Skip to content

Skip to table of contents

 LISAUN 3

Oinsá atu hadiʼa problema sira

Oinsá atu hadiʼa problema sira

“Imi tenke hadomi malu tebetebes, tanba domin taka sala barak.”​—1 Pedro 4:8

Kuandu Ita ho Ita-nia kaben foin harii umakain, imi sei hasoru problema ruma. Ida-neʼe akontese tanba baibain feen-laʼen iha hanoin, sentimentu no hahalok neʼebé la hanesan. Dala ruma, kaben-naʼin sira bele kona susar neʼebé akontese derrepente deʼit, ka problema mosu tanba ema seluk.

Kuandu hasoru problema sira, ema balu hanoin atu hasees an ka husik deʼit. Maibé Bíblia fó konsellu ba ita atu buka dalan oinsá atu hadiʼa problema sira. (Mateus 5:23, 24) Hodi halo tuir matadalan sira husi Bíblia, ita bele hadiʼa problema sira-neʼe.

 1 KOʼALIA BA MALU KONA-BA PROBLEMA

BUAT NEʼEBÉ BÍBLIA HANORIN: “Iha tempu . . . atu koʼalia.” (Eclesiastes [Pengkhotbah] 3:1, 7) Ita ho Ita-nia kaben presiza fahe tempu atu koʼalia ba malu kona-ba problema. Koʼalia nakloke hodi fó sai Ita-nia hanoin no sentimentu. Sempre “koʼalia lia-loos” ba malu. (Éfeso 4:25) Maski Ita sente atu lakon pasiénsia ona, keta haksesuk malu. Hodi hatán ho kalma, neʼe sei ajuda atu la halo problema sai boot liután.—Provérbios (Amsal) 15:4; 26:20.

Maski Ita ho Ita-nia kaben hanoin la hanesan, maibé nafatin koʼalia ho laran-diʼak. Ita tenke hatudu domin no respeitu ba Ita-nia kaben. (Koloso 4:6) Hakaʼas an atu hadiʼa lalais problema no labele para atu koʼalia ba malu.—Éfeso 4:26.

BUAT NEʼEBÉ ITA BELE HALO:

  • Buka tempu diʼak ida atu koʼalia ba malu kona-ba problema

  • Kuandu Ita-nia kaben koʼalia hela, fó tempu atu rona ba nia no labele korta ninia liafuan. Hein toʼo nia koʼalia hotu mak Ita bele fó sai Ita-nia hanoin

 2 RONA MALU NO KOMPRENDE MALU

BUAT NEʼEBÉ BÍBLIA HANORIN: “Hadomi malu tebetebes . . . Buka uluk atu hatudu respeitu ba malu.” (Roma 12:10) Importante tebes atu rona ba malu didiʼak. Nuʼudar Ita rona ba Ita-nia kaben, koko atu komprende ninia hanoin hodi “hanoin malu . . . no haraik-an”. (1 Pedro 3:8; Tiago 1:19) Labele finje deʼit katak Ita rona. Se bele, kuandu Ita halo hela buat ruma, para lai hodi fó atensaun tomak ba nia. Ka se Ita la bele fó atensaun iha tempu neʼe, husu nia se bele koʼalia fali iha tempu seluk. Se Ita haree Ita-nia kaben nuʼudar kolega, laʼós inimigu, Ita sei la “sente an lalais hodi sai hirus”.—Eclesiastes (Pengkhotbah) 7:9.

BUAT NEʼEBÉ ITA BELE HALO:

  • Kuandu Ita-nia kaben koʼalia hela, nafatin rona ba nia ho laran maski Ita sente katak nia koʼalia laloos

  • La rona deʼit ba Ita-nia kaben nia liafuan, maibé haree mós ninia oin no lian hodi buka-hatene loloos saida mak nia hakarak

3 HAKAʼAS AN ATU HALO TUIR

BUAT NEʼEBÉ BÍBLIA HANORIN: “Liuhusi serbisu makaʼas naran deʼit mak bele lori rezultadu diʼak, maibé hodi koʼalia deʼit, neʼe la lori buat ida.” (Provérbios [Amsal] 14:23) Labele koʼalia deʼit kona-ba oinsá atu hadiʼa problema ruma. Imi presiza halo tuir saida mak imi naʼin-rua deside ona atu halo. Hodi halo nuneʼe, imi tenke hakaʼas an duni, maibé imi sei hetan rezultadu diʼak. (Provérbios [Amsal] 10:4) Hodi serbisu hamutuk no apoia malu, imi-nia hakaʼas-an neʼe sei hetan “kolen diʼak”.—Eclesiastes (Pengkhotbah) 4:9.

BUAT NEʼEBÉ ITA BELE HALO:

  • Halo desizaun hamutuk kona-ba saida mak Ita no Ita-nia kaben presiza halo atu hadiʼa problema ruma

  • Liutiha tempu balu, haree toʼok se imi-nia situasaun sai diʼak liu ka lae