FARAÓ nia oan-feto neʼebé hakiak Moisés mak fó naran neʼe ba Moisés. Nia hili naran neʼe tanba karik signifika “Salva husi bee”, no neʼe mak dalan neʼebé nia salva bebé Moisés. Karik nia hakarak labarik neʼe sai ema neʼebé importante iha Faraó nia umakain. Ita bele fiar katak nia kontente atu haree Moisés hetan edukasaun neʼebé aas. Bíblia hatete: “Moisés simu hanorin tuir ema Ejitu nia matenek hotu.”

Kuandu Moisés sai boot, ema barak admira nia. Bíblia hatete: “Tuir loloos, nia koʼalia ho kbiit no halo hahalok boot sira.” Moisés bele deʼit tau fokus atu sai riku, iha naran-boot, no moris diʼak iha rai-Ejitu. Maibé Moisés hatene katak se nia halo nuneʼe, nia sei la iha relasaun diʼak ho Jeová. Entaun Moisés presiza deside saida mak nia sei halo ho ninia moris.

Bainhira Moisés tinan 40, ninia hahalok hatudu sai desizaun neʼebé nia foti. Bíblia dehan: “Liuhusi fiar mak Moisés lakohi ema bolu nia nuʼudar Faraó nia oan-feto nia oan bainhira nia sai boot ona. Nia hili atu hetan terus hamutuk ho Maromak nia povu duké haksolok ba tempu uitoan hodi halo sala.” Nia hatudu fiar no aten-brani no halo desizaun neʼebé loos. Maibé nia mós halo sala balu.

Moisés hakarak ajuda “ninia maluk” ema Izraél tanba ema trata aat sira. Loron ida, Moisés bá haree oinsá ema Izraél halo serbisu todan. Nia haree mane Ejitu ida, karik xefe ida, baku hela atan Izraél ida. Moisés haruka mane Ejitu neʼe atu para ka lae? Ita la hatene. Maibé Bíblia dehan katak Moisés “hateke bá-mai”, karik nia hakarak haree se ema ruma atu ajuda atan neʼe ka lae. Maibé nia la haree ema ida. Tan neʼe nia deside atu ajuda. “Nia oho tiha ema Ejitu neʼe.” Bíblia la fó sai katak Moisés hakarak atu oho mane neʼe, maibé karik tanba nia hirus, nia baku mane neʼe makaʼas no mane neʼe mate. Karik neʼe mak asidente deʼit. Maski nuneʼe, Moisés hatene katak ninia moris iha perigu laran. Tan neʼe nia subar ema Ejitu nia mate-isin iha rai-henek laran.

Iha loron tuirmai, Moisés mós bá haree ninia maluk sira. Nia haree atan Izraél naʼin-rua baku malu no nia koko atu hapara sira. Maibé atan ida dehan: “Sé mak hili ó nuʼudar ulun-naʼin no juís ba  ami? Ó mós planu atu oho haʼu hanesan ó oho ema Ejitu neʼe ka?” Moisés sai taʼuk tanba ema hatene buat neʼebé nia halo.

Moisés la espera ida-neʼe atu akontese. Bíblia hatete: “Nia hanoin katak ninia maun-alin sira sei komprende katak Maromak atu fó salvasaun ba sira liuhusi ninia liman, maibé sira la komprende ida-neʼe.” Haree hanesan Moisés fiar katak Maromak hili nia atu salva ema Izraél husi rai-Ejitu. Maibé Moisés la komprende katak tuir Jeová nia haree, tempu seidauk toʼo atu halo ninia povu sai livre. Moisés mós la espera katak ema Izraél sei trata nia hanesan neʼe. Sira la tau fiar ba Moisés tanba nia sai boot iha Faraó nia umakain, maski nia mak ema Izraél.

Moisés hanoin katak nia prontu ona atu lori Jeová nia povu sai husi rai-Ejitu, maibé tuir loloos Jeová presiza treinu liután nia. Klaru katak nia mak aten-brani, forte, no mós “koʼalia ho kbiit”. Maibé nia nafatin presiza haburas hahalok seluk neʼebé Jeová hafolin, neʼe mak laran-maus. Dala ruma Moisés la hanoin uluk antes halo buat ruma, hanesan buat neʼebé nia halo ba ema Ejitu neʼe.

Lakleur deʼit, Faraó mós rona kona-ba neʼe. Faraó la fó oportunidade ba Moisés atu esplika no nia buka atu oho Moisés. Entaun Moisés halai husi rai-Ejitu. Moisés la hatene ninia moris sei sai oinsá, nia presiza husik ninia rikusoin, moris diʼak, no pozisaun. Klaru katak nia presiza hatudu duni aten-brani atu sai husi ninia uma no halo viajen ba rai-Midian neʼebé maran no dook tebes. Nia presiza hela iha neʼebá durante tinan barak nuʼudar “ema estranjeiru”. Nia sei iha aten-brani atu troka ninia hahalok no sai ema laran-maus no haraik an tuir Jeová nia hakarak ka lae? Ita sei hetan resposta iha kapítulu tuirmai.

Lee istória neʼe iha:

• Éxodo 2:​11-22

• Apóstolu 7:​22-29

• Ebreu 11:​24-26

Atu koʼalia hamutuk:

Oinsá Moisés hatudu aten-brani durante tempu neʼe iha ninia moris?

 Keʼe kleʼan

1. 1. Arkeólogu sira hetan evidénsia saida neʼebé apoia Bíblia nia istória kona-ba ema Izraél sai atan iha rai-Ejitu? (w20.03 p. 30) Haree dezeñu A

   Ita-nia resposta

   Courtesy Brooklyn Museum, gift of Theodora Wilbour

2. 2. Saida mak Moisés aprende husi ninia inan-aman no saida mak nia aprende husi ema Ejitu? (Após 7:22; w02 15/6 p. 10 par. 2-5)

   Ita-nia resposta

3. 3. Tanbasá mak ema Ejitu sente hirus kuandu Moisés oho ema Ejitu ida no subar ninia mate-isin iha rai-henek? (it “Ejitu, ema Ejitu” par. 28-wcgr) Haree dezeñu B

   Ita-nia resposta

4. 4. Moisés halai ba Midian. Saida mak hanesan entre ema Midian no ema Izraél? (it “Midian” No. 2 par. 1-2-wcgr)

   Ita-nia resposta

 Lisaun atu aplika

• Ita bele aprende saida husi Moisés kona-ba kontrola Ita-nia hirus?

  Ita-nia resposta

• Saida mak joven sira bele aprende husi Moisés kona-ba hatudu aten-brani hodi hili planu neʼebé loos? Haree dezeñu C

  Ita-nia resposta

• Iha dalan saida deʼit mak Ita bele banati-tuir Moisés nia aten-brani husi istória neʼe?

  Ita-nia resposta

Medita kona-ba Jeová no ninia hakarak

• Saida mak haʼu bele aprende kona-ba Jeová husi istória neʼe?

  Ita-nia resposta

• Oinsá mak istória neʼe liga ho Jeová nia hakarak?

  Ita-nia resposta

• Kuandu Moisés moris hiʼas, haʼu hakarak husu pergunta saida deʼit ba nia kona-ba ninia moris iha rai-Ejitu no Midian?

  Ita-nia resposta