Skip to content

Skip to table of contents

Tanbasá importante nafatin atu haraik an

Tanbasá importante nafatin atu haraik an

“Matenek sei hamutuk ho ema haraik-an.”—PROVÉRBIOS (AMSAL) 11:2.

KNANANUK: 38, 11

1, 2. Tanbasá mak Maromak lakohi tan Saul atu sai liurai? (Haree dezeñu iha leten.)

IHA tempu Jeová hili Saul atu sai liurai, Saul mak ema neʼebé haraik an tebes. (1 Samuel 9:1, 2, 21; 10:20-24) Maibé bainhira nia sai ona liurai, nia foti-an tebes. Iha tempu ida, ema Filístia rihun ba rihun mai atu ataka ema Izraél. No profeta Samuel fó-hatene ba Saul katak nia mak sei mai atu hasaʼe sakrifísiu ba Jeová. Maibé antes Samuel toʼo mai, Saul la iha tan pasiénsia atu hein no hasaʼe uluk sakrifísiu ba Jeová tanba ema Izraél barak sai taʼuk no husik ona nia. Saul halo buat neʼebé nia la iha direitu atu halo, no Jeová la kontente tebes ho nia.—1 Samuel 13:5-9.

2 Bainhira Samuel toʼo mai, nia fó konsellu makaʼas ba Saul tanba la halo tuir Jeová. Maibé Saul la sente katak nia halo ona buat neʼebé sala. Nia buka razaun oioin no duun ema seluk. (1 Samuel 13:10-14) Komesa husi tempu neʼebá, Saul halo buat barak ho foti-an. Tan neʼe Jeová lakohi tan nia atu  sai liurai. (1 Samuel 15:22, 23) Maski foufoun Saul nia moris diʼak, maibé ikusmai sai aat tebes.—1 Samuel 31:1-6.

3. (a) Ema barak hanoin oinsá kona-ba haraik-an? (b) Ita sei koʼalia kona-ba pergunta saida deʼit?

3 Ohin loron, ema barak sente katak se ita hakarak iha moris neʼebé susesu, ita la bele haraik an. Tan neʼe sira gaba an katak sira diʼak liu fali ema seluk. Porezemplu, iha atór ida neʼebé mós polítiku-naʼin hatete: “Haraik-an mak liafuan neʼebé nunka aplika ba haʼu-nia moris, haʼu sei nunka hatudu hahalok neʼe.” Maibé tanbasá mak hahalok haraik-an importante nafatin ba ema kristaun? Saida loos mak haraik-an? Iha lisaun neʼe ita sei koʼalia kona-ba pergunta sira-neʼe. No iha lisaun tuirmai ita sei haree oinsá mak ita bele haraik an nafatin maski susar atu halo nuneʼe.

TANBASÁ IMPORTANTE ATU HARAIK AN?

4. Saida mak hahalok foti-an?

4 Bíblia hatete katak liafuan kontra husi haraik-an mak foti-an. (Lee Provérbios [Amsal] 11:2. *) Tan neʼe mak David husu ba Jeová: “Hanetik Ita-nia atan atu la halo hahalok aat ho foti-an.” (Salmo [Mazmur] 19:13) Saida mak hahalok foti-an? Foti-an mós iha arti halo buat neʼebé ita la iha direitu ka podér atu halo, karik tanba ita la iha pasiénsia. Tanba ita la perfeitu, dala ruma ita hotu hatudu hahalok neʼe. Maibé ita aprende husi Liurai Saul nia ezemplu katak, se ita mak iha toman atu hatudu beibeik hahalok neʼe, Jeová sei la kontente ho ita. Salmo 119:21 hatete katak Jeová sei “korrije ema foti-an sira”. Tanbasá?

5. Tanbasá mak importante atu la halo buat neʼebé ita la iha direitu atu halo?

5 Primeiru, se ita halo buat neʼebé ita la iha direitu atu halo, neʼe la hatudu respeitu ba Jeová nuʼudar ita-nia Maromak no Ukun-Naʼin. Segundu, neʼe bele hamosu problema ho ema seluk. (Provérbios [Amsal] 13:10) No terseiru, se ema hatene katak ita halo ona buat neʼebé ita la iha direitu atu halo, neʼe sei halo moe ita rasik. (Lucas 14:8, 9) Tan neʼe mak Jeová hakarak ita atu hatudu haraik-an.

HARAIK-AN ENVOLVE SAIDA?

6, 7. Hahalok haraik-an envolve saida deʼit?

6 Tuir Bíblia, haraik-an mak hahalok neʼebé dook husi foti-an ka loko-an. Ema neʼebé haraik an haree ema seluk boot liu nia. (Filipe 2:3) Nia rekoñese katak nia iha limitadu, no nia simu sala neʼebé nia halo. Nia prontu atu rona ba ema seluk nia sujestaun no aprende husi ema seluk. Jeová gosta tebes ema neʼebé haraik an.

7 Bíblia mós hatudu katak ema neʼebé haraik an hatene ninia an, nia hatene katak iha buat balu nia la iha kbiit atu halo, ka la iha direitu atu halo. Hahalok neʼe ajuda nia atu hatudu respeitu ba ema seluk no trata sira iha dalan neʼebé diʼak.

8. Saida mak hatudu katak ita komesa ona iha hahalok foti-an?

8 Se ita la kuidadu, ita bele iha hanoin ka hatudu hahalok foti-an. Oinsá? Karik ita komesa sente katak ita importante liu ema seluk tanba ita ka ita-nia belun diʼak kaer priviléjiu iha kongregasaun.  (Roma 12:16) Ka ita komesa atu dada atensaun demais ba ita-nia an. (1 Timóteo 2:9, 10) Ka karik ita komesa manda ema seluk atu halo buat ruma ka bandu sira atu labele halo buat ruma.—1 Korinto 4:6.

9. Saida mak halo ema balu sai foti-an? Fó toʼok ezemplu ida husi Bíblia.

9 Se ita mak la kontrola didiʼak ita-nia hakarak aat isin nian, neʼe mós bele hamosu hahalok foti-an. Ema barak komesa halo buat neʼebé sira la iha direitu atu halo tanba sira buka glória ba sira-nia an, laran-moras ba ema seluk, ka tanba la bele kontrola sira-nia hirus. Neʼe mak buat neʼebé akontese ba ema balu iha Bíblia, hanesan Absalão, Uzias, no Nabukodonosor. Maibé ikusmai Jeová hatudu sai katak importante tebes atu haraik an.—2 Samuel 15:1-6; 18:9-17; 2 Crônicas (Tawarikh) 26:16-21; Daniel 5:18-21.

10. Tanbasá mak ita labele tesi lia ba buat neʼebé ema seluk halo? Fó toʼok ezemplu ida husi Bíblia.

10 Karik tanba razaun seluk mak book ema atu la hatudu hahalok haraik-an. Ezemplu ida mak kona-ba Abimélec no Pedro. (Gênesis [Kejadian] 20:2-7; Mateus 26:31-35) Buat neʼebé sira halo hatudu katak sira foti-an ka lae? Ka tanba seidauk hatene faktu hotu ka la hanoin uluk mak book sira hodi halo buat sira-neʼe? Ita la bele haree ema nia laran, tan neʼe ita labele tesi lia ba buat neʼebé ema seluk halo.—Lee Tiago 4:12.

KNAAR IHA MAROMAK NIA ORGANIZASAUN

11. Oinsá mak haraik-an liga ho Maromak nia arranju iha kongregasaun?

11 Ema neʼebé haraik-an halaʼo ninia knaar tuir Maromak nia arranju sira. Jeová laʼós Maromak runguranga nian. Iha kongregasaun laran, ema ida-idak iha ninia knaar. Ema hotu importante. Jeová fó ba ita ida-idak matenek, talentu, ka kbiit neʼebé la hanesan, no nia husik ita hili rasik oinsá atu uza kbiit sira-neʼe. Ita hakarak hatudu haraik-an hodi uza prezente furak sira-neʼe atu halo buat neʼebé Jeová simu. (Roma 12:4-8) Jeová hakarak tebes ita atu uza prezente sira-neʼe hodi fó glória ba nia no ajuda ema seluk.—Lee 1 Pedro 4:10.

Ita bele aprende saida husi Jesus nia ezemplu bainhira ita-nia knaar troka? (Haree parágrafu 12-14)

12, 13. Ita presiza hanoin-hetan saida se ita-nia moris iha mudansa balu?

12 Ita-nia knaar atu serbí Jeová sempre iha mudansa. Ezemplu ida mak kona-ba Jesus, ninia knaar mós sempre troka. Foufoun nia ho ninia Aman mesak deʼit iha lalehan. (Provérbios [Amsal] 8:22) Tuirmai nia ajuda Jeová hodi kria anju sira, rai no lalehan, no ema. (Koloso 1:16) Tuir tan mai, nia simu knaar foun ida hodi tun mai rai, no moris nuʼudar bebé toʼo sai ema boot. (Filipe 2:7) Bainhira Jesus moris fali husi mate, nia fila fali ba lalehan nuʼudar espíritu atu sai Liurai ba Maromak nia Ukun iha tinan 1914. (Ebreu 2:9) Iha futuru, bainhira nia ukun tiha ba tinan rihun ida nuʼudar Liurai, nia sei fó fali Ukun neʼe ba Jeová, “atu nuneʼe Maromak bele sai buat hotu ba ema hotu”.—1 Korinto 15:28.

13 Knaar neʼebé ita iha mós dala ruma bele troka, no mudansa sira-neʼe bele mai husi ita-nia hakarak rasik. Porezemplu, karik uluk ita klosan, depois ita deside atu kaben. Ka karik agora ita iha oan. Ikusmai, karik ita foti desizaun atu halo simples ita-nia moris hodi ita bele serbí Jeová tempu-tomak. Dala ruma mudansa balu mós bele mai husi  situasaun moris nian. Porezemplu, karik ita iha ona tempu atu halo serbisu liután, ka ita-nia situasaun la husik atu halo serbisu liután ba Jeová. Maibé maski ita mak ema neʼebé joven ka idade, saúde diʼak ka ladiʼak, Jeová hatene oinsá atu uza ita hodi serbí nia tuir ita-nia kbiit. Nia nunka husu ita atu halo buat neʼebé ita la iha kbiit atu halo. No nia kontente tebes atu haree ita hakaʼas an hodi serbí nia.—Ebreu 6:10.

14. Oinsá hahalok haraik-an bele ajuda ita atu kontente ho knaar neʼebé ita iha?

14 Jesus simu knaar sira neʼebé Jeová fó ba nia ho haksolok, no ita mós bele haksolok hanesan Jesus. (Provérbios [Amsal] 8:30, 31) Ema neʼebé haraik an kontente ho priviléjiu no knaar neʼebé nia iha. Nia la hanoin demais kona-ba buat neʼebé ema seluk halo. Maibé nia haksolok ho knaar neʼebé nia simu iha Maromak nia organizasaun. Nia haree knaar sira-neʼe mai husi Jeová. Ema neʼebé haraik an respeitu ema seluk no apoia sira ho haksolok. Nia rekoñese katak Jeová mós fó knaar ba ema sira-neʼe.—Roma 12:10.

HANOIN NEʼEBÉ LOOS KONA-BA HARAIK-AN

15. Ita bele aprende saida husi Jideaun nia ezemplu?

15 Jideaun hatudu ezemplu neʼebé diʼak tebes kona-ba haraik-an. Bainhira Jeová fó knaar ba nia atu salva ema Izraél husi ema Midian, Jideaun hatete: “Haʼu-nia umakain mak kiʼik liu iha Manase,  no haʼu mak ema neʼebé la importante liu iha haʼu-nia aman nia umakain.” (Juízes [Hakim-Hakim] 6:15) Maski nuneʼe, Jideaun tau fiar ba Jeová hodi simu deʼit knaar neʼe. Tuirmai nia buka-hatene saida mak Jeová hakarak nia atu halo no nia halo orasaun husu Jeová fó matadalan ba nia. (Juízes [Hakim-Hakim] 6:36-40) Jideaun mak ema neʼebé forte no aten-brani, maibé nia mós matenek no kuidadu an. (Juízes [Hakim-Hakim] 6:11, 27) Ikusmai povu hakarak foti nia atu sai sira-nia ukun-naʼin, maibé nia la simu. Bainhira nia halaʼo tiha knaar neʼebé Jeová hakarak nia atu halo, nia kontente hodi fila fali ba uma.—Juízes (Hakim-Hakim) 8:22, 23, 29.

16, 17. Oinsá mak ema neʼebé haraik an bele laʼo ba oin?

16 Se ema ida simu knaar foun ka hakarak halo buat barak liután iha kongregasaun, neʼe la hatudu katak nia la haraik an. Bíblia fó laran-manas ba Jeová nia atan atu serbí irmaun-irmán sira no laʼo ba oin liután iha lia-loos. (1 Timóteo 4:13-15) Maibé, ita tenke simu knaar foun mak bele laʼo ba oin ka lae? Lae. Ita hotu bele laʼo ba oin atu hadiʼa ita-nia hahalok no uza kbiit neʼebé Jeová fó atu serbí nia no ema seluk diʼak liután.

17 Antes atu simu knaar foun, ema neʼebé haraik an sempre buka-hatene uluk saida mak nia presiza halo. Nia halo orasaun kona-ba neʼe no haree didiʼak se nia bele kumpre knaar neʼe ka lae. Nia sei hanoin uluk kona-ba nia iha tempu no forsa atu halo buat importante seluk ka lae. Selae, nia bele fó fali knaar neʼebé nia halaʼo daudauk ba ema seluk. Bainhira haree didiʼak tiha kona-ba buat sira-neʼe, karik ema neʼebé haraik an sei deside katak nia la iha kbiit atu simu knaar foun neʼe. Se ita mak haraik an, karik ita sei foti desizaun atu la simu deʼit.

18. (a) Bainhira ema neʼebé haraik an simu knaar foun, nia halo uluk saida? (b) Oinsá mak Roma 12:3 ajuda ita atu haraik an?

18 Jeová hakarak ita laʼo hamutuk ho nia “ho haraik-an”. (Miquéias [Mikha] 6:8) Tan neʼe, bainhira ita simu knaar foun ida, ita presiza buka matadalan husi Jeová no husu nia atu ajuda ita hanesan Jideaun halo. Ita presiza hanoin didiʼak kona-ba saida mak Jeová hatete ba ita liuhusi Bíblia no ninia organizasaun. Ita tenkesér hanoin-hetan katak laʼós ho ita-nia kbiit no matenek mak ita bele kumpre ita-nia knaar sira, maibé tanba Jeová mak ajuda ita ho haraik-an. (Salmo [Mazmur] 18:35) Ema neʼebé haraik an sei “la hanoin nia an diʼak liu fali buat neʼebé loos”.—Lee Roma 12:3.

19. Tanbasá mak ita tenke haraik an?

19 Ema neʼebé haraik an hatene katak Jeová mesak deʼit mak merese atu simu glória hotu, tanba nia mak Kriadór no Ukun-Naʼin Aas Liu Hotu iha lalehan no rai. (Apokalipse 4:11) Se ita mak haraik an, ita kontente atu halo buat naran deʼit hodi serbí Jeová. Ita hatudu respeitu ba irmaun-irmán sira-nia sentimentu no hanoin hodi ita bele iha unidade nafatin. Ema neʼebé haraik an hanoin didiʼak antes nia halo buat ida hodi nia bele hasees an husi halo desizaun neʼebé sala. Jeová gosta tebes ema neʼebé haraik an. Tan neʼe mak haraik-an importante tebes ba Jeová nia povu. Iha lisaun tuirmai ita sei haree oinsá mak ita bele haraik an nafatin maski susar atu halo nuneʼe.

^ par. 4 Provérbios 11:2 Bainhira iha hahalok foti-an, tuirmai sei iha mós moe, maibé matenek sei hamutuk ho ema haraik-an.