Skip to content

Skip to table of contents

Ita bele haraik an nafatin iha situasaun oioin

Ita bele haraik an nafatin iha situasaun oioin

“Laʼo hamutuk imi-nia Maromak ho haraik-an!”—MIQUÉIAS (MIKHA) 6:8.

KNANANUK: 48, 1

1-3. Profeta husi rai-Judá la halo saida, no neʼe lori rezultadu saida? (Haree dezeñu iha leten.)

LIURAI JEROBOAM harii altár ida ba adorasaun falsu iha sidade Betel. Tan neʼe Jeová haruka profeta ida husi rai-Judá bá atu fó avizu makaʼas ba nia. Profeta neʼe mak ema neʼebé haraik an, no nia halo tuir Jeová hodi hatoʼo Jeová nia mensajen neʼe. Liurai hirus tebes ba profeta, maibé Jeová proteje nia.—1 Reis (Raja-Raja) 13:1-10.

2 Antes atu bá, Jeová fó ona mandamentu ida ba profeta atu labele han ka hemu buat ruma iha rai-Izraél no nia tenkesér uza fali dalan seluk atu fila ba uma. Maibé iha tempu profeta neʼe fila husi Izraél, iha katuas ida bosok nia katak nia mós simu mensajen ida husi Jeová. Katuas neʼe konvida profeta bá ninia uma atu han no hemu. Profeta neʼe bá duni hodi la halo tuir buat neʼebé Jeová hatete ba nia. Jeová la kontente ho profeta neʼe. Bainhira nia fila, leaun ida ataka no oho nia iha dalan.—1 Reis (Raja-Raja) 13:11-24.

3 Bíblia la esplika tanbasá mak profeta rona ba katuas neʼe. Maibé buat neʼebé ita hatene mak profeta neʼe la kontinua tan atu laʼo hamutuk Jeová ho haraik-an. (Lee Miquéias [Mikha]  6:8. *) Bíblia esplika katak laʼo hamutuk ho Jeová envolve tau fiar ba nia, sadere ba ninia matadalan, no halo tuir nia. Ema neʼebé haraik an hatene katak nia presiza halo orasaun beibeik ba Jeová atu husu ninia matadalan. Tan neʼe, se profeta neʼe mak haraik-an nafatin, nia tenkesér husu ba Jeová katak Jeová fó duni matadalan foun ka lae. Dala ruma, ita mós presiza halo desizaun neʼebé susar, no karik ita la hatene Jeová nia hakarak mak saida. Maibé se ita mak haraik-an, ita hakarak husu Jeová atu fó matadalan ba ita hodi ita la halo desizaun neʼebé sala.

4. Ita sei aprende saida husi lisaun neʼe?

4 Iha lisaun uluk nian, ita aprende ona kona-ba saida mak haraik-an no tanbasá haraik-an importante ohin loron. Maibé oinsá mak ita bele hatudu haraik-an liután? Situasaun saida deʼit mak bele koko ita atu hatene ita mak ema neʼebé haraik an duni ka lae? Lisaun neʼe sei ajuda ita atu buka-hatene resposta ba pergunta sira-neʼe.—Provérbios (Amsal) 11:2.

SITUASAUN TROKA

5, 6. Oinsá mak Barzilai hatudu katak nia ema haraik an?

5 Dalan neʼebé ita sente kona-ba situasaun foun ka bainhira ita-nia knaar troka sei hatudu sai ita mak ema neʼebé haraik an ka lae. Ita bele aprende ida-neʼe liuhusi Liurai David nia belun Barzilai nia ezemplu. Bainhira nia tinan 80, David konvida nia atu hela iha Liurai nia palásiu. Maski neʼe mak priviléjiu boot ida, maibé Barzilai hatete katak diʼak liu fatin neʼe fó fali ba Kimham, karik neʼe mak ninia oan.—2 Samuel 19:31-37.

6 Tanbasá mak Barzilai halo desizaun hanesan neʼe? Neʼe tanba nia lakohi simu responsabilidade ka tanba nia hakarak moris hakmatek deʼit ka lae? Lae. Tanba nia mak ema neʼebé haraik an. Nia rekoñese katak ninia situasaun la hanesan ho uluk no ninia kbiit limitadu ona. (Lee Galásia 6:4, 5.) Ita mós tenkesér haraik an hanesan Barzilai. Duké hanoin liu kona-ba ita rasik nia diʼak ka kompara ita-nia an ho ema seluk, diʼak liu hakaʼas an atu serbí Jeová tuir ita-nia kbiit. Halo hanesan neʼe importante liu fali simu knaar espesiál ka sai naran boot. (Galásia 5:26) Se ita mak haraik an, ita hakarak serbisu hamutuk ho irmaun-irmán sira atu fó glória ba Jeová no ajuda ema seluk.—1 Korinto 10:31.

7, 8. Oinsá mak haraik-an bele ajuda ita atu la sadere ba ita-nia an rasik?

7 Se ita mak simu tan responsabilidade boot ka podér, neʼe bele halo susar ba ita atu haraik an nafatin. Diʼak atu aprende husi Neemias nia ezemplu. Bainhira nia rona katak povu sira iha Jeruzalein hasoru daudauk problema oioin, nia husu makaʼas ba Jeová atu ajuda sira. (Neemias 1:4, 11) Jeová hatán duni ba Neemias nia orasaun. Liurai Artaxerxes foti nia sai governadór. Maski Neemias mak ema neʼebé iha pozisaun aas no riku, maibé nia nunka sadere ba ninia an rasik. Nia buka matadalan husi Jeová no lee beibeik Jeová nia Ukun-Fuan. (Neemias 8:1, 8, 9) Neemias nunka uza ninia podér atu buka diʼak deʼit ba ninia an ka trata ema iha dalan neʼebé ladiʼak.—Neemias 5:14-19.

8 Neemias nia ezemplu diʼak tebes ba ita. Se ita mak simu tan responsabilidade ka ita-nia knaar troka, ita hakarak hatudu haraik-an nafatin. Ita lakohi atu sadere deʼit ba ita rasik nia matenek ka esperiénsia. Saida mak hatudu katak ema ida komesa sadere ba ninia an rasik? Karik irmaun katuas ida la halo orasaun uluk antes atu halo buat ruma ba  kongregasaun. Ka karik irmaun ka irmán ida halo uluk desizaun, depois mak husu Jeová atu fó bensaun ba desizaun neʼebé nia foti ona. Maibé ema neʼebé haraik an la sadere ba ninia an hanesan neʼe, maski buat neʼebé nia atu halo, nia halo beibeik ona. Nia sempre hanoin-hetan katak ninia matenek dook husi Jeová nian. (Lee Provérbios [Amsal] 3:5, 6. *) Ohin loron, ema barak hanoin an deʼit, no sira sempre buka diʼak ba sira-nia an. Maibé Jeová nia atan la hanesan neʼe. Ita nunka iha hanoin katak tanba ita iha responsabilidade, tan neʼe ita diʼak liu fali ema seluk iha ita-nia família ka kongregasaun. Duké hanoin nuneʼe, ita halaʼo ita-nia knaar iha Maromak nia arranju no serbisu hamutuk ho irmaun-irmán sira seluk.—1 Timóteo 3:15.

BAINHIRA EMA KRITIKA KA GABA ITA

9, 10. Bainhira ema kritika ita, oinsá mak haraik-an bele ajuda ita?

9 Bainhira ema kritika ita, susar atu kontrola ita-nia sentimentu. Neʼe mak buat neʼebé akontese ba Ana. Maski ninia laʼen hadomi tebes nia, maibé nia la sente kontente nafatin tanba ninia laʼen nia feen seluk, Penina sempre hatún nia. Ana hakarak tebes atu iha oan maibé nia la iha oan. Loron ida tanba nia sente laran-tun, nia bá tabernákulu atu halo orasaun. Amlulik Boot Eli haree nia tanis no duun katak nia lanu! Tuir loloos Ana bele sai hirus, maibé nia hatán ba Eli iha dalan neʼebé respeitu. Ikusmai nia halo orasaun ida neʼebé hatudu katak nia iha fiar no hadomi Jeová.—1 Samuel 1:5-7, 12-16; 2:1-10.

10 Haraik-an bele ajuda ita atu “kontinua manán buat aat ho buat neʼebé diʼak”. (Roma 12:21) Satanás nia mundu nakonu ho buat aat oioin. Tan neʼe ita la hakfodak se ema trata ita iha dalan neʼebé ladiʼak. Maski neʼe bele halo ita hirus, maibé ita tenke luta hasoru sentimentu neʼe. (Salmo [Mazmur] 37:1) Liuliu se ita mak iha problema ho irmaun-irmán sira, neʼe sei halo ita triste liután. Bainhira ida-neʼe akontese, diʼak atu banati-tuir Jesus. Bíblia dehan: “Kuandu ema koʼalia aat hasoru nia, nia la  koʼalia aat fali ba sira . . . , maibé nia entrega nia an ba ida neʼebé tesi lia ho loloos.” (1 Pedro 2:23) Jesus haraik an tebes no nia hatene katak Jeová sei tesi lia ba buat neʼebé la iha justisa. (Roma 12:19) Ita mós tenkesér hatudu haraik-an atu la “selu aat ho aat”.—1 Pedro 3:8, 9.

11, 12. (a) Oinsá mak ita bele haraik an nafatin bainhira ema gaba ita? (b) Oinsá mak ita bele hatudu katak ita haraik an liuhusi hahalok no dalan neʼebé ita hatais no hadiʼa an?

11 Bainhira ema gaba ita, neʼe mós bele koko ita-nia haraik-an. Hanoin toʼok kona-ba Ester nia ezemplu. Nia mak feto neʼebé bonita tebes iha rai-Pérsia no ema barak gaba nia. Ema fó tratamentu ba nia no feto joven seluk ba tinan ida atu sai bonita liután hodi dada liurai nia atensaun. Maibé liurai hili Ester mak atu sai liurai-feto. Maski nuneʼe, Ester la sai foti-an. Nia haraik an nafatin, laran-diʼak no hatudu nafatin respeitu ba ema seluk.—Ester 2:9, 12, 15, 17.

Ita-nia hatais no hadiʼa an hatudu respeitu ba Jeová no ema seluk, ka hatudu katak ita la haraik an? (Haree parágrafu 12)

12 Se ita mak haraik an, ita hakarak hatais no hadiʼa an iha dalan neʼebé hatudu katak ita respeitu ema seluk no mós ita-nia an rasik. Ita lakohi dada ema nia atensaun, maibé koko atu iha hahalok “laran-maus no laran-diʼak”. (Lee 1 Pedro 3:3, 4; Jeremias [Yeremia] 9:23, 24) Ita-nia sentimentu kona-ba ita-nia an sei hatudu sai liuhusi ita-nia koʼalia no hahalok. Porezemplu, karik ita koʼalia gaba an uitoan atu ema hatene katak ita mak ema neʼebé espesiál tanba ita-nia pozisaun, tanba ita hatene segredu ruma ka tanba ita belun diʼak ho irmaun ida neʼebé kaer responsabilidade importante. Ka karik ita koko atu halo ema fiar katak ita halo ona buat importante ruma ho ita-nia kbiit rasik, maibé tuir loloos ema seluk mós ajuda ona ita. Se hanesan neʼe, diʼak atu hanoin kona-ba Jesus nia ezemplu. Tuir loloos nia bele dada ema seluk nia atensaun ba ninia matenek. Maibé nia sempre temi liafuan sira husi eskritura. Nia lakohi ema seluk atu fó hahiʼi ba nia. Nia hakarak glória hotu fó deʼit ba Jeová.—João 8:28.

BAINHIRA HALO DESIZAUN

13, 14. Oinsá mak haraik-an bele ajuda ita halo desizaun neʼebé diʼak?

13 Ita presiza hatudu haraik-an bainhira ita ka ema seluk atu halo desizaun ruma. Porezemplu, iha tempu neʼebé apóstolu Paulo hela iha Sezareia, nia hakarak bá Jeruzalein atu halaʼo serbisu neʼebé Jeová fó ba nia. Maibé profeta Ágabo hatete ba nia katak se nia bá, ema sei kaer nia. Karik ema sei oho nia. Tan neʼe irmaun sira husu makaʼas ba Paulo atu labele bá. Maibé Paulo deside ona katak nia tenke bá. Paulo halo hanesan neʼe tanba nia sadere liu ba ninia an rasik ka lae? Lae. Tuir loloos Paulo hatudu haraik-an tanba nia tau fiar tomak ba Jeová. Irmaun sira mós hatudu haraik-an tanba sira apoia Paulo nia desizaun hodi husik nia bá.—Apóstolu 21:10-14.

14 Haraik-an bele ajuda ita atu halo desizaun neʼebé diʼak maski ita la hatene ka la bele kontrola buat hotu atu sai loos. Porezemplu, karik ita hanoin hela atu serbí Jeová tempu-tomak. Maibé oinsá se ita moras? Oinsá se ita-nia inan-aman moras no presiza ajuda? Sé mak sei tau matan ba ita bainhira ita-nia idade aumenta? Maski ita koko dalan oioin atu buka-hatene, ita la bele hetan resposta ba pergunta sira-neʼe. (Eclesiastes [Pengkhotbah] 8:16, 17) Maibé se ita tau fiar ba Jeová, neʼe sei ajuda ita atu simu katak ita iha limitadu. Diʼak atu halo riset, husu ema seluk nia sujestaun, no importante liu mak atu halo orasaun. Tuirmai ita presiza husik Jeová nia espíritu santu atu dirije ita. (Lee Eclesiastes [Pengkhotbah]  11:4-6. *) Jeová bele fó bensaun ba ita-nia desizaun sira, ka nia bele ajuda ita atu troka ita-nia planu sira.—Provérbios (Amsal) 16:3, 9.

DALAN ATU HARAIK AN LIUTÁN

15. Tanbasá mak hanoin kleʼan kona-ba Jeová bele ajuda ita atu haraik an nafatin?

15 Oinsá mak ita bele haburas liután hahalok haraik-an? Mai ita koʼalia kona-ba dalan haat. Primeiru, ita presiza hanoin kleʼan kona-ba Jeová atu hatene nia mak Maromak hanesan saida. Bainhira ita hatene didiʼak kona-ba Jeová, ita bele haree katak ita kiʼik tebes no nia matenek liu ita hotu. (Isaías [Yesaya] 8:13) Presiza hanoin-hetan katak ita serbí Maromak neʼebé Aas Liu Hotu, laʼós ema ka anju. Tan neʼe mak medita kona-ba nia bele ajuda ita atu ‘haraik ita-nia an ba Maromak kbiit-naʼin’.—1 Pedro 5:6.

16. Tanbasá mak medita kona-ba Jeová nia domin bele ajuda ita haraik an?

16 Dalan segundu atu haburas liután hahalok haraik-an mak medita kona-ba Jeová nia domin neʼebé boot tebetebes ba ita. Apóstolu Paulo kompara kongregasaun hanesan ho ita-nia isin-lolon. Jeová mak kria ita-nia isin-lolon, no parte ida-idak iha folin-boot ba nia. (1 Korinto 12:23, 24) Hanesan neʼe mós ho ita, ita ida-idak iha folin-boot ba Jeová. Nia nunka uza ema seluk atu kompara ho ita, no nia mós nunka dada fali ninia domin bainhira ita halo sala ruma. Hodi hatene katak Jeová hadomi ita, neʼe halo ita sente seguru tebes, loos ka lae?

17. Tanbasá mak importante atu hanoin diʼak kona-ba ema seluk?

17 Dalan terseiru atu bele haraik an liután mak halo tuir Jeová nia ezemplu hodi hanoin diʼak kona-ba ema seluk. Duké buka oin ka sempre manda ema atu halo buat ruma, diʼak atu husu ema seluk nia sujestaun no simu ema seluk nia ideia sira. (Provérbios [Amsal] 13:10) Ita mós hakarak haksolok bainhira ita haree irmaun ka irmán simu knaar foun espesiál ruma. No ita hakarak fó-agradese ba Jeová tanba nia husik ita hotu atu serbí nia.—1 Pedro 5:9.

18. Tanbasá mak treinu ita-nia konxiénsia bele ajuda ita haraik an liután?

18 Dalan ikus atu haburas liután hahalok haraik-an mak uza Bíblia nia prinsípiu sira atu treinu ita-nia laran, ka konxiénsia. Ita bele buka-hatene oinsá Jeová sente no hanoin liuhusi Bíblia nia prinsípiu sira. Bainhira ita estuda, halo orasaun, no uza buat neʼebé ita aprende, neʼe bele halo ita-nia konxiénsia metin liután. (1 Timóteo 1:5) Ita mós aprende atu hanoin uluk ema seluk. Se ita mak halo buat sira-neʼe, Jeová promete katak nia sei ‘halo kompletu ita-nia treinu’, inklui mós ajuda ita atu sai haraik-an liután.—1 Pedro 5:10.

19. Saida mak bele ajuda ita atu haraik an nafatin?

19 Sei hanoin-hetan profeta husi rai-Judá ka lae? Nia lakon ninia moris no relasaun diʼak ho Jeová tanba nia la hatudu tan haraik-an. Maibé ita hotu bele haraik an nafatin maski susar atu halo nuneʼe. No ezemplu husi Jeová nia atan sira hatudu katak ita bele duni hatudu haraik-an. Se ita mak serbí Jeová ba tempu kleur ona, tuir loloos ita tenkesér sadere liután ba nia. (Provérbios [Amsal] 8:13) Maski ita ida-idak nia situasaun moris la hanesan, maibé laʼo hamutuk ho Jeová mak priviléjiu neʼebé boot tebes ba ita hotu. Tan neʼe, mai ita hakaʼas an atu hatudu haraik-an nafatin no laʼo hamutuk ho Jeová toʼo tempu neʼebé la bele sura.

^ par. 3 Miquéias 6:8 Oh ema sira, nia fó-hatene ona ba imi buat neʼebé diʼak. No saida mak Jeová husu ba imi atu halo? Neʼe mak atu imi hatudu hahalok justisa, hafolin hahalok laran-metin, no atu laʼo hamutuk imi-nia Maromak ho haraik-an!

^ par. 8 Provérbios 3:5, 6 Tau fiar ba Jeová ho ó-nia laran tomak, no labele sadere ba ó-nia matenek rasik. Hanoin didiʼak kona-ba nia iha ó-nia dalan hotu, no nia sei halo loos ó-nia dalan sira.

^ par. 14 Eclesiastes 11:4-6 Ema neʼebé hateke deʼit ba anin sei la kari fini, no ema neʼebé hateke deʼit ba kalohan sei la koʼa buat ida. Ó la hatene oinsá forsa moris nian book an iha bebé ida nia ruin sira iha ninia inan nia kabun, nuneʼe mós ó la hatene Maromak loos nia serbisu, ida neʼebé halo buat hotu. Kari ó-nia fini iha dadeer no keta husik ó-nia liman deskansa toʼo kalan; tanba ó la hatene ida neʼebé mak sei moris, karik fini ida-neʼe ka ida neʼebá, ka karik sira rua moris hotu.