼuk no nakdedar.”—FILIPE 2:12.

KNANANUK: 41, 11

1. Tanbasá mak importante atu hetan batizmu? (Haree foto iha leten.)

TINAN-TINAN, estudante Bíblia rihun ba rihun hetan batizmu. Barak mak joven no foin-saʼe sira. Balu boot iha lia-loos. Ita mak ema ida husi sira ka lae? Se nuneʼe, buat neʼebé Ita halo iha folin-boot tebes. Ema kristaun presiza hetan batizmu, no neʼe mak hakat importante hodi bele hetan salvasaun no moris ba nafatin.—Mateus 28:19, 20; 1 Pedro 3:21.

2. Tanbasá mak Ita la presiza sente taʼuk atu dedika Ita-nia an ba Jeová?

2 Batizmu loke dalan ba Ita atu simu bensaun oioin husi Jeová. Maibé, batizmu mós lori responsabilidade foun ba Ita. Tanbasá? Tanba iha loron neʼebé Ita atu hetan batizmu, Ita hatán “Sin” ba pergunta tuirmai neʼe: “Hodi fiar ba Jesus Kristu nia sakrifísiu, Ita hakribi ka arrepende Ita-nia sala no dedika tiha ona Ita-nia an ba Maromak Jeová atu halo ninia hakarak ka lae?” Ho ida-neʼe, Ita promete atu hadomi Jeová no tau ninia hakarak uluk iha Ita-nia moris. Ita presiza arrepende ho desizaun neʼebé Ita halo ka lae? Lae! Ita sei nunka sente  sala atu husik Jeová mak dirije Ita-nia moris. Hanoin toʼok, ema neʼebé la adora Jeová, sira moris iha Satanás nia ukun. Diabu la iha interese ba sira ka ba Ita. Ninia hakarak mak atu haree Ita lakon Ita-nia esperansa moris rohan-laek no nia kontente atu haree Ita apoia nia hodi kontra Jeová.

3. Jeová fó ona bensaun saida deʼit ba Ita tanba dedika an ba nia?

3 Hanoin kona-ba bensaun saida deʼit mak Ita simu ona husi Jeová hodi dedika Ita-nia an ba nia no hetan batizmu. Ita fó ona Ita-nia moris ba Jeová, tan neʼe ho fiar an Ita bele hatete: “Jeová iha haʼu-nia sorin; haʼu sei nunka taʼuk. Saida mak ema bele halo ba haʼu?” (Salmo [Mazmur] 118:6) Sin, la iha buat seluk mak bele halo Ita sente kontente liu hodi hatene katak Ita apoia Jeová no nia simu Ita.

ITA RASIK NIA RESPONSABILIDADE

4, 5. (a) Tanbasá mak dedikasaun ita ida-idak nia responsabilidade? (b) Susar saida deʼit mak ema kristaun hotu hasoru?

4 Maski Ita hela hamutuk ho inan-aman, Ita la bele sadere ba inan-aman nia relasaun ho Jeová. Ita rasik mak iha responsabilidade atu hametin relasaun diʼak ho Jeová. Tanbasá diʼak atu hanoin-hetan kona-ba neʼe? Tanba Ita la hatene susar saida deʼit mak Ita sei hasoru iha futuru. Porezemplu, karik Ita hetan ona batizmu iha tempu foin-saʼe. Maibé tanba agora Ita sai ona joven, Ita hasoru fali sentimentu ka problema neʼebé foun. Feto joven ida dehan: “Baibain se labarik ida la han dose halo tinan nian iha eskola, nia la arrepende an katak nia mak Testemuña ida. Maibé bainhira toʼo ona tinan neʼebé hakarak seksuál nian komesa sai makaʼas, nia rasik mak presiza iha fiar neʼebé metin katak halo tuir Jeová nia ukun-fuan sira sempre lori rezultadu neʼebé diʼak ba nia.”

5 Laʼós joven deʼit mak sei hasoru problema foun, ema boot neʼebé hetan batizmu mós sei hasoru koko ba sira-nia fiar iha dalan neʼebé sira nunka hanoin. Koko neʼebé sira hasoru karik bele mai husi moris kaben, saúde, ka serbisu. Maski idade kiʼik ka boot, ita hotu sei hasoru koko oioin kona-ba ita-nia laran-metin ba Jeová.—Tiago 1:12-14.

6. (a) Ita presiza hanoin-hetan saida kona-ba Ita-nia dedikasaun? (b) Ita bele aprende saida husi Filipe 4:11-13?

6 Atu ajuda Ita laran-metin, hanoin-hetan katak, bainhira Ita dedika Ita-nia an ba Jeová, Ita promete ba Ukun-Naʼin Aas Liu Hotu atu serbí nia deʼit maski Ita-nia kolega ka inan-aman hili atu husik nia. (Salmo [Mazmur] 27:10) Diʼak atu sempre husu Jeová hodi ajuda Ita kaer metin ba Ita-nia promesa neʼe.—Lee Filipe 4:11-13.

7. “Hakaʼas an atu hetan imi-nia salvasaun ho taʼuk no nakdedar” katak sá?

7 Jeová hakarak Ita atu sai ninia belun. Maibé Ita presiza hakaʼas an atu bele iha relasaun neʼebé metin nafatin ho nia no atu hetan salvasaun ba Ita-nia an. Filipe 2:12 hatete: “Kontinua hakaʼas an atu hetan imi-nia salvasaun ho taʼuk no nakdedar.” Liafuan sira-neʼe hatudu katak Ita presiza hanoin didiʼak kona-ba oinsá Ita bele hakbesik nafatin ba Jeová no laran-metin ba nia maski hasoru problema naran deʼit. Ita presiza kuidadu atu la fiar an demais, tanba Maromak nia atan balu neʼebé serbí nia tinan barak ona mós bele husik nia. Ita bele halo saida deʼit atu ajuda Ita hetan salvasaun?

IMPORTANTE ATU ESTUDA BÍBLIA

8. Estuda mesak inklui saida deʼit, no tanbasá importante?

8 Atu sai Jeová nia belun, ita presiza rona ba nia no koʼalia ho nia. Dalan importante  liu atu rona ba Jeová mak liuhusi estuda Bíblia. Neʼe inklui lee no hanoin kleʼan kona-ba ninia Liafuan no ita-nia livru sira. Estuda Bíblia la hanesan ho ezame neʼebé ita dekór deʼit informasaun sira. Maibé estuda Bíblia mak hanesan ho halo aventura hodi buka buat foun oioin kona-ba Jeová. Halo nuneʼe bele ajuda Ita hakbesik ba nia no nia mós sei hakbesik ba Ita.—Tiago 4:8.

Ita-nia toman atu koʼalia ho Jeová oinsá? (Haree parágrafu 8-11)

9. Ita uza saida deʼit iha Ita-nia estuda mesak?

9 Jeová nia organizasaun halo ona buat barak neʼebé Ita bele uza ba Ita-nia programa estuda mesak. Porezemplu, série ida naran “Atividade atu estuda Bíblia” neʼebé loke husi “Joven sira” iha ita-nia sítiu jw.org bele ajuda Ita uza buat neʼebé Ita aprende husi Bíblia nia akontesimentu oioin. No Ita mós bele hetan matadalan atu estuda husi “Tuir Loloos, Saida mak Bíblia Hanorin?” iha sítiu jw.org. Buat sira-neʼe bele ajuda Ita haburas fiar no esplika Ita-nia fiar ba ema seluk. Ita bele buka tan ideia seluk kona-ba oinsá atu estuda mesak husi tópiku “Ita haksolok atu lee Maromak nia Liafuan ka lae?” iha Livru Haklaken, 15 Maiu 2015. Estuda no hanoin kleʼan importante tebes ba Ita rasik nia salvasaun.—Lee Salmo (Mazmur) 119:105. *

IMPORTANTE ATU HALO ORASAUN

10. Tanbasá mak Ita presiza halo orasaun?

10 Ita rona ba Jeová liuhusi estuda Bíblia, no bainhira ita halo orasaun, ita koʼalia ba nia. Ita la bele haree orasaun hanesan toman deʼit ka buat neʼebé atu lori sorte ba Ita-nia moris. Orasaun mak dalan atu koʼalia ba ita-nia Kriadór. Jeová hakarak rona Ita koʼalia ba nia. (Lee Filipe 4:6.) Tan neʼe mak bainhira Ita sente laran-taridu kona-ba buat ruma, Bíblia hatete atu ‘entrega Ita-nia laran-susar hotu ba Jeová’. (Salmo [Mazmur] 55:22) Irmaun-irmán rihun ba rihun bele fó prova ba Ita katak halo orasaun ajuda duni sira. Halo orasaun mós bele ajuda Ita!

11. Tanbasá mak Ita tenke fó agradese beibeik ba Jeová?

11 Ita la halo orasaun tan deʼit ita hakarak hetan ajuda husi Jeová. Bíblia  dehan: “Hatudu bá katak imi agradese.” (Koloso 3:15) Dala ruma ita preokupa liu kona-ba ita-nia problema sira toʼo ita la haree tan bensaun sira neʼebé ita simu. Tan neʼe koko atu halo buat tuirmai neʼe: Iha loron ida-idak, koko hanoin kona-ba bensaun tolu neʼebé Ita simu, depois fó agradese ba Jeová kona-ba bensaun sira-neʼe. Joven ida naran Abigail neʼebé hetan batizmu bainhira nia idade 12 hatete: “Haʼu sente Jeová mak merese liu atu ita hatoʼo agradese. Ita tenkesér uza oportunidade hotu neʼebé ita iha hodi fó agradese ba nia kona-ba prezente sira neʼebé nia fó ba ita.” Abigail hatete katak dala ruma nia tenke fó-hanoin ba ninia an atu fó agradese ba Jeová loroloron kona-ba buat hotu neʼebé nia iha.

KOKO KATAK JEOVÁ MAK DIʼAK

12, 13. Oinsá mak Ita rasik koko ona katak Jeová mak diʼak, no tanbasá mak importante atu hanoin kona-ba ajuda neʼebé Ita simu husi Jeová?

12 Jeová fó ajuda ba Liurai David hodi tahan susar oioin neʼebé nia hasoru. Tan neʼe David fó sai ninia sentimentu hodi dehan: “Koko hodi haree katak Jeová mak diʼak; ksolok ba ema neʼebé buka protesaun husi nia.” (Salmo [Mazmur] 34:8) Eskritura neʼe fó laran-manas ba ita atu koko rasik Jeová nia diʼak. Bainhira Ita lee Bíblia ho ita-nia livru sira, no tuir reuniaun, Ita bele aprende husi ema seluk nia ezemplu kona-ba oinsá Maromak ajuda sira hodi laran-metin ba nia. Maibé nuʼudar Ita-nia relasaun ho Jeová sai metin ba daudaun, Ita rasik tenke haree oinsá mak Jeová ajuda Ita. Iha dalan saida mak Ita rasik koko ona katak Jeová mak diʼak?

13 Ita hotu haree ona dalan neʼebé Jeová hatudu ninia diʼak ba ita. Nia konvida ona ita ida-idak atu hakbesik ba nia no ba ninia Oan-Mane. Jesus dehan: “La iha ema ida neʼebé bele hakbesik haʼu se haʼu-nia Aman neʼebé haruka haʼu mai la dada nia.” (João 6:44) Ita sente duni katak Jeová mak dada Ita ka lae? Ka Ita hanoin, ‘Jeová dada duni haʼu-nia inan-aman maibé haʼu tuir deʼit’? Presiza hanoin-hetan katak, iha tempu Ita dedika an ba Jeová no hetan batizmu, tuir loloos Ita hatudu katak Ita rasik mós haburas ona relasaun ho nia, tanba Bíblia hatete katak se ema ida mak hadomi Maromak, Maromak koñese ema neʼe. (1 Korinto 8:3) Ita tenke hafolin priviléjiu neʼebé Ita ida-idak simu husi Jeová iha ninia organizasaun.

14, 15. Oinsá mak serbisu haklaken bele ajuda Ita atu iha fiar neʼebé metin?

14 Dalan seluk neʼebé Ita haree Jeová nia diʼak mak bainhira nia fó aten-brani ba Ita hodi esplika Ita-nia fiar ba ema seluk iha serbisu haklaken ka iha eskola. Dala ruma la fasil atu haklaken ba Ita-nia kolega eskola. Karik Ita taʼuk sira sei koʼalia saida. Liuliu atu esplika Ita-nia fiar iha ema barak nia oin, karik neʼe sei halo Ita sente taʼuk liután. Saida mak bele ajuda Ita?

15 Hanoin kona-ba tanbasá mak Ita fiar ba buat neʼebé Ita fiar daudaun. Ita bele uza matadalan atu estuda, neʼebé hetan husi jw.org. Atividade sira-neʼe bele ajuda Ita hanoin kona-ba Ita-nia fiar, tanbasá mak Ita fiar ba neʼe, no oinsá mak Ita bele esplika Ita-nia fiar ba ema seluk. Se Ita mak fiar loloos no prepara ho didiʼak ona, neʼe sei book Ita atu haklaken kona-ba Jeová.—Jeremias (Yeremia) 20:8, 9.

16. Saida mak bele ajuda Ita atu aten-brani hodi esplika Ita-nia fiar?

 16 Maski Ita prepara didiʼak, karik Ita sei sente nakdedar atu esplika Ita-nia fiar ba ema seluk. Irmán ida idade 18 no nia hetan batizmu bainhira nia tinan 13, nia dehan: “Haʼu hatene buat neʼebé haʼu fiar, maibé dala ruma haʼu sente susar atu fó sai haʼu-nia hanoin.” Saida mak ajuda nia? Nia dehan: “Haʼu koko atu koʼalia hanesan baibain. Haʼu-nia kolega eskola la taʼuk atu koʼalia kona-ba buat sira neʼebé sira halo. Haʼu mós tenkesér sente hanesan neʼe. Tan neʼe haʼu sempre konta liu deʼit buat neʼebé haʼu halo, porezemplu, ‘Bainhira haʼu hanorin hela Bíblia iha loron neʼebá, no . . . ’ Tuirmai haʼu kontinua konta deʼit haʼu-nia istória neʼe. Maski haʼu-nia istória neʼe laʼós kona-ba Bíblia, maibé baibain ema seluk husu kona-ba bainhira haʼu hanorin Bíblia, haʼu halo saida deʼit. Dala ruma sira hakarak buka-hatene kona-ba Bíblia. Tanba haʼu uza beibeik dalan hanesan neʼe, sai fasil liu ba haʼu atu esplika haʼu-nia fiar ba ema seluk. Bainhira haʼu halo nuneʼe, haʼu sempre sente kontente!”

17. Saida tan mak bele ajuda Ita atu koʼalia ho ema seluk?

17 Se ema bele sente katak Ita hanoin tebes no respeitu sira, karik sira mós sei hatudu respeitu ba Ita no Ita-nia fiar. Porezemplu, Olivia neʼebé idade 17 no hetan batizmu iha tempu foin-saʼe, nia hatete: “Bainhira koʼalia ho ema, haʼu sempre sente taʼuk atu koʼalia kona-ba Bíblia, tanba taʼuk ema sei hatete katak haʼu fanátiku.” Maibé ikusmai nia hadiʼa ninia hanoin neʼe. Duké hanoin liu kona-ba ninia taʼuk, Olivia hanoin: “Joven barak la hatene kona-ba Testemuña ba Jeová. Ita deʼit mak Testemuña neʼebé sira hasoru ona. Tan neʼe ita-nia hahalok bele fó impaktu oinsá sira hanoin kona-ba ita. Oinsá se ita sente moe ka sente susar atu koʼalia kona-ba ita-nia fiar, ka oinsá se atu koʼalia ba ema seluk maibé sente nanál toos? Se nuneʼe, karik sira sei hanoin katak ita ladún orgullu kona-ba ita-nia identidade nuʼudar Testemuña. Karik sira sei la hatudu respeitu ba ita tanba ita la fiar an. Maibé se ita mak koʼalia hanesan baibain no fiar an, karik neʼe sei book sira atu hatudu respeitu ba ita.”

KONTINUA HAKAʼAS AN ATU HETAN ITA-NIA SALVASAUN

18. Ita presiza halo saida hodi bele hetan Ita-nia salvasaun?

18 Ita aprende ona katak, atu hetan ita rasik nia salvasaun mak responsabilidade neʼebé sériu tebes. Ita presiza lee no hanoin kleʼan kona-ba Maromak nia Liafuan, halo orasaun ba Jeová, no hanoin didiʼak kona-ba dalan oioin neʼebé nia ajuda ona ita. Halo buat sira-neʼe bele ajuda Ita atu fiar liután katak Jeová mak Ita-nia Belun. Neʼe sei book Ita atu koʼalia ba ema seluk kona-ba Ita-nia fiar.—Lee Salmo (Mazmur) 73:28. *

19. Tanbasá mak Ita-nia hakaʼas an atu hetan salvasaun la sai saugati deʼit?

19 Jesus dehan: “Se ema ruma hakarak tuir haʼu, nia tenke nega ninia an rasik no lori ninia ai-riin terus nian no kontinua laʼo tuir haʼu.” (Mateus 16:24) Sin, atu laʼo tuir Jesus, ema kristaun ida-idak tenke dedika ninia an ba Jeová no hetan batizmu. Neʼe loke dalan ba ita atu hetan bensaun oioin ohin loron no lori moris rohan-laek ba ita iha Maromak nia mundu foun. Tan neʼe hakaʼas an nafatin atu hetan Ita-nia salvasaun!

^ par. 9 Salmo 119:105 Ita-nia liafuan mak ahi-oan neʼebé leno haʼu-nia ain, no fó naroman ba haʼu-nia dalan.

^ par. 18 Salmo 73:28 Maibé kona-ba haʼu, atu hakbesik ba Maromak mak diʼak mai haʼu. Haʼu buka ona protesaun husi Jeová, Naʼi Ukun-Naʼin Boot Liu, atu fó sai Ita-nia hahalok sira hotu.