Skip to content

Skip to table of contents

 AJUDA BA FAMÍLIA | MORIS KABEN NIAN

Oinsá atu hametin juramentu kaben nian

Oinsá atu hametin juramentu kaben nian

TANSÁ MAK SUSAR?

Iha Ita-nia loron kazamentu, Ita halo ona juramentu ba Ita- nia kaben, dehan, Ita sei hadomi nia iha tempu diʼak no mós iha tempu susar toʼo mate mak haketak imi naʼin-rua.

Agora, tinan balu liu ona. Loron-loron Ita haksesuk malu deʼit ho Ita-nia kaben, no Ita-niamoris kaben nian la kontente. Ita sei kaer metin nafatin ba juramentu kaben nian neʼebé uluk Ita halo ona ka lae?

BUAT NEʼEBÉ ITA PRESIZA HATENE

Juramentu kaben nian mak hanesan ankor ida neʼebé halo ita-nia moris kaben nian labele namlele bá-mai

Juramentu halo ita sente seguru, laʼós hasusar ita. Ohin loron, liafuan “juramentu” halo ema barak sente taʼuk. Tuir ema balu nia hanoin, juramentu mak hanesan korrente boot ida neʼebé kesi metin sira ba desizaun ladiʼak neʼebé sira halo ona. Maibé tuir loloos, juramentu mak hanesan ankor ida neʼebé ajuda ró labele namlele bá-mai iha tasi laran neʼebé siʼak. Feen ida naran Megan hatete: “Buat diʼak ida kona-ba juramentu kaben nian mak halo haʼu fiar metin katak maski haʼu hirus malu ho haʼu-nia laʼen, maibé ami sei nunka soe malu.” * Se ita fiar metin katak ita ho ita-nia kaben sei nunka fahe malu, ida-neʼe sei book ita atu hakaʼas an rezolve problema neʼebé mosu, laʼós atu soe malu.—Haree kaixa “ Juramentu no laran-metin”.

Tan neʼe, se Ita iha problema daudauk ho Ita-nia kaben, agora mak tempu atu hametin fali juramentu kaben nian neʼebé Ita halo ona, laʼós laran-rua hodi hanoin: ‘Karik haʼu kaben ona ho ema sala.’ Maibé oinsá mak ita bele hametin fali juramentu kaben nian?

 SAIDA MAK ITA BELE HALO?

Buka-hatene Ita-nia hanoin. Liafuan juramentu “moris hamutuk toʼo mate” halo Ita sente la livre, ka halo Ita kontente tanba laran-metin ba malu? Se problema ruma mosu, Ita hanoin katak “haketak malu” mak dalan diʼak ida atu rezolve problema ka lae? Atubele laran-metin nafatin ba ita-nia kaben, ulukliu ita tenke hadiʼa ita-nia hanoin. Loos, ita tenke hafolin juramentu kaben nian nuʼudar tali neʼebé labele hakotu.—Bíblia nia matadalan: Mateus 19:6.

Hanoin fali inan-aman nia moris kaben nian. Dala ruma ita bele hanoin sala kona-ba juramentu kaben nian tanba ita haree buat neʼebé akontese ona ba ita-nia inan-aman nia moris kaben nian. Feen ida naran Lea hatete: “Bainhira haʼu sei joven, haʼu-nia inan-aman soe malu, ida-neʼe halo haʼu taʼuk atu halo juramentu kaben nian.” Maibé tuir loloos, ita bele aprende husi inan-aman nia sala no la presiza repete fali buat neʼebé sira halo, tanba ita rasik bele halaʼo ita-nia moris kaben nian ho laran-haksolok!—Bíblia nia matadalan: Galásia 6:4, 5.

Tetu didiʼak Ita-nia liafuan. Bainhira Ita ho Ita-nia kaben hanoin la kona malu no hirus malu, keta temi liafuan hanesan: “Ita soe malu deʼit ona!” ka: “Diʼak liu haʼu buka fali ema neʼebé hafolin haʼu!” Liafuan hanesan neʼe bele estraga moris kaben nian, tanba neʼe la ajuda rezolve problema, maibé halo Ita ho Ita-nia kaben hirus malu liután. Tan neʼe, diʼak liu Ita koʼalia hanesan: “Agora, oinsá mak ita naʼin-rua bele rezolve problema ida-neʼe hamutuk?”—Bíblia nia matadalan: Provérbios (Amsal) 12:18.

Hatudu laran-metin. Tau Ita-nia kaben nia foto iha Ita-nia meza iha serbisu-fatin. Koʼalia ba ema seluk kona-ba Ita-nia kaben nia hahalok diʼak. Koko telefone beibeik Ita-nia kaben bainhira Ita ho nia dook malu. Uza beibeik liafuan “ami”, “haʼu ho haʼu-nia feen (ka la’en)”. Hodi halo buat hirak-neʼe, Ita hatudu ba ema seluk no mós ba Ita-nia an rasik katak, Ita ho Ita-nia kaben mak isin ida deʼit no laran ida deʼit.

Halo tuir ezemplu diʼak. Koʼalia ho feen-la’en sira neʼebé kleur ona laran-metin ba malu iha tempu diʼak no mós tempu susar. Husu ba sira: “Oinsá mak imi laran-metin nafatin ba malu? Oinsá mak juramentu kaben nian ajuda imi-nia moris nuʼudar feen-laʼen?” Bíblia dehan: “Besi kadi besi, hanesan neʼe mós ema ida kadi ema seluk.” (Provérbios [Amsal] 27:17) Hakbesik ba feen-laʼen neʼebé halaʼo ona moris kaben nian ho haksolok no halo tuir sira-nia ezemplu diʼak.

^ par. 7 Tuir Bíblia, razaun ida deʼit neʼebé feen-laʼen bele soe malu mak se sira ida halo sala-foʼer. Haree iha pájina 10, “Bíblia nia hanorin—Adultériu”.