Skip to content

Skip to table of contents

 BÍBLIA NIA HANORIN

Mundu nia rohan

Mundu nia rohan

Bíblia dehan: “Mundu neʼe no ninia hakarak liu daudaun.” (1 João 2:17) Neʼe koʼalia kona-ba mundu nia rohan. Maibé “mundu neʼe” mak saida? Oinsá no bainhira mak mundu nia rohan toʼo mai?

“Mundu neʼe” mak saida?

SAIDA MAK BÍBLIA HANORIN?

“Mundu neʼe” mak kona-ba ema sira neʼebé halo sira-nia an sai Maromak nia inimigu. (Tiago 4:4) Tanba eskritura iha leten dehan “mundu neʼe no ninia hakarak”, tan neʼe, neʼe la koʼalia kona-ba rai ka ema nia hela-fatin, maibé koʼalia kona-ba ema sira neʼebé ho hakarak rasik la halo tuir Maromak. “Ita-nia Naʼi sei tesi lia ba ema sira-neʼe. Sira-nia kastigu mak atu lakon ba nafatin” husi mundu. (2 Tesalónika 1:7-9) Maibé ema neʼebé halo tuir Jesus Kristu “laʼós mundu neʼe nian”, no sira iha esperansa atu moris ba nafatin.João 15:19.

Nuneʼe mós iha 1 João 2:17 hatutan tan dehan: “Ema neʼebé halo Maromak nia hakarak sei hela ba nafatin.” Loos, ema sira hanesan neʼe mak bele moris ba nafatin iha rai. Eskritura ida tan iha Salmo (Mazmur) 37:29 mós dehan: “Ema laran-loos sei simu rai, no sira sei moris ba nafatin iha neʼebá.”

“Keta hadomi mundu ka buat sira neʼebé mundu nian. Se ema ida hadomi mundu, domin ba Aman la hela iha nia.”1 João 2:15.

Oinsá mak mundu nia rohan toʼo mai?

SAIDA MAK BÍBLIA HANORIN?

Koʼalia kona-ba mundu nia rohan, iha buat rua neʼebé sei akontese. Primeiru, Maromak sei halakon relijiaun falsu. Bíblia kompara relijiaun falsu hanesan feto-aat ida no hanaran nia “Babilónia Boot”. (Apokalipse 17:1-5; 18:8) Maski sira dehan, sira hadomi Maromak, maibé sira nafatin mete ba buat polítiku nian, hanesan feto-aat neʼebé laran-makerek. Loron ida, ulun-naʼin polítiku nian hotu mak sei halakon relijiaun falsu sira-neʼe. Bíblia dehan: “Sira sei odi feto-aat neʼe no sei halakon nia no halo nia isin-tanan, no sei han nia isin [ka, ninia rikusoin] no sei sunu hotu nia iha ahi.”Apokalipse 17:16.

Segundu, Maromak sei halakon “liurai sira iha rai tomak”, neʼe mak ulun-naʼin polítiku nian hotu. Maromak sei halakon sira no ema aat sira hotu iha “funu neʼebé mosu iha Maromak Kbiit Boot Liu Hotu nia loron boot”. Iha Bíblia, funu neʼe naran “Armajedón”.—Apokalipse 16:14, 16.

“Buka Jeová bá, imi hotu neʼebé laran-maus iha rai . . . Buka atu halo buat loos bá, buka laran-maus bá. Karik Jeová sei subar imi iha ninia loron hirus.”Sofonias (Zefanya) 2:3.

 Bainhira mak mundu nia rohan toʼo mai?

SAIDA MAK BÍBLIA HANORIN?

Mundu nia rohan besik ona toʼo mai. Maibé tanba Maromak mak justisa no laran-sadiʼa, nia hakarak fó oportunidade ba ema hotu atu rona uluk liafuan diʼak kona-ba Ninia Reinu, ka Ukun, neʼebé sei halakon no troka ema nia governu hotu iha rai. (Daniel 7:13, 14) Jesus Kristu dehan: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, no depois neʼe mundu nia rohan sei mai.” (Mateus 24:14) Tan neʼe ema tenke haklaken liafuan diʼak. Bíblia mós dehan, funu sei mosu iha nasaun hotu, sei mosu rai-nakdoko, rai-hamlaha no moras-peste. Buat hotu neʼe mak sinál neʼebé hatudu katak ita moris iha loron ikus sira no mundu nia rohan besik ona toʼo mai.Mateus 24:3; Lucas 21:10, 11.

Liután neʼe, Bíblia mós dehan katak iha “loron ikus sira” ema nia hahalok sei sai aat ba beibeik. Eskritura dehan: ‘Iha loron ikus sira, susar barak sei mosu mai. Ema sei hanoin deʼit sira an hodi buka osan, sira sei refila inan-aman, la tuir ukun-fuan, fuik no buat diʼak hotu nia funu-balun, hakarak deʼit buka sira rasik nia ksolok liu fali hadomi Maromak.’ *2 Timóteo 3:1-5, Liafuan diak ba imi—segunda edisaun.

Mundu aat neʼe “liu daudaun”.1 João 2:17

Hahú husi tinan 1914 maizumenus iha tempu Funu Mundiál Primeiru toʼo ohin loron, buat hirak-neʼe hotu sai loos ona. Liafuan diʼak kona-ba Maromak nia Ukun mós habelar daudaun iha mundu tomak. Ami Testemuña ba Jeová mak haklaken liafuan diʼak neʼe. Ami sente kontente tebes ho ami-nia knaar neʼe, no tinan ba tinan ami fahe ona livru ho títulu Livru Haklaken—Fó sai Maromak Jeová nia Ukun.

“Tan neʼe, matan-moris nafatin bá, tanba imi la hatene loron no oras.”Mateus 25:13.

^ par. 14 Atu hetan informasaun liután, haree kapítulu 9 husi livru Tuir Loloos, Saida mak Bíblia Hanorin? Livru neʼe husi Testemuña ba Jeová, no bele download iha www.jw.org/tdt.