Skip to content

Skip to table of contents

Buka buat ida neʼebé diʼak liu fali osan-mean

Buka buat ida neʼebé diʼak liu fali osan-mean

Uluk Ita keʼe hetan ona osan-mean ka lae? Karik ema uitoan deʼit mak keʼe ona osan-mean. Maibé ema rihun ba rihun buka-hetan ona buat ida neʼebé diʼak liu fali osan-mean. Neʼe mak matenek husi Maromak. Matenek neʼe osan-mean mós “la bele sosa”. —Jó (Ayub) 28:12, 15.

TUIR loloos buat neʼebé estudante Bíblia halo atu hanesan ho ema neʼebé buka osan-mean. Nia presiza hakaʼas an no buka beibeik eskritura sira hodi bele hetan matenek neʼebé folin-boot. Ita sei haree dalan tolu oinsá mak estudante Bíblia bele aprende husi ema neʼebé buka osan-mean.

ITA HETAN FATUK OSAN-MEAN IDA!

Imajina toʼok se ita mak laʼo hela iha mota-ibun no ita haree iha fatuk kiʼik ida hanesan fatuk britas neʼebé nabilan loos. Ita kontente tebes hodi haree katak neʼe mak fatuk osan-mean ida. Osan-mean neʼe kiʼik liu fali ai-kose ulun, maibé iha folin-boot liu fali fatuk-murak neʼebé diʼak liu. Ita bele fiar katak ita sei buka haleʼu tan atu haree toʼok sei iha ka lae.

Neʼe hanesan ho tempu neʼebé Testemuña ba Jeová hasoru ita iha uma hodi koʼalia kona-ba esperansa husi Bíblia. Karik ita sei hanoin-hetan iha momentu neʼebá ita foin buka-hetan fatuk osan-mean espirituál nian ida. Hanesan, ita foin dala primeiru haree Maromak nia naran Jeová mosu iha Bíblia. (Salmo [Mazmur] 83:18) Ka ita foin hatene katak ita mós bele sai nuʼudar Maromak nia belun. (Tiago 2:23) Iha tempu neʼebá ita hatene kedas katak ita buka-hetan buat ida neʼebé diʼak liu fali osan-mean! Karik ita mós hakarak tebes atu buka fatuk espirituál seluk tan husi tempu neʼebá.

ITA HETAN TAN!

Dala ruma ita bele hetan osan-mean musan kiʼik-kiʼik bou-hamutuk iha mota laran. Se ema neʼebé buka osan-mean hakaʼas an, nia bele hetan tan osan-mean barak neʼebé iha folin toʼo dolar rihun ba rihun.

Bainhira ita foin estuda Bíblia ho Testemuña ba Jeová, karik ita sente hanesan ho ema neʼebé taʼes rai-henek iha mota atu buka osan-mean. Hanoin kleʼan kona-ba eskritura ida-idak bele aumenta ita-nia matenek sai barak liután, no halo ita riku iha dalan espirituál nian. Bainhira ita hanoin kleʼan kona-ba lia-loos husi Bíblia, ita aprende katak ita mós bele hakbesik ba Jeová no simu ninia domin hodi moris ba nafatin.—Tiago 4:8; Judas 20, 21.

Ita hanesan ema neʼebé hakaʼas an atu buka osan-mean hodi badinas aprende kona-ba lia-loos neʼebé folin-boot husi Bíblia ka lae?

Karik ita mós hanesan ho ema neʼebé taʼes  osan-mean, ita badinas tebes atu buka rikusoin espirituál neʼebé folin-boot tebes. Bainhira ita aprende tiha lia-loos importante sira husi Bíblia, neʼe book duni ita atu dedika ita-nia an no hetan batizmu.—Mateus 28:19, 20.

KONTINUA BUKA NAFATIN!

Karik ema neʼebé buka osan-mean mós bele hetan osan-mean balu husi fatuk. Ema raʼut no baku rahun fatuk sira-neʼe hodi hasai osan-mean. Se ita hateke liu deʼit, ita la bele haree osan-mean iha fatuk sira-neʼe. Tanbasá? Tanba fatuk neʼebé diʼak, karik tonelada ida mak hetan osan-mean grama 10 deʼit. Maibé ba ema neʼebé buka osan-mean, hetan uitoan mós nia hakarak hakaʼas an atu buka.

Ema neʼebé hatene ona “hanorin neʼebé simples kona-ba Kristu” mós presiza hakaʼas an nafatin. (Ebreu 6:1, 2) Ita presiza hakaʼas an atu bele keʼe sai informasaun foun no diʼak ba ita-nia moris husi ita-nia estudu Bíblia. Entaun, saida mak ita bele halo hodi ita-nia estudu Bíblia bele lori rezultadu neʼebé diʼak nafatin maski ita estuda ona eskritura sira ba tinan barak ona?

Badinas aprende nafatin. Fó atensaun didiʼak ba informasaun hotu. Kontinua hakaʼas an hodi ita bele hetan tan matenek folin-boot no matadalan sira husi eskritura. (Roma 11:33) Aproveita didiʼak ajuda neʼebé ita iha atu halo riset iha ita-nia língua. Buka matadalan no resposta ba ita-nia pergunta kona-ba Bíblia ho pasiénsia. Husu ema seluk kona-ba eskritura no informasaun saida mak ajuda tebes sira no saida mak fó laran-manas ba sira. Fahe pontu importante husi Bíblia neʼebé ita hetan husi ita-nia estudu Bíblia ho ema seluk.

Maibé, buat neʼebé ita hakarak mak laʼós atu aumenta matenek deʼit. Apóstolu Paulo fó avizu katak “matenek halo ema foti an”. (1 Korinto 8:1) Tan neʼe, hakaʼas an atu haraik-an nafatin no iha fiar neʼebé metin. Halaʼo adorasaun família nian no estuda mesak beibeik bele ajuda ita atu moris tuir Jeová nia hakarak no bele mós book ita atu ajuda ema seluk. Buat neʼebé diʼak liután mak ita iha haksolok tanba ita hetan ona buat ida neʼebé diʼak liu fali osan-mean.—Provérbios (Amsal) 3:13, 14.