Skip to content

Skip to table of contents

 LISAUN ESTUDU 43

Adora Jeová mesak deʼit

Adora Jeová mesak deʼit

“Jeová mak Maromak neʼebé hakarak ema atu adora nia mesak deʼit.”​—NAUM 1:2.

KNANANUK 51 Dedika an ba Maromak!

IHA LISAUN NEʼE *

1. Tanbasá ita tenke adora Jeová mesak deʼit?

ITA tenke adora Jeová mesak deʼit tanba nia mak Kriadór no Hun ba moris. (Apok 4:11) Maibé, dala ruma susar. Maski ita hadomi no respeitu Jeová, buat seluk bele sai importante liu iha ita-nia moris toʼo hanetik ita atu hadomi no adora Jeová mesak deʼit. Ita presiza buka-hatene oinsá ida-neʼe bele akontese. Maibé ulukliu, mai ita aprende kona-ba adora Jeová mesak deʼit katak sá.

2. Tuir Éxodo 34:14, ita sei halo saida se ita adora Jeová mesak deʼit?

2 Iha Bíblia, hadomi Jeová ho laran iha ligasaun metin ho adora nia mesak deʼit. Ita hakarak hadomi Jeová ho ita-nia laran tomak no ita lakohi hadomi ema ruma ka buat ruma liu fali nia.​—Lee Éxodo 34:14.

3. Tanbasá ita iha razaun diʼak atu adora Jeová mesak deʼit?

3 Ita iha razaun diʼak atu adora Jeová mesak deʼit. Tanbasá? Tanba buat oioin neʼebé ita aprende kona-ba nia. Ita admira ninia hahalok furak sira. Ita hatene saida mak Jeová gosta no odi, no ita mós gosta no odi buat sira-neʼe. Ita komprende no apoia ninia hakarak ba ema. Ita sente agradese tanba nia fó ita oportunidade atu sai ninia belun. (Sal 25:14) Buat hotu neʼebé ita aprende kona-ba ita-nia Kriadór halo ita hakbesik liután ba nia.​—Tgo 4:8.

4. (a) Saida mak Diabu uza atu hamenus ita-nia domin ba Jeová? (b) Ita sei aprende saida iha lisaun neʼe?

4 Diabu mak kontrola mundu aat neʼe, no nia uza mundu neʼe atu halo ita sente katak ita-nia hakarak mak importante liu no mós halo susar ba ita atu kontrola ita-nia  hakarak isin nian. (Éf 2:1-3; 1 João 5:19) Nia hakarak ita atu hadomi mós buat seluk atu nuneʼe ita labele hadomi deʼit Jeová. Ita sei aprende kona-ba dalan rua neʼebé Diabu halo nuneʼe. Primeiru, nia tenta ita atu buka rikusoin, no segundu nia koko atu book ita hili atividade halimar nian neʼebé aat.

PROTEJE ITA-NIA AN HUSI DOMIN BA OSAN

5. Tanbasá ita tenke proteje ita-nia an husi domin ba osan?

5 Ita hotu hakarak atu iha hahán natoon, roupa neʼebé diʼak, no hela-fatin. Maibé, ita tenke proteje ita-nia an husi domin ba osan. Ema barak iha Satanás nia mundu “hadomi osan” no rikusoin. (2 Tim 3:2) Jesus hatene katak ninia dixípulu sira mós karik sei hetan tentasaun atu haburas domin neʼe. Jesus hatete: “La iha ema ida mak bele sai atan ba patraun naʼin-rua, tanba nia sei odi ida no hadomi ida seluk, ka nia sei apoia ida no hakribi ida seluk. Imi labele sai atan ba Maromak no mós ba Rikusoin.” (Mt 6:24) Ema neʼebé adora Jeová maibé uza mós tempu barak no hakaʼas an atu sai riku iha mundu neʼe mak hanesan ema neʼebé koko atu serbí patraun naʼin-rua. Nia la adora Jeová mesak deʼit.

Oinsá ema Laodiseia balu haree sira-nia an . . . no oinsá Jeová no Jesus haree sira (Haree parágrafu 6)

6. Ita bele aprende saida husi Jesus nia liafuan ba kongregasaun iha Laodiseia?

6 Antes tinan 100 EC, ema Kristaun iha kongregasaun iha sidade Laodiseia gaba an hodi dehan: “Haʼu riku, haʼu halibur ona rikusoin no la presiza tan buat seluk.” Maibé tuir Jeová no Jesus, ema sira-neʼe “la kontente, kuitadu liu, kiak, matan-delek no isin-tanan”. Jesus fó konsellu ba sira laʼós tanba sira riku, maibé tanba sira-nia domin ba rikusoin estraga sira-nia relasaun diʼak ho Jeová.  (Apok 3:14-17) Se ita sente katak hakarak atu buka rikusoin sai buras iha ita-nia laran, ita tenke hadiʼa ida-neʼe lalais. (1 Tim 6:7, 8) Se lae, ita sei komesa hadomi rikusoin no Jeová sei la simu ita-nia adorasaun. Nia ‘hakarak ita atu adora nia mesak deʼit’. (Deut 4:24) Oinsá mak osan bele sai importante liu iha ita-nia moris?

7-9. Saida mak Ita aprende husi katuas kongregasaun ida naran David?

7 Hanoin kona-ba ezemplu husi katuas kongregasaun ida iha Estadus Unidus naran David. Nia hatete katak nia serbisu ho badinas. Kompañia aumenta ninia pozisaun no osan, no kona-ba serbisu neʼebé nia halo, ema rekoñese nia nuʼudar serbisu-naʼin neʼebé matenek iha Estadus Unidus. David hatete: “Iha tempu neʼebá, haʼu hanoin katak haʼu hetan susesu sira-neʼe tanba Jeová nia bensaun.” Maibé susesu neʼebé nia hetan mai duni husi Jeová ka lae?

8 Neineik-neineik David rekoñese katak ninia serbisu estraga daudaun ninia relasaun diʼak ho Jeová. Nia hatete: “Bainhira tuir reuniaun sira no haklaken, haʼu mós kontinua hanoin kona-ba problema neʼebé liga ho serbisu. Maski haʼu manán osan barak, maibé haʼu-nia estrese aumenta, no mosu problema iha haʼu-nia moris kaben nian.”

9 David rekoñese katak nia presiza hanoin fali kona-ba saida mak importante liu iha ninia moris. Nia dehan: “Haʼu halo desizaun metin atu hadiʼa haʼu-nia situasaun.” David hakarak atu troka ninia oráriu, no fó sai ninia planu neʼe ba ninia patraun. Rezultadu mak saida? David lakon ninia serbisu. Entaun nia halo saida? David hatete: “Loron tuirmai, haʼu hatama  formuláriu atu sai pioneiru estra ba nafatin.” Atu sustenta sira-nia moris, David no ninia feen komesa halo serbisu atu hamoos. Liutiha tempu balu, nia komesa serbí nuʼudar pioneiru regulár, no tuirmai ninia feen mós serbí nuʼudar pioneiru regulár. Baibain ema barak lakohi halo serbisu atu hamoos, maibé ba sira, sira-nia serbisu laʼós buat neʼebé importante liu ba sira. Maski manán osan uitoan liu fali uluk, maibé fulan-fulan sira hetan osan natoon atu uza ba sira-nia presiza. Sira hakarak tau uluk Jeová iha sira-nia moris, no sira sente rasik oinsá Jeová tau matan ba ema neʼebé tau uluk Maromak nia Ukun.​—Mt 6:31-33.

10. Oinsá mak ita bele proteje ita-nia laran?

10 Maski ita iha osan uitoan ka barak, maibé ita presiza proteje ita-nia laran. Oinsá? Keta haburas domin ba osan. Keta husik serbisu atu manán osan sai importante liu fali serbisu ba Jeová. Oinsá mak ita hatene kona-ba neʼe? Ita bele husu pergunta balu ba Ita-nia an: ‘Haʼu sempre hanoin kona-ba haʼu-nia serbisu bainhira haʼu tuir reuniaun ka haklaken ka lae? Haʼu kontinua laran-taridu kona-ba osan ka lae? Osan no sasán hamosu problema iha haʼu-nia moris kaben nian ka lae? Haʼu prontu atu halo serbisu neʼebé ema seluk lakohi halo se ida-neʼe fó tempu liután mai haʼu atu serbí Jeová ka lae?’ (1 Tim 6:9-12) Bainhira hanoin kona-ba pergunta sira-neʼe, ita tenke hanoin-hetan katak Jeová hadomi ita no promete ba ema hotu neʼebé serbí deʼit nia: “Haʼu sei nunka husik ó, no haʼu sei nunka fila kotuk ba ó.” Tan neʼe mak apóstolu Paulo hakerek: “Iha imi-nia moris, keta hadomi osan.”​—Ebr 13:5, 6.

HILI DIDIʼAK ITA-NIA ATIVIDADE HALIMAR NIAN

11. Oinsá atividade halimar nian bele book ita?

11 Jeová hakarak ita atu moris kontente, no atividade halimar nian bele halo ita kontente. Tuir loloos, Bíblia dehan: “Diʼak liu ba ema ida atu han, hemu no hetan ksolok husi ninia serbisu makaʼas, tanba la iha buat ida mak diʼak liu fali ida-neʼe.” (Ecle 2:24) Maibé, atividade halimar nian barak iha mundu neʼe bele fó influénsia aat ba ita. Neʼe bele book ema atu simu ka hadomi buat neʼebé Maromak hakribi.

Sé mak prepara ita-nia atividade halimar nian? (Haree parágrafu 11-14) *

12. Tuir 1 Korinto 10:21, 22, tanbasá ita tenke hili didiʼak atividade halimar nian?

 12 Ita hakarak atu adora Jeová mesak deʼit, tan neʼe ita labele han husi “Jeová nia meza” no mós “anju aat nia meza”. (Lee 1 Korinto 10:21, 22.) Baibain han hamutuk ho ema ruma mak sinál katak sira mak belun. Se ita hili atividade halimar nian neʼebé hatudu violénsia, espiritizmu, sala seksuál, ka hakarak no hahalok isin nian seluk, tuir loloos ita han ai-han neʼebé Maromak nia inimigu prepara ona. Rezultadu mak, ita lori susar ba ita-nia an no mós estraga ita-nia relasaun diʼak ho Jeová.

13-14. (a) Iha dalan saida mak ita bele kompara atividade halimar nian ho ai-han? (b) Tuir Tiago 1:14, 15, tanbasá ita tenke kuidadu ho atividade halimar nian neʼebé ita hili?

13 Iha dalan saida mak ita bele kompara atividade halimar nian ho ai-han? Bainhira ita han, ita bele hili saida mak ita sei hatama iha ita-nia ibun. Maibé bainhira ita tolan ona ai-han neʼe, ita labele hili oinsá ai-han neʼe afeta ita-nia isin. Ai-han neʼebé diʼak bele halo ita iha saúde diʼak. Ai-han neʼebé la diʼak bele estraga ita-nia saúde. Karik ita la nota kedas rezultadu, maibé liutiha tempu balu ita bele nota ida-neʼe.

14 Nuneʼe mós bainhira ita hili atividade halimar nian, ita bele hili buat neʼebé ita sei hatama iha ita-nia neon. Maibé depois neʼe, atividade halimar nian neʼebé ita hili bele fó influénsia ba ita-nia hanoin no sentimentu. Atividade halimar nian neʼebé diʼak halo ita sente kmaan, maibé atividade halimar nian neʼebé aat estraga ita. (Lee Tiago 1:14, 15.) Karik ita sei la nota kedas rezultadu husi atividade halimar nian neʼebé aat, maibé ikusmai ita sei nota ida-neʼe. Tan neʼe mak Bíblia fó avizu ba ita hodi dehan: “Keta lohi imi-nia an: Ita labele bosok Maromak. Tanba buat naran deʼit neʼebé ema kari, nia mós sei koʼa ida-neʼe. Ema neʼebé kari hodi tuir hakarak isin nian sei koʼa mate husi ninia isin.” (Gal 6:7, 8) Importante tebes atu hasees an husi atividade halimar nian neʼebé hatudu sai buat sira neʼebé Jeová odi.​—Sal 97:10.

15. Jeová fó ita prezente furak saida?

15 Jeová nia povu barak kontente atu haree JW Broadcasting®, ita-nia estasaun televizaun iha internét. Irmán ida naran Marilyn dehan: “JW Broadcasting ajuda ona haʼu atu iha hanoin pozitivu, no haʼu bele haree buat hotu iha estasaun neʼe tanba buat hotu mak diʼak. Bainhira haʼu sente mesamesak ka laran-kraik, haʼu buka diskursu ida ka adorasaun dadeer nian ida atu haree. Neʼe halo haʼu sente besik liután ba Jeová no ninia organizasaun. JW Broadcasting lori duni mudansa ba haʼu-nia moris.” Ita mós hetan benefísiu husi Jeová nia prezente neʼe ka lae? JW Broadcasting iha programa foun fulan-fulan, iha áudio, vídeo no mós múzika sira neʼebé fó kmaan ba ita no ita bele haree ka rona iha tempu naran deʼit.

16-17. Tanbasá ita presiza kontrola tempu neʼebé ita uza atu halo atividade halimar nian? Oinsá mak ita bele halo ida-neʼe?

16 Ita presiza kontrola atividade halimar saida mak ita hili, no mós kontrola tempu neʼebé ita uza. Se lae, karik ita sei uza tempu barak liu atu halo atividade halimar nian duké serbí Jeová. Ema barak sente susar atu kontrola tempu neʼebé sira uza atu halo atividade halimar nian. Irmán Abigail neʼebé idade 18  dehan: “Haree televizaun ajuda haʼu atu sente hakmatek fali bainhira halaʼo tiha serbisu barak iha loron neʼe. Maibé se haʼu la kuidadu, haʼu bele uza tempu barak liu atu haree televizaun.” Irmaun joven ida naran Samuel dehan: “Dala ruma haʼu haree vídeo badak barak iha internét. Foufoun haʼu haree vídeo ida deʼit, no haʼu la nota katak haʼu uza ona oras tolu ka haat atu haree vídeo sira.”

17 Oinsá mak Ita bele kontrola tempu neʼebé Ita uza hodi halo atividade halimar nian? Hakat primeiru mak buka-hatene tempu neʼebé Ita uza. Durante semana ida koko hakerek iha Ita-nia kalendáriu tempu neʼebé Ita uza atu haree televizaun, uza internét, no halimar game iha Ita-nia telemovel. Se Ita sente katak Ita uza tempu barak liu, diʼak atu halo oráriu. Planu atu halo uluk buat importante liu, no tuirmai fahe tempu atu halo atividade halimar nian. Depois neʼe, husu Jeová nia ajuda atu kumpre Ita-nia planu. Hodi halo nuneʼe, Ita sei iha tempu no enerjia atu estuda Bíblia mesak, halaʼo adorasaun família, tuir reuniaun, no serbí Jeová liuhusi haklaken no hanorin ema seluk. Karik Ita mós sei la fó sala ba Ita-nia an kona-ba tempu neʼebé Ita uza atu halo atividade halimar nian.

KONTINUA ADORA JEOVÁ MESAK DEʼIT

18-19. Oinsá mak ita bele hatudu katak ita adora Jeová mesak deʼit?

18 Depois hakerek tiha katak Satanás nia mundu sei remata no mundu foun sei mai, apóstolu Pedro dehan: “Maluk doben sira, tanba imi hein hela buat sira-neʼe, hakaʼas an liután atu ikusmai Maromak haree imi nuʼudar ema neʼebé moos, sala-laek no iha dame ho Maromak.” (2 Ped 3:14) Bainhira ita halo tuir konsellu neʼe no hakaʼas an atu moos nafatin iha dalan morál no adora Jeová iha dalan neʼebé nia simu, ita hatudu katak ita adora Jeová mesak deʼit.

19 Satanás no ninia mundu neʼe sei kontinua tenta ita atu tau uluk buat sira seluk duké adorasaun ba Jeová. (Lc 4:13) Maibé, Ita hakarak hadomi Jeová ho ita-nia laran tomak no ita lakohi hadomi ema ruma ka buat ruma liu fali nia. Ita hakarak adora Jeová mesak deʼit tanba nia merese simu ida-neʼe.

KNANANUK 30 Haʼu-nia Aman, Maromak no Belun

^ par. 5 Ita gosta serbí Jeová. Maibé ita adora nia mesak deʼit ka lae? Resposta ba pergunta neʼe depende ba desizaun neʼebé ita halo. Ita sei koʼalia kona-ba buat rua neʼebé ajuda ita atu buka-hatene se ita adora Jeová mesak deʼit ka lae.

^ par. 53 ESPLIKASAUN BA DEZEÑU: Ita lakohi han ai-han neʼebé ema teʼin iha dapur neʼebé foʼer. Entaun tanbasá ita hakarak haree atividade halimar nian neʼebé hatudu violénsia, espiritizmu, ka sala seksuál?