Skip to content

Skip to table of contents

 KAPÍTULU 10

Moris kaben nian—Prezente husi Maromak domin nian

Moris kaben nian—Prezente husi Maromak domin nian

“Tali tolu neʼebé bobar hamutuk la bele kotu lalais.”​—ECLESIASTES 4:​12.

1, 2. (a) Kuandu ema foin kaben, dala ruma ita hanoin saida? Tanbasá? (b) Ita sei koʼalia kona-ba pergunta saida deʼit iha kapítulu ida-neʼe?

ITA gosta bá festa kazamentu ka lae? Ema barak gosta, tanba neʼe tempu neʼebé fó ksolok ba ema hotu. Ita haree noiva no noivu hatais furak tebes. Maibé buat neʼebé diʼak liu mak haree sira-nia oin kontente tebetebes! Iha loron neʼebá sira naʼin-rua kontente loos no sira hanoin kona-ba buat diʼak deʼit ba sira-nia moris iha aban-bainrua.

2 Maibé ita hatene katak ohin loron kaben-naʼin barak nia moris nakonu ho problema. Maski ita hein katak kaben-naʼin foun neʼe sei iha moris neʼebé kontente, karik dala ruma ita hanoin: ‘Sira sei kontente nuʼudar kaben-naʼin ka lae? Sira sei moris hamutuk nafatin ka lae?’ Ida-neʼe depende ba laʼen no feen atu tau fiar no halo tuir Maromak nia konsellu kona-ba moris kaben nian. (Provérbios 3:​5, 6) Sira presiza halo ida-neʼe atubele hela nafatin iha Maromak nia domin. Agora mai ita haree Bíblia nia resposta ba pergunta haat tuirmai neʼe: Tanbasá mak ema kaben? Se Ita hakarak kaben, saida mak matadalan atu hili kaben neʼebé diʼak? Oinsá mak Ita bele prepara Ita-nia an atu moris nuʼudar kaben-naʼin? Saida mak bele ajuda kaben-naʼin atu moris kontente nafatin?

TANBASÁ MAK EMA KABEN?

3. Tanbasá mak la matenek atu kaben ho razaun neʼebé ladún importante?

3 Ema barak sente katak kaben mak importante atu hetan  moris neʼebé kontente, neʼe katak se la kaben, la bele moris kontente. Ida-neʼe la loos! Jesus la kaben, no nia hatete katak moris hanesan neʼe mak buat neʼebé furak no nia fó laran-manas ba ema atu moris hanesan neʼe nafatin se sira bele. (Mateus 19:11, 12) No mós apóstolu Paulo koʼalia buat diʼak kona-ba ema neʼebé la kaben. (1 Korinto 7:32-38) Jesus no Paulo la bandu ema atu kaben; tuir loloos Bíblia hatete katak se bandu ema atu “labele kaben” ida-neʼe mak “diabu nia hanorin”. (1 Timoteo 4:1-3) Se la kaben ida-neʼe fó ema oportunidade atu fó atensaun tomak atu serbí Maromak Jeová. Tan neʼe la matenek atu kaben tan deʼit haree Ita-nia kolega kaben ona, ka razaun seluk neʼebé ladún importante.

4. Se kaben-naʼin iha moris kaben nian neʼebé diʼak, oan sira bele hetan saida?

4 Se Ita hakarak kaben, iha razaun neʼebé diʼak atu halo ida-neʼe ka lae? Sin. Moris kaben nian mak prezente ida husi ita-nia Maromak domin nian. (Gênesis 2:18) Tan neʼe, ida-neʼe bele lori bensaun no buat diʼak seluk. Porezemplu, moris kaben neʼebé diʼak mak hun ba moris família nian neʼebé kontente. Oan sira presiza iha moris família nian neʼebé nakonu ho dame. Sira mós presiza inan-aman neʼebé haboot sira ho domin, fó hanorin no dixiplina ba sira. (Salmo 127:3; Efeso 6:1-4) Maibé ita la kaben tan deʼit ita hakarak atu iha oan sira.

5, 6. (a) Tuir Eclesiastes 4:9-12, ita bele hetan bensaun saida deʼit se iha belun neʼebé besik? (b) Oinsá mak moris kaben nian bele sai hanesan tali tolu neʼebé bobar hamutuk?

5 Hanoin toʼok kona-ba eskritura ba tema husi kapítulu ida-neʼe. No mós hanoin kona-ba versíkulu balun antes versíkulu neʼe: “Naʼin-rua diʼak liu duké naʼin-ida, tanba sira iha kolen diʼak ba sira-nia serbisu makaʼas. Tanba se ida karik monu, ida seluk bele hiʼit nia. Maibé oinsá ho ema ida neʼebé monu no la iha ida seluk atu hiʼit nia? No mós, se naʼin-rua toba hamutuk sira bele sai manas, maibé oinsá ho ema ida deʼit? No se ema ida bele manán hasoru ida deʼit, naʼin-rua hamutuk bele hamriik hasoru nia. No tali tolu neʼebé bobar hamutuk la bele kotu lalais.”​—Eclesiastes 4:9-12.

 6 Liuliu versíkulu sira-neʼe koʼalia kona-ba buat diʼak neʼebé mai husi relasaun entre belun sira. No feen-laʼen iha relasaun neʼebé besik liu ida-neʼe. Entaun eskritura neʼe hatudu katak laʼen no feen bele ajuda, fó kmaan no tau matan ba malu. Iha versíkulu 12 hatudu katak tali rua neʼebé bobar hamutuk bele kotu. Maibé tali tolu neʼebé bobar hamutuk mak susar liu atu kotu. Hanesan neʼe mós, laʼen no feen nia relasaun sei sai metin liu se sira tau tan buat ida. Sira-nia moris kaben nian bele sai hanesan tali tolu neʼebé bobar hamutuk se sira naʼin-rua hanoin uluk buat neʼebé halo kontente Maromak Jeová. Relasaun neʼe sai metin liu tanba sira envolve Maromak Jeová iha sira-nia moris kaben nian.

7, 8. (a) Paulo hakerek konsellu saida ba ema kristaun neʼebé seidauk kaben no luta ho hakarak seksuál nian? (b) Bíblia hatete saida kona-ba moris kaben nian?

7 Iha kaben laran deʼit mak ema bele goza hakarak seksuál nian. Bíblia hatudu katak relasaun seksuál iha kaben laran mak buat ida neʼebé bele halo kaben-naʼin kontente. (Provérbios 5:18) Kuandu ema sei joven, neʼe mak tempu neʼebé hakarak seksuál neʼebé makaʼas mosu. Dala ruma maski ema ida liu tiha tempu joven neʼe, karik nia sei luta nafatin ho hakarak seksuál nian. Se nia la kontrola nia an, hakarak ida-neʼe bele book nia atu halo hahalok neʼebé lamoos ka laloos. Maromak haleno Paulo atu hakerek konsellu tuirmai neʼe ba ema neʼebé seidauk kaben: “Sira la bele ukun an karik, diʼak liu sira kaben . . . atu la bele lakan hanesan ahi ho hakarak aat.”​—1 Korinto 7:9; Tiago 1:15.

8 Se ema ida hakarak kaben tanba nia iha razaun ruma karik, diʼak atu nia rekoñese buat diʼak no susar neʼebé nia sei hetan se nia kaben. Tanba hanesan Paulo hatete kona-ba sira neʼebé kaben, sira “sei hetan susar iha sira-nia moris”. (1 Korinto 7:28) Kaben-naʼin sira sei hasoru problema neʼebé ema neʼebé la kaben sei nunka hasoru. Entaun, se Ita hili atu kaben, oinsá mak Ita bele hamenus problema sira no hetan bensaun barak liu iha moris kaben nian? Dalan ida mak hodi hili Ita-nia pár ho matenek.

 MATADALAN ATU HILI KABEN NEʼEBÉ DIʼAK

9, 10. (a) Paulo fó ai-knanoik saida atu fó avizu kona-ba habelun ema neʼebé laʼós fiar-naʼin? (b) Se la halo tuir Maromak nia konsellu hodi kaben ho ema neʼebé laʼós fiar-naʼin, dala barak saida mak akontese?

9 Maromak haruka Paulo atu hakerek matadalan neʼebé importante atubele hili kaben neʼebé diʼak: “Keta kesi imi an ho sira neʼebé oin-seluk, sira neʼebé fiar-laek.” (2 Korinto 6:14) Paulo nia ai-knanoik neʼe mai husi toʼos-naʼin nia moris. Se kesi hamutuk animál rua ho isin neʼebé boot la hanesan atu fila rai, sira rua sei terus. Hanesan neʼe mós, se ema neʼebé iha fiar kaben ho ema neʼebé la iha fiar, sira sei hasoru problema no susar. Se kaben-naʼin ida hakarak hela nafatin iha Maromak Jeová nia domin no nia pár la interese, sira sei hanoin la hanesan kona-ba buat neʼebé importante ba sira-nia moris no ikusmai ida-neʼe bele lori problema. Entaun Paulo fó laran-­manas ba ema kristaun atu kaben deʼit “iha Naʼi”.​—1 Korinto 7:39.

10 Dala ruma tanba ema kristaun ida neʼebé seidauk kaben sente mesak, nia hanoin katak diʼak liu atu ‘kesi nia an’ ho ema neʼebé fiar-laek. Balun deside atu la tuir Bíblia nia konsellu hodi kaben ho ema ida neʼebé la serbí Maromak Jeová. Dala barak rezultadu mak triste loos. Ema hanesan neʼe la bele koʼalia kona-ba buat neʼebé tuir nia hanoin mak importante ho nia feen ka laʼen. Antes kaben sira sente mesak duni, maibé kuandu kaben ho ema neʼebé la iha fiar, sira sente mesak liu tanba la bele fahe hanoin ba malu. Maibé ita kontente tebes atu hatene katak ema kristaun rihun ba rihun neʼebé seidauk kaben tau fiar no laran-metin ba Maromak nia konsellu. (Salmo 32:8) Maski sira hein katak loron ida sira sei kaben, sira sei la kaben toʼo hetan pár husi sira neʼebé adora Maromak Jeová.

11. Saida mak bele ajuda Ita atu hili ho matenek ema neʼebé sei sai Ita-nia kaben? (Haree mós kaixa “ Oinsá mak haʼu bele hili kaben neʼebé diʼak?”.)

11 Tuir loloos, ida-neʼe la dehan katak Maromak Jeová nia atan ida-idak bele sai nuʼudar laʼen ka feen neʼebé diʼak. Se Ita hanoin atu kaben buka ba ema ho hahalok neʼebé kona  Ita-nia laran, iha domin ba Maromak, no iha planu espirituál nian hanesan Ita-nian. Grupu atan laran-metin fó sai ona ai-han espirituál barak kona-ba neʼe. Entaun diʼak atu Ita hanoin hodi halo orasaun kona-ba konsellu neʼebé mai husi ai-han espirituál sira-neʼe no husik ida-neʼe sai matadalan ba Ita kuandu halo desizaun importante neʼe. *​—Salmo 119:105.

12. Iha rai barak ema iha lisan saida kona-ba kaben? Bíblia nia ezemplu saida mak fó matadalan kona-ba ida-neʼe?

12 Iha rai barak, ema iha lisan neʼebé inan-aman mak hili feen ka laʼen ba sira-nia oan. Ema barak iha rai sira-neʼe apoia lisan ida-neʼe tanba sira fiar katak inan-aman iha matenek no esperiénsia liu atu halo desizaun importante neʼe. Hanesan mós iha Bíblia nia tempu kaben neʼebé inan-aman arranja ona dala barak iha susesu. Ohin loron inan-aman neʼebé iha responsabilidade hanesan neʼe bele aprende husi Abraão nia ezemplu kuandu nia haruka nia atan ida atu buka feen ba nia oan Isaac. Abraão la interese ba osan no pozisaun, maibé nia hakaʼas nia atan atu buka feen ba Isaac husi ema neʼebé adora Maromak Jeová. *​—Gênesis 24:3, 67.

OINSÁ MAK ITA BELE PREPARA ITA-NIA AN ATU IHA MORIS KABEN NIAN NEʼEBÉ DIʼAK?

13-15. (a) Provérbios 24:27 fó matadalan saida atu ajuda mane-klosan neʼebé hanoin atu kaben? (b) Oinsá mak feto-klosan ida bele prepara nia an ba moris kaben nian?

13 Se Ita loloos hanoin atu kaben, diʼak atu husu ba Ita-nia an: ‘Tuir loloos, haʼu prontu atu kaben ka lae?’ Se Ita iha domin neʼebé boot, iha hakarak seksuál nian, hakarak iha  belun, ka iha oan, buat sira-neʼe la dehan katak Ita prontu atu kaben. Maibé iha buat seluk tan neʼebé importante atu hanoin se Ita hakarak sai feen ka laʼen neʼebé diʼak.

14 Mane-klosan ida neʼebé hakarak iha feen tenke hanoin didiʼak kona-ba matadalan ida-neʼe: “Prepara bá ó-nia serbisu iha uma liʼur, no prontu bá atu halo ida-neʼe iha toʼos. Depois neʼe ó tenke harii ó-nia umakain.” (Provérbios 24:27) Neʼe katak sá? Iha tempu uluk, se mane ida hakarak atu “harii [ninia] umakain”, ka kaben hodi iha família, nia presiza husu ba nia an: ‘Haʼu prontu ka lae atu tau matan ba haʼu-nia feen no oan neʼebé karik sei moris mai?’ Uluk nia tenke halo serbisu iha toʼos. Hanesan mós ohin loron, mane ida neʼebé hakarak kaben presiza prepara nia an atu simu responsabilidade nuʼudar laʼen ida. Se nia bele halo serbisu, nia iha duni responsabilidade atu halo serbisu hodi tau matan ba nia família. Laʼen ida tenke tau matan ba família nia presiza moris nian no espirituál nian, no mós hanoin kona-ba sira-nia sentimentu. Maromak nia Liafuan hatete katak se laʼen ida la halo buat sira-neʼe nia aat liu fali ema neʼebé laʼós fiar-naʼin!​—1 Timoteo 5:8.

15 Se feto-klosan ida deside atu kaben, nia mós tenke prontu atu simu responsabilidade boot nuʼudar feen. Bíblia gaba matenek no hahalok diʼak neʼebé feen presiza iha hodi nia tau matan ba nia umakain no ajuda nia laʼen. (Provérbios 31:10-​31) Dala ruma mane ka feto ansi atu kaben no la prepara nia an atu simu responsabilidade iha família laran. Tuir loloos, hodi halo hanesan neʼe nia buka ba nia an deʼit, no la hanoin kona-ba buat neʼebé nia bele fó ba nia kaben. Maibé, importante liu ba sira neʼebé hanoin atu kaben mak prepara sira-nia an atubele halo tuir Maromak nia matadalan kona-ba moris família nian.

16, 17. Atu prepara ba moris kaben nian mane no feto presiza hanoin kleʼan kona-ba matadalan saida iha Bíblia?

16 Atu prepara ba moris kaben nian mane ka feto presiza hanoin kleʼan kona-ba knaar neʼebé Maromak fó ba laʼen no feen.  Mane tenke komprende nia knaar nuʼudar ulun iha família kristaun. Knaar ida-neʼe la fó lisensa ba nia atu hanehan nia família. Maibé nia tenke banati-tuir dalan neʼebé Jesus halaʼo nia knaar nuʼudar ulun. (Efeso 5:​23) Hanesan neʼe mós feto kristaun ida presiza komprende katak nia mós iha knaar neʼebé importante nuʼudar feen. Kuandu nia kaben, nia prontu atu hakruʼuk ba nia laʼen nia “ukun-fuan” ka lae? (Roma 7:2) Nia iha ona Maromak Jeová no Kristu nia ukun-fuan nia okos. (Galasia 6:2) Ninia laʼen nia kbiit nuʼudar ulun iha umakain mak ukun-fuan ida seluk. Nia bele apoia no hakruʼuk hodi simu nia laʼen neʼebé la perfeitu nuʼudar ulun ka lae? Se nia sente katak nia la bele simu ida-neʼe, diʼak liu ba nia atu la hanoin atu kaben.

17 Liután neʼe, feen no laʼen iha presiza neʼebé espesiál. Entaun sira ida-idak tenke prontu atu fó atensaun ba nia kaben nia presiza. (Filipe 2:4) Paulo hakerek: “Mane ida-idak sei hadomi nia kaben; hadomi nia hanesan nia an rasik, no feto mós sei hamtaʼuk nia laʼen.” Maromak ajuda Paulo atu komprende katak mane sira iha presiza neʼebé espesiál. Sira presiza sente katak sira-nia feen hamtaʼuk, ka iha respeitu neʼebé kleʼan, ba sira. No mós, feto nia presiza neʼebé espesiál mak atu sente katak nia laʼen hadomi nia.​—Efeso 5:21-33.

Durante tempu namora, pár barak uza matenek hodi planu atu iha ema seluk hamutuk ho sira

18. Tanbasá mak klosan sira tenke kontrola an durante tempu namora?

18 Entaun, tempu namora nian laʼós atu buka haksolok deʼit. Neʼe mak tempu ba mane no feto atu hatene malu diʼak liu hodi sira bele halo desizaun neʼebé matenek se sira atu kaben ka lae. Neʼe mós tempu atu kontrola an! Tentasaun atu halo hahalok seksuál nian bele sai makaʼas​—tanba tuir loloos hakarak hanesan neʼe baibain deʼit. Maibé, se Ita loloos hadomi Ita-nia namoradu ka namorada, Ita sei la halo hahalok neʼebé bele estraga nia relasaun ho Maromak. (1 Tesalonika 4:6) Entaun, se Ita iha namora, kontrola Ita-nia an. Hodi halo ida-neʼe sei lori buat neʼebé diʼak ba Ita-nia moris tomak, maski Ita kaben ka la kaben ho nia.

 OINSÁ MAK ITA-NIA MORIS KABEN NIAN BELE TAHAN?

19, 20. Oinsá mak ema kristaun nia hanoin kona-ba moris kaben nian la hanesan ho ema barak nia hanoin ohin loron? Fó toʼok ilustrasaun.

19 Se kaben-naʼin hakarak sira-nia moris kaben bele tahan ba nafatin, sira presiza hanoin katak buat neʼebé sira promete tiha ona ba malu mak importante. Iha parte ikus husi istória iha livru no filme barak baibain ramata ho kazamentu, no ema barak hakarak iha moris kontente hanesan neʼe. Maibé tuir loloos moris kaben nian komesa ho kazamentu. Maromak Jeová mak halo kazamentu primeiru, no nia hakarak katak moris kaben nian tahan ba nafatin. (Gênesis 2:​24) Maibé triste tebes tanba ohin loron ema barak la halo hanesan neʼe. Iha rai balun ema hanoin katak kaben mak hanesan tali rua neʼebé kesi metin ba malu. Ilustrasaun neʼe hatudu duni oinsá ema barak hanoin kona-ba moris kaben nian. Tanbasá? Maski ema kesi tali rua atu tahan ba tempu kleur, maibé sira mós hakarak katak fasil ba sira atu kore fali.

20 Ohin loron ema barak hanoin katak moris kaben nian mak moris hamutuk ba tempu uitoan deʼit. Sira kaben lalais tanba sira hanoin katak ida-neʼe bele kumpre sira-nia presiza, maibé se problema mosu sira bele hakotu relasaun kaben nian. Maibé, hanoin-hetan dalan neʼebé Bíblia uza tali nuʼudar ilustrasaun hanesan relasaun entre kaben-naʼin sira. Porezemplu ema halo ró talin husi buat neʼebé bele tahan, la fasil atu sai dodok ka kotu maski anin no udan boot kona ró talin neʼe. Nuneʼe mós, Maromak nia hakarak mak moris kaben nian tahan ba nafatin. Hanoin-hetan Jesus nia liafuan neʼebé hatete: “Buat neʼebé Maromak tau hamutuk ema keta haketak.” (Mateus 19:6) Se Ita kaben tiha ona, Ita presiza hanoin hanesan eskritura neʼe dehan. Atu moris tuir buat neʼebé Ita promete, ida-neʼe mak buat neʼebé susar ka lae? Lae.

21. Laʼen no feen presiza mantein hanoin saida kona-ba malu? Saida mak ajuda sira atu halo ida-neʼe?

21 Laʼen no feen presiza mantein hanoin neʼebé loos ba  malu. Se sira hakaʼas an atu hanoin kona-ba hahalok diʼak no hafolin buat neʼebé sira ida halo, moris kaben nian sei sai kontente no lori kmaan ba sira. Ita bele hanoin buat diʼak kona-ba Ita-nia kaben neʼebé la perfeitu ka lae? Maromak Jeová hatene ita-nia fraku, maibé ita hakarak nia atu haree mós buat diʼak kona-ba ita. Ema ida neʼebé hakerek livru Salmos husu: “Se sala sira deʼit mak Ita haree oh, Jah, oh, Jeová, sé mak bele tahan?” (Salmo 130:3) Laʼen no feen presiza hanoin hanesan neʼe kona-ba malu no prontu atu fó perdua ba malu.​—Koloso 3:13.

22, 23. Abraão no Sara fó ezemplu diʼak saida ba kaben-naʼin sira ohin loron?

 22 Kaben-naʼin bele hetan bensaun barak no iha moris kaben nian neʼebé tahan ba tinan barak. Bíblia konta kona-ba Abraão no Sara nuʼudar ezemplu kona-ba ida-neʼe. Maibé sira-nia moris mós iha susar no problema sira. Hanoin toʼok Sara neʼebé maizumenus tinan 60, nia husik nia uma neʼebé kapás iha sidade riku naran Ur, no moris iha tenda toʼo nia mate. Maski ida-neʼe susar ba Sara, maibé nia hakruʼuk ba Abraão nuʼudar nia ulun. Sara serbisu hamutuk no ajuda Abraão hodi hakaʼas an atu halo ninia laʼen nia desizaun sira sai loos. No kuandu Sara hatudu respeitu ba Abraão, nia laʼós finje deʼit atu halo ida-neʼe. Iha Sara “nia laran”, nia bolu Abraão nia naʼi. (Gênesis 18:12; 1 Pedro 3:6) Sin, Sara nia respeitu ba Abraão mai husi Sara nia fuan-laran.

23 Maibé ida-neʼe la dehan katak Abraão no Sara sempre iha hanoin neʼebé hanesan kona-ba buat ruma. Loron ida Sara fó-hatene ninia hanoin ba Abraão no Abraão “la gosta duni”. Maibé Maromak Jeová haruka Abraão atu rona, no nia haraik an hodi rona ba nia feen, no ida-neʼe lori bensaun ba sira-nia família. (Gênesis 21:9-13) Ohin loron kaben-naʼin foun no mós sira neʼebé kaben tinan barak ona bele aprende buat barak husi Abraão no Sara nia ezemplu.

24. Moris kaben nian hanesan saida mak bele fó glória ba Maromak Jeová? Tanbasá?

24 Iha kongregasaun kristaun ohin loron, iha kaben-naʼin rihun ba rihun neʼebé kontente tebes ho sira-nia moris kaben nian. Feen sira hatudu respeitu neʼebé kleʼan ba sira-nia laʼen, no laʼen sira mós hadomi no hatudu respeitu ba sira-nia feen. No sira naʼin-rua serbisu hamutuk atu tau uluk Maromak Jeová nia hakarak no halo tuir buat sira-neʼe hotu iha sira-nia moris. Se Ita hakarak atu kaben, ami hein katak Ita uza matenek kuandu hili pár, prepara didiʼak antes kaben, no hakaʼas an atu halaʼo moris kaben nian neʼebé nakonu ho domin no dame hodi fó glória ba Maromak Jeová. Se halo hanesan neʼe Ita-nia moris kaben nian sei ajuda Ita atu hela nafatin iha Maromak nia domin.

^ par. 11 Haree livru iha lia-indonézia Rahasia Kebahagiaan Keluarga iha kapítulu 2. Livru neʼe husi Testemuña ba Jeová, no iha mós iha lia-­portugés.

^ par. 12 Iha tempu antigu fiar-naʼin no ema Izraél balun iha feen barak. Maski Maromak Jeová la arranja ida-neʼe, maibé nia husik sira atu hola feto rua ka liu. Lisan neʼe la mai husi Maromak maibé nia fó ukun-fuan balun kona-ba buat neʼebé sira bele no la bele halo. Maibé, nuʼudar ema kristaun ita hatene katak Maromak Jeová la husik tan nia atan sira atu iha feen rua ka liu.​—Mateus 19:9; 1 Timoteo 3:2.