Skip to content

Skip to table of contents

Mantein neutrál iha mundu neʼebé laiha unidade

Mantein neutrál iha mundu neʼebé laiha unidade

“Fó . . . ba Maromak buat neʼebé Maromak nian.”—MATEUS 22:21.

KNANANUK: 33, 137

1. Iha dalan saida mak ita bele halo tuir Maromak no ema nia governu?

MAROMAK nia Liafuan haruka ita atu halo tuir ema nia governu, maibé Bíblia mós hatete katak ita tenke halo tuir Maromak duké halo tuir ema. (Apóstolu 5:29; Tito 3:1) Liafuan sira-neʼe kontra malu ka lae? Lae. Jesus uza prinsípiu ida hodi ajuda ita atu hatene sé mak ita tenke halo tuir. Jesus hatete katak ita tenke “fó ba Liurai Roma buat neʼebé Liurai Roma nian, no ba Maromak buat neʼebé Maromak nian”. [1] (Haree nota husi lisaun.) (Mateus 22:21) Oinsá mak ita bele halo tuir Jesus nia liafuan neʼe? “Fó ba Liurai Roma buat neʼebé Liurai Roma nian” mak bainhira ita halo tuir governu nia lei sira, hatudu respeitu ba governu nia elementu sira, no selu taxa. (Roma 13:7) Maibé, se governu mak haruka ita atu halo buat neʼebé kontra Maromak, ho respeitu ita la bele halo tuir deʼit.

2. Oinsá mak ita bele hatudu katak ita la mete ba polítiku mundu neʼe nian?

2 Dalan ida neʼebé ita fó ba Maromak buat neʼebé Maromak nian mak la mete ba buat polítiku no nafatin neutrál. (Isaías [Yesaya] 2:4) Tuir loloos Jeová mak husik ema nia governu atu ukun, tan neʼe mak ita la bele kontra sira. Maibé ita mós lakohi envolve an iha atividade patriotizmu ka nasionalizmu sira. (Roma 13:1, 2) Ita la koko atu troka governu, vota, ka sai kandidatu ba partidu polítiku ruma.

3. Tanbasá mak ita tenkesér neutrál?

 3 Bíblia koʼalia kona-ba razaun balu tanbasá mak Maromak hakarak ita atu la mete ba buat polítiku nian. Razaun primeiru mak tanba Jesus Kristu “laʼós parte husi mundu neʼe”. Jesus nunka mete polítiku ka buat funu nian, tan neʼe ita hakarak banati-tuir nia. (João 6:15; 17:16) Razaun seluk mak tanba ita hakarak apoia Maromak nia Ukun. Se ita mak neutrál, ita mós bele iha konxiénsia neʼebé moos bainhira ita haklaken ba ema katak só Maromak nia Ukun mesak deʼit mak bele rezolve ema nia problema hotu. Tanba relijiaun falsu sira mete ba buat polítiku nian mak halo ema fahe malu, maibé ita lae, ita bele iha unidade iha mundu tomak tanba ita mantein pozisaun neʼebé neutrál.—1 Pedro 2:17.

4. (a) Tanbasá mak ita bele fiar katak sei susar ba ita atu mantein neutrál iha futuru? (b) Tanbasá mak ita tenke hametin ita-nia hakarak agora kedas atu la mete buat polítiku nian?

4 Karik iha fatin neʼebé ita hela daudauk situasaun polítiku sei kalma no ita la presiza preokupa ho ita-nia pozisaun neutrál ba buat polítiku nian. Maibé tanba Satanás nia mundu besik ona atu remata, ita bele fiar katak sei susar ba ita atu mantein ita-nia pozisaun neutrál iha futuru. Ohin loron ema barak sai ona “ulun-toos” no “lakohi simu konsellu”, tan neʼe iha futuru ema sei fahe malu liután. (2 Timóteo 3:3, 4) Iha nasaun balu, ita-nia irmaun-irmán sira hasoru ona situasaun neʼebé problema polítiku troka derrepente deʼit. Tan neʼe mak bainhira situasaun polítiku kalma hela, ita tenke prepara an ka hametin ita-nia hakarak atu la mete ba buat polítiku nian. Se ita hein toʼo situasaun grave mak foin hakfodak, karik ita bele halo buat neʼebé kontra ita-nia desizaun ba buat polítiku nian. Agora mai ita koʼalia kona-ba dalan haat atu prepara an ba situasaun neʼe.

HAREE GOVERNU SIRA HANESAN JEOVÁ HAREE SIRA

5. Oinsá mak Jeová haree ema nia governu sira?

5 Dalan primeiru atu bele neutrál mak haree ema nia governu hanesan Jeová haree sira. Bainhira Jeová kria ema, nia nunka kria ema iha dalan neʼebé ema atu ukun ema seluk. (Jeremias [Yeremia] 10:23) Ema nia governu sira sempre book ema atu hatudu hahalok nasionalizmu, no neʼe halo ema fahe malu. Maski iha ulun-naʼin balu mak diʼak tebes, maibé sira labele rezolve ema nia problema sira. No mós komesa husi tinan 1914, ema nia governu sai ona hanesan inimigu ba Maromak nia Ukun, no lakleur tan Maromak nia Ukun sei halakon hotu ema nia governu sira.—Lee Salmo (Mazmur) 2:2, 9. [2]

6. Ita tenke hatudu hahalok saida ba ema husi governu sira?

6 Maromak husik ema nia governu atu ukun tanba sira bele kontrola situasaun hodi iha dame no hakmatek. Ida-neʼe ajuda tebes ita atu haklaken Maromak nia mensajen. (Roma 13:3, 4) Maromak mós hakarak ita atu halo orasaun kona-ba sira hodi desizaun neʼebé sira halo bele apoia ita adora Jeová ho hakmatek. (1 Timóteo 2:1, 2) Apóstolu Paulo hatete katak se ema ruma trata ita la ho justisa, ita mós bele husu governu sira-nia ajuda. (Apóstolu 25:11) Maski Bíblia dehan katak Satanás mak kontrola governu hotu iha mundu neʼe, maibé Bíblia la dehan katak nia mak kontrola ema ida-idak iha governu sira-neʼe. (Lucas 4:5, 6) Tan neʼe ita la bele koʼalia katak ema husi governu neʼe Diabu mak kontrola. Bíblia anima ita katak bainhira hasoru ema husi “governu no ukun-naʼin sira” ita la bele “koʼalia aat kona-ba ema ida”.—Tito 3:1, 2.

7. Ita tenke hasees an husi hanoin saida?

7 Ita halo tuir Maromak hodi la apoia ba kualkér kandidatu, partidu, ka opiniaun polítiku ida. Dala ruma neʼe la fasil atu halo  tuir. Porezemplu, hanoin toʼok se governu ida mak lori terus barak ba povu, inklui mós Testemuña ba Jeová sira, no povu komesa kontra governu neʼe. Ita hatene katak ita lakohi tama iha protesta sira-nia leet hodi kontra governu neʼe. Maibé ita bele hanoin hanesan neʼe ka lae, katak protesta sira-neʼe mak loos no ita espera katak sira mak manán? (Éfeso 2:2) Se ita neutrál, ita la bele iha hanoin hanesan neʼe, sesé deʼit mós ita la bele apoia, liuhusi hahalok no ibun deʼit mós la bele.

“MATAN-MORIS” MAIBÉ “LARAN-MOOS”

8. Oinsá mak ita bele “matan-moris” no “laran-moos” hodi la mete ba buat polítiku nian?

8 Dalan segundu atu neutrál mak ‘matan-moris hanesan samea, maibé laran-moos hanesan manu-pombu’. (Lee Mateus 10:16, 17.) Ita hatudu “matan-moris” liuhusi hanoin uluk kona-ba perigu sira, no “laran-moos” hodi kaer metin ba ita-nia pozisaun neutrál. Agora mai ita koʼalia kona-ba situasaun balu no haree toʼok oinsá mak ita bele neutrál nafatin iha situasaun sira-neʼe.

9. Ita tenke kuidadu kona-ba saida iha ita-nia koʼalia?

9 Ita-nia koʼalia. Ita tenkesér kuidadu se ema komesa koʼalia kona-ba buat polítiku nian. Porezemplu, bainhira ita haklaken hela ba ema, kuidadu atu la gaba ka krítika kona-ba partidu polítiku nia ideia ka kona-ba ulun-naʼin ida. Duké koʼalia kona-ba saida mak ema bele halo atu rezolve problema sira, diʼak liu hatudu eskritura ba sira atu haree katak Maromak nia Ukun deʼit mak bele rezolve problema sira-neʼe ba nafatin. Se ema mak komesa diskute kona-ba tópiku sensitivu, hanesan kona-ba omoseksuál kaben ho malu ka kona-ba abortu, diʼak atu uza Maromak nia Liafuan hodi esplika ba sira kona-ba Maromak nia morál no esplika ba sira oinsá mak ita bele moris tuir morál sira-neʼe. Se ema hatete katak lei ruma presiza troka ka hasai, ita la bele fó ita-nia opiniaun, no ita mós la bele obriga ema neʼe atu troka ninia hanoin.

10. Oinsá mak ita bele iha hanoin neʼebé neutrál nafatin bainhira haree ka lee notísias?

10 Notísias. Dala ruma notísias bele fó sai informasaun neʼebé todan ba sorin deʼit, liuliu iha nasaun sira neʼebé governu mak kontrola atu fó sai notísias sira. Se jornalista ka notísias ida mak fó sai deʼit informasaun neʼebé todan ba parte ida deʼit, nuʼudar ema kristaun ita tenkesér kuidadu tebes atu la husik buat neʼebé sira fó sai atu book ita hanoin hanesan sira. Porezemplu, ita hanoin hanesan neʼe ka lae: ‘Haʼu gosta rona ba jornalista ida-neʼe tanba haʼu konkorda ho buat neʼebé nia hatete kona-ba ideia polítiku nian.’ Se nuneʼe, diʼak atu la haree ka rona ba reportajen sira neʼebé fó sai informasaun neʼebé todan ba buat polítiku nian. Diʼak atu hanoin beibeik kona-ba buat neʼebé ita rona la bele kontra “liafuan loloos” husi Bíblia.—2 Timóteo 1:13.

11. Oinsá mak materializmu perigu ba ita-nia pozisaun atu neutrál?

11 Materializmu. Se ita mak haree osan ka sasán nuʼudar buat neʼebé importante tebes ba ita-nia moris, neʼe bele halo susar ba ita atu mantein pozisaun neʼebé neutrál. Porezemplu, iha tinan 1970, tanba lakohi tuir partidu, ema fó terus ba Testemuña sira iha rai-Malavi. Tan neʼe sira barak presiza husik sasán no rikusoin hotu hodi halai. Maibé triste mak balu hakarak moris diʼak nafatin no lakohi husik sira-nia sasán. Irmán ida naran Ruth hatete: “Testemuña balu halai hamutuk ho ami, maibé ikusmai tama fali partidu hodi sira bele fila fali ba uma atu bele moris diʼak nafatin, sira lakohi moris iha kampu refujiadu.” Maibé Maromak nia povu barak mak mantein nafatin neutrál maski moris ho problema ekonomia no lakon sira-nia sasán hotu.—Ebreu 10:34.

12, 13. (a) Jeová hanoin oinsá kona-ba ema? (b) Oinsá mak ita hatene se ita foti an kona-ba ita-nia rai?

 12 Foti-an. Baibain ema gosta gaba sira-nia rasa, suku, kultura, sidade, ka nasaun. Maibé, Jeová nunka iha hanoin katak ema ida ka grupu husi ema ruma diʼak liu fali seluk, ba nia ita hotu hanesan deʼit. Diʼak tanba nia kria ema ida-idak la hanesan, hodi nuneʼe ita bele haksolok ho kultura neʼebé la hanesan. Jeová nunka hakarak ita atu husik ita-nia kultura, maibé nia mós lakohi ita atu hanoin katak ita mak diʼak liu fali ema seluk.—Roma 10:12.

13 Gaba an liu kona-ba ita-nia nasaun mak nasionalizmu nia hun. Se ita mak iha hanoin hanesan neʼe, karik neʼe bele halo susar ba ita atu mantein neutrál. Buat hanesan neʼe akontese ona ba ema balu iha apóstolu sira-nia tempu. Irmaun-irmán balu diskrimina malu tan deʼit sira mai husi rai neʼebé la hanesan. (Apóstolu 6:1) Oinsá mak ita bele buka-hatene ita rasik iha problema hanesan neʼe ka laiha? Porezemplu, se iha irmaun ka irmán ida neʼebé husi rai seluk fó sujestaun ida ba ita, no ita hanoin kedas hanesan neʼe, ‘Iha neʼe ami hatene liu imi’, depois, ita lakohi simu ninia sujestaun neʼe. Se nuneʼe, hanoin kona-ba konsellu importante neʼe: “Haraik-an hodi haree ema seluk boot liu imi.”—Filipe 2:3.

AJUDA HUSI JEOVÁ

14. Oinsá mak orasaun bele ajuda ita, no ezemplu saida husi Bíblia mak fó prova kona-ba neʼe?

14 Dalan terseiru atu neutrál mak sadere ba Jeová nia ajuda. Husu Jeová fó ninia espíritu santu liuhusi orasaun, neʼe bele ajuda ita atu iha hahalok pasiénsia no kontrola an. Hahalok sira-neʼe bele ajuda ita tahan hasoru governu sira neʼebé mak la justu ka halo korrupsaun. Ita mós bele husu matenek husi Jeová atu ajuda ita tetu situasaun ho didiʼak hodi ita la halo buat neʼebé kontra ita-nia pozisaun atu bele neutrál nafatin. (Tiago 1:5) Se tanba ita-nia adorasaun mak ema kaer ita ba komarka ka fó kastigu ita, halo orasaun atu husu kbiit husi Jeová hodi ajuda ita esplika ita-nia fiar ho aten-brani. Ita bele fiar katak Jeová sei ajuda duni ita.—Lee Apóstolu 4:27-31.

15. Oinsá mak Bíblia bele ajuda ita atu mantein neutrál? (Haree mós kaixa “Maromak nia Liafuan ajuda hametin sira-nia desizaun.”)

15 Jeová mós bele hametin ita liuhusi ninia Liafuan. Medita didiʼak kona-ba eskritura sira neʼebé ajuda ita atu bele mantein neutrál. Hanoin didiʼak kona-ba eskritura sira-neʼe, no koko atu dekór, tanba se loron ida mak ita laiha Bíblia, eskritura sira-neʼe sei ajuda ita. Bíblia mós bele hametin ita-nia esperansa kona-ba futuru. Ita presiza duni esperansa neʼe atu bele tahan hasoru terus sira. (Roma 8:25) Hili eskritura sira neʼebé mak koʼalia kona-ba buat neʼebé ita gosta atu halo iha mundu foun no imajina katak ita halo hela buat sira-neʼe iha neʼebá.

EZEMPLU HUSI JEOVÁ NIA ATAN SIRA NEʼEBÉ LARAN-METIN AJUDA ITA

16, 17. Oinsá mak ezemplu husi Jeová nia atan sira neʼebé laran-metin bele ajuda ita atu mantein neutrál nafatin? (Haree foto iha pájina 27.)

16 Dalan ikus atu neutrál mak hanoin kona-ba ezemplu husi Jeová nia atan sira neʼebé laran-metin ba nia. Ezemplu sira-neʼe bele ajuda ita atu iha matenek no kbiit hodi tahan hasoru susar no terus. Ezemplu ida mak kona-ba Sadrak, Mexak, no Abednego neʼebé lakohi adora estátua boot ida neʼebé mak reprezenta governu Babilónia nian. (Lee Daniel 3:16-18. [3]) Lee kona-ba sira-nia ezemplu ajuda ona Testemuña barak atu iha aten-brani hodi kaer metin ba sira-nia pozisaun atu la adora bandeira husi rai neʼebé sira hela. Jesus mós la mete buat polítiku ka ema nia konflitu sira. Nia hatene katak ninia ezemplu neʼe bele ajuda ninia dixípulu, tan neʼe nia dehan: “Aten-brani bá! Basá haʼu manán tiha ona mundu.”—João 16:33.

 17 Ohin loron, Testemuña barak mós mantein sira-nia pozisaun atu neutrál nafatin. Tan neʼe, sira balu ema fó terus, balu ema kaer ba kadeia, no balu tan ema oho, tan deʼit sira hakarak laran-metin ba Jeová. Sira-nia ezemplu bele ajuda ita. Porezemplu, irmaun ida naran Baris husi rai-Turkia hatete: “Franz Reiter mak irmaun joven ida neʼebé ema oho tanba nia lakohi tama militár iha Hitler nia tempu. Kalan antes nia mate, nia hakerek karta ida ba ninia amá. Buat neʼebé nia hakerek hatudu duni katak nia iha fiar neʼebé boot no nia tau fiar metin ba Jeová. Se haʼu mak hasoru situasaun hanesan ninian, haʼu mós hakarak halo tuir ninia ezemplu.” [4]—Haree nota husi lisaun.

18, 19. (a) Oinsá mak irmaun-irmán sira husi ita-nia kongregasaun bele ajuda ita atu neutrál? (b) Ita hakarak atu halo saida?

18 Irmaun-irmán sira husi ita-nia kongregasaun mós bele ajuda ita atu mantein neutrál. Se ita mak hasoru hela problema kona-ba atu mantein neutrál, fó-hatene ba katuas sira no buka Bíblia nia konsellu husi sira. Kuandu irmaun-irmán sira husi ita-nia kongregasaun hatene katak ita hasoru hela problema neʼe, sira mós sei hakarak fó laran-manas ba ita. Husu sira atu halo orasaun ba ita. Ita rasik mós tenke halo buat neʼebé hanesan ba ema seluk se sira mak hasoru hela problema hanesan neʼe. (Mateus 7:12) Uza ita-nia sítiu jw.org atu buka irmaun-irmán sira neʼebé hasoru hela susar neʼe hodi halo orasaun ba sira. (Buka iha “Saksi-Saksi Yehuwa yang Dipenjarakan Karena Iman Mereka—Menurut Lokasi”, no loke iha RUANG BERITA > BERITA HUKUM.) Bainhira hetan tiha sira-nia naran, husu Jeová atu fó aten-brani ba irmaun-irmán sira-neʼe hodi sira bele mantein sira-nia laran-metin ba nia.—Éfeso 6:19, 20.

19 Nuʼudar tempu besik toʼo ona ba Maromak atu halakon ema nia governu sira, ita mós bele fiar katak neineik-neineik sira sei sai ulun-toos atu la husik ita mantein neutrál ba buat polítiku nian. Tan neʼe mak importante ba ita atu prepara an agora kedas hodi bele kaer metin ba ita-nia pozisaun atu mantein neutrál iha mundu neʼebé laiha unidade neʼe!

^ [1] (parágrafu 1) Jesus uza Liurai Roma atu koʼalia kona-ba governu, tanba Liurai Roma mak pozisaun neʼebé aas liu hotu iha ninia tempu.

^ [2] (parágrafu 5) Salmo 2:2, 9 Liurai sira rai neʼe nian sai hanesan kontradór no ukun-naʼin sira halibur an hamutuk ho hanoin ida deʼit hodi kontra Jeová no kontra ida neʼebé nia hili ona. Ó sei harahun sira ho ai-tonka besi nian, no ó sei harahun sira hanesan sanan-rai ida.”

^ [3] (parágrafu 16) Daniel 3:16-18 16 Sadrak, Mexak, no Abednego hatán ba liurai: “Oh, Nabukodonozor, kona-ba neʼe ami la presiza hatán ba Ita. 17 Se neʼe mak tenkesér nuneʼe duni, ami-nia Maromak neʼebé ami serbí bele salva ami husi fornu neʼebé ahi lakan makaʼas neʼe, no husi Ita-nia liman, oh liurai. 18 Maibé maski nia la salva ami mós, ami hakarak Ita atu hatene, oh liurai, katak ami sei la serbí Ita-nia maromak sira, no ami sei la adora estátua osan-mean neʼebé Ita harii ona.”

^ [4] (parágrafu 17) Haree livru Saksi-Saksi Yehuwa—Pemberita Kerajaan Allah, p. 662, no mós livru Kerajaan Allah Memerintah! iha kaixa kap. 14 “Ia Mati Demi Kehormatan Allah.”