Skip to content

Skip to table of contents

Ajuda “ema estranjeiru” nia oan sira

Ajuda “ema estranjeiru” nia oan sira

“La iha buat ida neʼebé halo haʼu haksolok liu fali ida-neʼe, katak haʼu rona haʼu-nia oan sira kontinua laʼo iha lia-loos.”3 JOÃO 4.

KNANANUK: 41, 11

1, 2. (a) Oan sira neʼebé moris iha rai seluk hasoru problema saida? (b) Ita sei koʼalia kona-ba pergunta saida deʼit iha lisaun neʼe?

JOSHUA hatete: “Husi kiʼik haʼu koʼalia ami-nia língua rasik iha uma no iha kongregasaun. Maibé bainhira haʼu tama eskola, haʼu komesa koʼalia fali língua neʼebé ema iha rai neʼe uza. Tinan balu liutiha, haʼu koʼalia deʼit língua neʼe. Língua neʼebé uza iha reuniaun, haʼu ladún komprende ona, no haʼu sente haʼu-nia kultura la hanesan ona ho haʼu-nia inan-aman nian.” Tuir loloos, buat neʼebé akontese ba Joshua, baibain akontese mós ba ema barak.

2 Ohin loron, iha ema naʼin–240,000,000 mak hela iha nasaun neʼebé laʼós sira-nia moris-fatin. Se Ita mak inan-aman neʼebé muda husi rai seluk, oinsá mak Ita bele ajuda Ita-nia oan atu iha oportunidade furak hodi aprende kona-ba Jeová no “kontinua laʼo iha lia-loos”? (3 João 4) Oinsá mak ema seluk mós bele ajuda?

INAN-AMAN SIRA, HATUDU EZEMPLU DIʼAK

3, 4. (a) Oinsá mak inan-aman bele hatudu ezemplu diʼak ba oan sira? (b) Inan-aman labele iha hanoin saida?

3 Inan-aman, Ita-nia ezemplu mak buat neʼebé importante tebes atu ajuda oan haburas relasaun diʼak ho Jeová hodi hetan moris  rohan-laek. Se oan sira mak haree Ita “buka uluknanain Maromak nia Ukun”, sira mós sei aprende oinsá atu sadere ba Jeová kona-ba presiza loroloron nian. (Mateus 6:33, 34) Tan neʼe, hakaʼas an atu tau uluk Jeová iha Ita-nia moris, duké buka beibeik sasán. Moris ho buat neʼebé Ita presiza deʼit no keta debe. Buka atu halo Jeová kontente, neʼe mak “rikusoin iha lalehan”, duké buka osan ka buka glória husi ema.Lee Marcos 10:21, 22; João 12:43.

4 Labele preokupa liu ho Ita-nia an toʼo la iha tempu ba oan sira. Fó-hatene ba sira katak Ita kontente tebes ho sira-nia desizaun atu tau uluk Jeová duké buka naran boot ka buka osan ba sira-nia an ka ba Ita. Keta iha hanoin neʼebé sala katak oan mak tenke buka moris neʼebé diʼak ba inan-aman. Tenke hanoin-hetan katak, “oan sira la rai rikusoin ba sira-nia inan-aman, maibé inan-aman mak rai ba oan sira”.2 Korinto 12:14.

HAKAʼAS AN ATU REZOLVE PROBLEMA KONA-BA LÍNGUA

5. Tanbasá mak inan-aman tenkesér koʼalia beibeik ho oan kona-ba Jeová?

5 Bíblia fó-hatene nanis katak, ema “husi nasaun oioin neʼebé koʼalia língua oioin” sei laʼo nadodon ba Jeová nia organizasaun. (Zacarias [Zakharia] 8:23) Maibé, se oan mak la komprende Ita-nia língua rasik, neʼe sei halo susar ba Ita atu hanorin lia-loos ba sira. Oan sira mak Ita-nia estudante Bíblia neʼebé importante liu hotu, no ajuda sira “hatene didiʼak” kona-ba Jeová mak bele lori moris rohan-laek ba sira. (João 17:3) Ita tenkesér koʼalia beibeik kona-ba lia-loos hodi oan sira mós bele aprende kona-ba Jeová.Lee Deuteronômio (Ulangan) 6:6, 7. *

6. Tanbasá mak diʼak se oan sira aprende koʼalia Ita-nia língua rasik? (Haree foto iha pájina 8.)

6 Oan sira baibain aprende língua neʼebé ema uza iha rai ida-idak liuhusi eskola ka husi ema seluk. Maibé Ita presiza uza Ita rasik nia língua hodi koʼalia beibeik ho sira atu sira bele aprende Ita-nia língua rasik. Se sira hatene Ita-nia língua, neʼe sei halo fasil ba sira atu koʼalia ho Ita no fó-hatene Ita kona-ba sira-nia sentimentu. No mós, se sira mak hatene koʼalia língua seluk, neʼe sei ajuda aumenta sira-nia kbiit atu hanoin no ajuda mós sira atu komprende kona-ba ema seluk nia hanoin. Karik, neʼe mós bele fó oportunidade barak liután atu aumenta sira-nia serbisu ba Jeová. Carolina nia inan-aman mós muda husi rai seluk, nia dehan: “Serbí iha kongregasaun neʼebé koʼalia língua seluk mak kapás tebes. Haʼu gosta tebes hodi bele ajuda iha fatin neʼebé presiza tan haklaken-naʼin.”

7. Se língua mak sai problema ba Ita-nia família, Ita bele halo saida?

7 Maibé, dala ruma tanba oan sira aprende kultura ka língua husi rai neʼebé sira hela agora, karik neʼe bele halakon sira-nia hakarak ka abilidade atu aprende Ita-nia língua rasik. Inan-aman, se ida-neʼe mak akontese ba Ita-nia oan, diʼak atu aprende uitoan língua neʼebé ema iha rai neʼe uza. Hanoin toʼok se Ita bele komprende saida mak Ita-nia oan sira koʼalia, no se Ita komprende sira-nia atividade halimar nian. Ka se Ita bele koʼalia rasik ho sira-nia profesora sira no komprende sira-nia TPC, neʼe sei sai fasil liu ba Ita atu haboot Ita-nia oan sira iha lia-loos, loos ka lae? Sin, aprende língua foun ida presiza duni tempu, hakaʼas-an, no haraik-an. Maibé halo nuneʼe sei la sai saugati deʼit. Porezemplu, se Ita-nia oan ida mak derrepente sai tilun-diuk, Ita hakarak aprende língua tilun-diuk nian hodi bele koʼalia ho nia, loos ka lae? Se nuneʼe, Ita mós hakarak aprende língua neʼebé Ita-nia oan komprende liu hodi bele koʼalia ho nia, loos ka lae? *—Haree nota iha kraik.

8. Oinsá mak Ita bele ajuda oan se Ita ladún komprende língua neʼebé sira uza?

 8 Ba inan-aman balu, la fasil atu aprende língua foun neʼebé sira-nia oan uza. Neʼe halo susar ba sira atu ajuda oan komprende kona-ba “buat neʼebé hakerek iha livru santu”. (2 Timóteo 3:15) Se ida-neʼe mak Ita-nia situasaun, Ita bele ajuda nafatin oan sira hatene no hadomi Jeová. Irmaun katuas ida naran Shan hatete: “Ami-nia inan haboot ami mesak, no susar ba nia atu komprende língua neʼebé ami uza. Haʼu ho haʼu-nia feton sira ladún komprende kona-ba ami-nia inan nia língua. Maibé bainhira ami haree nia estuda, halo orasaun, no hakaʼas an hodi dirije adorasaun família semana-semana, neʼe ajuda ami haree katak hatene kona-ba Jeová mak buat neʼebé importante tebes.”

9. Oinsá mak inan-aman sira bele ajuda oan neʼebé presiza estuda iha língua rua?

9 Karik oan balu presiza uza língua rua atu aprende kona-ba Jeová. Tanbasá? Tanba iha eskola sira uza língua ida no iha uma sira uza fali língua seluk. Tan neʼe, inan-aman balu uza livru, gravasaun, no vídeo iha língua rua hodi ajuda oan. Husi neʼe Ita bele haree katak inan-aman neʼebé muda husi rai seluk presiza gasta tempu barak no hakaʼas an atu ajuda oan hodi hakbesik ba Jeová.

TENKE TUIR KONGREGASAUN NEʼEBÉ KOʼALIA LÍNGUA SAIDA?

10. (a) Sé mak foti desizaun kona-ba tuir reuniaun iha língua saida? (b) Saida mak família nia ulun tenke halo antes foti desizaun?

10 Bainhira Ita sai “ema estranjeiru” iha fatin neʼebé Testemuña sira la hatene koʼalia Ita-nia língua, Ita presiza ransu deʼit ho kongregasaun neʼebé uza sira-nia língua. (Salmo [Mazmur] 146:9) Maibé se iha kongregasaun besik neʼebé uza Ita-nia língua rasik, família nia ulun mak presiza foti desizaun kona-ba atu tuir reuniaun iha língua saida. Maibé antes atu foti desizaun, nia presiza hanoin didiʼak uluk no halo orasaun. Nia mós presiza koʼalia hamutuk ho ninia feen no oan sira. (1 Korinto 11:3) Nia presiza hanoin kona-ba saida? Bíblia nia prinsípiu saida deʼit mak bele ajuda nia foti desizaun neʼe?

11, 12. (a) Oinsá mak língua mós bele kona dalan neʼebé oan aprende iha reuniaun? (b) Tanbasá mak oan balu lakohi aprende inan-aman nia língua?

11 Maski tuir reuniaun ba oras balu latoʼo atu ajuda oan komprende lia-loos husi Bíblia, maibé ita hatene katak reuniaun sira importante duni. No se oan tuir reuniaun iha língua neʼebé sira komprende, sira sei aprende buat barak liután duké tuir reuniaun iha língua neʼebé sira la komprende. Karik sira sei aprende barak liu fali tuir buat neʼebé inan-aman hanoin. (Lee 1 Korinto 14:9, 11.) No ita mós presiza hatene katak, karik iha futuru, inan-aman nia língua sei la sai língua neʼebé oan uza atu hanoin no book ninia laran. Oan balu aprende duni oinsá atu fó komentáriu, haklaken, no hatoʼo diskursu iha inan-aman nia língua, maibé tuir loloos neʼe la mai husi laran. Tan neʼe, inan-aman tenke hanoin kona-ba oan nia presiza loloos mak saida.

12 No mós, laʼós língua deʼit mak bele book oan nia laran. Neʼe mak buat neʼebé akontese ba Joshua neʼebé temi iha leten. Ninia biin dehan: “Ba labarik, inan-aman nia língua, kultura, no relijiaun mak buat ida deʼit.” Se oan mak sente katak inan-aman nia toman atu moris la hanesan ho ninian, nia sei lakohi aprende inan-aman nia língua no relijiaun. Entaun, inan-aman bele halo saida?

13, 14. (a) Tanbasá mak inan-aman ida deside hodi muda ba kongregasaun neʼebé uza língua seluk? (b) Inan-aman neʼe halo saida hodi hametin sira rasik nia relasaun ho Jeová?

13 Inan-aman tenke hanoin liu kona-ba oan nia presiza duké hanoin kona-ba saida mak sira rasik hakarak. (1 Korinto 10:24) Joshua no Esther nia aman Samuel dehan: “Haʼu ho haʼu-nia feen haree didiʼak ba ami-nia oan sira kona-ba língua saida mak ajuda sira atu laʼo ba oin iha lia-loos, no ami halo orasaun hodi husu matenek kona-ba neʼe. Ami haree duni oan sira ladún hetan benefísiu husi reuniaun neʼebé uza ami-nia língua  rasik, tan neʼe ami halo desizaun hodi muda fali ba kongregasaun neʼebé uza língua husi rai neʼe. Maski desizaun neʼe laʼós tuir haʼu no haʼu-nia feen nia hakarak, maibé ami tuir beibeik reuniaun no haklaken hamutuk ho oan sira. Ami mós konvida irmaun-irmán sira husi kongregasaun atu han no pasiar hamutuk. Buat hotu neʼe ajuda duni ami-nia oan sira hodi koñese didiʼak irmaun-irmán sira no mós Jeová. Sira bele sente katak Jeová laʼós deʼit Maromak, maibé mós sira-nia Aman no Belun. Ami sente neʼe mak buat neʼebé importante liu duké sira aprende ami-nia língua.”

14 Samuel hatutan hodi dehan: “Haʼu ho haʼu-nia feen mós tuir reuniaun iha ami-nia língua rasik atu hametin ami-nia relasaun ho Jeová. Maski ami-nia tempu uitoan deʼit no ami sente kole tebes, maibé ami agradese tanba Jeová fó bensaun ba ami-nia hakaʼas-an no sakrifísiu. Agora ami-nia oan naʼin-tolu serbí daudauk Jeová tempu-tomak.”

JOVEN SIRA BELE HALO SAIDA?

15. Tanbasá mak Kristina sente katak diʼak ba nia atu muda ba kongregasaun neʼebé uza língua rai neʼe nian?

15 Bainhira oan sira sai boot, karik sira bele sente katak tuir reuniaun iha língua seluk mak diʼak liu ba sira atu serbí Jeová. Se sira mak foti desizaun hanesan neʼe, inan-aman la bele sente katak oan sira la hadomi ona sira. Kristina dehan: “Haʼu komprende inan-aman nia língua uitoan deʼit, no neʼe halo susar ba haʼu atu komprende iha reuniaun sira. Bainhira haʼu tinan 12, haʼu tuir reuniaun boot ida uza língua neʼebé ami koʼalia iha eskola. Neʼe mak dala primeiru haʼu foin komprende katak buat neʼebé haʼu rona mak lia-loos duni! Buat seluk tan mak bainhira haʼu halo orasaun iha língua neʼebé haʼu uza iha eskola, neʼe ajuda haʼu koʼalia ba Jeová husi haʼu-nia laran!” (Apóstolu 2:11, 41) Bainhira Kristina sai tinan 18, nia koʼalia buat sira-neʼe ba ninia inan-aman no deside atu muda ba kongregasaun neʼebé uza língua seluk. Nia dehan: “Uza língua neʼebé haʼu koʼalia iha eskola hodi aprende kona-ba Jeová book duni haʼu atu halo planu iha lia-loos.” Lakleur Kristina mós foti pioneiru no iha moris neʼebé kontente tebes.

16. Tanbasá mak Nadia agradese hodi la muda ba kongregasaun neʼebé uza língua seluk?

16 Joven sira, imi sente duni katak tuir reuniaun neʼebé uza língua seluk mak diʼak liu ka lae? Se Ita hanoin neʼe diʼak duni, husu ba Ita-nia an tanbasá diʼak. Muda ba kongregasaun neʼe sei ajuda Ita hakbesik ba Jeová ka lae? (Tiago 4:8) Ka Ita hakarak muda tanba Ita lakohi inan-aman atu haree buat hotu neʼebé Ita halo ka tanba Ita mak baruk ona atu hakaʼas an? Irmán ida naran Nadia, agora serbí daudaun iha Betel dehan: “Kuandu ami hotu sai joven, ami hakarak muda ba kongregasaun neʼebé uza língua husi rai neʼebé ami hela bá.” Maibé sira-nia inan-aman hatene katak muda ba kongregasaun neʼe sei la ajuda sira-nia relasaun diʼak ho Jeová. Nia dehan: “Agora ami agradese tebes ba ami-nia inan-aman hodi hakaʼas an hanorin ami sira-nia língua rasik no la husik ami muda ba kongregasaun neʼebé uza língua seluk. Neʼe lori rezultadu diʼak ba ami-nia moris no fó oportunidade barak liután ba ami atu ajuda ema seluk hodi hatene Jeová.”

OINSÁ MAK EMA SELUK MÓS BELE AJUDA?

17. (a) Jeová fó responsabilidade atu haboot oan ba sé? (b) Inan-aman bele husu ajuda saida kona-ba hanorin lia-loos ba oan?

17 Jeová fó responsabilidade ba inan-aman mak atu hanorin lia-loos ba sira-nia oan. Nia la fó responsabilidade neʼe ba avó ka ema seluk. (Lee Provérbios [Amsal] 1:8; * 31:10, 27, 28. *) Ba inan-aman sira neʼebé la hatene koʼalia língua  husi rai neʼebé sira hela, karik sira presiza ajuda husi ema seluk atu oan sira bele laʼo ba oin iha lia-loos. Bainhira husu ajuda, laʼós katak sira koko atu fó fali sira-nia responsabilidade ba ema seluk mak atu haboot sira-nia oan. Maibé inan-aman bele aproveita ajuda sira-neʼe atu “fó dixiplina no matadalan neʼebé tuir Jeová nia hakarak” hodi haboot sira-nia oan. (Éfeso 6:4) Porezemplu, karik inan-aman bele husu sujestaun ba katuas kongregasaun sira kona-ba oinsá atu halaʼo adorasaun família no oinsá atu buka belun neʼebé diʼak ba sira-nia oan.

Ransu ho irmaun-irmán sira husi kongregasaun bele ajuda inan-aman no oan sira (Haree parágrafu 18, 19)

18, 19. (a) Oinsá mak ema seluk bele fó ajuda ba joven sira? (b) Inan-aman tenke halo nafatin saida?

18 Karik dala ruma inan-aman bele konvida família seluk atu tuir sira-nia adorasaun família nian hodi ajuda sira-nia oan. No mós, joven sira bele aprende husi ema seluk bainhira sira haklaken ka halo buat balu hamutuk ho irmaun-irmán sira. (Provérbios [Amsal] 27:17) Shan, neʼebé temi ona iha leten, dehan: “Haʼu hanoin-hetan nafatin irmaun sira neʼebé fó ajuda ba haʼu. Bainhira sira ajuda haʼu kona-ba knaar iha reuniaun, haʼu sempre aprende buat barak husi sira. Haʼu mós gosta halo atividade halimar nian hamutuk ho irmaun-irmán sira.”

19 Diʼak mós ba irmaun-irmán sira neʼebé inan-aman husu atu ajuda sira-nia oan hodi fó beibeik laran-manas ba oan atu hatudu respeitu ba inan-aman. Sira presiza koʼalia beibeik buat neʼebé pozitivu kona-ba oan sira-nia inan-aman no kuidadu atu la kaer fali inan-aman nia responsabilidade atu haboot inan-aman sira-nia oan. No mós, sira neʼebé fó ajuda tenke kuidadu atu la hatudu hahalok ruma neʼebé halo ema balu husi kongregasaun ka ema seluk hanoin katak neʼe mak hahalok la morál. (1 Pedro 2:12) Maski inan-aman bele husu irmaun-irmán seluk nia ajuda, maibé responsabilidade atu hanorin lia-loos ba oan mak sira-nian nafatin. Sira presiza kontrola beibeik kona-ba ajuda neʼebé ema seluk fó ba sira-nia oan.

20. Oinsá mak inan-aman bele ajuda oan atu sai Jeová nia atan ida?

20 Inan-aman, halo orasaun atu husu ajuda husi Jeová, no hakaʼas an nafatin. (Lee 2 Crônicas [Tawarikh] 15:7. *) Hanoin uluk kona-ba oan nia relasaun ho Jeová duké hanoin kona-ba Ita-nia hakarak. Hakaʼas an halo buat hotu atu ajuda oan laʼo ba oin iha lia-loos. Tenke iha fiar katak Ita-nia oan sei sai Jeová nia atan ida. Bainhira Ita haree Ita-nia oan sira halo tuir Maromak nia Liafuan no banati-tuir Ita-nia ezemplu, Ita sei sente hanesan apóstolu João sente kona-ba ninia oan espirituál sira, nia dehan: “La iha buat ida neʼebé halo haʼu haksolok liu fali ida-neʼe, katak haʼu rona haʼu-nia oan sira kontinua laʼo iha lia-loos.”3 João 4.

^ par. 5 Deuteronômio 6:6, 7 Liafuan sira neʼebé haʼu fó sai ba imi ohin tenke rai iha imi-nia laran, no imi tenke hanorin liafuan sira-neʼe ba imi-nia oan no koʼalia kona-ba buat sira-neʼe kuandu imi tuur iha imi-nia uma, kuandu imi laʼo iha dalan, kuandu imi toba, no kuandu imi hadeer.

^ par. 7 Atu hatene informasaun kona-ba oinsá atu aprende língua foun, haree iha Sedarlah! fulan-Marsu 2007, pájina 10-12.

^ par. 17 Provérbios 1:8 Haʼu-nia oan, rona ba ó-nia aman nia dixiplina, no keta fila kotuk ba ó-nia inan nia hanorin.

^ par. 17 Provérbios 31:10, 27, 28 10 Sé mak bele hetan feen neʼebé diʼak? Ninia folin-boot liu fali ahu-ruin. 27 Nia tau matan didiʼak ba serbisu hotu iha ninia uma-laran, no nia la han paun baruk-teen nian. 28 Ninia oan sira hamriik no dehan sai katak nia kontente; ninia laʼen hamriik no gaba nia.

^ par. 20 2 Crônicas 15:7 Maibé imi, sai aten-brani bá no keta sai laran-tun, tanba imi sei simu bensaun ba imi-nia hahalok.