Skip to content

Skip to table of contents

 ESPERIÉNSIA

Hakarak atu sai Kristu nia soldadu ida

Hakarak atu sai Kristu nia soldadu ida

Nuʼudar kilat-musan sira semo husi haʼu-nia sorin-sorin, haʼu hiʼit saʼe neineik haʼu-nia lensu mutin. Soldadu sira neʼebé tiru daudaun kilat hakilar mai haʼu atu sai husi haʼu-nia subar-fatin. Haʼu laʼo sai neineik no la hatene katak haʼu sei moris ka mate. Tanbasá mak haʼu hasoru situasaun perigu neʼe?

HAʼU moris iha tinan 1926 iha knua kiʼik ida naran Karítsa, rai-Grésia. Ami oan hamutuk naʼin-ualu, haʼu mak oan númeru hitu. Ami-nia inan-aman mak ema neʼebé badinas tebes.

Iha 1925, haʼu-nia inan-aman hasoru John Papparizos neʼebé badinas no koʼalia barak. Nia Testemuña ba Jeová ida, uluk bolu nuʼudar Estudante Bíblia. Haʼu-nia inan-aman gosta tebes dalan neʼebé John esplika eskritura sira ho matenek, tan neʼe sira komesa tuir reuniaun sira iha ami-nia knua. Maski haʼu-nia inan ladún hatene lee, maibé nia iha fiar neʼebé metin ba Jeová, no nia mós aproveita oportunidade diʼak sira hodi haklaken ba ema. Maibé triste tebes mak haʼu-nia apá husik ema seluk nia hahalok la perfeitu halo nia sidi, no neineik-neineik nia la tuir ona reuniaun sira.

Ami maun-alin sira respeitu tebes Bíblia, maibé nuʼudar ami sai boot, ami preokupa liu ba hakarak joven nian. Tuirmai, iha 1939, Funu Mundiál Segundu akontese iha Europa, no akontesimentu ida iha ami-nia knua halo ami hakfodak. Ema kaer ami-nia primu naran Nicolas Psarras atu tuir tropa gregu. Nia idade 20 deʼit no foin hetan batizmu, maibé ho aten-brani nia hatete ba militár sira, “Haʼu la bele halo funu tanba haʼu mak Kristu nia soldadu ida.” Sira lori nia ba tribunál militár nian no julga nia ba tinan sanulu iha komarka. Ami hotu sai bilán kona-ba akontesimentu neʼe!

Diʼak tanba iha 1941 nia hahú, tropa husi Bretaña no nasaun seluk tama iha Grésia ba tempu uitoan no Nicolas sai fali husi komarka. Nia fila fali ba Karítsa. Iha neʼebá, haʼu-nia maun boot Ilias husu nia pergunta oioin kona-ba Bíblia. Haʼu mós rona didiʼak ba sira. Ikusmai, Ilias, haʼu, no haʼu-nia  alin-feto Efmorfia komesa estuda Bíblia, no tuir beibeik reuniaun sira. Tinan tuirmai, ami naʼin-tolu dedika ami-nia moris ba Jeová no hetan batizmu. Ikusmai haʼu-nia maun naʼin-rua no biin naʼin-rua mós sai Testemuña.

Iha 1942, kongregasaun Karítsa iha irmaun-irmán joven hamutuk naʼin-sia ho idade husi 15 toʼo 25. Ami hatene katak ami sei hasoru susar iha futuru. Tan neʼe ami komesa hametin ami-nia fiar liuhusi aproveita tempu hodi estuda Bíblia hamutuk, kanta hahiʼi ba Jeová, no halo orasaun. Rezultadu mak ami-nia fiar sai metin liután.

Demetrius ho kolega sira iha Karítsa

FUNU IHA RAI LARAN

Bainhira Funu Mundiál Segundu besik ramata, partidu komunista gregu nian kontra hasoru governu gregu, no neʼe hamosu funu iha rai laran. Gerrilla komunista sira laʼo ba knua oioin hodi obriga ema tuir sira. Bainhira sira tama iha ami-nia knua, sira kaer subar ami joven Testemuñu naʼin-tolu, haʼu, Ilias no Antonio Tsoukaris. Ami koʼalia beibeik ba sira katak ami mak ema kristaun neʼebé lakohi mete iha funu, maibé sira obriga nafatin ami hodi laʼo oras 12 husi ami-nia knua bá toʼo Foho Olympus nian.

Lakleur, soldadu komunista ida manda ami atu tuir grupu gerrilla nian. Ami esplika ba nia katak ema kristaun neʼebé loos la kaer kilat hasoru ema no neʼe halo nia hirus tebes. Nia lori ami ba hasoru jenerál ida. Ami esplika ami-nia razaun ba jenerál, no nia hatete ba ami, “Se nuneʼe lori kuda neʼe bá tula ema sira neʼebé kanek husi funu ba ospitál.”

Ami hatán ba nia, “Maibé oinsá se soldadu husi governu kaer ami, sira sei hanoin katak ami mós halo funu, loos ka lae?” Nia dehan, “Entaun imi lori deʼit paun hodi fó ba sira neʼebé funu iha liña frente.” Ami esplika tan ba nia, “Maibé oinsá se komandante ida haree ami ho kuda, depois nia haruka ami atu lori kilat ba liña frente?” Jenerál neʼe hanoin didiʼak tiha, ikusmai nia hatete: “Se hanesan neʼe, imi bele tau matan ba bibi-malae deʼit!”

Ami naʼin-tolu sente katak tau matan ba bibi-malae la kontra ami-nia konxiénsia. Tinan ida liutiha, tanba Ilias mak oan boot, sira husik nia atu fila ba uma hodi tau matan ba ami-nia inan neʼebé faluk ona. Antonio mós kona moras, tan neʼe sira husik nia fila ba uma. Maibé sira kaer nafatin haʼu.

Iha tempu neʼe, soldadu gregu sira komesa avansa toʼo fatin komunista sira. Grupu neʼebé kaer hela haʼu halai ba foho besik rai-Albánia. Bainhira besik ona fronteira, derrepente ami haree soldadu gregu sira mak haleʼu ami. Tanba hakfodak, ema sira neʼebé kaer haʼu halai. Haʼu subar iha ai ida neʼebé monu ona, neʼe mak situasaun neʼebé haʼu konta uluk kona-ba soldadu sira atu tiru haʼu.

Bainhira haʼu fó-hatene ba soldadu gregu katak grupu komunista mak kaer haʼu, sira lori haʼu ba kampu militár besik Véroia, sidade antigu husi Bíblia neʼebé uluk naran Bereia. Iha neʼebá, sira haruka haʼu keʼe soldadu sira-nia subar-fatin. Bainhira haʼu lakohi halo tuir, komandante haruka lori haʼu ba kastigu iha illa Makrónisos (Makronisi).

 ILLA TERUS NIAN

Makrónisos mak illa ida neʼebé maran no manas tebes, besik tasi-ibun Attica no dook husi sidade Atenas ba kilómetru 50. Illa neʼe naruk kilómetru 13 no luan kilómetru 2,5. Maibé husi tinan 1947 toʼo 1958, ema naʼin–100.000 mak hetan ona kastigu iha neʼe. Ema sira-neʼe mak ema komunista ka deskonfia envolve ho komunista sira, iha mós ema neʼebé uluk kontra governu, no Testemuña ba Jeová sira.

Bainhira haʼu toʼo iha fatin neʼe iha 1949, sira fahe prizioneiru ba grupu barak. Sira tau haʼu iha grupu neʼebé livre uitoan, hamutuk ho ema atus ba atus. Ami naʼin-40 toba deʼit iha rai, iha lona laran neʼebé ema naʼin-sanulu deʼit mak bele toba. Ami hemu bee foʼer no dala barak han deʼit koto been no berinjela. Fatin neʼe rai-rahun no anin makaʼas, halo haʼu terus duni. Maibé diʼak tanba sira la haruka ami hulan fatuk bá-mai, tanba neʼe mak dalan neʼebé haterus ona ema barak.

Hamutuk ho Testemuña sira seluk iha illa Makrónisos

Loron ida haʼu laʼo hela iha tasi-ibun, haʼu hasoru Testemuña balu husi grupu seluk. Haʼu haksolok tebes bele hamutuk ho sira! Ami sempre buka oportunidade hodi bele halibur hamutuk subasubar. Ami mós uza matenek hodi haklaken ba prizioneiru seluk, no balu ikusmai sai duni Testemuña ba Jeová. Haklaken no halo orasaun ajuda ami atu iha relasaun metin nafatin ho Jeová.

TERUS SAI MAKAʼAS LIUTÁN

Hetan tiha kastigu ba fulan sanulu, ema neʼebé kaer haʼu fó farda ba haʼu tama militár. Kuandu haʼu lakohi halo tuir, sira lori haʼu ba hasoru komandante. Haʼu entrega karta ida ba komandante, dehan, “Haʼu hakarak deʼit sai Kristu nia soldadu ida.” Komandante neʼe ameasa haʼu no entrega fali haʼu ba komandante seluk. Nia mak bispu ida husi igreja Ortodoksu Gregu nian no nia hatais batina kompletu. Kuandu haʼu ho aten-brani hatán ba nia pergunta sira hodi uza eskritura husi Bíblia, nia ho hirus dehan: “Lori nia sai husi neʼe. Nia mak ema neʼebé fanátiku tebes!”

Iha loron tuirmai, soldadu sira obriga tan haʼu atu simu farda. Kuandu haʼu lakohi halo tuir, sira tuku no baku haʼu ho ai. Tuirmai sira lori haʼu ba fatin tratamentu atu hatene se haʼu-nia ruin la tohar no depois neʼe sira rasta fali haʼu ba tenda. Sira halo hanesan neʼe mai haʼu ba fulan rua nia laran.

Tanba haʼu nafatin kaer metin ba haʼu-nia fiar, soldadu sira koko fali dalan seluk atu haterus haʼu. Soldadu sira kesi haʼu-nia liman ba kotuk no uza tali atu baku haʼu-nia ain laran ho makaʼas tebes. Iha moras nia laran, haʼu hanoin-hetan Jesus nia liafuan neʼebé dehan: “Kontente ba imi kuandu ema koʼalia aat imi no fó-terus ba imi . . . Haksoit bá ho haksolok, tanba imi-nia kolen boot tebes iha lalehan, basá iha dalan hanesan neʼe mós sira fó-terus ba profeta sira neʼebé uluk liu imi.” (Mateus 5:11, 12) Ikusmai, tanba haʼu la bele tahan ona moras neʼe, haʼu dezmaia.

Haʼu hadeer mai haʼu iha komarka laran neʼebé malirin tebes hanesan jelu, la iha paun, bee ka manta. Maski nuneʼe, haʼu sente kalma nafatin tanba Maromak nia dame mak halo haʼu kontente no fó kbiit ba haʼu atu tahan hanesan temi iha Filipe 4:7. Loron tuirmai, soldadu ida neʼebé laran-diʼak fó paun no bee no mós jaketa ida ba haʼu. Soldadu seluk fali fó nia hahán ba haʼu. Ho ajuda oioin neʼebé haʼu simu, haʼu bele sente katak Jeová tau matan duni ba haʼu.

Autoridade sira haree haʼu hanesan kontradór neʼebé ulun-toos no sira lori haʼu ba Atenas atu hatán iha tribunál militár nian. Iha neʼebá mak sira foti desizaun atu kastigu haʼu ba tinan tolu iha Yíaros (Gyaros), illa ida neʼebé dook maizumenus kilómetru 50 husi Makrónisos parte leste.

“AMI BELE TAU FIAR BA IMI”

Komarka Yíaros mak komarka boot ida neʼebé harii husi tezolu mean no iha prizioneiru polítiku naʼin–5.000 liu mak sulan iha neʼebá, inklui Testemuña ba Jeová naʼin-hitu tanba lakohi envolve an ho polítiku. Ami naʼin-hitu hasoru malu subasubar atu estuda Bíblia hamutuk maski sira bandu makaʼas prizioneiru sira atu hasoru malu. Liután neʼe, ami mós simu beibeik Livru Haklaken subasubar husi ema seluk, depois ami hakerek fali ho liman hodi fahe ba malu atu estuda hamutuk.

 Loron ida kuandu ami estuda subasubar hela, derrepente deʼit guarda prizaun ida tama ba ami-nia fatin no hadau hotu ami-nia livru sira. Depois neʼe, sira mós lori ami ba hasoru xefe ba prizaun nian no ami hanoin katak sira sei hanaruk tan ami-nia kastigu. Maibé xefe ba prizaun dehan ba ami: “Ami hatene imi ema hanesan saida, no ami respeitu imi-nia fiar. Ami hatene katak ami bele tau fiar ba imi. Fila fali ba serbisu.” Nia mós fó serbisu neʼebé kmaan liután ba ami balu. Ami agradese tebes ba Jeová. Maski iha komarka laran, ami-nia laran-metin bele lori hahiʼi ba nia.

Ami-nia laran-metin mós lori rezultadu diʼak seluk tan. Tanba hahalok diʼak neʼebé ami hatudu iha komarka laran, ikusmai book prizioneiru ida neʼebé uluk serbisu nuʼudar mestre matemátika hakbesik ba ami atu buka-hatene liután kona-ba ami-nia fiar. Kuandu ami sai husi komarka iha 1951, nia mós hetan livre. Tuirmai, nia hetan batizmu no serbí nuʼudar haklaken-naʼin ba tempu-tomak.

NAFATIN NUʼUDAR SOLDADU IDA

Ho haʼu-nia feen, Janette

Depois sai husi komarka, haʼu fila fali ba haʼu-nia família iha Karítsa. Ikusmai, ema barak husi Grésia muda ba Melbourne, Austrália, inklui mós haʼu. Iha neʼebá haʼu hasoru Janette no kaben ho nia, nia mak irmán ida neʼebé laran-diʼak, no ami haboot ami-nia oan-mane ida no oan-feto naʼin-tolu tuir Bíblia nia matadalan.

Ohin loron, maski haʼu idade 90 liu ona, haʼu sei badinas nafatin serbí nuʼudar katuas kongregasaun ida. Tanba kanek neʼebé haʼu hetan uluk, neʼe halo haʼu-nia isin no ain dala ruma siin, liuliu depois haklaken. Maski nuneʼe, haʼu-nia hakarak atu sai Kristu nia soldadu ida, metin liután.—2 Timóteo 2:3.