Skip to content

Skip to table of contents

 KAPÍTULU 16

Halo funu hasoru Diabu no ninia babeur aat hotu

Halo funu hasoru Diabu no ninia babeur aat hotu

“Halo funu hasoru Diabu, no nia sei halai husi imi.”​—TIAGO 4:7.

1, 2. Sé deʼit mak sente kontente kuandu ema hetan batizmu?

SE ITA serbí Maromak Jeová kleur ona, Ita rona diskursu batizmu nian iha reuniaun boot sira dala barak ona. Maski nuneʼe, kuandu Ita haree sira neʼebé tuur iha oin, hamriik atu hatán ba pergunta sira hodi hatudu katak sira prontu ona atu hetan batizmu, ida-neʼe kona loos ba Ita-nia laran. Reuniaun-fatin sai nakonu ho lian husi ema neʼebé basa liman ho haksolok. Kuandu Ita haree ema foun neʼebé hili atu serbí Maromak Jeová, karik Ita-nia matan sai nakonu ho matabeen. Ita sente laran-kontente duni, loos ka lae?

2 Maski ita bele haree ema hetan batizmu dala balun deʼit iha tinan ida nia laran, anju sira haree beibeik tempu espesiál neʼe. Hanoin toʼok, oinsá mak lalehan sei “haksolok” hodi haree ema rihun ba rihun tama iha Maromak Jeová nia organizasaun semana-semana? (Lucas 15:​7, 10) Loos duni, anju sira sente haksolok hodi haree Maromak nia organizasaun sai boot daudaun!​—Ageu 2:7.

DIABU “LAʼO MAI LAʼO BÁ HANESAN LEAUN IDA”

3. Tanbasá mak Satanás laʼo mai laʼo bá “hanesan leaun ida”? Saida mak nia hakarak halo?

3 Maski nuneʼe, iha mós kriatura espíritu sira neʼebé sai hirus loos hodi haree ema hetan batizmu. Satanás no anju aat sira laran-nakali tebes kuandu sira haree ema rihun ba rihun hili atu la halo tuir tan mundu aat neʼe. Ita hatene ida-neʼe  tanba ho foti-an Satanás dehan katak la iha ema ida neʼebé serbí Maromak Jeová ho domin neʼebé loos, no la iha ema ida neʼebé bele hamriik metin nafatin se hasoru susar. (Jó 2:​4, 5) Ema ida-idak neʼebé halo desizaun atu dedika nia moris tomak ba Maromak Jeová hatudu katak Satanás mak bosok-teen. Neʼe katak, semana-semana, Satanás hetan moe boot husi ema rihun ba rihun neʼebé hetan batizmu. Tan neʼe, nia laran-nakali hodi “laʼo mai laʼo bá hanesan leaun ida, hodi buka atu han ema ruma”! (1 Pedro 5:8) “Leaun” ida-neʼe hakarak tebes atu han ita, hodi halo ita rasik estraga ita-nia relasaun ho Maromak.​—Salmo 7:1, 2; 2 Timoteo 3:12.

Kuandu ema ida dedika an ba Maromak Jeová no hetan batizmu, nia fó sasin katak Satanás mak bosok-teen

4, 5. (a) Maromak Jeová hanetik Satanás nia kbiit iha dalan rua saida? (b) Ema kristaun neʼebé loos bele fiar saida?

 4 Maski ita hasoru inimigu neʼebé siʼak tebes, ita lalika taʼuk demais. Tanbasá? Tanba Maromak Jeová hanetik “leaun” neʼe nia kbiit iha dalan rua neʼebé importante. Saida mak dalan rua neʼe? Primeiru, Maromak Jeová fó-hatene nanis katak ema kristaun loos, neʼebé Bíblia bolu “ema-lubun boot”, sei hetan salvasaun husi “terus makaʼas”. (Apokalipse 7:9, 14) Maromak nia liafuan sempre sai loos. Tan neʼe, Satanás rasik mós hatene katak nia la bele halakon Maromak nia povu nuʼudar grupu.

5 Ita bele hatene kona-ba dalan segundu liuhusi lia-loos neʼebé Maromak nia atan ida fó sai iha tempu antigu. Profeta Azarias hatete ba Liurai Asa: “Jeová sei hamutuk ho Ita se Ita hatudu katak Ita hamutuk ho nia.” (2 Crônicas 15:2; 1 Korinto 10:13) Iha Bíblia laran, iha ezemplu barak neʼebé hatudu katak Satanás nunka manán Maromak nia atan neʼebé besik nafatin ho Maromak. (Ebreu 11:4-40) Ohin loron mós ema kristaun neʼebé besik nafatin ho Maromak bele luta no manán hasoru Diabu. Loos, Maromak nia Liafuan hametin ita-nia fiar hodi dehan: “Halo funu hasoru Diabu, no nia sei halai husi imi.”​—Tiago 4:7.

“ITA LUTA HASORU . . . GRUPU ESPÍRITU NEʼEBÉ AAT”

6. Oinsá mak Satanás halo funu hasoru ema kristaun ida-idak?

6 Maski Satanás la bele manán kuandu funu hasoru Maromak nia povu nuʼudar grupu, maibé ema ida bele lakon se nia la kuidadu. Satanás hatene katak nia bele manán ita se nia halo ita-nia relasaun ho Maromak Jeová sai fraku. Oinsá mak Satanás koko atu halo nuneʼe? Hodi fó-terus makaʼas mai ita, hodi luta hasoru ita ida-idak, no hodi tau lasu oioin hasoru ita. Mai ita koʼalia kona-ba dalan tolu neʼe.

7. Tanbasá mak Satanás fó-terus ba Maromak Jeová nia povu?

7 Hodi fó-terus mai ita. Apóstolu João hatete: “Mundu tomak sei iha aat-naʼin nia ukun.” (1 Joao 5:19) Liafuan neʼe sai nuʼudar avizu ba ema kristaun loos hotu. Tanba Satanás ukun ona ema hotu neʼebé la halo tuir Maromak, nia bele koko makaʼas atu ataka sira neʼebé sees husi nia, katak Maromak Jeová  nia povu. (Miquéias 4:1; Joao 15:19; Apokalipse 12:12, 17) Nia laran-nakali tebes tanba hatene katak nia iha tempu uitoan deʼit. Tan neʼe nia hakaʼas an liután atu haterus ita no estraga ita-nia relasaun ho Maromak Jeová. Nuneʼe, ohin loron ita hasoru terus makaʼas liután, no ita presiza duni atu “iha matenek atu komprende tempu hodi hatene buat neʼebé [ita] tenke halo”.​—1 Crônicas 12:32.

8. Apóstolu Paulo hakerek katak ita presiza “luta” hasoru espíritu aat, ka anju aat. Neʼe katak saida?

8 Hodi luta hasoru ita ida-idak. Apóstolu Paulo fó avizu ba ema kristaun hodi dehan: “Ita luta hasoru . . . grupu espíritu neʼebé aat.” (Efeso 6:12, MF) Tanbasá mak Paulo uza liafuan “luta”? Liafuan luta katak ema naʼin-rua kaer malu no riba malu. Hodi uza liafuan ida-neʼe, Paulo hakarak hatete katak ita ida-idak tenke luta hasoru espíritu aat sira, katak anju aat sira. Karik ita hela iha rai neʼebé ema barak fiar ba anju aat, ka iha rai neʼebé ema ladún fiar buat hanesan neʼe. Maibé, ita labele haluha katak kuandu ita dedika an ona ba Maromak Jeová, ita hahú ona luta. Husi tempu neʼe, ita ida-idak nuʼudar ema kristaun labele sees husi luta neʼe. Tan neʼe mak Paulo presiza atu fó laran-metin ba ema kristaun iha Éfezu atu “funu toʼo rohan”!​—Efeso 6:11, 13, 14.

9. (a) Tanbasá mak Satanás no anju aat sira uza “babeur aat” oioin? (b) Tanbasá mak Satanás koko atu estraga ita-nia hanoin? Oinsá mak ita bele hasoru lasu sira-neʼe? (Haree kaixa “ Matan-moris ba satanás nia lasu!”) (c) Agora ita sei koʼalia kona-ba lasu saida?

9 Hodi tau lasu oioin. Paulo hatete ba ema kristaun atu hasoru Satanás nia “babeur aat hotu”. (Efeso 6:11) Iha eskritura neʼe apóstolu Paulo la hatete katak Diabu uza babeur ida deʼit. Diabu hamutuk ho anju aat sira uza babeur ka lasu oioin tanba sira hatene katak ema neʼebé hamriik metin no la monu iha lasu ida, bele monu fali ba lasu seluk. Tan neʼe, Diabu no ninia anju aat sira haree didiʼak ita ida-idak nia hahalok atubele hatene ita-nia fraku. Depois sira aproveita fraku neʼe atu halo ita estraga ita-nia relasaun neʼebé diʼak ho Maromak. Maibé, ita agradese ba Maromak tanba Bíblia hatudu  ho klaru kona-ba Satanás nia lasu sira. (2 Korinto 2:11) Iha livru ida-neʼe ita koʼalia ona kona-ba lasu balun, hanesan hanoin demais atu buka osan no sasán, ransu ho kolega neʼebé ladiʼak, no halo sala-foʼer. Agora, mai ita koʼalia kona-ba Satanás nia lasu ida seluk, matan-dook nia atividade.

ENVOLVE AN HO MATAN-DOOK NIA ATIVIDADE​—HALO ITA-NIA AN SAI TRAIDÓR

10. (a) Matan-dook nia atividade inklui saida deʼit? (b) Oinsá mak Maromak Jeová sente kona-ba matan-dook nia atividade? Oinsá mak Ita sente kona-ba atividade hirak-neʼe?

10 Ema neʼebé halo matan-dook nia atividade hanesan fekit ai-moruk, siʼik futuru, uza maninga, koʼalia ho matebian, sira envolve an ho anju aat. Hanesan ita aprende ona, Maromak Jeová “hakribi” atividade sira-neʼe. (Deuteronômio 18:10-12; Apokalipse 21:8) Ita mós tenke hakribi no “hadook” an husi “buat aat”, tan neʼe ita nunka hanoin atu halaʼo atividade neʼebé envolve anju aat. (Roma 12:9) Halo atividade hanesan neʼe mak aat tebes, tanba halo ita-nia an sai traidór hodi nega no husik ita-nia Aman Jeová iha lalehan!

11. Tanbasá mak Satanás sente kontente tebes kuandu ema kristaun loos ida envolve an ho matan-dook nia atividade? Esplika ho ilustrasaun.

11 Satanás hakarak tebes no hakaʼas an atu halo ita sai traidór ba Maromak Jeová, hodi halo ita mete ho matan-dook nia atividade. Kuandu nia konsege, nia sente katak nia manán buat folin-boot. Tanbasá? Hanoin toʼok ilustrasaun tuirmai neʼe: Se soldadu ida husik nia rasik nia tropa no sai traidór hodi tama fali ba tropa inimigu nian, komandante iha tropa inimigu nian sei sente kontente tebes. Karik komandante neʼe hatudu sai traidór neʼe ba ema hotu atu goza komandante neʼebé traidór neʼe husik. Hanesan neʼe mós, se ema kristaun ida komesa atu envolve an ho matan-dook nia atividade, neʼe katak ho neon nia husik Maromak Jeová no tama fali ba Satanás nia tropa. Hanoin toʼok, Satanás sente kontente tanba iha oportunidade atu goza Maromak hodi  hatudu sai traidór neʼebé husik Maromak! Ita hakarak husik Diabu atu manán ka lae? Lae duni! Ita laʼós traidór.

HAMOSU DÚVIDA HODI UZA PERGUNTA SIRA

12. Saida mak Satanás uza atu troka ita-nia hanoin kona-ba matan-dook nia atividade?

12 Se ita hakribi matan-dook nia atividade hotu, Satanás sei la konsege atu halo ita monu ba lasu neʼe. Tan neʼe, Satanás hatene katak nia tenke troka ita-nia hanoin. Oinsá? Nia buka dalan atu halo ema kristaun bilán kona-ba buat neʼebé diʼak no aat. Nia hakarak sira atu hanoin katak “buat neʼebé diʼak mak aat no buat neʼebé aat mak diʼak”. (Isaías 5:20) Atu halo nuneʼe, Satanás uza dalan neʼebé nia uza beibeik husi tempu uluk kedas​—nia uza pergunta atu hamosu dúvida iha ema nia laran.

13. Iha tempu uluk, oinsá mak Satanás uza pergunta atu hamosu dúvida?

13 Hanoin toʼok kona-ba oinsá mak Satanás uza pergunta iha tempu uluk. Iha Eden, nia husu ba Eva: “Maromak hatete katak imi labele han ai-fuan husi ai-hun hotu-hotu iha jardín laran, neʼe tebes duni ka lae?” Iha tempu Job, kuandu anju sira halibur iha lalehan, Satanás husu pergunta: “Se Job la hetan buat ida, nia taʼuk Maromak ka lae?” No mós kuandu Jesus Kristu foin komesa atu halaʼo ninia knaar iha mundu, Satanás kontra hasoru nia hodi dehan: “Ó Maromak nia Oan karik, haruka fatuk sira-neʼe nakfila ba paun.” Iha tempu neʼebá, Satanás hasaʼe dúvida kona-ba Maromak Jeová rasik nia liafuan neʼebé dehan: “Ida-neʼe mak haʼu-nia Oan doben, neʼebé fó ksolok mai haʼu.” Hanoin toʼok, Satanás barani atu hasoru Maromak rasik nia liafuan neʼe!​—Gênesis 3:1; Jó 1:9; Mateus 3:17; 4:3.

14. (a) Satanás lohi ema atu hanoin saida kona-ba matan-dook nia atividade balun? (b) Ita sei koʼalia kona-ba lasu rua saida?

14 Ohin loron, Diabu uza dalan neʼebé hanesan atu halo ema duvida katak envolve an ho matan-dook nia atividade mak buat neʼebé ladún aat. Triste katak Satanás konsege  hamosu dúvida iha fiar-naʼin balun nia neon. Sira komesa atu hanoin katak matan-dook nia atividade balun ladún aat. Karik sira husu: ‘Matan-dook nia atividade hotu perigu mai haʼu, neʼe tebes duni ka lae?’ (2 Korinto 11:3) Oinsá mak ita bele ajuda ema hanesan neʼe atu troka sira-nia hanoin? Oinsá mak ita bele tau matan ba ita-nia an atu la monu iha Satanás nia lasu ida-neʼe? Atu hetan resposta, mai ita koʼalia kona-ba lasu rua tan neʼebé Satanás uza atu lohi ema hodi sira envolve an ho anju aat sira. Lasu ida mak liuhusi atividade halimar nian, no ida seluk mak liuhusi tratamentu ba saúde.

APROVEITA BUAT NEʼEBÉ ITA GOSTA NO PRESIZA

15. (a) Iha rai riku sira, ema barak hanoin saida kona-ba matan-dook nia atividade? (b) Oinsá mak mundu nia hanoin kona ema kristaun balun nia hanoin?

15 Liuliu iha rai riku sira, ema barak hanoin katak halo matan-dook nia atividade hanesan bá siʼikdór, uza maninga, no koʼalia ho matebian, la iha perigu. Filme, livru, programa iha televizaun, no video games fó sai demóniu, ka anju aat, nia atividade sira nuʼudar hahalok halimar nian deʼit neʼebé jeitu. Ema barak gosta tebes buat sira-neʼe. Sira balun gosta filme no livru neʼebé konta kona-ba buan, uza maninga, no buat seluk hanesan neʼe, toʼo sira harii grupu hodi fahe informasaun no halo atividade ruma neʼebé tuir livru ka filme neʼe. Loos, anju aat sira konsege troka ema nia hanoin hodi sira fiar katak matan-dook nia atividade la iha perigu. Mundu nia hanoin neʼe kona ona ema kristaun balun nia hanoin ka lae? Sin, ema kristaun balun hanoin sala kona-ba matan-dook nia atividade. Oinsá? Porezemplu, ema kristaun ida haree filme ida neʼebé nakonu ho anju aat sira-nia atividade, no hatete: “Haʼu haree filme, maibé haʼu la halo tuir.” Tanbasá mak hanoin hanesan neʼe perigu?

16. Tanbasá mak iha perigu atu halo atividade halimar nian neʼebé hatudu matan-dook nia atividade?

16 Maski haree matan-dook nia atividade la hanesan ho halo atividade hirak-neʼe, ida-neʼe la dehan katak la iha  perigu atu haree. Tanbasá? Hanoin toʼok: Maromak nia Liafuan nunka hatete katak Satanás no ninia anju aat sira bele hatene kedas buat neʼebé ita hanoin. * Tan neʼe, hanesan hatete tiha ona, atu buka-hatene ita-nia hanoin no fraku, sira haree didiʼak ita-nia hahalok, neʼe inklui atividade halimar nian neʼebé ita gosta. Kuandu ema kristaun ida gosta filme no livru neʼebé konta kona-ba atividade husi matan-dook, buan no demóniu, ka anju aat sira, ka buat seluk tan neʼebé iha relasaun ho anju aat, tuir loloos, nia hatudu ninia fraku ba anju aat sira! Ida-neʼe katak nia fó fatin ba anju aat sira atu aproveita ninia fraku, no maski nia nafatin luta hasoru anju aat sira, ikusmai sira bele manán luta neʼe. Tuir loloos, ema balun neʼebé gosta atividade halimar nian kona-ba buat hirak-neʼe, ikusmai sira rasik mós envolve an ho matan-dook nia atividade.​—Galasia 6:7.

Simu Maromak Jeová nia ajuda kuandu Ita moras

17. Satanás bele aproveita ema moras nia situasaun hodi uza lasu saida?

17 Satanás la aproveita deʼit atividade halimar nian neʼebé ita gosta, maibé nia mós aproveita ita-nia presiza ba tratamentu saúde nian. Oinsá? Karik ema kristaun ida neʼebé moras sente laran-susar tebes, tanba maski buka ona dalan oioin atu kura, ninia moras nunka sai diʼak. (Marcos 5:​25, 26) Satanás no nia anju aat sira bele aproveita situasaun hanesan neʼe. Sira hatene ho klaru katak Maromak nia Liafuan fó avizu ona atu labele buka “ajuda husi sira neʼebé gosta hakanek ema seluk”. (Isaías 31:2) Atu halo ema kristaun la halo tuir avizu neʼe, karik anju aat sira intenta nia atu buka tratamentu neʼebé uza “forsa neʼebé laʼós baibain”, ka forsa husi espíritu aat​—buat neʼebé bele hakanek nia. Se ema moras neʼe monu ba lasu neʼe, ninia relasaun ho Maromak bele sai fraku. Oinsá?

18. Tratamentu saida deʼit mak ema kristaun sei la simu? Tanbasá?

 18 Maromak Jeová fó avizu ba ema Izraél neʼebé buka “forsa neʼebé laʼós baibain”, hodi dehan: “Kuandu imi loke liman, haʼu subar haʼu-nia matan husi imi. Maski imi halo orasaun beibeik, haʼu la see tilun.” (Isaías 1:13, 15) Ita lakohi duni atu halo buat saida deʼit neʼebé bele hanetik ita-nia orasaun ba Maromak Jeová, no hanetik Maromak nia ajuda ba ita​—liuliu kuandu ita moras. (Salmo 41:3) Tan neʼe, se iha dalan atu buka-hatene ka halo tratamentu ba moras neʼebé karik uza matan-dook nia atividade ruma, ema kristaun neʼebé loos tenkesér la simu. * (Mateus 6:13) Hodi sees nafatin husi buat hirak-­neʼe, nia sei simu nafatin Maromak Jeová nia ajuda.​—Haree kaixa “ Ida-neʼe tuir matan-dook nia atividade ka lae?”.

KUANDU EMA KONTA ISTÓRIA BARAK KONA-BA ANJU AAT SIRA

19. (a) Diabu lohi ona ema barak atu fiar saida kona-ba ninia forsa? (b) Ema kristaun neʼebé loos sees husi istória kona-ba saida?

19 Maski ema barak iha rai riku sira la hanoin katak Satanás iha forsa neʼebé perigu, maibé iha rai seluk ema barak taʼuk tebes kona-ba ninia forsa. lohi tiha ema  atu fiar katak ninia forsa mak boot liu. Ema barak taʼuk ba anju aat kuandu sira halaʼo atividade moris loron-loron nian, hanesan han, halo toʼos, ka toba. Ema konta istória barak kona-ba anju aat sira neʼebé iha forsa boot. Sira barak gosta tebes atu konta no rona istória hirak-neʼe. Diʼak atu ita mós habelar istória hanesan neʼe ka lae? Lae, Maromak neʼebé loos nia atan sira la halo hanesan neʼe tanba razaun importante rua.

20. Maski la ho neon, oinsá mak ema bele ajuda Satanás atu lohi ema seluk?

20 Primeiru, se ita konta istória kona-ba buat neʼebé anju aat sira halo, neʼe katak ita apoia Satanás nia hakarak. Tanbasá? Maromak nia Liafuan hatete katak Satanás bele halo duni buat barak hodi uza ninia forsa, maibé Bíblia mós fó avizu katak nia uza “sinál no hahalok oioin . . . neʼebé bele lohi” ema. (2 Tesalonika 2:9, 10) Satanás nuʼudar lohidór neʼebé matenek, hatene oinsá mak nia bele book ema neʼebé gosta  matan-dook nia atividade, hodi halo sira fiar ba buat neʼebé laloos. Karik ema neʼe fiar duni katak sira haree ka rona buat ruma, no konta fali ba ema seluk nuʼudar istória neʼebé loos. Maibé, kuandu istória neʼe konta bá-mai ba tempu kleur, ikusmai istória neʼe sai laloos ona. Se ema kristaun ida habelar istória hanesan neʼe, tuir loloos, nia halo tuir Diabu, “bosok-teen nia aman”, nia hakarak. Nia ajuda Satanás atu lohi ema seluk.​—Joao 8:44; 2 Timoteo 2:16.

21. Kuandu ita koʼalia halimar ho ita-nia maluk, ita hakarak dada sira-nia atensaun ba saida?

21 Segundu, maski iha tempu uluk ema kristaun ida iha esperiénsia ho anju aat, nia lalika koʼalia halimar hodi konta beibeik ninia istória ba maluk fiar-naʼin. Tanbasá? Tanba konsellu neʼebé dehan: “Haree ba Jesus neʼebé hatudu dalan mai ita iha fiar, no [neʼebé] halo ita-nia fiar sai diʼak loos.” (Ebreu 12:2) Loos duni, ita tenke fó atensaun ba Kristu, laʼós ba Satanás. Diʼak atu hanoin-hetan katak kuandu Jesus iha mundu, nia la koʼalia halimar ho ninia dixípulu sira hodi konta istória kona-ba anju aat, maski nia hatene barak kona-ba buat neʼebé Satanás bele halo no la bele halo. Duké halo nuneʼe, Jesus dada ema nia atensaun ba lia-foun Reinu nian. Tan neʼe, hodi banati-tuir Jesus no apóstolu sira-nia ezemplu, ita hakarak koʼalia kona-ba “Maromak nia hahalok waʼin”.​—Apostolu 2:11; Lucas 8:1; Roma 1:11, 12.

22. Oinsá mak ita bele hola parte atu halo lalehan “haksolok”?

22 Loos, Satanás uza lasu oioin, inklui mós matan-dook nia atividade, hodi koko atu halo ita estraga ita-nia relasaun ho Maromak Jeová. Maibé, se ita hakribi buat neʼebé aat no kaer metin ba buat neʼebé diʼak, ita la fó fatin ba Diabu atu manán ita. Nuneʼe, ita lakohi duni atu mete ho matan-dook nia atividade naran deʼit. (Efeso 4:27) Hanoin toʼok oinsá mak lalehan sei “haksolok” kuandu ita hamriik metin hodi “hasoru Diabu nia babeur aat hotu” toʼo tempu neʼebé Diabu la iha tan!​—Efeso 6:11.

^ par. 16 Bíblia bolu Satanás ho naran oioin hanesan Kontra-Naʼin, Bosok-Teen, Lohidór, Babeur-Naʼin. Naran sira-neʼe la hatudu katak nia iha matenek atu hatene kedas ita ema nia neon no laran. Maibé, Bíblia hatudu Maromak Jeová nuʼudar “Ida neʼebé haree [ema nia] fuan”, no Jesus nuʼudar ida neʼebé “koko ema nia fuan no hanoin sira”.​—Provérbios 17:3; Apokalipse 2:23.

^ par. 18 Atu hetan informasaun liután, haree Menara Pengawal husi 15 Dezembru 1994, iha pájina 19-​22, ho títulu, “Tes Kesehatan untuk Saudara?”, no mós Sedarlah! husi 8 Janeiru 2001, ho títulu, “Pandangan Alkitab: Memilih Perawatan Medis​—Pentingkah?” Iha mós iha lia-portugés.