Skip to content

Skip to table of contents

 LISAUN ESTUDU 52

Inan-aman, treinu imi-nia oan atu hadomi Jeová

Inan-aman, treinu imi-nia oan atu hadomi Jeová

“Oan sira mak liman-rohan husi Jeová.”—SAL 127:3.

KNANANUK 134 Oan sira mak liman-rohan

IHA LISAUN NEʼE *

1. Jeová fó responsabilidade saida ba inan-aman?

JEOVÁ kria mane no feto primeiru ho hakarak atu iha oan. Bíblia hatete: “Oan sira mak liman-rohan husi Jeová.” (Sal 127:3) Neʼe katak sá? Imajina toʼok, Ita-nia belun diʼak ida husu Ita atu rai didiʼak ninia osan barak. Ita sente oinsá? Karik, Ita sente orgullu tanba nia tau fiar ba Ita. Maibé Ita mós hanoin barak kona-ba oinsá Ita bele rai didiʼak osan neʼe. Jeová, ita-nia belun neʼebé diʼak liu hotu, fó knaar ba inan-aman atu tau matan ba buat neʼebé folin-boot liu fali osan. Nia fó responsabilidade ba sira atu tau matan ba oan sira-nia presiza no halo oan sira kontente.

2. Ita sei buka resposta ba pergunta saida deʼit?

2 Sé mak presiza deside se feen-laʼen atu iha oan ka lae no bainhira mak iha oan? No saida mak inan-aman bele halo atu ajuda sira-nia oan iha moris neʼebé kontente? Ita sei haree prinsípiu balu husi Bíblia neʼebé bele ajuda feen-laʼen Kristaun halo desizaun ho matenek.

RESPEITU FEEN-LAʼEN NIA DESIZAUN

3. (a) Sé mak presiza deside se feen-laʼen ida atu iha oan ka lae? (b) Bíblia nia prinsípiu saida mak família no belun sira presiza hanoin-hetan?

3 Iha kultura balu, ema hanoin katak mane no feto neʼebé foin kaben tenke iha oan kedas. Sira-nia família no ema seluk karik koko obriga sira atu iha oan lalais. Irmaun ida husi Ázia naran Jethro hatete: “Iha kongregasaun, irmaun-irmán sira neʼebé iha oan obriga feen-laʼen seluk atu iha oan.” Irmaun seluk husi Ázia naran Jeffrey hatete: “Ema balu hatete ba feen-laʼen neʼebé la iha oan katak la iha ema ida mak sei tau matan ba sira bainhira sira sai ferik-katuas.” Maibé tuir loloos, feen-laʼen ida-idak  mak tenke deside se sira hakarak iha oan ka lae tanba ida-neʼe mak sira-nia responsabilidade. (Gal 6:5, nota) La sala atu família no belun sira hakarak feen-laʼen foun atu sente kontente. Maibé ema hotu presiza hanoin-hetan katak neʼe mak feen-laʼen nia desizaun.—1 Tes 4:11.

4-5. Pergunta rua saida mak feen-laʼen presiza koʼalia hamutuk, no bainhira mak tempu diʼak atu koʼalia hamutuk kona-ba neʼe? Esplika toʼok.

4 Feen-laʼen neʼebé deside atu iha oan tenke koʼalia hamutuk kona-ba pergunta importante rua: Primeiru, bainhira mak sira hakarak atu iha oan? Segundu, sira hakarak atu iha oan naʼin-hira? Bainhira mak tempu diʼak ba feen-laʼen atu koʼalia kona-ba neʼe? No tanbasá pergunta rua neʼe importante?

5 Baibain, antes mane no feto ida kaben, sira presiza koʼalia hamutuk kona-ba atu iha oan ka lae. Tanbasá? Tanba importante tebes atu sira iha hanoin neʼebé hanesan kona-ba neʼe. No mós, sira presiza hanoin kona-ba se sira prontu ka lae atu simu responsabilidade neʼe. Feen-laʼen balu deside atu hein ba tinan ida ka rua depois sira-nia kazamentu atu bele iha oan tanba bainhira sira iha oan, sira sei uza tempu no enerjia barak atu tau matan ba oan. Sira sente katak hodi hein uitoan, sira bele sai toman ho moris nuʼudar feen-laʼen no hakbesik ba malu.—Éf 5:33.

6. Tanba ohin loron mak tempu neʼebé susar, feen-laʼen balu halo desizaun saida?

6 Ema Kristaun balu deside atu banati-tuir ezemplu husi Noé nia oan-mane naʼin-tolu no sira-nia feen. Sira la ansi atu iha oan. (Gén 6:18; 9:18, 19; 10:1; 2 Ped 2:5) Jesus kompara ita-nia tempu ho “Noé nia tempu” no ita hatene ho klaru katak ita moris iha tempu neʼebé iha “problema barak neʼebé susar atu tahan”. (Mt 24:37; 2 Tim 3:1) Tanba razaun neʼe mak feen-laʼen balu deside atu la iha oan hodi nuneʼe sira bele uza sira-nia tempu atu halo serbisu barak liután ba Jeová.

Bainhira deside atu iha oan ka lae no iha oan naʼin-hira, feen-laʼen neʼebé matenek ‘sura sira-nia osan’ (Haree parágrafu 7) *

7. Oinsá mak prinsípiu sira iha Lucas 14:28, 29 no Provérbios 21:5 bele ajuda feen-laʼen?

7 Bainhira deside atu iha oan ka lae no iha oan naʼin-hira, feen-laʼen neʼebé matenek sei ‘sura sira-nia osan’. (Lee Lucas 14:28, 29.) Inan-aman neʼebé iha esperiénsia atu haboot oan hatete katak haboot oan gasta osan barak no mós presiza uza tempu no enerjia barak. Tan  neʼe, importante tebes ba feen-laʼen atu hanoin kona-ba pergunta sira hanesan: ‘Ami naʼin-rua presiza serbisu atu bele tau matan ba família nia presiza ka lae? Ami naʼin-rua iha hanoin neʼebé hanesan kona-ba buat neʼebé ami-nia família presiza ka lae? Se ami naʼin-rua presiza serbisu, sé mak sei tau matan ba ami-nia oan? Ami hakarak sé atu fó influénsia ba sira-nia hahalok no hanoin?’ Se feen-laʼen koʼalia hamutuk pergunta sira-neʼe, sira aplika liafuan iha Provérbios 21:5.Lee.

Laʼen neʼebé hadomi ninia feen sei hakaʼas an atu apoia ninia feen (Haree parágrafu 8)

8. Susar saida deʼit mak inan-aman sira sei hasoru, no saida mak laʼen Kristaun ida presiza halo?

8 Inan no mós aman presiza uza tempu no enerjia atu tau matan ba oan ida-idak. Tan neʼe, se feen-laʼen iha oan barak iha tempu badak nia laran, susar ba sira atu fó atensaun ba oan ida-idak. Inan-aman balu neʼebé iha oan barak hatete katak sira sente susar duni. Inan ida karik sente kole tebetebes iha dalan fíziku no mós emosaun. Karik nia bele sente kole tebes toʼo la iha tan enerjia atu estuda, halo orasaun, no haklaken beibeik. Karik susar mós ba nia atu tau atensaun bainhira tuir reuniaun no hetan benefísiu husi reuniaun. Laʼen neʼebé hadomi ninia feen, sei hakaʼas an atu apoia ninia feen iha reuniaun-fatin no mós iha uma bainhira sira-nia oan presiza hetan atensaun. Porezemplu, nia bele ajuda ninia feen atu halo serbisu uma-laran nian. Nia sei hakaʼas an atu halaʼo Adorasaun Família nian semana-semana. No nia sei haklaken beibeik hamutuk ho ninia família.

HANORIN OAN SIRA ATU HADOMI JEOVÁ

9-10. Saida mak inan-aman presiza halo atu ajuda sira-nia oan?

9 Saida deʼit mak inan-aman bele halo atu ajuda sira-nia oan hadomi Jeová? Oinsá mak sira bele proteje sira-nia oan husi perigu iha mundu neʼe? Haree toʼok hakat balu neʼebé inan-aman bele halo.

10 Halo orasaun atu husu Jeová nia ajuda. Hanoin toʼok kona-ba Manoá no ninia feen nia ezemplu, sira mak Sansão nia inan-aman. Kuandu Manoá hatene katak nia no ninia feen sei iha oan-mane, nia harohan ba Jeová atu fó matadalan kona-ba oinsá atu haboot sira-nia oan.

11. Oinsá mak inan-aman balu banati-tuir Manoá nia ezemplu neʼebé temi iha Juís 13:8?

11 Feen-laʼen naran Nihad no Alma husi rai-Bóznia no Herzegovina aprende husi  Manoá nia ezemplu. Sira esplika: “Hanesan Manoá, ami harohan ba Jeová atu husu matadalan oinsá atu sai inan-aman diʼak. No Jeová hatán ami-nia orasaun iha dalan oioin liuhusi Eskritura sira, publikasaun sira, reuniaun sira no mós reuniaun boot sira.”​—Lee Juís 13:8.

12. José no Maria hatudu ezemplu saida ba sira-nia oan?

12 Hanorin liuhusi ezemplu. Ita-nia liafuan mak importante maibé Ita-nia hahalok bele lori influénsia boot liu ba Ita-nia oan. Ita bele fiar katak José no Maria hatudu ezemplu diʼak ba sira-nia oan, inklui Jesus. José serbisu makaʼas atu tau matan ninia família. José mós anima ninia família atu hafolin sira-nia relasaun ho Maromak. (Deut 4:9, 10) Maski Moisés nia Ukun-Fuan la haruka aman sira atu lori sira-nia família tomak bá Jeruzalein atu selebra Páskua tinan-tinan, maibé José lori sira bá Jeruzalein. (Lc 2:41, 42) Karik aman balu hanoin katak atu lori família tomak bá Jeruzalein mak susar, gasta tempu no osan barak. Maibé José hafolin tebes ninia relasaun diʼak ho Jeová no hanorin ninia oan sira atu halo hanesan. Maria mós hatene didiʼak Eskritura sira. Liuhusi ninia liafuan no hahalok, nia hanorin ninia oan sira atu hadomi Maromak nia Liafuan.

13. Oinsá mak inan-aman ida banati-tuir José no Maria nia ezemplu?

13 Nihad no Alma, neʼebé ohin temi ona, hakarak atu banati-tuir José no Maria nia ezemplu. Oinsá mak ida-neʼe ajuda sira atu haboot sira-nia oan-mane atu hadomi no serbí Jeová? Sira hatete: “Liuhusi ami-nia hahalok no liafuan, ami hakaʼas an atu hatudu ba ami-nia oan-mane katak diʼak tebes atu moris tuir Jeová nia prinsípiu sira.” Nihad hatutan: “Se Ita hakarak Ita-nia oan sai ema neʼebé diʼak, Ita rasik presiza hatudu hahalok diʼak.”

14. Tanbasá importante ba inan-aman atu hatene sira-nia oan ransu ho sé?

14 Ajuda Ita-nia oan atu hili didiʼak belun. Inan-aman presiza hatene sira-nia oan ransu ho sé no saida mak sira halo. Neʼe katak inan-aman presiza hatene sira-nia oan koʼalia ho sé liuhusi média sosiál no telemovel. Ema neʼebé ita-nia oan ransu bele fó influénsia ba oan sira-nia hahalok no hanoin.​—1 Kor 15:33.

15. Saida mak inan-aman sira bele aprende husi irmaun Jessie nia ezemplu?

15 Saida mak inan-aman bele halo se sira ladún hatene oinsá atu uza komputadór ka sasán eletróniku? Aman ida husi rai-Filipinas naran Jessie hatete: “Ami ladún hatene kona-ba sasán eletróniku. Maibé neʼe la hanetik ami atu hanorin ami-nia oan kona-ba perigu sira husi sasán eletróniku.” Jessie la bandu ninia oan sira atu uza sasán eletróniku tanba deʼit nia la hatene uza ida-neʼe. Nia esplika: “Haʼu anima haʼu-nia oan sira atu uza sasán eletróniku hodi aprende língua foun, atu prepara ba reuniaun, no atu lee Bíblia loroloron.” Se Ita mak inan ka aman, Ita lee no koʼalia hamutuk ona ho Ita-nia oan kona-ba informasaun ba “Joven sira” iha sítiu jw.org® kona-ba haruka mensajen no fahe foto iha internét ka lae? Ita mós haree hamutuk ona ka lae vídeo ho títulu Sasán eletróniku kontrola Ita ka lae? no Uza sítiu belun nian ho matenek? *  Informasaun sira-neʼe bele ajuda ita atu hanorin ita-nia oan oinsá atu uza sasán eletróniku ho matenek.​—Prov 13:20.

16. Saida mak inan-aman barak halo, no rezultadu mak saida?

16 Inan-aman barak hakaʼas an atu halo arranju oioin atu sira-nia oan bele ransu ho ema sira neʼebé hatudu ezemplu diʼak kona-ba serbí Maromak. Porezemplu, N’Déni no Bomine, feen-laʼen husi Kosta Marfín konvida beibeik katuas área atu hela iha sira-nia uma. N’Déni hatete: “Desizaun neʼe lori influénsia diʼak ba ami-nia oan-mane. Ami-nia oan-mane komesa serbí nuʼudar pioneiru no agora dala ruma nia serbí nuʼudar katuas área.” Ita mós bele halo arranju atu Ita-nia oan bele ransu hanesan neʼe ka lae?

17-18. Bainhira mak inan-aman presiza komesa hanorin sira-nia oan?

17 Treinu oan husi kiʼik kedas. Diʼak liu ba inan-aman atu treinu sira-nia oan husi kiʼik kedas. (Prov 22:6) Hanoin toʼok kona-ba Timóteo neʼebé halo viajen ho Paulo. Timóteo nia inan Eunice, no ninia avó-feto Loide komesa treinu nia “husi kiʼik kedas”.​—2 Tim 1:5; 3:15.

18 Feen-laʼen seluk naran Jean-Claude no Peace husi Kosta Marfín konsege haboot oan naʼin-neen atu hadomi Jeová no adora nia. Saida mak ajuda sira atu hetan susesu? Sira banati-tuir Eunice no Loide nia ezemplu. Sira hatete: “Ami hanorin Maromak nia Liafuan ba ami-nia oan sira husi sira kiʼik kedas, ami komesa husi sira moris mai.”​—Deut 6:6, 7.

19. Hanorin Maromak nia Liafuan ba Ita-nia oan katak sá?

19 “Hanorin” Jeová nia Liafuan ba Ita-nia oan katak sá? Liafuan Ebraiku “hanorin” signifika “fó-hanoin beibeik ka repete beibeik hodi hanorin”. Atu halo nuneʼe, inan-aman presiza gasta tempu beibeik hamutuk ho sira-nia oan. Karik dala ruma, inan-aman sai laran-kraik tanba sira presiza repete beibeik matadalan ba oan sira. Maski nuneʼe, inan-aman bele haree ida-neʼe nuʼudar oportunidade atu ajuda sira-nia oan komprende Maromak nia Liafuan no aplika ida-neʼe.

Inan-aman presiza deside oinsá atu treinu oan ida-idak (Haree parágrafu 20) *

20. Esplika toʼok oinsá ita bele aplika Salmo 127:4 atu haboot oan.

 20 Koñese didiʼak Ita-nia oan. Salmo 127 kompara labarik sira ho rama-oan. (Lee Salmo 127:4.) Rama-oan bele halo husi buat oioin no iha medida la hanesan, nuneʼe mós ho labarik sira, labarik ida-idak la hanesan. Tan neʼe, inan-aman presiza buka-hatene oinsá atu treinu oan ida-idak. Feen-laʼen ida husi rai-Izraél neʼebé haboot oan naʼin-rua ho susesu atu adora Jeová, fó sai buat neʼebé ajuda sira, hodi dehan: “Ami naʼin-rua halaʼo estuda Bíblia ho oan ketaketak.” Tuir loloos, família ida-idak nia ulun bele deside se sira presiza ka iha posibilidade ka lae atu halaʼo estudu hanesan neʼe.

JEOVÁ SEI AJUDA ITA

21. Inan-aman sira bele fiar saida kona-ba Jeová?

21 Dala ruma, inan-aman sente susar atu hanorin sira-nia oan, maibé oan sira mak prezente husi Jeová. Nia sempre prontu atu ajuda inan-aman sira. Nia prontu atu rona ba inan-aman nia orasaun. Nia hatán orasaun sira-neʼe liuhusi Bíblia, ita-nia publikasaun, no liuhusi ezemplu no konsellu husi inan-aman maduru seluk iha kongregasaun.

22. Saida deʼit mak inan-aman bele fó ba sira-nia oan?

22 Inan-aman balu hatete katak presiza tinan 20 atu haboot oan, maibé knaar nuʼudar inan-aman nunka iha rohan. Buat diʼak liu neʼebé inan-aman bele fó ba sira-nia oan mak domin, tempu no treinamentu neʼebé bazeia ba Bíblia. Labarik ida-idak nia reasaun la hanesan. Maski nuneʼe, labarik barak neʼebé sai boot iha família ho inan-aman neʼebé hadomi Jeová, sente hanesan ho irmán Joanna Mae husi Ázia: “Kuandu haʼu hanoin fali treinu neʼebé haʼu simu husi haʼu-nia inan-aman, haʼu agradese tebes tanba sira dixiplina haʼu no hanorin haʼu atu hadomi Jeová. Sira laʼós deʼit fó moris ba haʼu, maibé sira mós fó ba haʼu moris neʼebé iha duni folin.” (Prov 23:24, 25) Ita-nia maluk Kristaun rihun ba rihun mós sente hanesan neʼe.

KNANANUK 59 Mai hahiʼi Jeová

^ par. 5 Ema neʼebé kaben ona presiza iha oan ka lae? Se sira hili atu iha oan, sira sei iha oan naʼin-hira? No oinsá sira bele treinu sira-nia oan atu hadomi no serbí Jeová? Lisaun neʼe temi ezemplu balu iha ita-nia tempu no fó sai Bíblia nia prinsípiu neʼebé bele ajuda ita hatán ba pergunta sira-neʼe.

^ par. 15 Haree mós informasaun ho títulu “Hasees an husi perigu sira kona-ba média sosiál” husi livru Moris Kristaun no Haklaken fulan-Juñu 2018.

^ par. 60 ESPLIKASAUN BA DEZEÑU: Feen-laʼen ida koʼalia hamutuk kona-ba iha oan ka lae, no mós responsabilidade no benefísiu neʼebé sira sei hetan.

^ par. 64 ESPLIKASAUN BA DEZEÑU: Feen no laʼen estuda ketaketak ho sira-nia oan tanba oan ida-idak nia idade no abilidade la hanesan.