Skip to content

Skip to table of contents

Domin—Hahalok ida neʼebé furak tebes

Domin—Hahalok ida neʼebé furak tebes

JEOVÁ leno apóstolu Paulo hodi hakerek hahalok furak sia neʼebé mai husi espíritu santu. (Galásia 5:22, 23) * Hahalok sira-neʼe mak parte husi hahalok foun neʼebé Maromak hakarak ita atu iha. (Koloso 3:10) Porezemplu, se ai-hun ida mak hetan beibeik bee, ai neʼe sei fó fuan, hanesan neʼe mós se ema ida nia moris mak nakonu ho espíritu santu, nia sei hatudu hahalok furak sira-neʼe.—Salmo (Mazmur) 1:1-3.

Hahalok primeiru neʼebé Paulo temi mak domin. Tanbasá mak hahalok neʼe furak tebes? Paulo hatete katak se la iha domin, nia “la vale buat ida”. (1 Korinto 13:2) Maibé saida mak domin? Oinsá mak ita bele haburas no hatudu hahalok neʼe loron-loron?

SAIDA MAK DOMIN?

Maski difisil atu esplika ho loloos domin mak saida, maibé Bíblia esplika oinsá ita bele hatudu hahalok neʼe. Porezemplu, Bíblia hatete katak domin mak “pasiénsia no laran-diʼak”, “haksolok ho lia-loos”, “lori todan hotu, fiar buat hotu, tau esperansa iha buat hotu, no tahan buat hotu”. Domin mós inklui hanoin ema seluk, hatudu interese, no laran-metin. Maibé, se ema mak la iha domin, nia sei hatudu laran-moras, foti-an, hahalok arbiru, hanoin an, no la fó perdua ba ema seluk. Duké tau hahalok ladiʼak sira-neʼe, diʼak atu hadomi ema ho laran, tanba domin neʼebé loos “la buka nia rasik nia diʼak”.—1 Korinto 13:4-8.

JEOVÁ NO JESUS HATUDU EZEMPLU DIʼAK TEBES KONA-BA DOMIN

“Maromak mak domin.” (1 João 4:8) Jeová halo buat hotu ho domin. Ninia domin boot liu hotu neʼebé nia hatudu ba ema mak hodi haruka Jesus mai rai atu terus no mate ba ita. Apóstolu João dehan: “Iha dalan neʼe mak Maromak hatudu nia domin mai ita, basá nia haruka ninia Oan-Mane mesak ba mundu atu ita bele hetan moris liuhusi nia. Maromak nia domin mak neʼe, laʼós katak ita hadomi ona Maromak, maibé nia hadomi ita no haruka ninia Oan-Mane nuʼudar sakrifísiu neʼebé hasaʼe ona atu taka ita-nia sala hodi nuneʼe ita bele hadame malu fali ho Maromak.” (1 João 4:9, 10) Tanba Maromak nia domin mak ita bele hetan perdua, esperansa no moris.

Jesus hatudu domin ba ema liuhusi fó ninia moris atu halo Maromak nia hakarak. Apóstolu Paulo hatete: “Ho Maromak nia ‘hakarak’ neʼe ita sai santu liuhusi Jesus Kristu nia isin neʼebé nia hasaʼe nuʼudar sakrifísiu dala ida ba nafatin.” (Ebreu 10:9, 10) Jesus dehan: “La iha ema ida iha domin boot liu fali ema neʼebé fó nia moris ba ninia belun sira.” (João 15:13) Ema sala-naʼin bele halo tuir domin neʼebé Jeová no Jesus hatudu ka lae? Bele! Mai ita haree toʼok oinsá mak ita bele halo nuneʼe.

“KONTINUA LAʼO IHA DOMIN”

Paulo fó laran-manas ba ita nuneʼe: “Banati-tuir Maromak nuʼudar ninia oan doben sira, no kontinua laʼo iha domin, hanesan Kristu mós  hadomi imi no fó nia moris ba imi.” (Éfeso 5:1, 2) Liafuan “kontinua laʼo iha domin” katak sá? Neʼe katak hatudu domin iha tempu hotu. Ita la hadomi ho liafuan deʼit, maibé ho ita-nia hahalok sira. Apóstolu João dehan: “Oan doben sira, ita labele hadomi ho liafuan ka ho ibun deʼit, maibé ho hahalok no lia-loos.” (1 João 3:18) Porezemplu, ita haklaken “liafuan diʼak kona-ba Maromak nia Ukun” tanba ita iha domin ba Jeová no ba ita-nia maluk. (Mateus 24:14; Lucas 10:27) Ita mós bele “kontinua laʼo iha domin” bainhira ita hatudu pasiénsia, laran-diʼak, no fó perdua ba ema. Ita hakarak halo tuir Bíblia nia konsellu neʼe: “Nuʼudar Jeová fó perdua ba imi ho laran tomak, imi mós tenke halo nuneʼe.”—Koloso 3:13.

Se ita fó konsellu ka korrije ema, neʼe la hatudu katak ita la iha domin. Porezemplu, atu hapara oan hodi la tanis tan, inan-aman balu halo tuir deʼit oan nia hakarak. Maibé, se inan-aman mak hadomi sira-nia oan, sira sei fó dixiplina iha tempu neʼebé oan halo sala. Hanesan neʼe mós kona-ba Jeová. Maski nia mak Maromak domin nian, maibé nia “fó dixiplina ba sira neʼebé nia hadomi”. (Ebreu 12:6) Tan neʼe mak atu fó dixiplina ba ema iha tempu neʼebé loos, neʼe hatudu domin. (Provérbios [Amsal] 3:11, 12) Maibé tenkesér hanoin-hetan katak, ita hotu sala-naʼin no dala ruma ita mós la hatudu domin. Tan neʼe mak ita hotu presiza hadiʼa liután dalan neʼebé ita hatudu domin. Oinsá mak ita bele halo nuneʼe? Mai ita haree toʼok dalan tolu.

OINSÁ ATU HABURAS DOMIN?

Primeiru, husu Maromak atu fó ninia espíritu santu neʼebé lori hahalok domin. Jesus hatete katak Jeová “fó duni espíritu santu ba sira neʼebé husu ba nia”. (Lucas 11:13) Tan neʼe ita bele fiar katak se ita mak halo orasaun atu husu no husik espíritu santu ajuda ita, ita bele hatudu domin liután. (Galásia 5:16) Porezemplu, se Ita mak katuas kongregasaun, Ita bele husu espíritu santu atu ajuda Ita hatudu domin bainhira Ita uza Bíblia atu fó konsellu ba ema seluk. Ka se Ita mak inan-aman, Ita bele husu Maromak atu fó ninia espíritu santu atu ajuda Ita fó dixiplina ba Ita-nia oan ho domin, no laʼós ho hirus.

Segundu, hanoin oinsá Jesus hatudu domin maski ema trata nia iha dalan neʼebé aat. (1 Pedro 2:21, 23) Se ema ruma hakanek ka trata Ita la ho justisa, husu ba Ita-nia an, ‘Jesus sei halo saida iha situasaun hanesan neʼe?’ Irmán Leigh hatete katak husu pergunta hanesan neʼe ajuda nia atu hanoin uluk antes halo buat ruma. Nia dehan: “Loron ida, haʼu-nia kolega serbisu ida haruka e-mail ba serbisu-naʼin seluk hodi konta aat haʼu no haʼu-nia serbisu. Neʼe hakanek tebes haʼu. Maibé haʼu husu ba haʼu-nia an, ‘Oinsá mak haʼu bele banati-tuir Jesus hodi trata ema neʼe?’ Hanoin tiha kona-ba saida mak Jesus sei halo iha situasaun neʼe, haʼu deside atu husik deʼit. Ikusmai haʼu foin buka-hatene katak kolega serbisu neʼe hasoru hela problema boot ho ninia saúde no nia estrese hela kona-ba buat barak. Haʼu hanoin, karik buat neʼebé nia halo laʼós ho neon. Hanoin kona-ba oinsá Jesus hatudu domin iha tempu neʼebé ema halo aat nia ajuda haʼu hodi hatudu domin neʼebé hanesan ba kolega serbisu neʼe.” Se ita mak banati-tuir Jesus, ita sei hatudu domin ba ema seluk iha tempu hotu.

Terseiru, haburas domin neʼebé la hanoin an deʼit. Domin neʼe mak hatudu sai Jesus nia dixípulu neʼebé loos. (João 13:34, 35) Jesus rasik mós hatudu domin neʼe no ninia ezemplu diʼak tebes ba ita. Oinsá? Tanba ita mak nia “husik buat hotu neʼebé nia iha” hodi “halo tuir toʼo mate”. (Filipe 2:5-8) Bainhira ita halo tuir Jesus nia domin neʼebé la hanoin an deʼit, ita-nia hanoin no sentimentu mós sei sai hanesan ninian, no ita sei hanoin uluk kona-ba ema seluk nia presiza. Hatudu hahalok domin sei lori rezultadu saida tan?

DOMIN LORI REZULTADU DIʼAK

Bainhira ita hatudu domin, neʼe sei lori rezultadu neʼebé diʼak. Haree toʼok ezemplu balu tuirmai neʼe:

Oinsá mak hatudu domin lori rezultadu neʼebé diʼak ba ita?

  •  FAMÍLIA ESPIRITUÁL IHA MUNDU TOMAK: Tanba domin mak ita hatene katak, iha kongregasaun naran deʼit neʼebé ita bá, irmaun-irmán sira sei simu ita ho laran tomak. Hodi hatene katak ita-nia “maluk fiar-naʼin iha mundu tomak” hadomi ita mak bensaun ida husi Jeová! (1 Pedro 5:9) Só Jeová nia povu deʼit mak hatudu domin hanesan neʼe.

  • DAME: Hahalok “tahan malu iha domin” mak halo ita iha dame ho irmaun-irmán sira. (Éfeso 4:2, 3) Ita sente duni dame hanesan neʼe bainhira ita tuir reuniaun no reuniaun boot sira. Iha dame hanesan neʼe iha mundu aat neʼe mak buat neʼebé úniku tebes, loos ka lae? (Salmo [Mazmur] 119:165; Isaías [Yesaya] 54:13) Se ita mak buka dame ho ema seluk, neʼe hatudu katak ita hadomi tebes sira, no neʼe mós halo kontente ita-nia Aman iha lalehan.—Salmo (Mazmur) 133:1-3; Mateus 5:9.

“DOMIN HARII”

Apóstolu Paulo hatete katak “domin harii”. (1 Korinto 8:1) Neʼe katak sá? Iha 1 Korinto kapítulu 13 apóstolu Paulo esplika dalan neʼebé domin harii. Domin mak hahalok neʼebé buka uluk ema seluk nia diʼak. Domin hanoin kona-ba ema seluk nia presiza. (1 Korinto 10:24; 13:5) No mós tanba domin mak hahalok neʼebé hanoin kona-ba ema seluk nia sentimentu, pasiénsia, no laran-diʼak, neʼe ajuda hametin família no kongregasaun.—Koloso 3:14.

Ita-nia domin ba Jeová mak halo ita iha unidade! Tanba domin mak book ema husi rai, rasa, no língua oioin atu “adora nia ho unidade”. (Sofonias [Zefanya] 3:9) Tan neʼe, domin ba Jeová mak importante liu hotu. Mai ita hakaʼas an atu hatudu hahalok furak neʼe neʼebé mai husi espíritu santu iha ita-nia moris loron-loron.

^ par. 2 Neʼe mak lisaun primeiru husi lisaun sia neʼebé sei koʼalia kona-ba hahalok ida-idak neʼebé mai husi espíritu santu.