RAAB mak feto-aat ida neʼebé hela iha uma iha sidade Jerikó nia moru. Bíblia bolu Jerikó nuʼudar “sidade ai-palmeira nian”. (Deut 34:3) Entaun bainhira Raab hateke sai husi ninia janela, nia bele haree fatin neʼebé furak tebes. Maibé bainhira nia laʼo iha sidade laran, nia haree ema barak neʼebé taʼuk no la iha esperansa. Tanbasá sira taʼuk?

Nasaun Izraél iha ona Mota Jordaun nia sorin. Tinan 40 antes neʼe, Jeová salva ninia povu hodi halakon Faraó nia tropa iha Tasi Mean. Jeová mós ajuda ninia povu atu manán liurai Amoreu sira neʼebé kbiit boot no ukun Sihon no mós Og. Neʼe úniku tanba ema Izraél laʼós soldadu, no sira mak ema laʼo-rai deʼit. Ema Jerikó hatene katak Jeová apoia nasaun Izraél no Jeová sei halakon sira. Tempu toʼo ona ba Jeová atu fó kastigu ba ema Jerikó neʼebé halo hahalok aat. No Jeová iha razaun loos atu halo nuneʼe.

Raab hatene katak ema Jerikó mak ema aat. Nia rasik mós halaʼo moris neʼebé la morál. Maibé karik nia lakohi moris iha dalan hanesan neʼe no hakarak troka ninia moris. Nia aprende ona buat barak kona-ba Jeová nia hahalok, no neʼe la halo nia taʼuk ba Jeová maibé fó esperansa ba nia. Nia komprende katak Jeová mak Maromak neʼebé proteje no respeita ninia povu. Jeová la hanesan duni ho ema Kanaan nia maromak falsu sira. Raab hakarak hakbesik ba ema Izraél nia Maromak neʼebé naran Jeová tanba Jeová sempre hatudu hahalok justisa, no nia mós hafolin no proteje ninia povu.

Kalan ida, mane estranjeiru naʼin-rua mai iha Raab nia uma no buka fatin atu toba ba kalan ida. Raab hatene kedas katak sira mak ema Izraél nia espiaun. Liurai Jerikó mós rona ona kona-ba mane sira-neʼe. Tan neʼe, nia haruka ninia ema sira bá Raab nia uma no haruka Raab atu entrega mane sira-neʼe. Saida mak Raab sei halo? Nia sei hili atu ajuda ema aat sira iha ninia sidade ka hili atu apoia Jeová? Desizaun neʼebé nia halo sei afeta ninia moris tomak.

Ho aten-brani, Raab hili atu apoia Jeová. Raab subar espiaun sira-neʼe iha ninia uma-kakuluk no tuirmai hatete ba liurai nia ema sira katak espiaun sira-neʼe bá ona. Depois liurai nia ema sira bá, Raab saʼe ba uma-kakuluk no esplika ba espiaun sira-neʼe tanbasá nia ajuda sira. Raab hatete: “Haʼu hatene katak Jeová sei fó rai neʼe  ba imi.” Nia tau fiar duni ba Maromak Jeová! Nia mós anima sira hodi dehan katak ema Jerikó taʼuk tebes ema Izraél. No nia mós husu sira atu proteje nia no ninia família bainhira Jeová harahun sidade neʼe.

Raab salva espiaun sira-neʼe nia moris. Sira rekoñese katak Raab apoia Jeová, tan neʼe sira konkorda atu proteje Raab no ninia família. Espiaun sira haruka Raab atu la fó sai ba ema ruma kona-ba sira, kesi tali mean iha ninia janela neʼebé iha sidade nia moru, no mós la sai husi ninia uma-laran bainhira ema Izraél ataka Jerikó. Se nia halo tuir, nia no ninia família neʼebé halibur iha ninia uma sei nafatin seguru.

Raab ajuda espiaun sira-neʼe halai sai husi sidade hodi ajuda sira tun ho tali liuhusi ninia janela. Tuirmai nia halo tuir duni hodi kesi tali mean ida iha janela, rai didiʼak segredu ho aten-brani, no mós halibur ninia família iha uma-laran. Se ema iha sidade hatene buat neʼebé nia halo, nia sei mate. Bainhira Raab rona katak Jeová hapara Mota Jordaun atu ema Izraél bele hakur, karik nia sai fiar metin liután katak nia halo ona desizaun neʼebé loos. Bainhira tropa Izraél marxa haleʼu sidade neʼe ba loron hitu, karik ema iha sidade laran sente taʼuk tebetebes. Iha loron hitu bainhira amlulik sira huu dikur no tropa Izraél hakilar, Raab no ninia família hakoʼak malu iha uma-laran, no bainhira moru Jerikó monu tun, sira nafatin seguru. Parte balu husi moru Jerikó la monu tun no neʼe mak Raab nia uma.

Kuandu funu neʼe hotu ona, Josué haruka espiaun naʼin-rua neʼe atu lori sai Raab no ninia família husi uma-laran. Ikusmai, Raab adora Jeová hamutuk ho ema Izraél. Nia kaben ho mane Izraél ida no iha oan sira. Tinan atus ba atus liutiha, mane ida neʼebé aten-brani tebes moris mai husi Raab nia liña jerasaun, neʼe mak Jesus Kristu. (Mt 1:​5, 16) Jeová haraik bensaun barak ba Raab tanba nia fiar metin no aten-brani.

Lee istória neʼe iha:

• Josué 2:​1-24; 5:1; 6:​14-25

• Ebreu 11:​30, 31

• Tiago 2:​24, 25

Atu koʼalia hamutuk:

Oinsá Raab hatudu aten-brani?

 Keʼe kleʼan

1. 1. Raab nia moris iha Jerikó mak oinsá? (w13 1/11 p. 12 par. 4–p. 13 par. 1-wcgr)

   Ita-nia resposta

2. 2. Saida mak hatudu katak espiaun sira bá Raab nia uma laʼós atu halo buat neʼebé la morál? (it “Feto-aat” par. 16-wcgr)

   Ita-nia resposta

3. 3. Tanbasá Raab iha duʼut-liñu kain iha ninia uma-kakuluk? No neʼe uza atu halo saida? (it “Duʼut-liñu” par. 2-4-wcgr) Haree dezeñu A

   Ita-nia resposta

   Thanks for your interest in my photos/Moment Open via Getty Images

4. 4. Tanbasá Raab la halo sala bainhira lohi liurai nia ema sira? (w04 1/12 p. 9 par. 1-wcgr) Haree dezeñu B

   Ita-nia resposta

 Lisaun atu aplika

• Tanbasá Raab presiza hatudu aten-brani atu husik ninia moris neʼebé la morál hodi adora Jeová hamutuk ho ema Izraél? Saida mak estudante Bíblia sira bele aprende husi ninia ezemplu?

  Ita-nia resposta

• Iha dalan saida deʼit mak Ita bele banati-tuir Raab nia aten-brani?

  Ita-nia resposta

Medita kona-ba Jeová no ninia hakarak

• Saida mak haʼu bele aprende kona-ba Jeová husi istória neʼe?

  Ita-nia resposta

• Oinsá mak istória neʼe liga ho Jeová nia hakarak?

  Ita-nia resposta

• Haʼu hakarak husu pergunta saida deʼit ba Raab bainhira nia moris hiʼas?

  Ita-nia resposta