Skip to content

Skip to table of contents

 LISAUN 1

Buka Maromak nia matadalan atu moris kaben nian kontente

Buka Maromak nia matadalan atu moris kaben nian kontente

“Horiuluk kedas Maromak kria ema no nia kria sira mane no feto.”​—Mateus 19:4

Maromak Jeová * mak Ida neʼebé halaʼo kazamentu primeiru. Bíblia hatete mai ita katak Maromak kria feto primeiru no “lori nia ba [Adão]”. Adão kontente tebes hodi dehan: “Ikusmai ida-neʼe mak ruin husi haʼu-nia ruin no isin husi haʼu-nia isin.” (Gênesis [Kejadian] 2:22, 23) Ohin loron, Jeová hakarak nafatin kaben-naʼin sira atu moris kontente.

Bainhira Ita foin kaben, karik Ita hanoin katak buat hotu sei laʼo ho diʼak. Maibé realidade mak la hanesan neʼe. Maski feen-laʼen sira neʼebé hadomi malu tebes, sira mós hasoru susar. (1 Korinto 7:28) Iha livru neʼe, ita sei haree matadalan sira husi Bíblia no kuandu ita halo tuir, ita-nia moris kaben nian no família nian bele sai kontente.—Salmo (Mazmur) 19:8-11.

 1 HALAʼO KNAAR NEʼEBÉ MAROMAK JEOVÁ FÓ BA ITA

BUAT NEʼEBÉ BÍBLIA HANORIN: Laʼen mak família nia ulun.—Éfeso 5:23.

Nuʼudar laʼen ida, Maromak Jeová hakarak Ita atu tau matan ba Ita-nia feen ho domin. (1 Pedro 3:7) Maromak kria feto atu halo mane sai kompletu no nia hakarak Ita atu hafolin no hadomi Ita-nia feen. (Gênesis [Kejadian] 2:18) Ita tenke hadomi tebes Ita-nia feen no buka uluk ninia diʼak, liu fali Ita rasik nian.—Éfeso 5:25-29.

Nuʼudar feen ida, Maromak Jeová hakarak Ita atu hatudu respeitu kleʼan ba Ita-nia laʼen no ajuda nia halaʼo ninia knaar. (1 Korinto 11:3; Éfeso 5:33) Hakaʼas an atu apoia ninia desizaun sira no serbisu hamutuk ho nia. (Koloso 3:18) Se Ita halo nuneʼe, Ita sei sai hanesan buat furak ba Ita-nia laʼen no ba Maromak Jeová.—1 Pedro 3:1-6.

BUAT NEʼEBÉ ITA BELE HALO:

  • Husu toʼok ba Ita-nia kaben: ‘Saida mak haʼu bele halo atu sai laʼen ka feen neʼebé diʼak liután?’ Rona didiʼak ba malu, no hakaʼas an atu halo tuir Ita-nia kaben nia liafuan

  • Hatudu pasiénsia, tanba baibain feen-laʼen presiza tempu atu aprende oinsá atu fó ksolok ba malu

2 HANOIN ITA-NIA KABEN NIA SENTIMENTU

BUAT NEʼEBÉ BÍBLIA HANORIN: Ita tenke buka uluk Ita-nia kaben nia diʼak. (Filipe 2:3, 4) Haree Ita-nia kaben nuʼudar buat neʼebé folin-boot, no la haluha katak Jeová hakarak ninia atan sira atu “hatudu laran-diʼak ba ema hotu”. (2 Timóteo 2:24) Bíblia hatete: “Liafuan neʼebé la hanoin uluk antes koʼalia mak hanesan sona ho surik, maibé ema matenek nia nanál mak bele kura.” Tan neʼe, kuandu Ita koʼalia tenke sukat no hili didiʼak Ita-nia liafuan sira. (Provérbios [Amsal] 12:18) Jeová nia espíritu santu sei ajuda Ita atu koʼalia ho laran-diʼak no domin.—Galásia 5:22, 23; Koloso 4:6.

BUAT NEʼEBÉ ITA BELE HALO:

  • Bainhira Ita atu koʼalia kona-ba buat ida neʼebé importante ba Ita-nia kaben, halo orasaun hodi husu Maromak atu ajuda Ita kalma nafatin no prontu atu rona ba malu

  • Hanoin didiʼak lai saida mak Ita atu koʼalia no oinsá mak Ita sei hatoʼo ida-neʼe

 3 HAKAʼAS AN ATU IHA HANOIN IDA DEʼIT

BUAT NEʼEBÉ BÍBLIA HANORIN: Bainhira mane ho feto kaben, sira sai “isin ida deʼit”. (Mateus 19:5) Maibé tanba Ita ho Ita-nia kaben mak ema neʼebé la hanesan, dala ruma hanoin mós la hanesan. Tan neʼe, imi naʼin-rua presiza aprende atu iha hanoin ida deʼit. (Filipe 2:2) Liuliu, kuandu imi halo desizaun ruma, importante tebes atu iha hanoin ida deʼit. Bíblia hatete: “Bainhira koʼalia ba malu ho didiʼak, planu sira sei hetan susesu.” (Provérbios [Amsal] 20:18) Nuneʼe, halo tuir matadalan sira husi Bíblia nuʼudar imi naʼin-rua foti desizaun sira neʼebé importante.—Provérbios (Amsal) 8:32, 33.

BUAT NEʼEBÉ ITA BELE HALO:

  • La koʼalia deʼit kona-ba buat neʼebé Ita halo loroloron, maibé koʼalia mós Ita-nia sentimentu ba Ita-nia kaben

  • Antes halo planu ruma, koʼalia uluklai ho Ita-nia kaben

^ par. 4 Jeová mak Maromak nia naran hanesan temi iha Bíblia.